Musambo 106:1-48
106 Tumbishayi Yah!*
Tumbulayi Yehowa muanda e buwa.
Kifulo kiaye kia lulamato ki kuanka bua loso.
2 Nnanyi mulombene kuukisha binyibinyi bikitshino bioso bia bukome bia Yehowa,Sunga kulungula pabitale bikitshino biaye bioso bia ntumbo?
3 Ba sha muloo mbaba boso abakitshi mianda na kululama,Baba abakitaa nka mianda ibuwa.
4 Ntentekieshe namu nsaa y’olesha muilo oobe kalolo, Ô Yehowa.
Mpasukile namu na bikitshino biobe bia kipandilo.
5 Bua’shi ami namu nsangele buwa bobe bokitshinaa basangulue bobe,Na nekale na muloo pamune na muilo oobe,Bua’shi nkutumbishe na muloo oso pamune na bupianyi bobe.
6 Tui bakite miluisho nka bu bibakitshine bamashetu kulu,Tui bakite bibubi, tuakita mianda ibubi bukile.
7 Bamashetu kulu tababaadi basangele midimo yobe ya kukaanya mu Ejipitu.
Tababatentekieshe kifulo kiobe kikata kia lulamato,Anka babaadi batombokie ku kalunga ka mema, oolo ku Kalunga Kamonga.
8 Kadi bebapaashile pa muanda w’eshina diaye,Bua kuukisha bukome buaye.
9 Baadi musaashile Kalunga Kamonga, na ako nkukama,Bebakunkuishe muushi muako nka bu abatambukila mu kabaaka.
10 Bebapaashile kuiyasa dia baluishi babo,Na nkuibakuula kuiyasa dia muishikuanyi.
11 Mema abapuutshile baluishi babo,Takui muntu su ngumune a kuabadi bapandile.*
12 Akupu, babatuudile lukumiino mu mulayilo waye,Abo nkubanga kuyimba bua kumutumbisha.
13 Anka babalubile bukidibukidi bibaadi mukite,Tababatengiele elango diaye.
14 Babaadi batadiile nkalo yabo ibubi ayibakambila mu kabaaka,Babatompele Efile Mukulu mu kabaaka.
15 Bebapeele bibaabadi batekie,Kadi akupu, aye nkuibatumina kipupa kibaadi kibayipee.
16 Babaadi bakuatshile Moyise kiutu mu kishaleloNa Alona, a kishila a Yehowa.
17 Nsenga ibaadi ibuule mukanua ayo nkumina Datane,Na ayo nkupuuta baba babaadi bebungie pamune na Abirame.
18 Kaalo kabatembele munkatshi mua kisaka kiabo,Na ndimi ya kaalo nkushiika bantu bebubi.
19 Babakitshine kana ka ngombe ku HorebeAbo nkuinamina nkishi a kilonda.*
20 Babaatshile ntumbo yande,Abo nkuiyipa kinfuanyi kia ngombe adiyaa kisuku.
21 Babalubile Efile Mukulu Mupaashi aabo,Aye bakitshine mianda ikata mu Ejipitu,
22 Bakitshine mianda ya kukaanya mu eumbo dia Kame,Bikitshino abikuatshisha moo ku Kalunga Kamonga.
23 Baadi pepi na kutuma eyi bua kuibabutula,Anka Moyise musangulue aaye baadi mumusendeeleBua kukanda nsungu yaye ayibutulaa.
24 Akupu babaadi babepuule eumbo dibuwa,Tababaadi baleeshe lukumiino mu mulayilo waye nya.
25 Babaadi nka abedidi mu tushibo tuabo tua mapema,Tababaadi bateemeshe eyi dia Yehowa.
26 Biabia baadi muibueshe eyasa diaye, na aye nkuitshipa pabibatale,Bua kuibayipaa mu kabaaka.
27 Baadi na kia kuponesha bekulu babo ku maasa kua miilo,Na kuibapalakasha mu maumbo.
28 Akupu bababangile kulanguila Baale a ku Peore,Na abo nkudia milambu yabadi balambule bafue.*
29 Babaadi bamolomone na bikitshino biabo,Na kipupa nkutuela munkatshi muabo.
30 Anka pabaadi Finease muimane, na aye nkuata kitshibilo kia kupua wawa muanda,Kipupa kibayimeene.
31 N’aye nkubadikibua bu muntu mululame bua uno muandaMunda mua bipungo bioso bua loso.
32 Babaadi bamukuatshishe nsungu ku mema a Meriba,*Na mianda nkuluidila Moyise pamuanda wabo.
33 Babaadi benyongoshe kikudi kia Moyise,Na aye nkuakula mianda kushi kunangushena.
34 Tababaadi babutule miilo,Bu bibaadi Yehowa muibatumine eyi.
35 Babaadi besangie na miilo,Na abo nkuambula* mushindo wabo wa kukita mianda.
36 Babaadi abafubila ma nkishi aabo,Na ao nkufika bu muteo kuabadi.
37 Babaadi abalambula bana babo balume,Na bana babo bakashi kui ba demo.
38 Babaadi abapongoola mase a bantu bashi basoole muanda,Mase a bana babo balume na bana babo bakashi,Bababaadi abalambula ma nkishi a mu Kanaana.
Babaluishile eumbo na kusumbula kua mase.
39 Babafikile butete pa muanda wa bikitshino biabo,Babatambukile lusandi lua mu kikudi, kukiila ku bikitshino biabo.
40 Biabia nsungu ya Yehowa ibaadi itembele muilo waye,Na aye nkubanga kushikua bupianyi buaye.
41 Baadi muibatuule mu maasa mua miilo misango na misango,Bua’shi baba babaadi bebashikue bebakunkushe.
42 Beshikuanyi babo babaadi abebakiengiesha,Na babaadi abebatuulu muushi mua matalua aabo.
43 Baadi ebapaasha misango ibungi,Anka babaadi abatomboka na kukutua kukookiela,Na babaadi abayishibua milongo pa muanda wa bilubilo biabo.
44 Kadi baadi amono dikienga diabo,Na kupusha kudila kuabo bua kuteka bukuashi.
45 Pa muanda wabo, baadi atentekiesha kilombeno kiaye,Baadi ebapushiisha lusa pa muanda wa kifulo kiaye kikata kia lulamato.
46 Baadi akitshi bia’shi bebapushishe lusa,Kui baba boso bebakuate benda nabo.
47 Etupaashe, Ô Yehowa Efile Mukulu eetu,Etukatushe namu mu miilo wetubungie,Bua’shi tutumbishe eshina diobe dia kishila,Na tukusaamune na muloo.
48 Yehowa Efile Mukulu a Isalele atumbishibue,Bua ikalayika.*
Na muilo oso wambe’shi, “Amene!”*
Tumbishayi Yah!*
Mayi e mushi mwesaki
^ Sunga “Aleluya,” kishima “Yah” nyi mushindo wa kufunda eshina dia Yehowa mu kitshibo.
^ Sunga “bashadile.”
^ Sunga “nkishi a kilonda kisunguulue.”
^ Nkuamba’shi, “milambu yabadi balambule bantu bafue sunga b’efile bashi na muwa.”
^ Adipushisha “kuikakeena.”
^ Sunga “nkulonga mushindo wabo.”
^ Sunga “ku ikalayika na ku ikalayika.”
^ Sunga “bikale’nka biabia.”
^ Sunga “Aleluya,” kishima “Yah” nyi mushindo wa kufunda eshina dia Yehowa mu kitshibo.
