Lisamu 18:1-50
Ku muzamaisi wa lipina. Samu ya Davida, mutangaa Jehova, yanaabulelela Jehova manzwi a pina ye, ka lizazi lanaa mulamulezi Jehova mwa lizoho la lila zahae kaufela ni mwa lizoho la Saule. Naaize+
18 Nakulata Jehova, wena maata aka.+
2 Jehova ki licwe laka ni musilelezi waka mi ki Yena yanilamulela.+
Mulimu waka ki licwe laka,+ nisabela ku yena,Ki tebe yaka mi ki lunaka* lolu nipilisa,* ki masabelo aka atiile.*+
3 Nihuweleza ku Jehova, yaswanela kulumbekwa,Mi nikapiliswa kwa lila zaka.+
4 Nenipotolohilwe ki mihala ya lifu;+Baana babasina tuso bane bataha sina mezi a muunda neba nisabisize.+
5 Nenitamilwe ki mihala ya Libita;*Naipumana mwa malaba a lifu.+
6 Nenihuwelelize ku Jehova hane niziyelehile,Nazwelapili kuhuweleza ku Mulimu waka kuli anituse.
Autwa linzwi laka inzaa li mwa tempele yahae,+Mi autwa ni sililo saka sa kukupa tuso ku yena.+
7 Cwale lifasi lakala kunyanganya ni kuzikinyeha;+Mitomo ya malundu yazikinyehaMi yanyungana kabakala kuli naahalifisizwe.+
8 Mwa lingo zahae kiha kuzwa musi,Mi mwa mulomo wahae kwazwa mwateñi mulilo ocisa;+Mashala aatuka azwa ku yena.
9 Hanaashetumuka, akopamisa mahalimu,+Mi lilu lelinsu nelili kwatasaa mahutu ahae.+
10 Azulama kerubimi mi ataha inzaa fufa.+
Ashetumuka ka lubilo inzaa li fa mafufa a sibupiwa sa moya.*+
11 Kihona aikwahela ka lififi,+Lamubeya mwahali sina tende,Ni ka mezi amansu ni malu amakima.+
12 Mwa liseli lene lili fapilaa haeKwazwa mwateñi simbwewewe ni mashala aatuka, zapunya malu.
13 Cwale Jehova apalakata sina mushika mwa mahalimu;+Yapahami ka Kufitisisa autwahaza linzwi lahae+Ka simbwewewe ni mashala aatuka.
14 Akunupa masho ahae mi abahasanya;+Aluma lumonyi lwahae mi abalyanganisa.+
15 Lilaho la linukana* labonahala;+Mitomo ya naha yapatuluha ka kalimelo yahao, wena Jehova,Yapatuluha ka buhali bwa moya ozwa mwa lingo zahao.+
16 Aotolola lizoho lahae ali kwahalimu;Aniswala ni kunicimbula mwa mezi amañata.+
17 Anilamulela kwa sila saka sesimaata,+Kwa batu babanitoile, bane banifita kwa maata.+
18 Neba nitaselize ka lizazi lene nili mwa kozi,+Kono Jehova anitusa.
19 Anitisa mwa sibaka mokusina kozi;*Anilamulela bakeñisa kuli naanitabela.+
20 Jehova unifa mupuzo kulikana ni kuluka kwaka;+Unifa mupuzo kulikana ni kutokwa mulatu* kwa mazoho aka.+
21 Kakuli nimamezi linzila za Jehova,Mi hanisika eza kezo yemaswe ya kufulalela Mulimu waka.
22 Likatulo zahae kaufela li fapilaa ka;Hanina kutula milao yahae.
23 Nikazwelapili kuba yasanyazahali fapilaa hae,+Mi nikatokomela kuli hanifosi.+
24 Haike Jehova anife mupuzo kulikana ni kuluka kwaka,+Kulikana ni kutokwa mulatu kwaka fapilaa hae.+
25 Yasepahala umueza ka kusepahala;+Yasina mulatu haumufi mulatu;+
26 Ku yakenile ubonisa kukena kwahao,+Kono ku yamaswe ubonisa butali bwahao.+
27 Kakuli upilisa ba mayemo a kwatasi*+Kono ukokobeza babaikuhumusa.*+
28 Kakuli wena Jehova ki wena yatukisa lambi yaka,Mulimu waka yanimonyehela mwa lififi leli niapesize.+
29 Ka tuso yahao, nakona kulwanisa mpi ya bahapi;+Ka maata a Mulimu nakona kupahama limota.+
30 Nzila ya Mulimu wa niti ipetahalile;+Linzwi la Jehova likenile.+
Ki tebe kwa batu kaufela babasabela ku yena.+
31 Kakuli ki mañi Mulimu yomuñwi kwandaa Jehova?+
Mi ki mañi licwe yomuñwi kwandaa Mulimu waluna?+
32 Mulimu wa niti ki yena yaniapesa maata,+Mi ukapetahalisa nzila yaka.+
33 Ufa mahutu aka lubilo loluswana ni lwa lizwii;Uniyemisa fa libaka zelumbile.+
34 Uluta mazoho aka mwakulwanela;Mazoho aka akona kuhoha buta bwa kopa.
35 Unifa tebe yahao yeenipilisa,+Lizoho lahao la bulyo ki lona leli nitusa,*Mi buikokobezo bwahao bunibisa yomutuna.+
36 Uhulisa nzila mwahata mahutu aka;Mahutu aka haana* kutelela.+
37 Nikandongwama lila zaka ni kuliswala;Hanina kukuta kufitela niliyundisa.
38 Nika litubaka kuli lisike zazuha hape;+Likawela mwatasaa mahutu aka.
39 Uka nifa maata kuli nikone kulwana;Ukawiseza lila zaka mwatasaa ka.+
40 Ukatahisa kuli lila zaka lisabe fapilaa ka,*Mi nikayundisa* baba nitoile.+
41 Balilela kutusiwa, kono hakuna yabapilisa;Mane balilokela Jehova, kono haabaalabi.
42 Nika basita, kubaeza busisani sina liluli leli mwa moya;Nika banepaka sina sileze sa mwa linzila.
43 Uka nilamulela kwa batu bababata kufumana mulatu ku na.+
Uka niketa kuba toho ya macaba.+
Batu benisa zibi baka nisebeleza.+
44 Zebaka utwa likatahisa kuli baniutwe;Bazwahule bakato koza fapilaa ka.+
45 Bazwahule bakafelelwa ki bundume;*Bakataha inze bangangama kuzwa kwa libaka zabona za silelezo.
46 Jehova wapila! Kulumbekwe Licwe laka!+
Haike Mulimu yanipilisa apahamiswe.+
47 Mulimu wa niti ukutiseza bumaswe baba nieza maswe;+Ukokobeza macaba mwatasaa mahutu aka.
48 Unilamulela kwa lila zaka zehalifile;Ki wena yanipahamisa fahalimwaa baba nilwanisa;+Ki wena yanipilisa ku mutu wa lindwa.
49 Ki lona libaka hanika kukanyisa mwahalaa macaba, wena Jehova,+Mi nikaopelela libizo lahao milumbeko.+
50 Uezeza mulena yaaketile likezo zetuna za kupilisa;*+Ubonisa lilato lelisa feli ku mutoziwa wahae,+Ku Davida ni kwa bana* bahae kuya kuile.+
Litaluso ze kwatasi
^ Mubone Litaluso za Manzwi.
^ Kamba “mi ki mupilisi waka yamaata.”
^ Kamba “sibaka sesilumbile sa silelezo.”
^ Kamba “Sheoli,” fo kikuli, sibaka sa swanisezo sa babashwile. Mubone Litaluso za Manzwi.
^ Kamba “inzaa li fa moya.”
^ Kamba “Mikokolombwa ya mezi.”
^ Kamba “sibaka sesituna.”
^ Linzwi ka linzwi, “ni kukena.”
^ Kamba “babanyandile.”
^ Linzwi ka linzwi, “meeto aikuhumusa.”
^ Kamba “leli nitiisa.”
^ Kamba “Lingongo za mahutu aka halina.”
^ Kamba “Uka nifa mukokoto wa lila zaka.”
^ Linzwi ka linzwi, “nikakuzisa.”
^ Kamba “bakafokola.”
^ Kamba “litulo zetuna.”
^ Linzwi ka linzwi, “peu.”
