Musambo 60:1-12
Kui mukunkushi; muyile “Kilongo kia Lise kia Kutentekiesha.” Miktame* ya Davide. Bua kulongiesha. Nsaa ibaadi mulue ngoshi na Arame-naharaime na Arame-Zoba, na Yoabe nkualukiila, aye nkuyipaa bena Edome 12 000 mu Ebanda dia Mungua.
60 Ô Efile Mukulu, we muitusumbushene, na we muitupalakashe.
Bodi muitukuatshile nsungu, anka binobino etukumiine namu dingi.
2 Bodi mutshinkishe nsenga, obe nkuiyelesha mitanta.
Lumbuula namu mitanta yayo, muanda ikuete kupona.
3 We mumueshe muilo oobe malua.
We muitutomeshe nfinyo ayitulundusha.
4 Pa* baba abakutshinyi kitunduilo,Bua’shi basukie na beepe* mikietue.
5 Bua’shi bantu bobe bodi mufule bapaashibue,Etupaashe namu na mboko yobe ibalume na wetualule.
6 Efile Mukulu akula mu buiselele* buaye’shi:
“Nakekala na muloo, nakatuusha Shekeme bu bupianyi,Na nakapimi Ebanda dia Sukote.
7 Gileade ngande mpa na Manasee namu ngande,Na Efraime nkifulu* bua mutue wande,Yunda mmukombo wande wa bufumu.
8 Moabe e bu elonga diande mua kuitumpila mema.
Nasumbula sandale ande mu EdomeNa nakeele misaase ya kutshimuna mu Filistine.
9 A nnanyi akantuala ku kibundi kiabadi befunyishe?*
Nnanyi akankunkusha mpa na ku Edome?
10 Nta nobe muitusumbushene, Ô Efile Mukulu,Obe Efile Mukulu eetu, sh’akumiinaa kuenda dingi na biluilo bietu mu ngoshi?
11 Etukuashe namu mu malua eetu,Muanda kipandilo akifiki kui bantu nkia bisumanga.
12 Ku bukuashi bua Efile Mukulu atukapete bukome,Na nnaye akafuntu beshikuanyi betu ngua.
