Musambo 45:1-17
Kui mukunkushi; muyile “Bilongo bia Lise.” Musambo wa bana ba Kora. Masikile.* Musambo wa kifulo.
45 Eshimba diande di na muloo ukata bua muanda wibuwa.
Nakula’shi: “Musambo* wande ngutale nfumu.”
Ludimi luande luikale bu ka mutshi* ka kufunda nako ka mufundi auku kufunda kalolo.
2 We mukile buwa a ku bana boso ba bantu.
Bishima bibuwa abipongoloka ku milomo yobe.
Nyi buakinyi Efile Mukulu mmukuelele miabi bua loso.
3 Obe kilobo, someka lupete lobe mu kifuka,Mu kinemo kiobe na ntumbo yobe.
4 Mu ntumbo yobe, enda okatshimune,Kaamina pa nfualasa oobe, olue ngoshi bua binyibinyi na bua kuiyisha na kululama,Na mboko yobe ibalume ayikakitshi* mianda ya kukaanya.
5 Mikietue yobe ngisongole kalolo, ayiponesha bantu kumpala kobe,Ayitubula mashimba a beshikuanyi ba nfumu.
6 Efile Mukulu nyi nkuasa oobe a bufumu bua loso,Mukombo oobe wa bufumu, mmukombo wa kululama.
7 Bodi mufule kululama na oshikua mianda ibubi.
Nyi buakinyi Efile Mukulu, aye muikale Efile Mukulu oobe, baadi mukupongoluele muimu wa muloo kukila benobe.
8 Bilamba biobe bioso abituuku mapembue a mire, a alowe na a mutshi wa kasia,Kukatukila ku ebalasa diobe dikata dia mibanga, biombuanga bia mioshi abikusankisha.
9 Ba nsonguakashi ba nfumu be munkatshi mua bana bakashi bobe ba kinemo.
Ku mboko yobe ibalume nkuimane ndalamumba muilengieshe na ôlo a ku Ofire.
10 Ô nsonguakashi teemesha na opushe biankulungula,Luba muilo oobe na ba mu nshibo ya nshobe.
11 Paapa nfumu akalakila buwa bobe,Muanda nyi nfumobe,Biabia muinamine.
12 Nsonguakashi a ku Tiire akafiki na kia buntu,Bana balume be na bupeta buibungi abakakimbi kukuminyibua nobe.
13 Nsonguakashi a nfumu ebuwa bukile munda mua ebalasa,Bilamba biaye mbilengieshibue na ôlo.
14 Abakende naye kui nfumu, mmufuale bilamba* bilengieshibue kalolo.
Balole baye baki tumame abende na kumulonda, abakatuele naye kumpala kobe.
15 Abakafiki nabo abafuabasankanga na muloo,Abakatuele muibalasa dia nfumu.
16 Bana bobe abakaata mbalo ya bankambua bobe.
Okebatuulu bu ba nfumu* mu nsenga ishima.
17 Nakaukisha eshina diobe kui bipungo bioso bia bantu abikafiki.
Nyi buakinyi bantu abakakutumbisha bua loso.
