Musambo 69:1-36
Kui mukunkushi. Muyile “Bilongo bia Lise.” Musambo wa Davide.
69 Mpaashe namu Ô Efile Mukulu, muanda mema aatuulu muwa wande mu masaku.
2 Ne mushiikame mu matekie e bula, mushi nsenga i bukopo.
Ne mutuele muushi mua mema,Mema e mpumo abangalasha.
3 Nakooko pa muanda wa kuela misaase.
Mu mudibu mubangumu.
Meso ande abakooko pankuete kutengiela Efile Mukulu ande.
4 Baba banshikue kushi muanda,Be bungi kukila nyene ya ku mutue wande.
Baba abakimbi kungipaa,Beshikuanyi bande babafuimi.
Mbankitshishe bua kualusha bintu bianshii muibe.
5 Ô Efile Mukulu, ouku kubulakana kuande,Na kupiila kuande tankufuame ku meso kobe.
6 Baba bakulupile modi tabakuatshikanga namu buufu pa muanda wande,Ô Muanana Mukile Bukata Yehowa a biluilo.
Baba abakukimbi tabayishibuanga namu milongo pa muanda wande,Ô Efile Mukulu a Isalele.
7 Nkuete kukienga pa kukayibua bua muanda oobe.
Kuishibua milongo nkubuikile mpala yande.
8 Nafiki bu muenyi kui bakuetu balume,Na bu muntu abashabauku kui bana ba nyinami.
9 Katshintshi bua nshibo yobe akakatembe bu kaalo muishimba diande.
Kukayibua kua baba abakukaa kubapoona pandi’mi.
10 Panaadi muiyishe bua kuishidika,*Babaadi bansabuule.
11 Panaadi muikashe mpaya bu kilamba kiande,Naadi mufikie bu kintu kia kusenga* kuabadi.
12 Ne mu miisambo ya baba bashale ku kiibi kia kibundi,Na bankodi ba maalua abangiele mu misambo yabo.
13 Kadi luteko luande lufikie namu kodiMu nsaa ilombane, Ô Yehowa.
Mu kifulo kiobe kikata kia lulamato Ô Efile Mukulu,Ngaluule namu na bikitshino biobe bia kipandilo.
14 Mpaashe namu, ontushe mu matekie.
Tondekielanga nshiikame.
Mpaashe namu kui baba banshikue,Na ku mema e bula.
15 Tolekielanga namu mema e mpumo antuale,Sunga kuleka mema e bula bua’shi ammine,Totadilanga namu buina bui bula bunfungile mukanua.
16 Ngaluule namu Ô Yehowa, muanda kifulo kiobe kia lulamato ki buwa.
Muyile lusa lobe lukata, ealuule namu otale kuandi.
17 Tofuamishanga namu mufubi oobe mpala yobe.
Ngaluule namu bukidi muanda ne mu kinyongua.
18 Efubuile namu pepi nami na ompaashe.
Nkuule namu pa muanda wa beshikuanyi bande.
19 Ouku mulomo wabankaa, biabansabuula na biabangisha milongo.
Omono beshikuanyi bande boso.
20 Mulomo wabankaa ubantapa kuishimba, na elonda tadiwumu.*
Nakulupilanga mayi a kalolo, kadi takui su ndimune,Nakulupilanga’shi abanyingisha, kadi ntshi mupete muntu su ngumune.
21 Pamutue pa bidiibua babampa mulungu,*Na bua kupua nyota yande babampa vinegre bua kutoma.
22 Mesa aabo afikie bu bukondia kuabadi,Na bupeta buabo bufikie bu muteo.
23 Mu meso muabo muibeele mufito bua’shi tabamonanga,Ebatelemune* bifuka biabo nsaa yoso.
24 Ebapongoluele nsungu yobe,Na nsungu yobe ibukopo ibatembele kaalo.
25 Mu kishalelo muabo mushale bisumanga.
Takuikalanga muntu su ngumune mu tushibo tuabo tua mapema.
26 Muanda bakuete kulondalonda yawa oodi mukupile,Na bakuete kutungunuka na kuakula pabitale makienga a baba bodi mutape.
27 Ebafuimiishe kuitopeka kuabo,Na tuebamonanga bu bantu balulame.
28 Shima mashina aabo mu mukanda wa bantu be na muwa,*Na tabafundibuanga mashina munkatshi mua bantu balulame.
29 Kadi ami ne mukalakashue na ne mu dikienga.
Bukome bobe abupaashaa bunkaluile namu Ô Efile Mukulu.
30 Nakayimbi bua kutumbisha eshina dia Efile Mukulu,Na nakamusaamuna na mulambu wa lutumbu.
31 Bino abikasankisha Yehowa kukila ngombe mulume,Kukila muana a ngombe mulume e na nsengua na bikona.*
32 Bantu ba sha kuiyisha abakebimono na basankie.
Anue abakimbi Efile Mukulu, mashimba eenu apetuule dingi bukome.
33 Muanda Yehowa ateemeshaa balanda,Na t’akabepuula bantu baye babadi bakuate.
34 Eyilu na nsenga bimutumbishe,Mpa na tulunga tua mema na bioso abitambakana muanka.
35 Muanda Efile Mukulu akapaasha Siyona,Na akebakulula bibundi bia Yunda,Abakemushala na kupiana ino nsenga.
36 Bekulu ba bafubi baye abakeyipiana,Na baba bafule eshina diaye abakemushala.
