Musambo 78:1-72
-
Bulami bu’Efile Mukulu na kukutua kua lukumiino kua Isalele
Masikile.* Musambo wa Asafe.
78 Muilo wande, teemeshayi muiya wande.
Teeyi matui ku mayi a mukanua muande.
2 Nakabuula mukanua muande bua kuakula mu lukindi.
Nakeele miele ya kalakala.
3 Mianda yatudi bapushe na yatuuku,Ibaadi bamashetu betulondele,
4 T’atukeyifuamisha bana babo,Atukalondela bipungo bia bantu abifikiBikitshino bia kukaanya bia Yehowa na bukome buaye,Mianda ya kukaanya yadi mukite.
5 Batuudile eyi dia kutentekiesha mu Yakobo,*Na aye nkutuula muiya mu Isalele.
Baadi mutumine bamashetu kulu eyi,Bua kuukisha ino mianda kui bana babo.
6 Bua’shi kipungo akilondoKia bana abakatandikua, baukie ino mianda.
Abo namu, beyilungule bana babo.
7 Biabia abo namu abakatuulu lukulupilo luabo mui Efile Mukulu.
Bua’shi tabalubanga mifubo ya Efile Mukulu,Kadi batumikile miiya yaye.
8 Biabia t’abakekala bu bamashabo kulu,Babaadi kipungo kia bantu be na mutue wi bukopo, na bantomboshiBashibaadi na mashimba alulame,*Na bashibaadi na lulamato kui Efile Mukulu.
9 Bena Efraime babaadi na mata bu bina ngoshi,Kadi muifuku dia ngoshi babasuukile.
10 Tababaadi balame kilombeno kia Efile Mukulu,Na abo nkupela kutambukila mu miiya yaye.
11 Dingi babalubile mianda ibaadi mukite,Midimo yaye ya kukaanya ibaadi muibaleshe.
12 Bakitshine mianda ya kukaanya mu meso mua ba nkambua babo,Mu eumbo dia Ejipitu, mu kipindi kia nsenga kia Soane.
13 Baadi mutshibuule kalunga ka mema bua’shi bakiile muanka,Na aye nkuimika mema bu mudimba.*
14 Baadi ebakunkusha mu kanya ku bukuashi bua ekumbi,Na bufuku bushima ku bukuashi bua etaata dia kaalo.
15 Baadi mutanye mbuebue mu kabaaka,Babatomene mema abo nkupua nyota yabo, nka bu abatomena ku mema ala.
16 Baadi mutuushe mema aalala mu mbuebue,Na aye nkukita bia’shi mema aalale bu misulo.
17 Anka babatungunukile na kukita miluishoPa kutombokiela Sha Kuiyilu Kula mu kabaaka.
18 Babatompele Efile Mukulu mu mashimba aabo,P’abo kuteka bia kudia bibaabadi nabio lukalo.
19 Biabia abo nkuipula Efile Mukulu,Pa kuakula’shi: “Efile Mukulu mmulombene kuitupa bia kudia muno mu kabaaka su?”
20 Talayi! Bakupiile ku lubuebueNa mema nkupongoloka, na tu misulo tua mema nkualala.
“Mmulombene kuitupa dingi mukate,Sunga kupa muilo waye muita su?”
21 Pabaadi Yehowa mupushe ino mianda, bakuatshile nsungu ibukopo;Kaalo nkutembela Yakobo,Na nsungu yaye nkutembela Isalele.
22 Muanda tababaadi batuule lukumiino mui Efile Mukulu;Tababaadi bakulupile mu ngobesha yaye ya kuibapaasha.
23 Biabia aye nkutumina makumbi a muiyilu eyi,Na aye nkushitula biibi bia muiyilu.
24 Baadi nka ebanokiesha mane buabadia kudia;Aye nkuibapa ntete ya muiyilu.
25 Bantu babadiile mukate wa bilobo,*Bebapeele bia kudia bibungi, badia bayikuta.
26 Baadi muibueshe lupunga lua kutunduka nguba muiyilu,Na aye nkupukisha lupunga lua kuushi ku bukome buaye.
27 Baadi muibanokieshe muita nka bu lufufi,Tonyi tui bungi nka bu lusenga lua ku kiese kia kalunga ka mema.
28 Baadi muituponeshe munkatshi mua kishalelo,Tuifunyishe tushibo tuabo tua mapema.
29 Babadiile bayikuta,Baadi muibape bibaabadi abakimbi.
30 Anka, kumpala kua’shi bapue malaka aabo oso,Pabaadi bia kudia biki mukanua muabo,
31 Nsungu ibukopo ya Efile Mukulu ibaadi ibatembele.
Aye nkuipaa bantu babo be bukome;Na nkuipaa ba nsongualume ba mu Isalele.
32 Sunga mbiabia, babanyishile kukita miluisho,Ta mbatuule lukumiino mu midimo yaye ya kukaanya.
33 Biabia aye nkufudiisha mafuku aabo nka bu lupunga lua bisumanga,Na aye nkufudiisha bipua biabo pa kuibapulumuisha malua.
34 Kadi misango yoso ibaadi ebayipaa, babaadi abamukimbi,Babaadi abalukiila na abakimbi Efile Mukulu,
35 Babaadi abatentekiesha’shi Efile Mukulu Ndubuebue luabo,Na’shi Efile Mukulu Sha Kuiyilu Kula Mmukuudi aabo.
36 Kadi babaadi abatompo kumudimba na mukanua muabo,Na abamudimbi na ludimi luabo.
37 Tababaadi bamulamate n’eshimba dimune,Na tababaadi na lulamato ku kilombeno kiaye.
38 Anka, baadi na lusa,Baadi ebafuila lusa ku bilubilo biabo na tabaadi ebabutula.
Ke bungi baadi akanda nsungu yayePamutue pa kuibapongoluela yanka.
39 Muanda baadi atentekiesha’shi babaadi nka penda bana ba bantu,Lupunga alukidi kushi kualukiila dingi.*
40 Babaadi bamutombokiele mu kabaaka misango na misango,Na abo nkumutapa kuishimba mu kipia kia kabaaka.
41 Babaadi batompe Efile Mukulu misango na misango,Abo nkuinyongosha* A Kishila a Isalele.
42 Tababaadi batentekieshe bukome* buaye,Efuku dibaadi muibapaashe* kui muishikuanyi,
43 Bibaaadi muleeshe bitunduilo biaye mu Ejipitu,Na bilengieleshi biaye mu nsenga ya Soane.
44 Na bibaadi mualule mikola ya mema a mu Nile yafika mase,Mu mushindo wabashibaadi balombene kuiatoma.
45 Batumine bisaka bia bibuwa bua kuibasuma,Na nsobia* bua kuibabutula.
46 Bapeele mpasu ayiluishaa bikunuanga biumbuluanga biabo,Bapeele mpasu ya nshiye bintu biabo bibaabadi bakitshine mudimo wibukopo.
47 Baluishile mitshi yabo ya tumuma tua nfinyo na mpeshi a mabue,Na aye nkuluisha mitshi yabo ya sikomore na mabue a mpeshi.
48 Banokieshe mpeshi a mabue pa nyema yabo ayitualaa bushito,Na aye nkukupila bimunuanga biabo na mipenyo ya mpeshi.
49 Baadi muibapongoluele nsungu yaye ayitembe bu kaalo,Nsungu ibukopo na kufiita kua munda na dikienga,Bisaka bia mikeyilu bibaadi abibafuishila dikienga.
50 Baadi muibapongoluele nsungu yaye.
Tabaadi muibakaluile ku lufu;Na baadi muibatumine bipupa.
51 Nfudiilo a bioso bayipayile bana mbedi boso ba mu Ejipitu,Mbangilo a bukome buabo bua kutanda, mu tushibo tuabo tua mapema tua Kame.
52 Akupu, aye nkutuusha muilo waye nka bu kisaka kia mikooko,Na aye nkuibakunkusha bu kisaka kia nyema mu kabaaka.
53 Baadi ebakunkusha na kuibakaluila,Na tababaadi na moo,Kalunga ka mema kababuikiile beshikuanyi babo.
54 Bafikile nabo mu nsenga yaye iselele,Ino nsenga ya ku miengie ibaadi eyasa diaye dibalume dipete.
55 Babingile miilo kumpala kuabo,Baadi muibaabile bupianyi na moshi wa kupima nao,Baadi mutuule bisamba bia Isalele mu mashibo aabo.
56 Anka, babatungunukile na kutompa Efile Mukulu Sha Kuiyilu Kula, na kumutombokiela,Tababaadi batuule binangu ku mitentekiesho yaye.
57 Babaadi bamutombokiele na babaadi na bunsesa nka bu ba nkambua babo.
Tababaadi ba kukulupila nka bu buta buabashi baleme kalolo.
58 Babaadi nka abamufiitshisha munda na ma mbalo aabo e kunundu,Na abo nkumukuatshisha nsungu* ibukopo na ma nkishi aabo abaabadi basee.
59 Efile Mukulu bapushishe na aye nkukuata nsungu ibukopo,Biabia aye nkusumbushena Isalele oso mushima.
60 Nfudiilo a bioso baadi musumbushene tabernakele a ku Shilo,Kashibo k’epema mubaadi mushale munkatshi mua bantu.
61 Balekiele abende na kitunduilo kia bukome buaye,Aye nkutuula ntumbo yaye mu maasa mua baluishi.
62 Balekiele muilo waye buawudia kupona ku lupete lua ngoshi,Aye nkukuatshila bupianyi buaye nsungu ibukopo.
63 Kaalo kabashiikile ba nsongualume baye,Na tababayimbile ngono ya eyibakishi bua ba nsonguakashi baye tumame.*
64 Ba tshite muakuidi baye babaadi bapone ku lupete lua ngoshi,Na bakashi kilele babo tababadidile.
65 Paapa Yehowa babuukile nka bu muntu abuuku ku tulo,Nka bu kilobo kia ngoshi kikeele kikolue nfinyo akibuuku ku tulo.
66 Babingile beshikuanyi baye,Aye nkuibakuatshisha buufu bua loso.
67 Baadi musumbushene kashibo k’epema ka Yosefe.
Tabaadi musangule kisamba kia Efraime.
68 Kadi basanguile kisamba kia Yunda,Muengie wa Siyona wadi mufule.
69 Bekeeshe mbalo yaye ya kishila buayidia kuikala inyingishibue nka bu eyilu,Nka bu nsenga yadi munyingishe bua loso.
70 Basanguile mufubi aaye Davide,Amuata ku bikutu bia mikooko,
71 Kubaadi alama mikooko ayomeshaa,Aye nkumuikasha bu mulami a mikooko a Yakobo, muilo waye,Na a Isalele bupianyi buaye.
72 Baadi ebalama n’eshimba dilulame,Na kuibakunkusha na kalolo.
Mayi e mushi mwesaki
^ Tala Kipatuluilo kia Bishima.
^ Sunga “bekulu ba Yakobo.”
^ Kish ku kish. “mashimba alumbuulue.”
^ Sunga “kimano; mumba.”
^ Sunga “wa mikeyilu.”
^ Sunga pangi “Kikudi akiende na takialukiila dingi.”
^ Sunga “Abo nkukiengiesha.”
^ Kish ku kish. “eyasa diaye.”
^ Kish ku kish. “muibakuule.”
^ Sunga “ngunda.”
^ Sunga “mukao wibukopo.”
^ Kish ku kish. “Na tababaadi batumbishe ba nsonguakashi baye tumame.”
