Musambo 7:1-17
-
Yehowa nyi Nsushi mululame
-
“Nsambishe namu, Ô Yehowa” (8)
-
Musambo wa maalo wa Davide ubaadi muyimbile Yehowa pabitale mayi a Kushe muina Benyamine.
7 Ô Yehowa Efile Mukulu ande, modi nyi muandi mufuamine,Nkuashe namu, ompaashe kui baba boso bakuete kunkiengiesha.
2 Bisumanga abansasula tupesetupese nka bu abikitaa ntambue,Na kunshimisha kushi muntu su ngumune a kumpaasha.
3 Ô Yehowa Efile Mukulu ande, su ne mu kilubilo mu uno muanda,Su ne mukite mianda na kukutua kululama,
4 Su ne mukitshine muntu ankitshinaa mianda ibuwa bi bubi,Su ne munyengie muishikuanyi ande bintu kushi kabingilo,
5 Muishikuanyi ande ebingene nami na ankuate,Ansumbule paashi, anfunte* ngua mu nsenga,Na ashimishe ntumbo yande mu lufufi. (Sela)
6 Imana mu nsungu yobe, Ô Yehowa;Ebuee oluishe beshikuanyi bande be na nsungu i bukopo;Buuka na onkuashe, na tuma eyi bua’shi batshibe muanda wande na kululama.
7 Bisamba bikuifunyishe;Na okalu nabio kukatukila muiyilu.
8 Yehowa akatshibila miilo yoso kiimu.
Nsambishe namu, Ô Yehowa, muyile kululama kuandeNa muyile lulamato luande.
9 Fudiisha namu bikitshino bia bantu be bubi.
Kadi okaluile bantu balulame,Muanda we Efile Mukulu mululame, ataluulaa mashimba na binangu bifuame bi munda* mua bantu.
10 Efile Mukulu nyi ngabo yande, Mupaashi a baba be na mashimba alulame.
11 Nyi nsushi mululame,Efile Mukulu eukishaa kiimu kiaye efuku dioso.
12 Su muntu ta muilangie, Efile Mukulu anoono lupete luaye lua ngoshi;Anana buta buaye na ashala muibubelekie.
13 Alumbuula bina ngoshi biaye abiyipaa bantu;Alumbuula mikietue yaye ayitembe kaalo.
14 Tala muntu muimite bubi;Emita kafutakanyi na atanda madimi.
15 Abundula buina bula,Kadi emupono aye nabene.
16 Kafutakanyi katuusha akakalukiila pa mutue waye aye nabene;Buntomboshi buaye abukalukiila pa kabaala kaye.
17 Nakatumbisha Yehowa bua kululama kuaye;Nakayimbi misambo* bua kutumbisha eshina dia Yehowa, aye Sha Kuiyilu Kula.
