Luswanela kuzwelapili kuikataza kuhula kwa moya mi haluswaneli kukutela mwamulaho. Taba yeo italusa kuli haluswaneli kunahana kuli kikale luhula kwa moya mi halusa tokwa kuikataza kueza zwelopili ya kwa moya. (1 Makor. 10:12) Luswanela ‘kuzwelapili kuitekula’ kuli lubone haiba lusweli lwahula kwa moya. Muapositola Paulusi hape naakoñomekile butokwa bwa kuzwelapili kuhula kwa moya mwa liñolo lanaañolezi Bakreste ba mwa Kolose. Nihaike kuli neli Bakreste babahulile kwa moya, Paulusi naabaelelize kuli batokomele kuli basike bapumiwa ki mibonelo ya batu ba mwa lifasi. (Makolo. 2:​6-10) Epafrasi, ili yo mwendi naaziba hande batu ba mwa puteho yeo, naakuta-kutezi kubalapelela kuli ‘kwa mafelelezo bayeme bali babatiile,’ kamba kuli bahule kwa moya. (Makolo. 4:12) Luitutañi kwa taba yeo? Paulusi ni Epafrasi nebaziba kuli, mutu kuli afite fa kuhula kwa moya, utokwa kuikataza ni kutusiwa ki Mulimu. Nebabata kuli Bakreste ba mwa Kolose bazwelepili kuhula kwa moya kusina taba ni miinelo yetaata yene bakopana ni yona. w24.04 6-7 ¶16-17

Kusaba Jehova kutalusa kumulata hahulu kuli mane halukoni kueza nto ifi kamba ifi yesa mutabisi. Lunyolezwi hahulu kuziba shutano ye mwahalaa lika zelukile ni zesika luka, ye mwahalaa niti ni litaba za buhata, ilikuli lutabise Jehova. (Liprov. 2:​3-6; Maheb. 5:14) Haiba lusaba hahulu batu kufita Mulimu, kukona kulubela hahulu bunolo kukeluha mwa niti. Halunyakisiseñi mutala wa manduna ba 12 bane baizo twela naha yeo Jehova naasepisize kuifa kwa Maisilaele. Kono matwela baalishumi, nebasaba hahulu Makanana kufita mone balatela Jehova. Nebabulelezi Maisilaele babañwi kuli: “Halukoni kukambama kuyo lwanisa batu ba, kakuli bamaata kulufita.” (Num. 13:​27-31) Ki niti kuli ka kuya ka mubonelo wa batu, Makanana nebanani maata. Kono kubulela kuli Maisilaele nebasike bakona kutula lila zabona, nekubonisa kuli nebasa sepi Jehova. w24.07 9 ¶5-6

Kana lwakona kukolwa ka kutala kuli Jehova kamita uatulanga batu ka kuluka? Eni! Abrahama naautwisisa hande hahulu kuli Jehova ki yena “Muatuli wa lifasi kaufela” ni kuli upetahalile, hakuna yamufita kwa butali, mi unani sishemo. Ulutile Mwanaa hae mi umufile musebezi kaufela wa kuatula. (Joa. 5:22) Jehova ni Mwanaa hae baziba ze mwa pilu ya mutu ni mutu. (Mat. 9:4) Kacwalo, bakaeza “sesilukile” habaka atula mutu ni mutu! Haike luikatulele kusepa Jehova ni kukolwa kuli likatulo zahae ki zende hahulu. Lwaziba kuli ki yena feela yaswanela kuatula, luna haluna maata a kueza cwalo! (Isa. 55:​8, 9) Kacwalo, lusiya litaba kaufela za buatuli mwa mazoho a Jehova ni Mwanaa hae, yena Mulena yalikanyisa ka kutala sishemo ni katulo yelukile ya Ndatahe.—Isa. 11:​3, 4. w24.05 7 ¶18-19

Lwakona kuituta butokwa bwa kubulelanga niti mwa lipilu zaluna ku zeneezahezi Jesu hakopana ni Natanaele lwapili. Filipi hanaaisize mulikanaa hae Natanaele ku Jesu, nekuezahezi nto yeñwi yekomokisa. Nihaike kuli lo neli lona lwapili Jesu hakopana ni Natanaele, naabulezi kuli: “Hamubone Muisilaele yo kusina bupumi ku yena.” (Joa. 1:47) Jesu naalemuhile kuli Natanaele naasepahala hahulu nikufita. Ka kuswana ni luna, Natanaele naasika petahala. Kono naasi muipumisi mi naasepahala mwa lika kaufela. Jesu naatabisizwe ki nto yeo mi naababalize Natanaele. Buñata bwa lika zeluswanela kueza kuli lutabise Jehova ili zekolohanyizwe kwa Samu 15, libonisa moluswanela kupilisanela ni babañwi. Samu 15:3 ibulela kuli muenyi mwa tende ya Jehova “haasawani mutu ka lulimi lwahae, haaezi maswe mutu yomuñwi, mi haasinyi balikani bahae libizo.” Kusaitusisa hande mpo yaluna ya kubulela kukona kutahiseza babañwi butata bobutuna.—Jak. 1:26. w24.06 10 ¶7, 9; 11 ¶10

Haiba muitukiseza hande pili musikaya kale mwa bukombwa, hamuna kuikalelwa hahulu hamuka ambola ni batu. Jesu naatusize balutiwa bahae kuitukiseza hande pili asika baluma kale mwa bukombwa. (Luka 10:​1-11) Bakeñisa kuli nebasebelisize zanaa balutile Jesu, nebakonile kupeta lika zende zeñata mwa bukombwa mi nebabile ni tabo yetuna Lukona kuitukiseza cwañi pili lusikaya kale mwa bukombwa? Luswanela kunahanisisa molukona kutaluseza hande litaba za niti ka manzwi aluna. Hape lukatusiwa hahulu haiba lunahanisisa lika zepeli kamba zetaalu zebakona kubulela kamba kueza batu ba mwa kalulo yaluna ya simu ni kulelela cimo zeluka eza mwa miinelo yeo. Mi haluatumela batu, luswanela kuikataza kuwa pilu, kumenya, ni kubonisa silikani. w24.04 16 ¶6-7

Libaka la butokwa hahulu halukutazanga taba yende, kikuli lwalata Jehova Mulimu ni libizo lahae lelikenile. Luunga bukombwa bwaluna sina nzila ya kulumbeka ka yona Mulimu yelulata. Lwalumela ka pilu yaluna kaufela kuli Jehova Mulimu waswanela kufiwa kanya, likute, ni maata ki batanga bahae babasepahala. Lumufa kanya ni likute halutaluseza babañwi bupaki bobukolwisa bwa kuli ‘naabupile lika kaufela’ ni kuli ki yena yalufile bupilo. Lumufa maata, ona maata aluna, haluitusisa nako yaluna ni lika zelunani zona kuli luabane mwa bukombwa ka kutala kulikana ni miinelo yaluna. (Mat. 6:33; Luka 13:24; Makolo. 3:23) Ka mubulelelo omuñwi, lwalata kubulelela batu ka za Mulimu yelulata. Hape lususuezwanga kutaluseza babañwi ka za libizo lahae ni zelitalusa. w24.05 17 ¶11

Jehova ulufa kozo ni tabo ka nako ya cwale mi uka lufa bupilo bobusa feli kwapili. Lwakona kusepa Jehova ka kutala ni kuba ni buikolwiso bwa kuli walata luli kulufa mupuzo mi unani maata a kueza cwalo. Mi kuba ni buikolwiso bo kulususueza kueza zeñata mwa sebelezo yaluna ku Mulimu, sina feela mone baezelize batanga bahae babasepahala ba kwamulaho. Zeo ki zona zanaaezize Timotea yanaapilile mwa linako za baapositola. (Maheb. 6:​10-12) Timotea naasepile Mulimu yapila. (1 Tim. 4:10) Kacwalo, naanani libaka leliswanela la kusebeleza Jehova ka taata ni kutusa babañwi. Naaezize cwañi cwalo? Muapositola Paulusi naamususuelize kueza zwelopili kuli abe muluti yomunde mwa bukombwa ni mwa puteho. Timotea hape naatokwa kuba mutala omunde kwa mizwale ni likaizeli bahae, ibe kuli neli babahulu kamba banana. Mi naafilwe misebezi yetaata, yenekopanyeleza kufa kelezo yenongile kono ili yelilato hane kutokwahala. (1 Tim. 4:​11-16; 2 Tim. 4:​1-5) Timotea naanani buikolwiso bwa kuli Jehova naaka mufa mupuzo.—Maro. 2:​6, 7. w24.06 22-23 ¶10-11

Jehova hañata naaitusisanga bapolofita kuli alemuse ni kusikulula batu bahae. Ka mutala, Mulimu ka kuitusisa Jeremia, naabulezi kuli: “Ukute, wena Isilaele yakwenuhile . . . Hanina kukutalima ka buhali, kakuli nasepahala . . . Hanina kuhalifa kuya kuile. Feela uitumelele mulatu wahao, kakuli ufetuhezi Jehova.” (Jer. 3:​12, 13) Ka kuitusisa Joele, Jehova naabulezi kuli: “Mukutele ku na ka lipilu zamina kaufela.” (Joe. 2:​12, 13) Naasusuelize Isaya kubulela kuli: “Muikenise; muzwise likezo zamina zemaswe fapilaa ka; mutuhele kueza zemaswe.” (Isa. 1:​16-19) Mi ka kuitusisa Ezekiele, Jehova naabuzize kuli: “Kana nitabela lifu la mutu yamaswe? . . . Kana hanitabeli kuli atuhele linzila zahae mi azwelepili kupila? Hanitabeli lifu la mutu ufi kamba ufi, . . . kabakaleo, musikuluhe mi mupile.” (Ezek. 18:​23, 32) Kaniti, Jehova watabanga hahulu kubona batu hababaka kakuli ubata kuli bapile kuya kuile! w24.08 9 ¶5-6

Batu ba Mulimu kaufela baamuhela lico za kwa moya, ketelelo, ni silelezo yebatokwa. Mutala obonisa kuli Jehova haana ketululo kikuli ukonahalisize kuli mañi ni mañi mwa lifasi kaufela abe ni kolo ya kuipalela Bibele. Kwa makalelo, Mañolo A Kenile naañozwi mwa lipuo zetaalu, ili Siheberu, Siarami, ni Sigerike. Kana batu babakona kubala Bibele mwa lipuo zeo banani silikani sesitiile ni Jehova kufita babasa koni kuibala mwa lipuo zeo? Batili! (Mat. 11:25) Jehova haasika lumema ka libaka la kuli luitutile hahulu kamba kutokwa, kamba kuli lwaziba lipuo za kwa makalelo zene liitusisizwe kwa kuñola Bibele. Kono uzibahalize butali bwahae kwa batu kaufela ibe kuli baitutile hahulu kamba kutokwa. Linzwi lahae, yona Bibele, litolokilwe mwa lipuo zeñata-ñata, ili kufa batu kaufela kolo ya kutusiwa ki lituto ze mwateñi ni kuziba zekona kubatusa kuba balikani bahae.—2 Tim. 3:​16, 17. w24.06 6-7 ¶13-15

Kusinyiwa kwa Jerusalema ili kwa naapolofitile Jesu nekuatumela. Kacwalo Bakreste nebatokwa kuitusisa nako yene isiyezi yeo kuitukiseza ili kutiisa hahulu tumelo yabona ni kuba ni buitiiso. (Maheb. 10:25; 12:​1, 2) Lutuha lukopana ni ñalelwa yetuna hahulu kufita yene bakopani ni yona Bakreste ba Maheberu. (Mat. 24:21; Sin. 16:​14, 16) Munyakisiseñi zeñwi za likelezo zanaafile Jehova kwa Bakreste bao ili zekona kulutusa ni luna. Muapositola Paulusi naasusuelize Bakreste bao kuli baitute ka tokomelo Linzwi la Mulimu ni kulinahanisisa. (Maheb. 5:14–6:1) Ka kuitusisa Mañolo A Siheberu, Paulusi naatusize mizwale bahae kuutwisisa kuli nzila yene balapela ka yona Bakreste neifitela kwahule nzila yene balapela ka yona Majuda. Paulusi naaziba kuli Bakreste hane bakaekeza kwa zibo yabona ni kuutwisisa hande litaba za niti, nebaka lemuha mihupulo ya buhata ni kuihanyeza ilikuli basike bakeluswa. w24.09 8-9 ¶2-3; 10 ¶6

Balutiwa ba Jesu nebatokwa kususuezwa. Kabakalañi? Babañwi nebasiile mandu abona, mabasi, ni lipisinisi zene baezanga ilikuli balatelele Jesu. (Mat. 19:27) Babañwi nebasa ezwi hande bakeñisa kuli nebabile balutiwa ba Jesu. (Joa. 9:22) Nebaezize buitomboli bo bakeñisa kuli nebaziba kuli Jesu neli yena Mesia yanaasepisizwe. (Mat. 16:16) Kono Jesu hanaashwile, nebanahanile kuli lika zene balibelela nelisike zaezahala. Kusina kukakanya, Jesu naalemuhile kuli balutiwa bahae nebali mwa maswabi kabakala kuli nebashwezwi isiñi kabakala kuli tumelo yabona neifokola. Kacwalo, fa lizazi luli lanaazusizwe kwa bafu, akala kususueza balikani bahae. Ka mutala, naabonahezi ku Maria Magdalena yanaalila inzaa yemi kwa libita la Jesu. (Joa. 20:​11, 16) Hape naabonahezi kwa balutiwa bababeli bane bazwa mwa munzi wa Emausi. Mi naabonahezi ku muapositola Pitrosi. w24.10 13 ¶5-6

Bashemi mutuse mwanaa mina kuitukiseza kuyemela tumelo yahae ku Mubupi. Kwakona kutusa haiba munyakisisa hamoho litaba ze fa jw.org zebonisa kuli lika zepila nelibupilwe. Mi cwale munyakisise mwakona kutaluseza litaba zeo mwanaa mina ka nzila yekona kutahisa kuli babañwi balumele kuli kunani Mubupi. Mumususueze kutalusa lika ka nzila yebunolo ni yeutwahala haiba mutu yomuñwi watabela kuteeleza. Ka mutala, mwanaa sikolo yomuñwi wakona kubulela kuli: “Nikona feela kulumela lika zenibona, mi hanisika bona kale Mulimu.” Mukreste yasali yomunca ukona kualaba kuli: “Uunge kuli usweli wazamaya mwa mushitu otibani ili kwahule hahulu ni batu, mi ufumana ndu. Ki lika mañi zekataha mwa munahano wahao? Haiba ndu haikoni kufumaneha mwa mushitu kusina muyahi, uzibe kunani mutu yanani hahulu butali yabupile lika kaufela ze mwa pupo!” w24.12 18 ¶16

Kaufelaa luna lutokwa kuetelelwa halueza likatulo za butokwa mwa bupilo. Lwakona kufumana ketelelo yeo kwa baana-bahulu ni kwa Bakreste babañwi babanani yeloseli. Haiba ki babahulu ku luna, haluswaneli kunahana kuli kelezo yabona haikoni kulutusa kacenu. Jehova ubata kuli luitute kwa basupali. Bapilile nako yetelele kulufita mi banani yeloseli, kutwisiso, ni butali. Mwa linako zene iñolwa Bibele, Jehova naaitusisize basupali babasepahala kuli basusueze ni kuetelela sicaba sahae. Ka mutala, halunyakisiseñi ka za Mushe, Davida, ni muapositola Joani. Nebapilile ka linako zeshutana mi miinelo yabona ni yona neishutana hahulu. Kwa mafelelezo a bupilo bwabona, nebafile babanca kelezo yende. Baana bao kaufela nebakoñomekile butokwa bwa kusepahala ku Mulimu. Kunyakisisa kelezo yabona kwakona kulutusa ibe kuli lu babahulu kamba lu banana.—Maro. 15:4; 2 Tim. 3:16. w24.11 8 ¶1-2

Mwa mazazi a Nuwe, Mulimu naahanisize batu kuca mali. (Gen. 9:​3, 4) Jehova naakutezi taelo yeo mwa Mulao wanaafile Maisilaele. Mutu kaufela yanaafumanwa inze aca mali naalukela “kubulaiwa.” (Liv. 7:27) Jesu naayemezi Mulao wo. (Mat. 5:​17-19) Kacwalo, naasike asusueza Majuda babañata bao kuli bace nama yahae tenyene ni kunwa mali a mwa misinga yahae. Jesu naaitusisa mubulelelo wa swanisezo, sina mwanaaezelize kwamulaho hanaabulelezi musali wa Musamaria kuli: ‘Mezi enika fa afa bupilo bobusa feli.’ (Joa. 4:​7, 14) Jesu naasatalusi kuli musali wa Musamaria yo naakafumana bupilo bobusa feli ka kunwa feela mezi a mwa liweluwelu leliñwi. Ka nzila yeswana, naasatalusi kuli batu babañata banaaambola ni bona mwa Kapernauma nebaka pila kuya kuile hane bakaca nama ni kunwa mali ahae tenyene. w24.12 9 ¶4-6

Baana babali Bakreste baswanela kutokomela hahulu kuli basike baba ni mubonelo ofosahalile ka za basali. Kabakalañi? Libaka leliñwi kikuli, zelunahana hañata litahisanga kuli lueze nto yeñwi. Muapositola Paulusi naaelelize Bakreste babatozizwe ba mwa Roma kuli “[batuhele] kuya ka mikwa ya lifasi le.” (Maro. 12:​1, 2) Paulusi hanaañolezi Bakreste ba kwa Roma, kubonahala kuli puteho yeo nese ibile teñi ka nako yetelelenyana. Niteñi, manzwi a Paulusi abonisa kuli babañwi mwa puteho yeo nebasa kukuezwa ki mibonelo ya batu ba mwa lifasi. Ki lona libaka hanaa baelelize kuli bacince munahano ni likezo zabona. Kusina kukakanya, kelezo yeo yakona kutusa baana babali Bakreste kacenu. Ka bumai, babañwi bakukuelizwe ki munahanelo wa batu ba mwa lifasi mi mane banyandisanga basali babona. w25.01 9 ¶4

Baana-bahulu kacenu bapatehile hahulu. Ki bakutazi. (2 Tim. 4:5) Baetelelanga ka tukufalelo mwa musebezi wa kukutaza, kuonga-onga musebezi wa kukutaza mwa kalulo ya simu ya puteho, ni kululuta kuba bakutazi ni baluti babande. Hape basebezanga sina baatuli babanani sishemo ni babasina ketululo. Mukreste haezize sibi sesituna, baana-bahulu balikanga ka taata kumutusa kuli abe ni silikani sesinde hape ni Jehova. Kono ka nako yeswana, babanga ni tokomelo kuli babukeleze bukeni mwa puteho. (1 Makor. 5:​12, 13; Magal. 6:1) Kono sihulu, baana-bahulu bazibahala ka kuba balisana. (1 Pit. 5:​1-3) Baitukisezanga ni kufa lingambolo zetomile fa Mañolo, kuikataza kuziba mañi ni mañi mwa puteho, ni kueza misipili ya bulisana. Baana-bahulu babañwi batusanga mwa musebezi wa kuyaha ni kubabalela Mandu A Mubuso, kuonga-onga mikopano yemituna, kusebeza mwa Tutengo Totuswalisanisa Lipaki ni ba Sipatela ni kuba mwa Likwata za Kupotela Bakuli, ni kueza misebezi yemiñwi cwalo. Kaniti luli, baana-bahulu basebeza ka taata kabakala luna! w24.10 20 ¶9

Mwa Bibele, linzwi la “kulukululwa” litalusa kuswalelwa libi kamba mulatu kabakala tiululo yelifilwe. Muapositola Pitrosi naatalusize taba yeo cwana: “Mwaziba kuli nesi ka lika zebola, ka silivera kamba gauda, hane mulukuluzwi [linzwi ka linzwi, “hane muliuluzwi”] kwa bupilo bobusina tuso bone bamisiyezi bo kuku wamina. Kono neli ka mali a butokwa, aswana sina a ngunyana yesina sesinyazahala kamba litiba, ona mali a Kreste.” (1 Pit. 1:​18, 19; litaluso ze kwatasi) Kabakala sitabelo sa tiululo, lwakona kulukululwa kwa butanga bwa sibi ni lifu. (Maro. 5:21) Kaniti luli, lunani mabaka amande haluswanela kuitumela hahulu ku Jehova ni Jesu kakuli balulukuluzi ka mali a butokwa kamba bupilo bwa Jesu. w25.02 5 ¶15-16

Lukona kuisileleza cwañi kuli lusike lwaeza sibi? Halunyakisiseñi zelukona kuituta ku mutangana yatalusizwe kwa Liproverbia kauhanyo 7. Naaezize buhule ni musali wa mizamao ya buhule. Timana 22 ilutaluseza kuli mutangana yo naalatelezi musali yo “kapili-pili.” Kono sina litimana za kwamulaho moliboniseza, naaezize likatulo zeñwi zemaswe ili zenetahisize kuli kumubele hahulu bunolo kueza sibi. Ki lika mañi zenetahisize kuli aeze sibi? Sapili, manzibwana “naazamaya mwa nzila bukaufi ni kona” ya musali wa mizamao ya buhule. Kihona azamaya mwa nzila yeliba kwa ndu ya musali yo. (Liprov. 7:​8, 9) Kuzwa fo, naasika fapuha mwa nzila hanaaboni musali yo. Kono naalumezi kutubetiwa ki musali yo ni kuteeleza ku yena hanaabulela za matabelo a kuikabela anaafile, mi mwendi naabulezi cwalo kuli mutangana yo anahane kuli naali mutu yomunde. (Liprov. 7:​13, 14, 21) Kambe mutangana yo naatokolomohile lika zenelibisa kwa sibi seo, naasike akena mwa muliko wo ni kueza sibi. w24.07 16 ¶8-9; 19 ¶19

Jehova haatuhelelangi batu babaezize sibi sesituna, ili babasika baka, kuzwelapili kuba mwa puteho. Babañwi bakona kunahana kuli bakeñisa kuli Jehova unani sishemo, wakona kutuhelela mutu yasalati kubaka kuzwelapili kuba mwa puteho, kono Jehova habonisangi sishemo ka nzila yeo. Nihaike kuli Jehova unani sishemo, haatuhelelangi bumaswe mi haacincangi likuka zahae ka za zelukile ni zesika luka. (Juda 4) Kaniti luli, hanaaka eza cwalo naasike abonisa sishemo, kakuli puteho kaufela neikaba mwa lubeta. (Liprov. 13:20; 1 Makor. 15:33) Nihakulicwalo, luituta kuli Jehova haalati kuli mutu ufi kamba ufi atimezwe. Kono ubata kupilisa batu ka mokukonahalela kaufela. Ubonisanga sishemo kwa batu babacincize mupilelo wabona ili bababata kuba ni silikani sesinde ni yena hape. (Ezek. 33:11; 2 Pit. 3:9) Kacwalo, muuna wa mwa Korinte hanaabakile ni kutuhela mupilelo wahae omaswe, Jehova naaitusisize Muapositola Paulusi kutaluseza puteho kuli muuna yo naaswanela kuswalelwa ni kukutiswa mwa puteho. w24.08 17 ¶7; 18-19 ¶14-15

Mwa nguli ya lingu ni lipuli, Jesu utalusa katulo ya batu babanani kolo ya kutusa banyani bahae babatozizwe. (Mat. 25:​31-46) Ukaatula batu bao ka nako ya “ñalelwa yetuna,” pili ndwa ya Armagedoni isika kalisa kale. (Mat. 24:21) Sina feela mulisana haketanga lingu mwahalaa lipuli, Jesu ukaketahanya batu babatusa ka busepahali balateleli bahae babatozizwe mwahalaa babasa ezi cwalo. Bupolofita bwa mwa Bibele bubonisa kuli Jesu, ka kuba Muatuli yaketilwe ki Jehova, kamita ukaatula batu ka kuluka. (Isa. 11:​3, 4) Utalimisisa ka tokomelo muzamao, mubonelo, ni lipulelo za batu—kukopanyeleza cwalo ni mobaezeza babatozizwe. (Mat. 12:​36, 37) Jesu ukaziba batu bane bayemezi banyani bahae babatozizwe ni kubatusa mwa musebezi wabona. Yeñwi ya linzila za butokwa hahulu ili zeo babaswana sina lingu bakona kuyemela ka zona banyani ba Kreste ki ka kubatusa mwa musebezi wa kukutaza. w24.09 20-21 ¶3-4

Lukona kuikolwisisa kuli zelulumela ki za niti ka kulibapanya ni zeibulela Bibele. Ka mutala, halunyakisiseñi mutala wa mutangana yakakanya ka za haiba ki wa butokwa ku Mulimu. Kana uswanela kulumela feela maikuto ao asaezi sesiñwi? Batili, kono uswanela ‘kuikolwisisa lika kaufela’ ka kuba ni mubonelo wa Jehova ka za taba yeo. Halubala Linzwi la Mulimu, “luutwa” Jehova inzaa bulela ku luna. Kono lutokwa kuikataza kuli luzibe mubonelo wahae ka za puzo yelukona kuba ni yona. Halubala Bibele luswanela kuisa hahulu pilu kwa lika zelubilaeza. Lwakona kueza lipatisiso ka za taba yeo ka kuitusisa liitusiso zeñata zelukisizwe ki kopano ya Jehova. (Liprov. 2:​3-6) Lwakona kukupa Jehova kuli aluetelele halunze lueza lipatisiso ni kulutusa kulemuha mubonelo wahae ka za puzo yaluna. Kihona lukabata likuka za mwa Bibele ni kubata litaba zeñwi zekona kulutusa mwa muinelo oluli ku ona. w24.10 25 ¶4-5

Jehova haana kufuyaula buikatazo bwa mutu yaikuhumusa kamba yaikutwa kuba wa butokwa hahulu. (1 Makor. 10:​24, 33; 13:4) Nihaiba balikani ba Jesu babatuna, ka linako zeñwi nebabatanga kufiwa buikalabelo bobuñwi ka mabaka asaswaneli. Munahane zene baezize baapositola ba Jesu, ili Jakobo ni Joani. Nebakupile Jesu kuli abafe litulo zetuna mwa Mubuso wahae. Jesu naasika bababaza kabakala kubonisa moya wa kuipahamisa. Kono naataluselize baapositola bahae ba 12 kaufela kuli: “Mutu kaufela yabata kuba yomutuna mwahalaa mina ulukela kuba sikombwa samina, mi mutu kaufela yabata kuba wapili mwahalaa mina ulukela kuba mutangaa mina kaufela.” (Mare. 10:​35-37, 43, 44) Mizwale bababata kuba likombwa za puteho ka mulelo oswanela, ili wa kusebeleza babañwi, bakatusa hahulu puteho.—1 Mates. 2:8. w24.11 15-16 ¶7-8

Halueza likatulo, lilato lika lususueza kubata “sesiswanela yomuñwi” ni kuba ni buishuwo. (1 Makor. 10:​23, 24, 32; 1 Tim. 2:​9, 10) Mi lukaeza katulo yebonisa kuli lwalata babañwi ni kuli lwabakuteka. Haiba mubata kueza katulo ya butokwa hahulu, munahanisise zemuswanela kueza kuli mukondise. Jesu naalulutile kuli luswanela “kubala lisinyehelo.” (Luka 14:28) Kacwalo, munyakisise nako yemuka tanda, masheleñi atokwahala, ni buikatazo bomuswanela kueza kuli katulo yamina ikonde. Mwa miinelo yemiñwi, mukatokwa kubuza ba mwa lubasi lwamina kuli muzibe mwakona kutuseza mañi ni mañi kuli katulo yamina ikonde. Ki kabakalañi kueza cwalo hakuli kwa butokwa? Kueza cwalo kuka mitusa kuziba haiba mutokwa kueza licinceho kwa katulo yamina kamba kueza katulo isili. Mi kuambola ni ba mwa lubasi lwamina ni kuteeleza kwa liakalezo zabona, kukatahisa kuli kubabele bunolo kusebelisana ni mina kuli katulo yamina ikonde. w25.01 18-19 ¶14-15

Isaya utalusa libaka haluswanela ‘kuwabelwa ni kunyakalala’ mwa paradaisi ya kwa moya. Jehova ki yena yalukisize paradaisi ya swanisezo yeo. (Isa. 65:​18, 19) Ki lona libaka haitusisa luna kutusa batu kuzwa mwa likopano za lifasi le, zesaluti niti ka za Mulimu, ni kubatusa kutaha mwa paradaisi yaluna yende ya swanisezo. Limbuyoti zeluikola kabakala kuba mwa niti, lilutahiseza tabo mi lunani takazo yetuna ya kutaluseza babañwi ka za teñi. (Jer. 31:12) Hape lwaitumela ni kunyakalala kabakala sepo yelunani yona bakeñisa kuba mwa paradaisi ya kwa moya. Bibele isepisa kuli ‘lukayaha mandu ni kupila mwateñi, mi lukacala masimu a likota za veine ni kuca miselo yazona. Haluna kuikataza feela lusafumani sesiñwi, kakuli lukafuyaulwa ki Jehova.’ Ulusepisa kuli lukaba mwa buiketo mi lukaikola bupilo. Waziba zatokwa mañi ni mi ‘ukakulisa takazo ya zepila kaufela.’—Isa. 65:​20-24; Samu 145:16. w24.04 22-23 ¶11-12

Lubonisa kuli luunga Jehova kuba Licwe laluna haluitinga ku yena ka kutala. Lwaziba kuli lukatuseha haiba lumuutwa nihaiba ka nako yelukopana ni miinelo yetaata hahulu. (Isa. 48:​17, 18) Halulemuha mwalutuseza, lukafita fa kumusepa hahulu. Mi lukakolwa kuli ki Jehova feela yakona kulutusa kutiyela muinelo otaata ufi kamba ufi olukona kukopana ni ona. Ka kuswana ni licwe lelituna, Jehova utiile mi hakoni kucinca. Butu bwahae ni mulelo wahae halikoni kucinca. (Mala. 3:6) Bo Adama ni Eva hane bakwenuhezi Jehova mwa simu ya Edeni, naasika cinca mulelo wahae ka za batu. Sina feela mwanaabulelezi muapositola Paulusi, Jehova “hakoni kuitatula ili yena.” (2 Tim. 2:13) Taba yeo italusa kuli kusina taba ni zekona kuezahala kamba zebakona kueza batu, Jehova haana kutuhela kubonisa tulemeno twahae, kucinca mulelo wahae, kamba kucinca likuka zahae. Bakeñisa kuli Mulimu hakoni kucinca, lwaziba kuli uka lutusa halukopana ni miinelo yetaata ni kuli ukataleleza zasepisize kuluezeza kwapili.—Samu 62:​6, 7. w24.06 27-28 ¶7-8

Haiba mu mwa libato, ki lika mañi zekona kumitusa kueza katulo ya kunyalana kamba kusanyalana? Muzibane hande. Mwendi nemuzibile litaba zeñwi ka za mutu yo, pili musika kena kale mwa libato. Kono ka nako ya cwale munani kolo ya kuziba “mutu wa mwahali, wa mwa pilu.” Kueza cwalo kuama kuziba litaba zeñata ka za mutu yemubona kuli mwakona kunyalana ni yena, zecwale ka silikani sahae ni Jehova, butu bwahae, ni mwanahanela. Hamulaho wa nako, muswanela kuziba likalabo kwa lipuzo zeswana sina ze: ‘Kana naswanela luli kunyalana ni mutu yo?’ (Liprov. 31:​26, 27, 30; Maef. 5:33; 1 Tim. 5:8) ‘Kana lwakona kubonisana lilato ni kuisezana pilu? Kana lwakona kupilisana hande niha lunani bufokoli bobuñwi?’ (Maro. 3:23) Hamunze muzibana hande, muhupule kuli: Kuswanelana hakusika itiinga fa kutabela lika zeswana, kono sihulu kuitingile fa kukona kucinca ka bunolo kulikana ni mubonelo wa mutu yomuñwi. w24.05 27 ¶5

Mulena Davida naaezize sibi sesituna. Kono mupolofita Natani hanaa mutaluselize mwanaaikutwezi Jehova, Davida abaka ka kutala. (Samu 51:​3, 4, 17, manzwi a fahalimu) Mulena Ezekiasi ni yena naafoselize Jehova. (2 Makol. 32:25) Ka kuswana ni Davida, Ezekiasi ni yena naabakile ka kutala. (2 Makol. 32:26) Kabakaleo, Jehova kwa mafelelezo naamuungile kuba mulena yasepahala, ili ‘yanaazwezipili kueza zelukile.’ (2 Mal. 18:3) Luitutañi? Luswanela kubakela libi zaluna ni kueza molukonela kaufela kuli lusike lwakutela kueza libi zeswana. Kucwañi haiba lufiwa kelezo ki baana-bahulu ka za taba yebonahala kuba yenyinyani hahulu? Haluswaneli kuikutwa kuli Jehova kamba baana-bahulu habalulati. Mane nihaiba malena ba Isilaele babande nebafiwanga kelezo ni kalimelo. (Maheb. 12:6) Halufiwa kalimelo, luswanela kueza lika ze, (1) kuiamuhela, (2) kueza licinceho zetokwahala, ni (3) kuzwelapili kusebeleza Jehova ka pilu yaluna kaufela. Haiba lubakela libi zaluna, Jehova uka luswalela.—2 Makor. 7:​9, 11. w24.07 21 ¶8; 22 ¶9, 11

Muezalibi ukazusiwa mwa puteho haiba uhanile kucinca kusina taba ni kuli baana-bahulu bakuta-kutezi kulika kumutusa kuli abake. (2 Mal. 17:​12-15) Likezo zahae libonisa kuli uiketezi kupila ka kusalumelelana ni likuka za Jehova. (Deut. 30:​19, 20) Zibiso ikafiwa kwa puteho kuli mutu yo haasali yomuñwi wa Lipaki za Jehova. Mulelo wa zibiso yeo haki kuutwisa muezalibi yo maswabi. Kono mulelo wa zibiso yeo ki kutusa puteho kumamela taelo ya mwa Mañolo yeli, ‘mutuhele kuswalisana ni mutu yo, mane nihaiba kuca ni mutu yacwalo musike mwaca ni yena.’ (1 Makor. 5:​9-11) Jehova ulufile taelo yeo ka mabaka amande. Muapositola Paulusi naañozi kuli: “Mumela omunyinyani utundulukisa bupi kaufela bobulubilwe.” (1 Makor. 5:6) Baezalibi babasika baka bakona kutahisa kuli babañwi basike baikataza kupila ka kulumelelana ni likuka za Jehova zelukile.—Liprov. 13:20; 1 Makor. 15:33. w24.08 27 ¶3-4

Halukoni kufa batu babañwi maata aluna luli. Kono lwakona kuitusisa maata aluna kuli lubatuse. Ka mutala, lwakona kutusa Mukreste yali musupali kamba yali siyanga ka kuyo mulekela lika zeñwi kamba kumuezeza misebezi yemiñwi ya fa lapa. Kamba lwakona kuitatela kutusa mwa musebezi wa kukenisa ni kubabalela Ndu ya Mubuso. Hape muhupule kuli zemubulela zakona kususueza mutu yomuñwi. Kana kunani mutu yomuñwi yemuziba yakona kususuezwa haiba mumubabaza? Kana kunani mutu yomuñwi yemuziba yatokwa kuomba-ombiwa? Haiba ki cwalo, mueze momukonela kaufela kuli mutu yo azibe kuli mwamuisa pilu. Mwakona kupotela mutu yo, kumulizeza foni, kamba mwendi kumulumela kadi, email, kamba kashango ka fa foni. Hamutokwi kubulela litaba zeñata. Mwendi manzwi asikai feela azwelela kwatasaa pilu ki ona atokwa kuutwa muzwale kamba kaizeli kuli azwelepili kusepahala kamba kuikutwa hande mwa muinelo wali ku ona.—Liprov. 12:25; Maef. 4:29. w24.09 28 ¶8-10

Haiba semubile sikombwa sa puteho ka nako yetelelenyana, mwendi mutuha mukwanisa zetokwahala kuli mube muuna-muhulu. Kana mwatabela kueza “musebezi omunde”? Ki ifi misebezi yebaezanga baana-bahulu? Baetelela mwa musebezi wa kukutaza, basebeza ka taata mwa musebezi wa bulisana ni wa kuluta, mi batiisanga tumelo ya mizwale ni likaizeli babona ka lipulelo ni ka likezo zabona. Kacwalo, kwaswanela Bibele haibiza baana-bahulu babasebeza ka taata kuli ki “limpo zeli batu.” (Maef. 4:8) Mukona kukwanisa cwañi zetokwahala kuli mube muuna-muhulu? Kukwanisa zetokwahala kuli mutu abe muuna-muhulu kwashutana ni kukwanisa zetokwahala kuli mutu afiwe musebezi wa kwa mubili. Hañata, mubelekisi ukona kukenya mutu musebezi, ibile feela mutu yo unani buikoneli bwa kueza musebezi wo. Kono haiba mubata kuba muuna-muhulu, kunani lika zeñwi zemutokwa kueza kwandaa feela kuba ni buikoneli bwa kukutaza ni kuluta. Muswanela kukwanisa zetokwahala za mwa Mañolo ili zekolohanyizwe kwa 1 Timotea 3:​1-7 ni Tite 1:​5-9. w24.11 20 ¶1-3