Musambo 83:1-18
Loono. Musambo wa Asafe.
83 Ô Efile Mukulu toshalanga muwumiine,Toshalanga talala kushi kuakula muanda, Ô Sha Bukome Boso.
2 Muanda tala! Beshikuanyi bobe be mu kaumbakanyi,Baba bakushikue abakitshi mianda na kuikaamisha.
3 Na budimu boso abadiila muilo oobe lukuku mu bufiefie,Abadiila bantu bobe bodi mufule lukuku.
4 Abamba’shi: “Fikayi tushimishe kisamba kiabo,Bua’shi muntu su ngumune tatentekieshanga’nyi eshina dia Isalele.”
5 Mbabungie binangu pamune,na mbakite kilombeno bua kukuluisha—
6 Tushibo tua mapema tua bena Edome na tua bena Ismaele, Moabe na bena Agera,
7 Gebale, Amone na Amaleke,Bena Filistii, pamune na bantu ba mu Tiire.
8 Bena Asiri namu babebungile kuabadi,Abo nkukuatshishena bana ba Lota. (Sela)
9 Ebakitshine mianda nka bu bibodi mukitshine Madiane,Anka bu bibodi mukitshine Sisera na Yabine ku muela* wa Kishone.
10 Babaadi bayipayibue ku Ene-dore,Abo nkufika bu bintu bia kufukisha nabio nsenga.
11 Bantu babo ba kinemo, ebafuishe nka bu Orebe na Zebe,Na bakunkushi babo nka bu Zeba na Zalemuna,
12 Abakula’shi: “Tuateyi eumbo mushale Efile Mukulu.”
13 Ô Efile Mukulu, ebekashe namu bu ka mutshi ka meba akefunyu mu kingumbongumbo,*Nka bu kasosua kabapapula kui lupunga.
14 Anka bu kaalo akashiiki mutamba,Na bu ndimi ya kaalo ayishiiki miengie.
15 Elondene nabo na kipapi kiobe ki bukopo,Webakuatshishe moo na ngumbo oobe.
16 Ebapuute buufu ku mapala aabo,Bua’shi bamone bia kukimba eshina diobe, Ô Yehowa.
17 Bakuatshikie buufu na bekale na moo bua loso,Bayishibue milongo na bashimine,
18 Bantu baukie’shi obe, e na eshina bu Yehowa,We bupenka bobe Sha Kuiyilu Kula kunundu kua nsenga ishima.
