Musambo 68:1-35
Kui mukunkushi. Musambo wa Davide. Loono.
68 Efile Mukulu ebuee, beshikuanyi baye boso bapalakane,Na baba boso bamushikue basuukie kumpala kuaye.
2 Ebapalakashe nka bu biabapalakashaa miishi kui lupunga;Anka bu abisungulukaa kisa kia buuki mu kaalo,Biabia bantu bebubi bashimine kumpala kua Efile Mukulu.
3 Kadi bantu balulame basankie;Bekale na muloo wibungi kumpala kua Efile Mukulu,Baule ndaa na muloo.
4 Imbilayi Efile Mukulu, imbayi ngono bua kutumbisha eshina diaye.
Imbilayi Yawa akidila mu kabaaka.*
Yah nyi eshina diaye! Sankayi kumpala kuaye.
5 Efile Mukulu nshaye na bana ba nshiye, na akaluilaa bakashi kileleKukatukila mu mbalo yaye ya kishila yadi mushale.
6 Efile Mukulu apeyaa baba be bupenka mbalo ya kushala,Apososhaa bantu be mu lukano na ebapa bupeta.
Anka ba sha mutue wibukopo* abakashala mu mbalo yume.
7 Ô Efile Mukulu, pobodi mukunkushe muilo oobe,Pobodi mutambukile mu kabaaka, (Sela)
8 Nsenga ibaadi itshinkietshinkie,Eyilu nkupongoola mpeshi pa muanda wa Efile Mukulu;Uno Sinayi nkutshinkatshinka pa muanda wa Efile Mukulu, Efile Mukulu a Isalele.
9 Bodi munokieshe mpeshi ebungi, Ô Efile Mukulu;Bodi mupe dingi muilo* oobe ubaadi ukookie bukome.
10 Babaadi bashale mu kishalelo kiobe kia tushibo tua mapema;Mu kalolo kobe, bodi mulombeshe balanda nkalo yabo, Ô Efile Mukulu.
11 Yehowa atumu eyi;Bana bakashi bakuete kulungula mukandu wibuwa nyi kiluilo kikata.
12 Ba nfumu ba biluilo abasuuku, oolo abasuuku!
Muana mukashi mushale ku nshibo e na kiaye kipindi mu bintu biabadi bapaule.
13 Sunga biekala’shi nubaadi balale munkatshi mua tuulo tua mu kishalelo,Anukapete ekutshi di na mbaba yabadi balamikie kiamo kia arja,Na masala a ôlo mukile buwa.*
14 Pabaadi Sha Bukome Boso mupalakashe ba nfumu ba diadia eumbo,Neje banokiele mu Zalmone.
15 Muengie wa Bashane nyi muengie wa Efile Mukulu,Muengie wa Bashane mmuengie ula.
16 Buakinyi anutala na luabi anue miengie ila,Ku muengie ubaadi Efile Mukulu musangule bu kishalelo kiaye?
Mbinyibinyi, Yehowa akekushala bua loso.
17 Matempu a ngoshi a Efile Mukulu e binunu makumi, binunu na binunu,Yehowa mmukatukie ku Sinayi afika ku mbalo ya kishila.
18 Bokaamiine muiyilu,Obe nkuenda na ba mpika;Obe nkuata bia buntu bikale bantu,Oolo, mpa na baba ba sha mutue wibukopo, bua kushala munkatshi muabo, Ô Yah Efile Mukulu.
19 Yehowa atumbishibue, aye etusemuinaa bushito buetu efuku dioso,Efile Mukulu a binyibinyi a kipandilo kietu. (Sela)
20 Efile Mukulu a binyibinyi mmuikale Efile Mukulu, uno etupaasha,Na Yehowa Muanana Mukile Bukata apaashaa ku lufu.
21 Oolo, Efile Mukulu akafingakasha mitue ya beshikuanyi baye,Kabaala ka yawa oso atungunuka mu bubi buaye.
22 Yehowa mmuambe’shi: “Nakebalusha kukatukila mu Bashane;Nakebalusha kukatukila muushi mua kalunga ka mema,
23 Bua’shi ngua yobe ifunte mu mase,Na ludimi lua mbua yobe lulambe mase a beshikuanyi.”
24 Abamono milongo ya bantu bobe, Ô Efile Mukulu,Milongo ya bantu ba Efile Mukulu ande, Nfumu ande, mu mbalo ya kishila.
25 Ba tuyimba be kumpala, ba ngomba abombo biombuanga bia mioshi abebalondo kumongo.
Munkatshi muabo mui ba nsonguakashi abombo matumba.
26 Tumbishayi Efile Mukulu mu bisaka* bia bantu bebungie.
Tumbishayi Yehowa, anue abakatukila ku Nsulo ya Isalele.
27 Kuakua, Benyamine mukinga ku boso akebatuulu ku matalua aaye,Dingi bakunkushi ba Yunda na kisaka kiabo kia bantu abele tuleo,Bakunkushi ba Zabulone na bakunkushi ba Neftali abebatuulu na’bo namu ku matalua aabo.
28 Efile Mukulu oobe baadi mutume eyi’shi okekala na bukome.
Biabia lesha bukome bobe Ô Efile Mukulu, obe etukaluilaa.
29 Pa muanda wa ntempelo oobe e ku Yelusalema,Ba nfumu abakakutuadila bia buntu.
30 Saashila nyema ya mu kisuku,Kibumbu kia ngombe na tuana tuayo,Mpa’nka na apakakuinamina bantu, batuale* kiamo kia arja.
Kadi apalakasha bantu bakumiine ngoshi.
31 Abakafiki* na bintu bia bronze kukatukila ku Ejipitu.
Kushe akafiki bukidibukidi bua kulambula Efile Mukulu bia buntu.
32 Ô mafumu a pa nsenga, imbilayi Efile Mukulu,Imbayi* bua kutumbisha Yehowa, (Sela)
33 Yawa atambukila muiyilu, eyilu dia kalakala.
Talayi! Akungula na eyi diaye, eyi diaye di na bukome.
34 Shingulayi bi bukome bu’Efile Mukulu.
E na matalua kui Isalele,Na bukome buaye bui mu makumbi.
35 Efile Mukulu atshinyisha mu mbalo yaye ikata ya kishila.
Nyi Efile Mukulu a Isalele,Uno apaa bantu bukome na matalua.
Tumbishayi Efile Mukulu.
