Musambo 33:1-22
33 Elayi misaase ya muloo pa muanda wa Yehowa anue bantu balulame.
Mbilombanyine bua’shi bantu balulame bamutumbishe.
2 Tumbulayi Yehowa na luseese;Numuyimbile misambo* bua kumutumbisha na kiombuanga kia mioshi ekumi.
3 Muyimbileyi musambo upia;Nuyimbe kalolo na biombuanga bia mioshi pamune na misaase ya muloo.
4 Muanda eyi dia Yehowa ndilulame,Na kioso kiakitshi nkia kukulupila.
5 Mmufule kululama na kutshiba kua biimu kalolo.
Nsenga ngiule na kifulo kia lulamato kia Yehowa.
6 Kukiila ku eyi dia Yehowa, eyilu dibaadi dipangibue,Kukiila ku kikudi* kia mukanua muaye, bioso bi muiyilu bibaadi bipangibue.*
7 Abungu mema a mu kalunga nka bu mumba,Atuulu mbundambunda ya mema atombokie mu mbalo ya kulamina bintu.
8 Nsenga yoso ishima itshiine Yehowa.
Bantu boso ba mu nsenga ayitushaa bintu bekale na moo ukata buaye.
9 Muanda bakuile, na abio nkuikala kuanka,Batumine eyi, na abio nkuimana.
10 Yehowa mmuluishe nkuku ya bisamba,Mmutueshakashe mpango* ya miilo.
11 Anka bitshibilo bia Yehowa abishala kuanka bua loso;Binangu bia muishimba diaye mbia bipungo na bipungo.
12 Muilo wi na Yehowa bu Efile Mukulu ao ngua muloo,Bantu baadi musangule bu baye’ye nabene.
13 Yehowa atala kukatukila muiyilu,Amono bana ba bantu boso.
14 Kukatukila mu mbalo yaye yadi mushale,Atala bantu bashale pa nsenga.
15 Nnaye alumbuula mashimba a bantu boso,Ataluula midimo yabo yoso.
16 Takui nfumu apaashibuaa pa muanda wa kiluilo kiaye kikata,Muntu sha bukome, t’apaashibuaa pa muanda wa bukome buaye buibungi.
17 Kukulupila nfualasa bua kupaashibua* nkuidimba,Bukome buaye buibungi tabushinkamisha kupaashibua.
18 Talayi! Meso a Yehowa akuete kutala baba abamutshinyi,Baba abatengiela kifulo kiaye kia lulamato.
19 Bua kuibapaasha ku lufu,Na kuibalama na muwa mu kipungo kia nsala.
20 Tui batengiele Yehowa.
Aye mmuikale mukuashi eetu na ngabo eetu.
21 Mashimba eetu aapetela muloo kuadi,Muanda tui bakulupile muishina diaye dia kishila.
22 Kifulo kiobe kia lulamato kikale namu kuatudi, Ô Yehowa,Patutungunuka na kukutengiela.
