Musambo 144:1-15
Wa Davide.
144 Yehowa, Lubuebue luande, atumbishibue,Aye alongieshaa maasa ande bia kulua ngoshi,Na minue yande bia kulua ngoshi.
2 Mmuikale kifulo kiande kia lulamato na kifuamino kiande,Mbalo yande ya kufuamina na mupaashi ande,Nyi ngabo ande na Muadi nyi muandi mufuamine,Aye nyi atuulaa miilo ku matalua ande.
3 Ô Yehowa, a muntu namu nnanyi bua’shi omupasukile,Muana a muntu afuiyaa nnanyi bua’shi otume binangu biobe kuadi?
4 Muntu mmuifuanene na lupunga* lua bisumanga,Mafuku aaye enka bu muesheshe aukidi.
5 Ô Yehowa, nyekamisha eyilu diobe na oyikie,Kuma miengie na ituushe miishi.
6 Elesha mipenyo yobe na opalakashe beshikuanyi,Asa mikietue yobe webatueshe mu kafutakanyi.
7 Olola* namu maasa oobe kukatukila muiyilu,Nkaluile na ompaashe ku mema e na mbundambunda ayikupila,Kuiyasa dia bantu benyi,
8 Ba sha mukanua amuakula madimi,Na abebuesha eyasa diabo dibalume bua kuitshipa bua mianda ya madimi.*
9 Ô Efile Mukulu, nakakuyimbila musambo upia.
Nakayimbi bua kukutumbisha* na kiombuanga kia mioshi ekumi,
10 Kui yawa apeyaa ba nfumu kutshimuna,Aye apaashaa mufubi aaye Davide ku lupete lua ngoshi aluipayishena.
11 Nkaluile na ompaashe namu kuiyasa dia bantu benyi,Ba sha mukanua amuakula madimi,Na abebuesha eyasa diabo dibalume bua kuitshipa bua mianda ya madimi.
12 Biabia bana betu balume abakekala nka bu mitshi yana ayikulu bukidibukidi,Bana betu bakashi namu abekala bu bibayi bia mu mapaka a ebalasa biabadi balengieshe.
13 Mashibo eetu a kulamina bintu aakaulu na bintu bia mishindo yoso.
Mbushi na mikooko yetu abikefuimena mu mapia eetu misango binunu, na binunu makumi.
14 Ngombe yetu i na mayimi tayikakiengie sunga kupongola mayimi.
Takuikala kudila kua makienga mu ma mbalo eetu aebungilaa bantu bebungi.
15 Ba sha muloo mbantu abapete ino miabi yoso!
Ba sha muloo mbantu be na Yehowa bu Efile Mukulu aabo!
