Musambo 90:1-17
Luteko lua Moyise, muntu a Efile Mukulu a binyibinyi.
90 Ô Yehowa, we muikale mbalo yetu ya kushala* munda mua bipungo bioso.
2 Kumpala kua’shi miengie itandibue,Sunga kumpala kodia kutuusha nsenga, na nsenga ayimeneshaa bintu,Ku ikalaika na ku ikalaika, we Efile Mukulu.
3 Obe, walushaa muana a muntu ku lufufi.
Wakula’shi: “Alukilayi ku lufufi anue bana ba bantu.”
4 Muanda bipua kinunu bi ku meso kobe nka bu efuku dimune dia maloba akile,Nka bu kilo kimune kia bufuku.
5 Webakombo bashimine, nka bu abitshibikaa tulo.
Ku namashika be nka bu lubishi lubamene,
6 Alutuusha bilongo ku namashika na alutumpuka,Kadi ku kiolua alufumbu na aluwumu.
7 Muanda tubatutshika mu nsungu yobe,Na nsungu yobe ibukopo ayitutshinyisha.
8 We mutuule bilubilo bietu kumpala kobe,Mianda yetu ifuame ngileshibue patooka ku bukuashi bua mpala yobe.
9 Mafuku eetu akuete kuenda na kupua pamuanda wa nsungu yobe,Na bipua bietu abifudiila nka bu miununo.
10 Bula bua mafuku a muwa wetu mbua bipua 70,Sunga bipua 80 su muntu e na bukome buibungi.
Anka ngaule na nkalakashi na tuinyongoshi,Aakidi lubilo na atushimina.
11 Nnanyi mulombene kushingula bukome bua nsungu yobe?
Nsungu yobe ngikata nka bu moo watudi balombene kukupusha.
12 Etulongieshe namu biatudia kubadika mafuku eetu,Bua’shi tumone biatudia kupeta eshimba di na binangu.
13 Alukiila namu Ô Yehowa! Bino abiisha mpa na ku nsaa kinyi?
Fuila namu bafubi bobe lusa.
14 Etuikutshishe namu na kifulo kiobe kia lulamato ku namashika,Bua’shi tumone bia kuela misaase ya muloo na tusankie munda mua mafuku eetu oso.
15 Etuikashe namu na muloo munda mua mafuku e mumune na obodi muitumueshe malua,Bua’shi ekale bungi bui mumune na bipua bibaatudi bamone mpombo.
16 Kita namu bia’shi bafubi bobe bamone midimo yobe,Na bia’shi bana babo bamone ntumbo yobe.
17 Kalolo ka Yehowa Efile Mukulu eetu kekale kuatudi,Kita namu bia’shi midimo ya ku maasa eetu yende kumpala.
Oolo, yiisha namu midimo ya ku maasa eetu kumpala.
Mayi e mushi mwesaki
^ Sunga “we muikale kifuamino kietu.”
