Musambo 59:1-17
Kui mukunkushi, muyile “Tonfuishilanga kabutu.” Miktame* ya Davide. Pabaadi Saule mutume bantu buabadia kukalama nshibo ya Davide bua’shi bamuipee.
59 Mpaashe namu kui beshikuanyi bande, Ô Efile Mukulu.
Nkaluile namu kui baba abangibuela bua kulua nami.
2 Nkaluile namu kui baba abakitshi mianda ibubi,Na ompaashe kui bantu be na buntomboshi.*
3 Talanga! Mbantengiele bua kunkitshina bi bubi.
Bantu be bukome abantuuku ngoshi,Kushi pa muanda wa’shi ne mutombokie sunga kukita muluisho, Ô Yehowa!
4 Sunga biekala’shi ntshi mukite muanda wibubi, be mu lubilo na abelumbuula bua kuntuuka ngoshi.
Ebuee namu pankuitamina, na omone.
5 Muanda obe, Ô Yehowa Efile Mukulu a biluilo, we Efile Mukulu a Isalele.
Buuka na otuule binangu biobe kui miilo yoso.
Tofuilanga bano bantu bebubi na ba sha madimi lusa.
6 Abalukiila ku kiolua kioso,Ababuluka bu mbua na abefunyisha kibundi.
7 Tala mianda ayipongoloka mukanua muabo,Milomo yabo inka bu mpete ya ngoshi,Muanda abakula’shi: “Nnanyi kuete kuteemesha?”
8 Anka obe, Ô Yehowa, okebasepe,Okasengie miilo yoso.
9 Ô Bukome buande, nashala nka mutale kodi,Muanda Efile Mukulu nyi muikale mbalo yande inyingishibue ya kufuamina.
10 Efile Mukulu andeshaa kifulo kia lulamato afiki mu kunkuasha;Efile Mukulu akakitshi bia’shi ntale na muloo oso kupona kua beshikuanyi bande.
11 Tuebayipanga bua’shi tala muilo wande waluba.
Ku bukome bobe, ebaumbakashe.
Ebaponeshe, Ô Yehowa, obe ngabo eetu.
12 Pa muanda wa miluisho ya mukanua muabo na mayi a ku milomo yabo,Bakuatshibue mu kateo ka kuitatula kuabo,Pa muanda wa madimi na milua y’abele.
13 Ebashimishe mu nsungu yobe,Ebashimishe bua’shi tabekalanga dingi kuanka,Kita bia’shi baukie’shi Efile Mukulu nyi kuete kukunkusha mu Yakobo mpa na ku nfudiilo kua nsenga. (Sela)
14 Ebatadiile balukiile ku kiolua,Ebatadiile babulukie bu mbua na befunye kibundi.
15 Baumbakane bua kukimba kantu ka kudia,Tuebatadiilanga’shi bayikute sunga kupeta mbalo yabadia kufuamina.
16 Kadi buande’mi, nakayimbi pabitale bukome bobe,Ku namashika nakaukisha na muloo oso pabitale kifulo kiobe kia lulamato.
Muanda we mbalo yande inyingishibue ya kufuamina,Na mbalo yande ya kusuukila mu nsaa ya makienga.
17 Ô Bukome buande, nakayimbi bua kukutumbisha,Muanda Efile Mukulu nyi muikale mbalo yande inyingishibue ya kufuamina, Efile Mukulu andeshaa kifulo kia lulamato.
