Kacwalo, luswanela kuba ni tumelo mwa tiululo kuli lufumane bupilo bobusa feli. (Maef. 1:7) Batu banaabizize Jesu kuli ba “lingu zeñwi” habaswaneli kuca sinkwa kamba kunwa waine mi habacangi sinkwa ni kunwa waine ka nako ya Mulalelo wa Mulena oeziwanga hañwi ka silimo. (Joa. 10:16) Nihakulicwalo, ni bona batusiwa ki nama ni mali a Jesu Kreste. Batusiwa ka kubonisa tumelo mwa sitabelo sa Jesu sa tiululo ni lika zende zetahiswa ki sona. (Joa. 6:53) Babaswanela kuca sinkwa ni kunwa waine babonisa kuli ba mwa tumelelano yenca mi banani sepo ya kubusa mwa Mubuso wa kwa lihalimu. Kacwalo, ibe kuli lutozizwe kamba luba lingu zeñwi, lutokwa kubonisa tumelo ilikuli lufumane bupilo bobusa feli. w24.12 13 ¶14, 16

Ka nako ya Mulalelo wa Mulena, Jesu naafile baapositola bahae sinkwa sesisika ya mumela mi naababulelezi kuli nesiyemela mubili wahae. Kihona abafa waine ni kubulela kuli neiyemela ‘mali a tumelelano.’ (Mare. 14:​22-25; Luka 22:20; 1 Makor. 11:24) Tumelelano yenca yeo iezizwe ni “ba ndu ya Isilaele [wa kwa moya]” babakaba “mwa Mubuso wa Mulimu.”(Maheb. 8:​6, 10; 9:15) Zanaabulezi Jesu ka nako ya Mulalelo wa Mulena neliama kwa “mutapinyana.” Baapositola bahae babasepahala bane bali ni yena neli bona bapili kuba kalulo ya sikwatanyana seo. Ki bona babakaba ni Jesu kwa lihalimu. w24.12 11 ¶9-10

Jesu naabetekilwe, kutamiwa, kutapaulwa, kusawaniwa, kuatulelwa lifu, mane ni kutukufazwa. Masole neba muisize kwa sibaka kwanaaka bulaelwa ni kuyo mukokotela fa kota. Hanaanzaa itiisa ka busepahali kusina taba ni butuku bwanaautwa, nekunani yanaautwa hahulu butuku nikufita. Neli Jehova Mulimu. Nihaike kuli Jehova unani maata amatuna hahulu naasika tibela manyando anaakopani ni ona Mwanaa hae. Kabakalañi? Kabakala kuli sitabelo sa Jesu ki bupaki bobubonisa ka kutala kuli Jehova umilata hahulu. Naaezize buitomboli bobutuna ni kuitatela kuutwa hahulu butuku ilikuli amilukulule kwa sibi ni lifu. (1 Joa. 4:​9, 10) Kaniti luli, ubata kutusa mañi ni mañi waluna kumusebeleza kusina taba kuli lubaeza libi, mi kwapili ukafelisa sibi ka kutala! w24.08 6 ¶13-14

Haiba lunyakisisa zanaaitombozi Jehova, lukautwisisa hande mwalulatela. Satani upiha kuli hakuna mutu yakona kuzwelapili kusepahala ku Mulimu haiba akopana ni miinelo yetaata. Kuli abonise kuli taba yeo ki ya buhata, Jehova naatuhelezi Jesu kunyanda pili asika shwa kale. (Jobo 2:​1-5) Jehova naaiponela Jesu inzaa sheununwa ki babahulu ba bulapeli bane bamulwanisa, kushapakiwa ki masole, ni kukokotelwa fa kota ya linyando. Mi Jehova naaiponezi Mwanaa hae yalatwa haashwa lifu leli butuku. (Mat. 27:​28-31, 39) Jehova naanani maata a kutuhelisa muinelo wo ka nako ifi kamba ifi. (Mat. 27:​42, 43) Kono Jehova hanaaka eza cwalo, tiululo neisike yalifiwa mi nelusike lwaba ni sepo niyekana. Kacwalo, Jehova naatuhelezi Mwanaa hae kuitiisa hanaanyanda kufitela ashwa. w25.01 22 ¶7

Ki la Nisani 16, 33 C.E. Balutiwa ba Jesu ba mwa maswabi mi banani sabo. Bababeli ku bona bazwa mwa Jerusalema mi baliba kwa Emausi. Muuna yebasa zibi wabaatumela ni kukala kuzamaya ni bona. Balutiwa bao bamutaluseza ka za lika zemaswe zeezahezi ku Jesu. Cwale muuna yo ukala kubataluseza litaba zebasike balibala mwa bupilo bwabona. “Kukala ka Mushe ni Bapolofita kaufela,” ubataluseza libaka Mesia hanaaswanela kunyanda ni kushwa. Baana bao hase bafitile mwa Emausi, muuna yo waizibahaza ku bona kuli ki yena Jesu yazusizwe kwa bafu. (Luka 24:​13-35) Jesu naabonahezi hañata kwa balutiwa bahae mwa mazazi ahae a 40 a mafelelezo fa lifasi. Jesu naasusuelize balutiwa bahae bane baswabile ni kusaba, mi nebabile ni tabo ni bundume bwa kukutaza ni kuluta batu taba yende ya Mubuso. w24.10 12 ¶1-3

Nako hainze iya, mwanana wakona kuhula kuba mutu yomuhulu kusina kuikataza, kono kuli mutu ahule kwa moya utokwa kuikataza. Ka mutala, mizwale ni likaizeli ba mwa Korinte nebaamuhezi taba yende, kukolobezwa, kuamuhela moya okenile, ni kutusiwa ki lituto za muapositola Paulusi. (Lik. 18:​8-11) Kono hamulaho wa lilimo lisikai kuzwa fobakolobelezwa, buñata bwabona nebasika hula kwa moya. (1 Makor. 3:2) Kuli lufite fa buhulu bwa kwa moya, pili lutokwa kuba ni takazo ya kuhula. ‘Babalata kutokwa zibo,’ ili babatabela kuzwelapili kuba limbututu kwa moya, habana kueza zwelopili. (Liprov. 1:22) Halubati kuba sina batu babaeza kuli niha bahulile kwa mubili, basabata kuli bashemi babona babaezeze likatulo. Kono luna lubata kuikezeza likatulo ni kueza molukonela kaufela kuli luzwelepili kutiisa silikani saluna ni Jehova. Haiba musweli mwaikataza kuli mufite fa buhulu bwa kwa moya, mulapele ku Jehova kuli amife “takazo ni maata a kuunga muhato.”—Mafil. 2:13. w24.04 4 ¶9-10

Ka sishemo, Jehova ulutaluselize mwaikutwela ka za kuatula batu. (Ezek. 33:11) Jehova haana kuyundisa mutu ufi kamba ufi kuya kuile, konji haiba kunani libaka leliswanela. Unani hahulu sishemo, mi ubonisanga sishemo seo fokutokwahalela kaufela. Ki lika mañi zeluziba ka za batu babasike bazusiwa kwa bafu? Mwa Bibele kunani mitala isikai feela. Jesu naabonisize kuli Judasi Isikariota haana kuzusiwa. (Mare. 14:21; mubone ni Joani 17:12.) Judasi naaziba kuli ulwanisa Jehova ni Jesu, mi naaezize cwalo ka bomu. (Mubone Mareka 3:29; w07 7/15 like. 18.) Ka kuswana, Jesu naabulezi kuli baeteleli ba bulapeli babañwi bane bamulwanisize nebaka shwa mi habana kuzusiwa. (Mat. 23:33) Muapositola Paulusi ni yena naabulezi kuli bakwenuheli babasa lati kubaka habana kuzusiwa kwa bafu.—Maheb. 6:​4-8; 10:29. w24.05 4 ¶10-11

Haiba luzwelapili kuba ni silikani sesitiile ni Jehova, Satani haana kukona kulupaleliswa kufumana bupilo bobusa feli. (1 Joa. 3:8) Mwa lifasi lelinca, Jehova ukazwelapili kusileleza balikani bahae babasepahala kwa lika zekona kusinya silikani sabona ni yena ni kwa lifu. (Sin. 21:4) Ki tohonolo yetuna luli kuba muenyi mwa tende ya Jehova ni kuzwelapili kuba ni silikani sesitiile ni yena. (Ezek. 37:27) Ki lika mañi zeluswanela kueza kuli luzwelepili kuba baenyi mwa tende yahae? Haiba mutu yomuñwi amimemela kwa ndu yahae, mwendi mukatabela kuziba zabata kuli mueze. Ka mukwa oswana, lubata kuziba zatokwa Jehova kwa batu kaufela bababata kuzwelapili kuba baenyi. Lilato laluna ku Jehova lilususueza kueza molukonela kaufela kuli ‘lumutabise ka kutala.’ (Makolo. 1:10) Luswanela kuzwelapili kumukuteka. Kueza cwalo kuka lutusa kusaeza lika zasatabeli. Kaniti luli, lubata kuzwelapili kuzamaya “ka buikokobezo ni Mulimu” waluna!—Mika 6:8. w24.06 4 ¶8-9

Jehova naakupile Abrahama, yena muuna yanaanani hahulu tumelo, kuli aeze nto yetaata hahulu, ili kufa mwanaa hae Isaka sina sitabelo. Kusina kukakanya, taba yeo neiutwisize hahulu Abrahama butuku kwa pilu. Nihakulicwalo, naaitukiselize kueza zanaakupilwe. Kono hanaatuha abulaya mwanaa hae, Mulimu amuhanisa. Niteñi, mutala wo uluta batu kaufela babanani tumelo tuto ya butokwa, ya kuli, Jehova naakaitatela kufa Mwanaa hae yalatwa, sina sitabelo. Jehova ulata hahulu batu. (Gen. 22:​1-18) Hase kufitile lilimo zeñata kuzwa fo, Mulao one ufilwe kwa sicaba sa Isilaele neutokwa kuli kufiwange matabelo amañata ilikuli libi za batu ba Mulimu likwahelwe. (Liv. 4:​27-29; 17:11) Matabelo ao naabonisa kuli Jehova naakalukisa sitabelo sesinde hahulu, sene sikatahisa kuli libi za batu liswalelwe ka kutala. Bapolofita ba Mulimu nebasusumelizwe kutalusa kuli mwana yanaasepisizwe, yena Mwanaa Mulimu wa butokwa hahulu, naakanyanda ni kubulaiwa ili apilise batu kaufela kwa lifu kukopanyeleza cwalo ni mina.—Isa. 53:​1-12. w24.08 4 ¶7-8

Hamuketa kubala Bibele, mubone teñi kuli mwabata linzila za kusebelisa ka zona litaba zemubala. Hamunze mubala litaba zeñwi mwa Bibele, muipuze kuli, ‘Nikona kusebelisa cwañi litaba ze ka nako ya cwale kamba kwapili?’ Ka mutala, luunge kuli hane mubala Bibele nemubalile ni 1 Matesalonika 5:​17, 18. Hamulaho wa kubala litimana zepeli zeo, mwakona kutuhela hanyinyani kubala ni kunahana kuli muzibe haiba mwalapelanga kamita ni kueza cwalo kuzwelela kwatasaa pilu. Hape mwakona kunahana ka za lika zemuitebuha. Mwendi mwakona kuatula kuli mukaitumela ku Jehova ka kunonga kabala lika zetaalu zamiezelize. Nihaiba kubanga feela ni mizuzu yelikani yeo ya kunahanisisa ka tokomelo litaba zemubala, kwakona kumitusa kuba muutwi ni muezi wa Linzwi la Mulimu. Munahane feela momuka tusehela haiba zazi ni zazi muba ni nako ya kunahanisisa zemubala! Kusina kukakanya, kueza cwalo kuka mitusa hahulu kuba muutwi ni muezi wa Linzwi la Mulimu. w24.09 4-5 ¶9-10

Jehova ulubupile ni buikoneli bobuipitezi. Nihaike kuli lwabanga ni tabo halufiwa, lubanga ni tabo yetuna hahulu halufa babañwi. Luikutwanga hande halutusa mizwale ni likaizeli baluna. Mi lwatabanga hababonisa buitebuho. Niteñi, ibe kuli mutu yelutusize wabonisa buitebuho kamba kutokwa, lwakona kuba ni tabo kakuli luezize sesilukile. Kamita muhupulange kuli “Jehova wakona [kumifa] zeñata hahulu” kufita zemukona kufana. (2 Makol. 25:9) Halukoni feela kufita Jehova kwa bufani! Mi hakuna nto yekona kulutahiseza tabo yetuna, kufita kukutisezwa ki Jehova kasibili. Kacwalo, haike luikatulele kuzwelapili kulikanyisa Ndataa luna ya kwa lihalimu yanani bufani. w24.09 31 ¶20-21

Jehova unani sishemo ni mukekecima. (Samu 103:13; Isa. 49:15) Unani kutwelo-butuku, ili kutalusa kuli haluutwa butuku, ni yena wautwanga butuku. (Zak. 2:8) Ulutusanga kumuziba hande ni kuba balikani bahae. (Samu 25:14; Lik. 17:27) Mi waikokobeza; ‘wainamanga kuli abone lihalimu ni lifasi, ni kuzwisa wa mayemo a kwatasi mwa liluli.’ (Samu 113:​6, 7) Lubata kufa kanya ku Mulimu waluna yomutuna kabakala mabaka ao kaufela. Lufanga Jehova kanya bakeñisa kuli lubata kuli babañwi bamuzibe. Batu babañata habazibi niti ka za Jehova. Libaka? Bakeñisa kuli Satani ufoufalize minahano yabona ka kuhasanya litaba zemaswe hahulu ka za Jehova. (2 Makor. 4:4) Satani ukolwisize batu kulumela kuli Jehova ki Mulimu yasituhu, yasaisi batu pilu ni kuli ki yena yatahisize manyando amañata olubona mwa lifasi. Kono luna lwaziba niti ka za Mulimu waluna! Lunani tohonolo ya kutusa batu kuziba niti ka za Mulimu waluna, mi halueza cwalo, lumufa kanya.—Isa. 43:10. w25.01 3 ¶6-7

Mwa linako za baapositola, batu bane baswalisana ni Satani nebabulezi litaba za buhata zeñata ka za Mwanaa Mulimu yapetahalile, ili yanaaeza limakazo. Ka mutala, baeteleli ba bulapeli nebabulelezi batu kuli Jesu naaleleka madimona ka maata a “mubusi wa madimona.” (Mare. 3:22) Ka nako yanaazekiswa Jesu, baeteleli ba bulapeli neba mutamelelize kuli naanyefuzi Mulimu mi basusueza batu kuli bakupe kuli abulaiwe. (Mat. 27:20) Hasamulaho, ili ka nako yene bakutaza taba yende balateleli ba Jesu, bane babalwanisa “bashemaeta ni kutahisa kuli batu” balwanise Bakreste bao. (Lik. 14:​2, 19) Tora ya ku Libelela ya December 1, 1998, neibulezi ka za taba yeo kuli: “Balwanisi ba Majuda nebasika hana feela lushango, kono hape nebazwezipili kusawana kai ni kai, kulika kususueza ba macaba kuketulula Bakreste.” Kacenu, Satani uzwelapili ‘kukelusa lifasi kaufela.’ w24.04 11 ¶15-16

Kolo ya kupila kuya kuile, haisika itinga fa nako yashwa mutu. Jehova ki Muatuli yapetahalile, mi kamita uezanga likatulo zelukile. (Samu 33:​4, 5) Lwakona kukolwa kuli “Muatuli wa lifasi kaufela” ukaeza sesilukile. Hape kwaswanela kubulela kuli kolo ya kupila kuya kuile, haisika itinga kwa sibaka kwapila mutu. Jehova haana kuatula batu babañata-ñata sina “lipuli” ka libaka feela la kuli nebapila mwa linaha mone basina kolo ya kuutwa lushango lwa Mubuso. (Mat. 25:46) Muatuli wa lifasi kaufela yalukile ulata hahulu batu bao kufita molu balatela. Haluzibi mwaka zamaiseza lika Jehova ka nako ya ñalelwa yetuna. Mwendi babañwi kwa batu bao bakaba ni kolo ya kuituta ka za Jehova, kuba ni tumelo ku yena, ni kuba kwa lineku lahae hakakenisa libizo lahae fapilaa macaba kaufela.—Ezek. 38:16. w24.05 12 ¶14-15

Batanga ba Jehova balata kutusana. (2 Makor. 8:4) Kono fokuñwi batokwa kuba ni bundume kuli baeze cwalo. Ka mutala, hakuba ni ndwa, baana-bahulu balemuhanga kuli mizwale ni likaizeli babona batokwa kususuezwa ni kutusiwa kufumana zebatokwa kwa moya ni kwa mubili. Bakeñisa kuli baana-bahulu balata mizwale ni likaizeli babona, babeyanga bupilo bwabona mwa lubeta kuli babatuse kufumana zebatokwa. Mwa miinelo yecwalo, ki kwa butokwa hahulu kuzwelapili kuswalisana. Mulatelele ketelelo yemufiwa ki ofisi ya mutai ya mwa sibaka samina. (Maheb. 13:17) Baana-bahulu baswanela kunyakisisanga kamita litukiso za mwa kuitukiseza likozi hamohocwalo ni ketelelo yezwa kwa kopano yebonisa za kueza haiba kukulubelwa kuli kukaba ni kozi. (1 Makor. 14: 33, 40) Mube ni bundume ni maseme. (Liprov. 22:3) Munahanisise pili musika anga kale muhato. Musike mwa beya bupilo bwamina mwa lubeta ka bomu. Muitinge ku Jehova. Wakona kumitusa kuli musike mwakena mwa butata hamunze mutusa mizwale bamina. w24.07 4 ¶8; 5 ¶11

Mulena Davida naaziba Jehova mi naaitingile ku yena. Davida naalapezi ku Jehova kuli amutuse, lila zahae hane libata kumubulaya kukopanyeleza cwalo ni Mulena Saule. Mulimu hasaaalabile tapelo ya Davida ni kumulamulela, Davida naabulezi kuli: “Jehova wapila!” (Samu 18:46) Ka kubulela manzwi ao, Davida naasatalusi feela kuli Mulimu uteñi. Hatiso yeñwi ibulela kuli Davida hanaabulela manzwi ao naabonisa kuli naasepile Jehova “kuli ki Mulimu yapila yatusanga batu bahae kamita.” Zanaakopani ni zona Davida mwa bupilo bwahae neli mutusize kuziba kuli Mulimu wahae wapila, mi taba yeo nei mutusize kuzwelapili kusebeleza Jehova ni kumulumbeka. (Samu 18:​28, 29, 49) Kukolwa kuli Jehova ki Mulimu yapila kwakona kulutusa kumusebeleza ka kutukufalelwa. Kueza cwalo hape kuka lutusa kuba ni maata a kutiyela miinelo yetaata ni kuba ni takazo ya kusebeza ka taata mwa sebelezo yaluna ku Mulimu. Kutuha fo, lukaikatulela kuzwelapili kuba ni silikani sesinde ni Jehova. w24.06 20-21 ¶3-4

Ki lika mañi zelukona kuituta kwa manzwi ao muapositola Paulusi naañolezi Bakreste ba kwa Tesalonika? Haiba luutwa taba yesalumelelani ni litaba zeluitutile mwa Bibele kamba taba yekomokisa, luswanela kuba ni temuho. Mwa linaha zenebusiwa ki puso ya Soviet, lila zaluna nelihasanyize liñolo lene libonahala inge kuli nelizwa kwa ofisi yetuna yezamaisa musebezi waluna mwa lifasi kaufela. Liñolo leo nelisusueza mizwale babañwi kutoma kopano yeñwi yeicemezi. Liñolo leo nelibonahala inge kuli neli la niti. Kono mizwale babasepahala nebasika pumiwa. Nebalemuhile kuli litaba zenefumaneha mwa liñolo leo nelisa lumelelani ni litaba zene balutilwe. Kacenu, batu babalwanisa niti bakona kuitusisa zwelopili ya bumapanga-panga kuli balulyanganise ni kulukauhanya. Kufita kutuhelela “minahano [yaluna] kulyanganiswa ka bubebe,” lwakona kuisileleza ka kunyakisisa litaba zeluutwa ni zelubala ni kubona haiba zalumelelana ni litaba za niti zeluitutile.—2 Mates. 2:2; 1 Joa. 4:1. w24.07 12 ¶14-15

Katulo ya butokwa hahulu yakona kueza mutu ufi kamba ufi, ki kuneela bupilo bwahae ku Jehova ni kumulapela ka kuswalisana ni batanga bahae. Jehova ubata kuli batu kaufela baeze cwalo. Kabakalañi? Ubata kuli babe ni silikani sesinde ni yena ni kupila kuya kuile. (Deut. 30:​19, 20; Magal. 6:​7, 8) Nihakulicwalo, Jehova hahapelezi mutu ufi kamba ufi kumusebeleza. Ufile mutu ni mutu tukelo ya kuiketela za kueza. Kucwañi haiba Mukreste yakolobelizwe aloba mulao wa Mulimu ka kueza sibi sesituna? Haiba haalati kubaka, uswanela kuzwisiwa mwa puteho. (1 Makor. 5:13) Kono mane nihaiba mwa muinelo wo, Jehova ubanga ni sepo ya kuli muezalibi yo ukakutela ku yena. Mane libaka la butokwa lene litahisize kuli Jehova afe tiululo kikuli baezalibi bababakile bakone kuswalelwa. Mulimu waluna yalilato ususueza baezalibi kuli babake.—Zak. 1:3; Maro. 2:4; Jak. 4:8. w24.08 14 ¶1-2

Ka nako yeo muapositola Joani naañola liñolo lahae labulaalu, nekunani batu babañwi bane baluta lituto za buhata ni kutahisa lifapahano. Nihakulicwalo, babañwi nebazwezipili “kuzamaya mwa niti.” Nebautwile Jehova mi ‘nebazamaya ka milao yahae.’ (2 Joa. 4, 6) Bakreste babasepahala bao nebatabisize hahulu Joani mane ni Jehova. (Liprov. 27:11) Luitutañi? Kusepahala kutahisa tabo. (1 Joa. 5:3) Ka mutala, lunani tabo kakuli lwaziba kuli lutabisa Jehova. Watabanga haluamuhela niti ni kuhanyeza miliko ya lifasi le. Mangeloi a mwa lihalimu ni ona atabanga. (Luka 15:10) Ni luna lwakona kuba ni tabo halubona babañwi inze bazwelapili kusepahala. (2 Mates. 1:4) Mi lifasi la Satani halika sinyiwa, lukaba ni tabo kakuli neluzwezipili kusepahala ku Jehova. w24.11 12 ¶17-18

Muswanela kuziba hande mutu ka nako yekuma kai pili musika mutaluseza kale kuli mwamutabela? Haiba muatumela mutu yo honafo feela, ukona kunahana kuli hamunahanisisangi ka tokomelo pili musika eza kale likatulo. (Liprov. 29:20) Kono haiba mutu yomuñwi ulemuhile kuli mwamutabela mi muunga nako yetelele pili musika mutaluseza kale, ukona kunahana kuli muzina-zinanga hahulu kueza likatulo. (Muek. 11:4) Muhupule kuli, hamutokwi kuikolwisisa kuli mukanyalana ni mutu yomuñwi pili musika muatumela kale. Kono muswanela kuba ni buikolwiso bwa kuli muitukiselize luli kukena mwa linyalo ni kuli mutu yo ki yena luli yaswanela. Kono kucwañi haiba mulemuha kuli mutu yomuñwi wamitabela? Haiba mina hamu mutabeli, mubonise cwalo ka likezo zamina. Hakusika luka kubonisa inge kuli mwatabela kukena mwa libato ni mutu inze muziba kuli hamubati kueza cwalo luli.—Maef. 4:25. w24.05 22-23 ¶9-10

Bakreste babatozizwe baniti ni babasepahala ki bona feela baaka amuhela Jesu mwa Mubuso wa kwa lihalimu. Bakreste babatozizwe kaufela babapalelwa kuzwelapili kutona kwa moya habana kukubukanyiwa hamoho ni “baketiwa.” (Mat. 24:31) Kono Bakreste babanani sepo ya kuto pila fa lifasi, ni bona baswanela kuzwelapili kutona ni kusepahala. Lufitile fa kuziba hande Jehova; kacwalo, lusepile katulo yahae. Halubilaeli haiba Jehova uketile kutoza Bakreste babañwi babasepahala mwa lilimo za cwanoñu fa. Lwahupula zanaabulezi Jesu ka za babeleki bane bakeni ka hora yabu 11 mwa swanisezo yahae ya simu ya veine. (Mat. 20:​1-16) Bane bakalile kubeleka mwa simu ya veine ka kuliyeha ni bona nebaamuhezi tuwelo yeswana ni yene baamuhezi bane bakalile ka kuitahanela. Ka mukwa oswana, kusina taba ni nako fobatozezwa Bakreste babañwi, kaufelaa bona bakaamuhela mupuzo wabona wa kwa lihalimu haiba baatulwa kuli balukile. w24.09 24 ¶15-17

Jesu ulutomezi mutala omunde hahulu wa mwakuitiiseza haluezwa maswe. Halunyakisiseñi mwanaa ezelizwe maswe ki ba mwa lubasi lwahae ni batu babañwi. Ba lubasi lwahae bane basalumeli neba mutamelelize kuli watakana, baeteleli ba bulapeli neba mutamelelize kuli naasebelisana ni madimona, mi masole ba Maroma neba musheunuzi, kumunata, ni kumubulaya hasamulaho. (Mare. 3:​21, 22; 14:55; 15:​16-20, 35-37) Niteñi, Jesu naatiyezi kusaezwa hande koo mi naasika yolisa misuha. Lukona kuitutañi kwa mutala wahae? (1 Pit. 2:​21-23) Jesu ulutomezi mutala omunde hahulu wa moluswanela kuezeza haluezwa maswe. Naaziba nako ya kukuza ni nako ya kubulela. (Mat. 26:​62-64) Fokuñwi naakuzanga feela hanaatamelezwanga litaba. (Mat. 11:19) Hanaaketanga kualaba, naasatapaulangi bane bamunyandisa kamba kubabemba. w24.11 4-5 ¶9-10

Luunge kuli mufile mutu yemulata mpo yeipitezi, ili yende ni yekona kumutusa. Mukaikutwa hahulu bumaswe haiba mutu yo abeya feela mpo yeo mwa sibulukelo ni kusaisa kwateñi pilu. Kono mukataba haiba mutu yo aitusisa hande mpo yeo ni kubonisa kuli waitebuha yona. Sisupo ki sifi? Jehova ufile Mwanaa hae kabakala luna. Jehova ubanga ni tabo yetuna halubonisa buitebuho kwa mpo ya butokwa hahulu yeo ni kwa lilato lahae, ili lene limususuelize kufa tiululo! (Joa. 3:16; Maro. 5:​7, 8) Kono nako hainze iya, lwakona kukala kutuhela kuitebuha hahulu tiululo. Haiba kuba cwalo, kukaswana feela sina kubeya mpo ya Mulimu mwa sibulukelo. Lwatabela mpo yeo, kono haluisi pilu kwateñi. Kuli taba yeo isike yaezahala, luswanela kunahanisisanga kamita ka za lika kaufela zaluezelize Mulimu ni Kreste. w25.01 26 ¶1-2

Muzwale yakwanisize zetokwahala kuli abe muuna-muhulu haki mutu yasazo lumela. Nihaike kuli hakuswaneli kufita lilimo zeñata kuzwa fomukolobelezwa, mutokwa nako kuli mube Mukreste yahulile kwa moya. Ka kuswana ni Jesu, pili musika ketiwa kale kuba muuna-muhulu, muswanela kuba ni buikokobezo ni pilu-telele hamunze mulibelela ku Jehova kuli mufiwe buikalabelo. (Mat. 20:23; Mafil. 2:​5-8) Mwakona kubonisa kuli mwasepahala ka kukumalela ku Jehova ni kupila ka likuka zahae zelukile ni ka kulatelela ketelelo yalufa ka kuitusisa kopano yahae. Mañolo abonisa hande kuli muokameli uswanela kuba yakona kuluta batu. Kana fo kutalusa kuli muswanela kuba mubuleli yomunde hahulu? Batili. Nihaike kuli baana-bahulu babañata haki babuleli babande luli, ki bakutazi babande mi banani buikoneli bwa kueza misipili ya bulisana. w24.11 23-24 ¶14-15

Haiba mufumana taba yemusa utwisisi hande mwa Bibele, mueze lipatisiso. Mi mwahalaa lizazi, munahanisise lika zenca zemuitutile ka za Jehova, Mwanaa hae ni ka za lilato labona ku mina. (Samu 119:​97, ni litaluso ze kwatasi) Musike mwazwafa haiba musafumani lika zenca kamba zetabisa nako kaufela hamubala kamba kueza lipatisiso. Ka mubulelelo omuñwi, muswana sina mutu yabata gauda. Hañata, mutu yabata gauda utandanga lihora zeñata kamba mane mazazi kuli aifumane. Kono uzwelangapili kubata ka pilu-telele kakuli waziba kuli gauda yakafumana, nihaike kuli ki yenyinyani hahulu, ki ya butokwa hahulu ku yena. Kono nto yenca kaufela yeluituta mwa Bibele ki ya butokwa hahulu kufita gauda! (Liprov. 8:10) Kacwalo, mube ni pilu-telele mi mukumalele kwa tomahanyo yamina ya kubala Bibele.—Samu 1:2. w25.01 25 ¶14-15

Jehova ubata kuli luswalele baba lufoselize. (Samu 86:5; Luka 17:4; Maef. 4:32) Lukona kuutwa hahulu butuku kwa pilu haiba mutu yomuñwi alufoseza ka lipulelo kamba ka likezo, sihulu haiba mutu yo ki mulikanaa luna yomutuna kamba ki yomuñwi wa mwa lubasi lwaluna. (Samu 55:​12-14) Ka linako zeñwi, butuku boluutwanga bukona kuswanisezwa kwa kutabiwa nto yeñwi. (Liprov. 12:18) Lwakona kutibela maikuto aluna kamba kueza inge kuli halusika utwa butuku. Kueza cwalo kuswana feela inge kuli lutabilwe tipa mi tipa yeo haicomolwi fa sitombo. Ka nzila yeswana, haluswaneli kulibelela kuli butuku boluutwa bukafela haiba lutibela maikuto aluna. Mutu yomuñwi halufoseza, mwendi nto yapili yelukona kueza ki kunyema. Bibele ibonisa kuli lwakona kufilikana. Nihakulicwalo, ilulemusa kuli haluswaneli kuzwelapili kufilikana. (Samu 4:4; Maef. 4:26) Kabakalañi? Kakuli hañata luezanga lika ka kuya ka moluikutwela. Mi zezwanga mwa bunyemi hañata halibangi zende. (Jak. 1:20) Muhupule kuli mutu yomuñwi halufoseza lwakona kunyema, kono lunani maata a kuiketela kuzwelapili kunyema kamba kutokwa. w25.02 15 ¶4-6

Jesu naabulezi likande lelibonisa kuli mutu yaikubukanyeza masheleñi kono “hasika fumela ku Mulimu,” ki sitoto. (Luka 12:​16-21) Hakuna yaziba za kamuso. (Liprov. 23:​4, 5; Jak. 4:​13-15) Kunani butata bolukopana ni bona ka kuba balateleli ba Kreste. Jesu naabulezi kuli luswanela kuitukiseza ‘kuitoboha’ maluwo aluna kaufela kuli lube balutiwa bahae. (Luka 14:33) Bakreste ba mwa linako za baapositola bane bapila mwa Judea nebaitobohile maluwo abona ka tabo. (Maheb. 10:34) Mwa linako zaluna, mizwale babañata balatehezwi ki maluwo abona kabakala kuhana kuikenya mwa litaba za lipolitiki. (Sin. 13:​16, 17) Ki lika mañi zebatusize kueza cwalo? Basepile hahulu sepiso ya Jehova yeli: “Hanina kumisiya nikamuta, mi hanina kumiyubeka nikamuta.” (Maheb. 13:5) Lwaikatazanga kuitukiseza miinelo ya kwapili, kono halukopana ni muinelo osika libelelwa, lwasepanga Jehova kuli uka lutusa. w25.03 29 ¶13-14

Jehova halibeleli kuli lukahula kwa moya kaili luna. Babasebeza sina balisana ni baluti mwa puteho ya Sikreste baitukiselize kulutusa ‘kuhula’ kwa moya kuli “lufite fa tikanyo yekwanile ya siyemo sanaafitile ku sona Kreste.” (Maef. 4:​11-13) Jehova hape ulufanga moya wahae okenile kuli alutuse kuba ni “munahano wa Kreste.” (1 Makor. 2:​14-16) Kutuha fo, Mulimu naatahisize kuli Libuka za Evangeli zeene liñolwe ilikuli luzibe mwanaanahanela Jesu, zanaabulezi, ni zanaaezize ka nako ya bukombwa bwahae bwa fa lifasi. Haiba mulikanyisa mwanaanahanela Jesu ni mwanaaezezanga lika, mukakona kupeta sikonkwani samina sa kuba Mukreste yahulile kwa moya. Kono kuli luhule kwa moya, luswanela kusiya “tuto ya makalelo ya za Kreste,” ili kutalusa lituto za matatekelo za Sikreste. w24.04 4-5 ¶11-12

Zazi ni zazi lutokwanga kueza likatulo. Kulubelanga bunolo kueza likatulo zeñwi, inge cwalo kuatula kuli lukakushukañi kamba lukalobala nako mañi. Kono likatulo zeñwi litaata hahulu kulieza. Likatulo zelueza zakona kuama buikangulo bwaluna, tabo yaluna, balatiwa baluna, kamba sebelezo yaluna ku Jehova. Lubata kuli likatulo zaluna lilutuse ni kutusa lubasi lwaluna. Kono sa butokwa nikufita kikuli, lubata kuli likatulo zaluna litabise Jehova. (Maro. 12:​1, 2) Muhato wa butokwa okona kulutusa kueza katulo yende ki kuziba litaba kaufela. Ki kabakalañi kueza cwalo hakuli kwa butokwa? Luunge kuli mutu yakula butuku bobutuna uizo kupa tuso ku mualafi. Kana mualafi yo wakona kueza katulo ka za kalafo yaswanela kufiwa mukuli yo pili asika mutatuba kale kamba kumubuza lipuzo? Kutokwa nihanyinyani. Ni mina mukaeza katulo yende haiba munyakisisa pili ka tokomelo litaba zeama muinelo omuli ku ona. w25.01 14 ¶1-3

Ki lika mañi zeluziba ka za sishemo sa Jehova? Ubonisize cwañi kuli “hatabeli kuli mutu ufi kamba ufi atimezwe”? (2 Pit. 3:9) Halunyakisiseñi mwanaaboniselize sishemo kwa batu babañwi bane baezize libi zetuna. Mulena Davida naaezize libi zetuna, zecwale ka bubuki ni bubulai. Niteñi, Davida naabakile mi Jehova naamubonisize sishemo ka kumuswalela. (2 Sam. 12:​1-12) Mulena Manase naaezize lika zemaswe hahulu ka lilimo zeñata. Kono kusina taba ni zeo, Jehova naabonisize muuna yo sishemo ka kumuswalela bakeñisa kuli naabakile. (2 Makol. 33:​9-16) Mitala yeo iluhupulisa kuli Jehova wabonisanga sishemo hakunani libaka la kueza cwalo. Ukazusa batu babacwalo bakeñisa kuli nebalemuhile kuli nebaezize libi zetuna mi nebabakile. w24.05 4 ¶12