Musambo 143:1-12
Musambo wa Davide.
143 Ô Yehowa teemesha namu luteko luande.
Teemesha namu kuiyaya kuande bua kuteka bukuashi.
Ngalule namu mu lulamato lobe na mu kululama kobe.
2 Tokilanga namu ku kiimu na mufubi oobe,Muanda takui muntu su ngumune e na muwa mulombene kuikala mululame kumpala kobe.
3 Muanda muishikuanyi kuete kuilondena nami.
Mmufunte muwa wande mu nsenga.
Mmukite bia’shi nshale mu mufito, nka bu bantu bafue takudi mafuku ebungi.
4 Kikudi kiande kikuete kuenda na kubofula;Eshimba diande dikuete kukiengakana.
5 Natentekiesha mafuku a kala;Nanangushena ku midimo yobe yoso;Nanangushena ngofu ku* mudimo wa maasa oobe.
6 Nebuesha maboko ande kodi;N’enka bu nsenga yume i na nyota bobe. (Sela)
7 Ô Yehowa ngalule namu bukidi,Muanda bukome buande bubafudiila.
Tonfianga namu mpala yobe.
Bisumanga nekala’nka bu baba abayiki mu buina.
8 Ntadiile namu mpushe kifulo kiobe kia lulamato ku namashika,Muanda ne mukukulupile.
Ngukishe namu eshinda diandia kutambukila,Muanda ne mutale kodi.*
9 Mpaashe namu kui beshikuanyi bande Ô Yehowa.
Nakimbi’shi onkaluile.
10 Ndongieshe namu bia kukita kikiebe kieshimba diobe,Muanda we Efile Mukulu ande.
Kikudi kiobe ki buwa;Kinkunkushe namu mu mbalo ishalame.*
11 Ô Yehowa ndame namu na muwa pa muanda wa eshina diobe.
Mu kululama kobe, mpaashe namu ku makienga.
12 Shimisha* namu beshikuanyi bande mu kifulo kiobe kia lulamato,Butula namu baba boso abankiengiesha,Muanda ne mufubi oobe.
