Musambo 22:1-31
Kui mukunkushi. Muyile “Ntengu a pa nkielo.”* Musambo wa Davide.
22 Efile Mukulu ande, Efile Mukulu ande, buakinyi bonsumbushena?
Buakinyi t’ofiki mu kumpaasha,Buakinyi t’opusha kudila kuande kua kinyongua?
2 Efile Mukulu ande, nkuete kutungunuka na kukuitamina efuku dioso, anka tokuete kungaluula,Na bufuku bushima nkuete kutungunuka na kukuitamina kushi kuwumiina.
3 Kadi obe we a kishila,We muifunyishue na ntumbo ya Isalele.
4 Bamashetu babaadi bakulupile modi,Babaadi bakukulupile, obe nkutungunuka na kuibapaasha.
5 Babaadi bedile kodi, na babaadi bapaashibue,Babaadi bakukulupile, na tobodi muibakuatshishe buufu.
6 Anka ami ne musanda, ntshi muntu nya,Abansepe na kunsabuula kui bantu.
7 Boso abantala abansepe,Abamminyikila milomo na abapuku mitue na kapeesha koso pa kuakula’shi:
8 “Aye ekeele mukulupile mui Yehowa, binobino Amupaashengie tutale!
Efile Mukulu amupaashengie, bu biadi mumufule ngofu!”
9 Obe nyi baadi muntuushe muifu dia nyinami,Bokitshine bia’shi nepushe mu kukaluilua panaadi ku mabeele a nyinami.
10 Ne mutuudibue mu maasa mobe, kubanga pa kutandibua kuande,We muikale Efile Mukulu ande, kubanga muifu dia nyinami.
11 Toshalanga kula nami, muanda makienga e pepi,Na takui ungi muntu a kunkuasha.
12 Ngombe ilume yana ibungi nginyifunyishe,Ngombe ilume ibukome ya mu Bashane ngingiele mu kifunda.
13 Mbanfunguile mukanua muabo bikata,Be nka bu ntambue akungula, asaasula nyema aadi mukuate tupese tupese.
14 Ne mupongoolue nka bu mema,Mifufua yande yoso ngilamunukie.
Eshimba diande dibafiki nka bu kisa kia buuki,Dikuete kusunguluka munda muande.
15 Bukome buande bubaumu nka bu kipese kia ema,Na ludimi luande lubalamata mu kilakalaka,We mungishe mpa na mu lufufi lua mashama.
16 Muanda mbua nginyifunyisheAbefubuila kuandi nka bu kisaka kia bantomboshi,Mbandamate ku maasa na ku ngua nka bu ntambue.
17 Ne mulombene kubadika mifufua yande yoso,Baba bantu bakuete kuntala na kumbekiela.
18 Mbeabishene bilamba biande munkatshi muabo,Na mbatee bubale pabitale kilamba kiande.
19 Anka obe, Ô Yehowa, toshalanga kula n’ami.
Nnobe bukome buande, fika namu bukidi onkuashe.
20 Mpaashe namu ku lupete lua ngoshi,Opaashe muwa wande wi na muulo ku ngala ya mbua;
21 Mpaashe namu ku mbanga ya ntambue, na ku nsengua ya ngombe a mu kisuku;Ngalule namu na ompaashe.
22 Nankaukisha bakuetu eshina diobe;Nankakutumbisha munkatshi mua kakongie.
23 Anue abatshinyi Yehowa musamuneyi!
Anue bana boso ba Yakobo, mutumbisheyi!
Mutshineyi, anue bana boso ba Isalele.
24 Muanda aye ta musabuule sunga kusepa makienga a yawa mupombeshibue,Ta mumufuamishe mpala yaye.
Pabaadi yawa mupombeshibue muidile kuadi bua kukimba bukuashi, baadi mumuteemeshe.
25 Nakakutumbisha mu kakongie kakata,Nakakumbasha mitshipo yande kumpala kua baba abakutshinyi.
26 Baba beyishe abakadi bekute,Baba abakimbi Yehowa abakamutumbisha,Ikalayi na muwa* bua loso na muloo.*
27 Bantu boso be ku nfudiilo kua nsenga abakatentekiesha Yehowa na batadiile kuadi.
Bifuko bioso bia miilo abikele mapala paashi kumpala kuaye.
28 Muanda bufumu mbua Yehowa,Akunkusha bisamba.
29 Bampeta boso ba pa nsenga abakadi na abakele mapala paashi,Bano boso abalukiila ku lufufi abakakunama kumpala kuaye,Takui su ngumune a kuabadi akapaasha muwa* wabo.
30 Bana babo abakamufubila,Abakalungula kipungo kia bantu akifiki mianda ya Yehowa.
31 Abakafiki na bakule pabitale kululama kuaye.
Abakalungula bana babakatanda mianda yadi mukite.
