Musambo 79:1-13
Musambo wa Asafe.
79 Ô Efile Mukulu, miilo ibatuelela bupianyi bobe,Ibaluisha ntempelo oobe a kishila,Ibafuisha Yelusalema bu kibundi kiluile.
2 Babapa tonyi tua muiyilu bitanda bia bafubi bobe bu bidiibua,Babapa nyema ya bukielo ya pa nsenga mbidi ya bafubi bobe ba sha lulamato.
3 Babapongoola mase aabo nka bu mema mu Yelusalema,Na takui muntu su ngumune mushale bua kuibashiika.
4 Tubafiki bu kintu kia kusenga kui bankungishanyi netu,Baba betuifunyishe abetusepe na kuitudiidika.
5 Ô Yehowa, wekala na nsungu mpa na ku nsaa kinyi? Mbua loso su?
Nsungu yobe ayitungunuka na kutemba bu kaalo mpa na ku nsaa kinyi?
6 Pongoluela miilo ishayikuuku nsungu yobe,Na mafumu ashaetamina eshina diobe.
7 Muanda bababutula lutandua lua Yakobo,Na babalekie eumbo diaye bisumanga.
8 Tuetubadikilanga namu bilubilo bia bankambua betu.
Etuleeshe namu bukidi lusa lobe,Muanda tui bafudiile ngofu.
9 Etukuashe namu, Ô Efile Mukulu a kipandilo kietu,Pa muanda wa ntumbo ya eshina diobe.
Etupaashe namu na wetufuile lusa ku miluisho yetu, pa muanda wa eshina diobe.
10 Buakinyi abitungu miilo yakule’shi: “Efile Mukulu aabo e kunyi?”
Mu meso muetu, bisamba biukie’shi,Boobuela mase a bafubi bobe abekeele bapongoole.
11 Teemesha namu kuidila kua muina lukano.
Fubisha namu bukome bobe buibungi, bua kukaluila baba babadi batshibile kiimu kia lufu.
12 Nyooka namu bankungishanyi netu misango musambobidi,Pa muanda wa mulomo wabadi bakukee, Ô Yehowa.
13 Paapa, atue muilo oobe, na mikooko ya mu mapia oobe a kudishila nyema,Atukakutumbula bua loso.
Na atukaukisha ntumbo yobe mu bipungo na bipungo.
