Musambo 85:1-13
Bua mukunkushi. Musambo wa bana ba Kora. Loono.
85 Ô Yehowa we muleshe eumbo diobe lusa,We mualushe ba ku musuku wa Yakobo babaabadi bakuate benda nabo.
2 Bodi mulekieele bilubilo bia muilo oobe,Obe nkuibafuila lusa ku miluisho yabo yoso. (Sela)
3 Bopelele kukuata nsungu,Obe nkupoosha nsungu yobe i bukopo.
4 Etukumiine namu dingi Ô Efile Mukulu a kipandilo kietu,Katusha namu nsungu yobe kuatudi.
5 Wekala muitukuatshile nsungu bua loso su?
Nsungu yobe ayikatungunuka mu bipungo na bipungo su?
6 Tuetupa namu dingi bukome,Bua’shi muilo oobe umone bia kupetela muloo modi su?
7 Etuleshe namu kifulo kiobe kia lulamato Ô Yehowa,Na wetupe namu kipandilo kiobe.
8 Nankateemesha abiakula Yehowa Efile Mukulu a binyibinyi,Akakula pabitale butaale kui muilo waye, na kui ba sha lulamato baye,Tuebatadiilanga bekale dingi na kuikulupila bu kumpala.
9 Mbinyibinyi, kipandilo kiaye ki pepi na baba abamutshinyi,Bua’shi ntumbo yaye ishale muiumbo dietu.
10 Kifulo kia lulamato na lulamato abikafumankana pamune,Kululama na butaale abikefifiena ku milomo.
11 Lulamato alukamene mu nsenga,Na kukatukila muiyilu, kululama akukatala pa nsenga.
12 Oolo, Yehowa aketupa bintu bibuwa,Na nsenga yetu ayikatuusha biumbuluanga biayo.
13 Kululama akukatambuka kumpala kuaye,Na akukamulumbuluila eshinda.
