Musambo 17:1-15
Luteko lua Davide.
17 Pusha namu kuidila kuande, na onkitshine mianda na kululama Ô Yehowa,Teemesha namu kudila kuande bua kukimba bukuashi.
Teemesha namu luteko luande luantekie kushi kudimba.
2 Ata namu kitshibilo kilulame pabitale muanda wande,Meso oobe amone biabia bi buwa.
3 We mutaluule eshimba diande, na we muntaluule bufuku,We muntooshe.
Na osangana’shi ntshi mupuandikishe bua kukita muanda wibubi su ngumune,Na mukanua muande ntamukite muluisho.
4 Pabitale midimo ya bana ba bantu,Mu kuipushena na eyi dia ku milomo yobe, nasuukaa kutambukila mu mashinda a bangifi.
5 Matabula ande ashale mu mashinda oobe,Bua’shi mikoolo yande tayikokolanga.
6 Ô Efile Mukulu! Nakuitamina muanda ongaluula.
Tee namu matui* kuandi, opushe mayi ande.
7 Leesha namu kifulo kiobe kia lulamato mu mushindo wibuwa,Ô Mupaashi a baba abakimbi kifuamino ku mboko yobe ibalume,Kui baba abakutombokiela.
8 Ndame namu nka bu muan’obe a eyiso,Nfuamishe namu mu mutaala wa mbaba yobe.
9 Nkaluile namu kui bantu bebubi abalu nami,Kui beshikuanyi bande bangifunyishe, bantu abafuiyaa.
10 Mbapapishe mashimba,Na abakula na kuitatula,
11 Binobino mbetuifunyishe,Mbetubelamine, abakimbi mushindo wabadia kuituponesha.*
12 Enka bu ntambue mutengiele bua kusaasula nyema tupese tupese,Anka bu muana a ntambue mubelame.
13 Ebuee bua kulua naye, Ô Yehowa, na omuponeshe mu nsenga,Mpaashe namu na lupete lobe lua ngoshi kui muntu ebubi.
14 Mpaashe namu na eyasa diobe, Ô Yehowa,Kui bantu ba mu ino nsenga, be na muwa penda mu uno nshalelo,Baba bodi muushe na bintu bi buwaAbalekiela bana babo bebungi bupianyi.
15 Anka buande’mi, mu kululama nakamono mpala yobe,Nabuuku na muloo muukie’shi we nami.
