Musambo 31:1-24
Kui mukunkushi. Musambo wa Davide.
31 Ô Yehowa, ne mufuamine modi,Tonkuatshishanga buufu.
Mpaashe namu pa muanda wa kululama kobe.
2 Ntee namu matui.*
Ofikie bukidibukidi mu kumpaasha.
Wekale kuandi bu muengie wa kufuamina.
Mbalo inyingishibue ya kumpaasha.
3 Muanda we ebue diande na kifuamino kiande,Okandudika na kunkunkusha pa muanda w’eshina diobe.
4 Okampaasha ku bukondia buabadi bantee mu bufiefie,Muanda we kifuamino kiande.
5 Natuulu kikudi kiande mu maasa oobe.
We munkuule, Ô Yehowa Efile Mukulu a bia binyibinyi.*
6 Ne mushikue baba bepane ku ma nkishi a bisumanga,Anka buande’mi ne mukulupile Yehowa.
7 Nekala na muloo wibungi bua kifulo kiobe kia lulamato,Muanda we mumone malua ande;Ouku bi bukata bua kinyongua kiande.
8 Tue muntuule mu maasa mua muishikuanyi,Anka we mungimikie mu mbalo ishi masaku.
9 Ndeeshe namu kalolo kobe, Ô Yehowa, muanda ne mu dikienga.
Kinyongua kibabofusha meso ande mpa na mbidi* yande yoso ishima.
10 Kenyongoshi kabafudiisha muwa wande,Na bipua biande bibafudiila mu kuinyenga.
Bukome buande bubapu pa muanda wa kilema kiande;Mifufua yande ibabofula.
11 Bakuete kunsepa kui beshikuanyi nami,Bikishekishe baba bekungishene nami.
Na baba abeukena nami abampusha moo,Nsaa yabammono mu mbalo ya bantu bebungi, abansuuku.
12 Mbankatushe mu mashimba aabo na kunduba, anka bu’mi mupue kufua,Ne nka bu elondo ditanyikie.
13 Ne mupushe mianda ibubi ibungi y’abakula,Moo wibukopo nkunkuata.
Nsaa yabebungu pamune bua kulua nami,Abadi lukuku bua kungipaa.
14 Anka ami ne mukukulupile, Ô Yehowa.
Nakula’shi: “Obe we Efile Mukulu ande.”
15 Mafuku oso a muwa wande e mu maasa mobe.
Mpaashe namu kuiyasa dia beshikuanyi nami, na kua baba bakuete kunkiengiesha.
16 Munyikila namu mufubi oobe mpala yobe.
Mpaashe namu pa muanda wa kifulo kiobe kia lulamato.
17 Ô Yehowa, ntshikuatshikanga namu buufu nsaa yankuitamina.
Bantu bebubi bakuatshikie buufu,Bashale baumiine mu Mashama.*
18 Milomo ayakula mianda ya madimi yumiine,Milomo ayakula muntu mululame na kuitatula na kapeesha.
19 Miabi yobe i bungi bukile!
We muiyilamine baba abakutshinyi,Na we muiyileeshe kui bantu boso, bua baba abafuamina modi.
20 Okebafuamisha mu mbalo ifuame i kumpala kobe,Kui bantu abebadiila lukuku,Okebafuamisha mu mbalo yobe ya kufuamina,Kula na baba abebakula bibubi.
21 Yehowa atumbishibue,Muanda bandeesha kifulo kiaye kia lulamato mu mushindo ukile buwa, mu kibundi kiabadi befunyishe kui beshikuanyi.
22 Kadi ami, naadi mupampakane na nakula’shi:
“Nakashimina kumpala kobe.”
Anka bodi mupushe kuiyaya kuande bua kukimba bukuashi, panaadi muidile kodi.
23 Fulayi Yehowa, anue boso be na lulamato kuadi!
Yehowa akaluilaa ba sha lulamato,Anka, anyokaa bibukopo muntu oso sha kuitatula.
24 Ikalayi bakankamane, nunyingie mashimba,Anue boso abatengiela Yehowa.
