Musambo 35:1-28
Wa Davide.
35 Ô Yehowa, samba namu kilumbu kiande na baba abanduisha,Olue namu na baba abalu nami.
2 Ata namu ngabo oobe mukata na mupeela,*Na webuee bua kunkaluila.
3 Ibuesha mulumbu oobe na kabengiele* ka ngoshi kui baba abelondena nami.
Ondungule’shi: “Ami ne kipandilo kiobe.”
4 Baba abakimbi muwa wande bakuatshikie buufu na bayishibue milongo.
Baba abadi lukuku bua kungipaa balukiile kunyima na buufu.
5 Bekale nka bu bipusu bi mu lupunga,Muikeyilu a Yehowa ebabingie.
6 Mashinda aabo ekale mufito na buseene,Nsaa ayibabingi muikeyilu a Yehowa.
7 Muanda mbantee bukondia mu bufiefie bua kunkuata kuanshi musoole muanda,Mbambunduile buina kushi muanda.
8 Makienga ebafuile mu kabasamushi,Bakuatshikie mu bukondia buabadi bafie,Bapone muanka na babutudibue.
9 Kadi ami nakasankila mui Yehowa,Nakekala na muloo mu bikitshino biaye bia kipandilo.
10 Nakakula n’eshimba diande dioso’shi:
“Ô Yehowa, nnanyi e biodi?
Obe akuashaa bantu bashi na a kuibakuasha kui bantu be bukome,Muntu mulanda na yawa shi na a kumukuasha kui baba abebapaula.
11 Tumonyi tua madimi tubangibuela,Atungipusha mianda yanshanguku.
12 Abangaluisha bubi ku buwa,Na bino abimpa kinyongua kikata.
13 Anka pabaabadi abakumbu, naadi nafuala mpaya;Naadi muinyongole pa kuishidika,*Na nsaa yanshinadi nampete lualulo ku luteko luande,
14 Naadi natambuka muinyongole nka bu muntu e mu maalo a kuku aaye sunga a mukuabo mulume.
Naadi muitonte na kinyongua nka bu muntu e mu maalo a nyinaye.
15 Kadi panaadi mukokole, babaadi basankie abo nkuibunga pamune,Babaadi bebungie pamune, abo nkubelama bua kunduisha;Babaadi bansaasule tupese tupese kushi kushala baumiine.
16 Bantu bashi na kanemo bua Efile Mukulu abansepe na kapeesha,Abandiila meno.
17 Ô Yehowa, oshala mutale nka bisumanga mpa na ku nsaa kinyi?
Mpaashe namu kui abanduisha,Paasha namu muwa wande kui ntambue yana.
18 Paapa nakakutumbula munkatshi mua kakongie kakata;Nakakutumbisha munkatshi mua bibumbu bia bantu.
19 Totadiilanga baba banshikue kushi muanda basankie bua malua ande;Totadiilanga baba banshikue kushi muanda befinyene eyiso.
20 Muanda tabakuete kuakula mayi a butaale,Abaluku mianda ya madimi bua kuluisha bantu ba sha butaale ba muiwumbo.
21 Ababuula mukanua muabo bikata bua kunfunda,Abakula’shi: “Oolo! Oolo! Meso eetu ngebimone.”
22 We mumone uno muanda, Ô Yehowa. Toshalanga muwumiine.
Ô Yehowa, toshalanga kula nami.
23 Buuka na wemane bua kungakuila,Obe Yehowa Efile Mukulu ande, ngakuile namu mu kilumbu kiande.
24 Nsambishe namu muyile kululama kobe, Ô Yehowa Efile Mukulu.
Totadiilanga namu bua’shi basankie bua malua ande.
25 Tabakulanga’shi: “Oolo! Tubapete ki’atukiebanga.”
Efuku su ndimune tabakulanga’shi: “Tubamuminyi.”
26 Oso a kuabadi akuatshikie buufu na akutue kinemo,Baba abasanka pa muanda wa makienga ande.
Bano abemono bu bankile, bakuatshikie* buufu na kuyishibua milongo.
27 Anka baba abasanka bua kululama kuande bele misaase ya muloo,Bakule mafuku oso’shi:
“Yehowa atumbishibue, aye asangelaa butaale bua mufubi aaye.”
28 Biabia ludimi luande alukakula* bua kululama kobe,Na alukutumbisha munda mua efuku dioso dishima.
