Musambo 74:1-23
Masikile.* Musambo wa Asafe.
74 Ô Efile Mukulu, buakinyi buetusumbushena bua loso?
Buakinyi nsungu yobe ayitembela mikooko ya mu kipia kiobe kia kudishila nyema?
2 Tentekiesha muilo* oobe ubodi mupete kubanga kala,Kisamba kiobe kibodi mukuule bu bupianyi bobe.
Tentekiesha Muengie wa Siyona, kuboodi mushale.
3 Ludika ngua yobe mu mbalo iluishibue munda mua mafuku ebungi.
Muishikuanyi mmuluishe bintu bioso mu mbalo ya kishila.
4 Beshikuanyi bobe abele misaase ya kutshimuna mu ntempelo* oobe.
Kuakua mbashimikie mabendela aabo bu bitunduilo.
5 Babaadi nka bu bantu batombuele mutamba ushitakane tubengiele.
6 Babasooso bintu bioso biabadi basee mu ntempelo na tubengiele na biamo.
7 Babeele mbalo yobe ya kishila kaalo.
Babasabuula tabernakele e na eshina diobe, babamuponesha mu nsenga.
8 Abo na bekulu babo babakula mu mashimba aabo’shi:
“Ma mbalo oso abalanguilaa Efile Mukulu mu dino eumbo abitungu ediibue kaalo.”
9 Takui kitunduilo su nkimune kiatudia kumona.
Takui dingi mutemuki su ngumune,Na takui muntu su ngumune a kuatudi auku’shi bino abikayisha mpa na ku nsaa kinyi.
10 Ô Efile Mukulu, muishikuanyi atungunuka na kukusabuula mpa na ku nsaa kinyi?
Muishikuanyi abepuula eshina diobe bua loso su?
11 Buakinyi okanda mboko yobe, mboko yobe ibalume?
Eyituushe mu kiadi kiobe na webafudiishe.
12 Kadi Efile Mukulu nyi Nfumu ande kubanga kala,Aye akitaa bikitshino bia kupaasha pa nsenga.
13 Bodi mutshibuule kalunga ka mema ku bukome bobe.
Obe nkufingakasha mitue ya binyema bikata bia mu kalunga ka mema.
14 Bodi mufingakashe mitue ya Leviatane,Obe nkuiyipa bantu bu biakudia, baba bashale mu tubaaka.
15 Otuushaa nsulo ya mema na tusulo atualala,We mukamishe misulo ishayikamaa.
16 Kanya nkobe na bufuku mbobe,We mukite etaata* na nguba.
17 Bodi mutuule mikalo ya nsenga,We mukite kipungo kia kibobo na kipungo kia mashika.
18 Tentekiesha mulomo wa muishikuanyi, Ô Yehowa,Bi muilo ushi na binangu ausabuula eshina diobe.
19 Tolekielanga muwa wa ekutshi diobe kui nyema a bukielo.
Tolubanga bua loso muwa wa muilo oobe wi mu malua.
20 Tentekiesha kilombeno,Muanda ma mbalo e mufito a pa nsenga abaulu na ba ntomboshi.
21 Yawa mupombeshibue takuatshikanga buufu,Yawa mushadile na mulanda batumbishe eshina diobe.
22 Ebuee Ô Efile Mukulu na osambe kilumbu kiobe.
Tentekiesha biabakukaa kui muntu shi na binangu munda mua efuku dishima.
23 Tolubanga namu abiakula beshikuanyi bobe.
Tuleo tua baba abakutombokiela atutungunuka na kukaamina mafuku oso.
