Musambo 19:1-14
Kui mukunkushi. Musambo wa Davide.
19 Eyilu adiwukisha ntumbo y’Efile Mukulu,Bintu bi muiyilu* abiwukisha mifubo ya ku maasa aaye.
2 Efuku n’efuku, ngakuilo aabio apushikaa,Bufuku boso, abilesha kiwukilo.
3 Tabiakulaa sunga kutuusha bishima,Na eyi diabio tadipushikaa.
4 Kadi mayi aabio aapushika mu nsenga ishima,Na mukandu wabio aupushika mpa na kufudiile nsenga.
Muiyilu, mmushimikile nguba kashibo k’epema.
5 Enka bu mulume bakatuka mu kuibakila, atuuku mu kadimbo kaye,E na muloo nka bu kilobo akisuuku lubilo mu mashinda aakio.
6 Atuuku ku’yi nsongo ya eyilu,Efunyu mpa na ku ingi nsongo,Na takui kintu su nkimune kishakipusha kibobo kiaye.
7 Muiya wa Yehowa ngupuidikie, aupeyaa muntu bukome,*Mitentekiesho ya Yehowa ngia kukulupila, ayifuishaa muntu shi na binangu, sha binangu.
8 Mayi a Yehowa ngalulame, aasangashaa eshimba,Miiya ya Yehowa ngitookane, ayibuulaa muntu meso.
9 Kutshina kua Yehowa kui selele, akuikala kuanka bua loso,Biimu bia Yehowa mbia binyibinyi, na bioso mbilulame.
10 Bi buwa kukila ôlo,Kukila ôlo mukile buwa e bungi,Bi nsaasa kukila buuki, buuki abunoko ku bisa.
11 Ku bukuashi buabio, mufubi oobe mmudimushibue,Yawa ebitumikila apete efuto dikata.
12 Nnanyi mulombene kutundula bilubilo?
Mbadikie namu bu muntu shi musoole muanda ku miluisho yanshi mutundule.
13 Na olame namu mufubi oobe, bua’shi takitanga mianda ya kuitatula,Tueyitadilanga bua’shi immune.
Paapa nakekala mukumbane,Na shi musoole muanda ku miluisho ikata.*
14 Mayi a mukanua muande na mianda yannangushena muishimba diandeBikusankishe, Ô Yehowa, Ebue diande, na Mukuudi ande.
