Musambo 102:1-28
Luteko lua muntu mukalakashibue nsaa yadi mukutue lukulupilo* na afunguila Yehowa eshimba.
102 Ô Yehowa, teemesha namu luteko luande;Kudila kuande kua kukimba bukuashi kufikie kodi.
2 Tonfuamishanga namu mpala yobe nsaa yandi mu dikienga.
Ntee namu matui*Ongalule namu bukidi nsaa yankuitanyina.
3 Muanda mafuku ande akuete kushimina nka bu miishi,Na mifufua yande ayitembe nka bu kioto kia kaalo.
4 Eshimba diande dibafiki nka bu lubishi lubafumbu na lubaumu,Muanda ne mulube bua kudia biakudia biande.
5 Pa muanda wa kutompola kuande n’eyi dibukopo,Nashala nka penda mifufua.
6 Nefuana kionyi kia pelika kia mu kabaaka,Ne nka bu kipungulu ki mu kikulu.
7 Ntamono tuloNe nka bu konyi ke bupenka pa musaka wa nshibo.
8 Bakuete kunkaa kui beshikuanyi munda mua efuku dishima.
Baba abansepe bakuete kufubisha eshina diande bu mulua.
9 Muanda nkuete kudia buto bu mukate,Na bitomuanga biande mbiisangie na mpolo,
10 Muanda wa nsungu yobe na kunfiitshila kobe kua munda,We munkaamishe muiyilu, nka penda bua kunsumbula ku lupese.
11 Muwa* wande wi’nka bu muesheshe ukuete kuenda na kushimina,Na nkuete kufumba nka bu lubishi.
12 Kadi obe, we kuanka bua loso Ô Yehowa,Na nkumo* yobe ayikala kuanka bua bipungo na bipungo.
13 Mbinyibinyi, okebo na okalesha Siyona lusa,Muanda nyi nkipungo kia kumulesha lusa lobe.
Nsaa itshibibue ibalombana.
14 Muanda bafubi bobe abasankilaa mabue aaye,Mbafule mpa na lufuufi luaye.
15 Miilo ayikatshinyi eshina dia Yehowa,Na ba nfumu boso ba pa nsenga abakatshinyi ntumbo yobe.
16 Muanda Yehowa akebakuula Siyona,Na akamueka mu ntumbo yaye.
17 Akatee matui ku nteko ya baba bafudiile,Na takasumbushena nteko yabo.
18 Ino mianda ngifundibue bua bantu ba kipungo akifiki,Bua’shi bantu bashabandile kutandibua bakatumbishe Yah.
19 Muanda kuete kutala pa nsenga kukatukila muiyilu, mbalo yaye ya kishila,Kukatukila muiyilu, Yehowa kuete kumona pa nsenga.
20 Bua kupusha kuidila kua muina lukano,Na kupoososha baba babadi batshibile kibao kia lufu,
21 Bua’shi baukishe eshina dia Yehowa mu Siyona,Na ntumbo yaye mu Yelusalema,
22 Apebungu miilo na mafumu pamuneBua kufubila Yehowa.
23 Mmufudiishe bukome buande kumpala kua nsaa,Na mmupeeleshe mafuku a muwa wande.
24 Nambile’shi: “Ô Efile Mukulu ande,Tongipanga namu otshibikishe muwa wande munkatshi,Obe e na bipua bishabifudiilaa munda mua bipungo na bipungo.
25 Kalakala bodi mupangie kitako kia nsenga,N’eyilu mmudimo wa ku maasa oobe.
26 Abikashimina, anka obe okashaala kuanka;Abikaluila nka bu bilamba.
Nka bu kilamba, okebishintuula, na abikashimina.
27 Anka obe t’oshintulukaa, na bipua biobe t’abikafiki ku nfudiilo.
28 Bana ba bafubi bobe abakashala ku matui talala,Na lutandua luabo alukanyingishibua bibukopo kumpala kobe.”
