Mwa Bibele lubala ka za batu bane balukile ili bao hasamulaho nebabile babasika luka. Mulena Salumoni ki yomuñwi wa batu bao. Naalutilwe linzila za Mulimu ka kutala mi naafuyauzwi hahulu ki Jehova; kono hasamulaho, naakalile kulapela milimu ya buhata. Libi zanaaezize nelihalifisize hahulu Jehova, mi nelitahisize kuli sicaba sa Isilaele sinyande ka lilimo zeñata-ñata. Ki niti kuli Mañolo abonisa kuli Salumoni ‘naabulukilwe sina bo kuku wahae,’ sina mone kubezi kwa baana babasepahala babacwale ka Mulena Davida. (1 Mal. 11:​5-9, 43; 2 Mal. 23:13) Kono kana taba ya mwanaabulukezwi italusa kuli ukazusiwa kwa bafu? Bibele haibuleli sesiñwi ka za teñi. Zuho ya bafu ki mpo yezwa ku Mulimu yalilato. Ukafa mpo yeo kwa batu baabata kufa kolo ya kumusebeleza kuya kuile. (Jobo 14:​13, 14; Joa. 6:44) Kana Salumoni ukafiwa mpo yeo? Haluzibi, Jehova ki yena feela yaziba kalabo. Kono seluziba feela kikuli, Jehova ukaeza sesilukile. w24.05 4 ¶9

Haluneela bupilo bwaluna ku Jehova, luba baenyi mwa tende yahae ya swanisezo. Luikola lico zeñata za kwa moya ni kuba ni silikani sesinde ni batu babañwi bababile baenyi ba Jehova. Tende yahae ya swanisezo haifumanehi feela mwa sibaka silisiñwi. Tende ya Jehova ifumaneha kai ni kai kobafumaneha batanga bahae babasepahala. (Sin. 21:3) Kucwañi ka za batanga ba Mulimu babasepahala babashwile? Kana kwaswanela kubulela kuli basali baenyi mwa tende ya Jehova? Eni! Ki kabakalañi halukona kubulela cwalo? Kakuli Jehova usa bahupula hande hahulu, mane ku yena kuswana feela inge kuli basapila. Jesu naabulezi kuli: “Haili ka za kuli babashwile bakazuha, nihaiba Mushe naazibahalize cwalo mwa taba ya sicacani sa miutwa, hanaabizize Jehova kuli ki ‘Mulimu wa Abrahama ni Mulimu wa Isaka ni Mulimu wa Jakobo.’ Haki Mulimu wa babashwile, kono ki wa babapila, kakuli ku yena, kaufelaa bona bapila.”—Luka 20:​37, 38. w24.06 3 ¶6-7

Zadoki naaile kwa Hebroni inze alwezi lilwaniso mi naaitukiselize ndwa. (1 Makol. 12:38) Naabata kuya ni Davida kwa ndwa ni kulamulela Maisilaele kwa lila zabona. Nihaike kuli Zadoki naasi ndwalume, naanani hahulu bundume. Zadoki yanaali feela muprisita naaitutile cwañi kuba ni bundume? Naaziba baana babañata bane batiile ili bane banani bundume. Kusina kukakanya, naatusizwe hahulu ki mutala wabona. Ka mutala, bakeñisa kuli Davida naabonisize bundume ka kuetelela “Maisilaele mwa lindwa zabona,” Maisilaele kaufela neba muyemezi ka pilu yabona kaufela. (1 Makol. 11:​1, 2) Davida kamita naaitinganga ku Jehova kuli amusileleze kwa lila zahae. (Samu 138:3) Zadoki hape naaitutile kwa mutala wa baana banaasebelisana ni bona, babacwale ka Jehoyada ni mwanaa hae Benaya yanaali ndwalume, hamohocwalo ni manduna ba masika ba 22 bane bali kwa lineku la Davida.—1 Makol. 11:​22-25; 12:​26-28. w24.07 3 ¶5-6

Saule wa kwa Tarese naanyandisize hahulu balateleli ba Kreste. Kubonahala kuli Bakreste babañata neba muunga kuli naasakoni kucinca, mi nekusina sepo ya kuli wakona kubaka. Kono Jesu naaziba kuli Saule nakona kucinca ni kubaka. Yena ni Ndatahe nebaboni tulemeno totunde twanaanani tona Saule. Jesu naabulezi kuli: “Mutu yo ki sisebeliso seniketile.” (Lik. 9:15) Mane Jesu naaitusisize makazo kuli atuse Saule kubaka. (Lik. 7:58–8:3; 9:​1-9, 17-20) Hasaabile Mukreste, Saule, ili yanaato zibahala sina muapositola Paulusi, hañata naabonisanga buitebuho bwahae kabakala kuli naabonisizwe sishemo. (1 Tim. 1:​12-15) Paulusi naatatuluzi cwañi taba yeswabisa yeama muzamao wa buhule yanaautwile mwa puteho ya Sikreste ya mwa Korinte? Naaezize cwalo ka nzila yeluluta tuto ya butokwa hahulu ka za kalimelo ya Jehova yelilato ni butokwa bwa kubonisa sishemo. w24.08 13 ¶15-16

Lilimo zeñata kwamulaho, Jehova naatusize batu babasika petahala kuutwisisa hanyinyani-hanyinyani mobakona kubela ni silikani sesitiile ni yena. Abele, yena mwana wabubeli wa bo Adama ni Eva, neli yena mutu wapili yanaabonisize tumelo ku Jehova hamulaho wa bukwenuheli bwa mwa simu ya Edeni. Bakeñisa kuli Abele naalata Jehova mi naabata kumutabisa ni kusutelela ku yena, amufa sitabelo. Abele naali mulisana; kacwalo, aanga kwa lingunyana zahae, alibulaya, ni kulifa ku Jehova sina sitabelo. Ki lika mañi zanaaezize Jehova? ‘Naashemubile Abele mi aamuhela nubu yahae.’ (Gen. 4:4) Jehova naatabisizwe ki matabelo aswana anaafilwe ki batu bane bamulata ili bane bamusepile, babacwale ka Nuwe. (Gen. 8:​20, 21) Ka kuamuhela matabelo acwalo, Jehova naabonisize kuli batu babasika petahala bakona kumutabisa ni kuba ni silikani sesitiile ni yena. w24.08 3 ¶5-6

Lwakona kuikutwa hahulu butuku kwa pilu ni kulembwala haluezwa maswe. (Muek. 7:7) Batanga ba Jehova babasepahala, babacwale ka Jobo ni Habakuki, ni bona nebaikutwile cwalo. (Jobo 6:​2, 3; Hab. 1:​1-3) Nihaike kuli hakusika fosahala luli kuikutwa cwalo, luswanela kutokomela zelueza haluezwa maswe ilikuli lusike lwaeza nto yemaswe ni kutatafaza hahulu muinelo. Haiba kubonahala inge kuli batu babaeza lika zesika luka habafiwi koto, lukona kuikutwa kuli hakutusi sesiñwi kueza zelukile. Halunyakisiseñi zeneezahezi ku muñoli yomuñwi wa samu yanaaboni kuli batu babamaswe nebabonahala kuli nebakondisa kufita babalukile. Naabulezi kuli, “bao ki bona babamaswe, belizamaela hande lika kamita.” (Samu 73:12) Naabilaelizwe hahulu ki kusaluka kwanaabona kuli mane naabatile kutuhela kusebeleza Jehova, naabulezi kuli: “Hane nilikile kuutwisisa taba yeo, nenikatazehile.”—Samu 73:​14, 16. w24.11 3 ¶5-7

Lufanga Jehova kanya bakeñisa kuli lumukuteka hahulu. Lunani mabaka amañata atahisa kuli lumukuteke. Jehova ki yamaata kaufela; maata ahae haana maciñekelo. (Samu 96:​4-7) Lika zaezize libonisa hande butali bwahae bobutuna. Ulufile bupilo ni lika kaufela zelutokwa kuli lupile. (Sin. 4:11) Wasepahala. (Sin. 15:4) Hakuna sesipala ku yena, mi watalelezanga lisepiso zahae kamita. (Josh. 23:14) Ki lona libaka mupolofita Jeremia hanaabulezi ka za Jehova kuli: “Mwahalaa bababutali kaufela ba macaba ni mwa mibuso yabona kaufela, hakuna ni yomukana yaswana ni wena”! (Jer. 10:​6, 7) Kaniti luli, lunani mabaka amañata haluswanela kukuteka Ndataa luna wa kwa lihalimu. Kono kwandaa feela kukuteka Jehova, hape lwamulata. Mi libaka lelituna kikuli, lufanga Jehova kanya bakeñisa kuli lumulata hahulu. w25.01 3 ¶5-6

Batu babalwanisa Mulimu balikanga kutahisa kuli batu baange lika zende zeieza kopano yahae kuli limaswe. Ka mutala, luitutile kuzwelela mwa Mañolo kuli Jehova ubata kuli baba mulapela babe babakenile kwa mubili, babe ni muzamao omunde, ni kuli bamulapele ka nzila yelukile. Ubata kuli mutu kaufela yazwelapili kueza lika zemaswe azwisiwe mwa puteho haiba haalati kubaka. (1 Makor. 5:​11,12; 6:​9, 10) Lwamamela taelo ya mwa Mañolo yeo. Kabakaleo, baba lulwanisa bakona kulutameleza kuli halukuteki batu babanani mibonelo yeshutana ni yaluna, kuli lwaatulanga babañwi, ni kuli halulati batu. Lulemuhe yalulwanisa luli. Litaba za buhata ze kaufela lisimuluha ku Satani Diabulosi. Ki yena “ndatahe buhata.” (Joa. 8:44; Gen. 3:​1-5) Kacwalo, luswanela kulibelela kuli Satani ukaitusisa batu babaswalisana ni yena kuli ahasanye litaba za buhata ka za kopano ya Jehova. w24.04 10-11 ¶13-14

Mane ñalelwa yetuna niha seikalisize, mwendi batu babañwi habaka bona “Babilona Yomutuna” inzaa yundiswa, bakahupula kuli ka lilimo zeñata Lipaki za Jehova nebabulelanga kuli taba yeo ikaezahala. Mwendi batu babañwi habaka bona likezahalo zeo bakaba ni tumelo ku Jehova. (Sin. 17:5) Haiba kuba cwalo, kukaswana ni mone kubezi mwa Egepita mwa mazazi a Mushe. Muhupule kuli “sikopekope sa batu” nesizwile mwa Egepita hamoho ni Maisilaele. Babañwi ba batu bao mwendi nebakalile kuba ni tumelo ku Jehova hane baboni kuli zanaabulezi Mushe ka za Likoto Zelishumi nelitalelelizwe. (Exo. 12:38) Haiba nto yeswana iezahala hamulaho wa kuyundiswa kwa Babilona Yomutuna, kana lukaikutwa bumaswe kuli batu babañwi bakonile kuswalisana ni luna nakonyana pili mafelelezo asika taha kale? Batili! Lubata kulikanyisa Ndataa luna wa kwa lihalimu, yena “Mulimu yanani makeke ni mukekecima, yasaakufi kuhalifa ni yatezi lilato lelisa feli ni niti.”—Exo. 34:6. w24.05 11 ¶12-13

Ki lika mañi zekona kuezahala haiba lutuhela kukumalela kwa “sikuka sa manzwi amande”? Halunyakisiseñi mutala wo. Mwa linako za baapositola, Bakreste babañwi nebahasanya taba ya buhata ya kuli lizazi la Jehova nelitile. Kubonahala kuli nekunani liñolo lene liingiwa kuli nelizwa ku muapositola Paulusi, ili lene libulela cwalo. Bakreste babañwi mwa Tesalonika nebalumezi taba ya buhata yeo mane ni kuihasanya basika batisisa kuli bazibe haiba neli ya niti kamba kutokwa. Kambe nebahupuzi litaba zanaa balutile Paulusi hanaasali ni bona, nebasike bapumiwa. (2 Mates. 2:​1-5) Paulusi naaelelize mizwale bahae kuli basike balumela litaba kaufela zebautwa. Mi kuli abatuse kusapumiwa kwapili, Paulusi naafelize liñolo lahae labubeli lanaañolezi Bakreste ba kwa Tesalonika ka manzwi ali: “Ki yeo tumeliso yaka, na Paulusi, ka lizoho laka, sona sisupo sesi mwa mañolo aka kaufela; wo ki ona muñolelo waka.”—2 Mates. 3:17. w24.07 12 ¶13-14

Bakreste ba Maheberu nebaka tokwa kuitiisa, tumelo yabona hane ikalikiwa kabakala kutotobela kwa miinelo mwa Judea. Nihaike kuli Bakreste ba Maheberu babañwi nebanyandisizwe hahulu, babañata ku bona nebabile Bakreste ka nako yene kubile ni kozonyana. Muapositola Paulusi naatalusize kuli nihaike kuli nebaitiisize, tumelo yabona hane ilikilwe hahulu, nebasika nyandiswa sina mwanaanyandiselizwe Jesu, fo kikuli, kuisa lifu. (Maheb. 12:4) Majuda bane bali balwanisi nebahalifile hahulu ni kutahisa mifilifili bakeñisa kuli palo ya Bakreste neisweli kuekezeha. Lilimo lisikai feela kwamulaho, Majuda babafitelela 40 “baitama ka luci, bali habana kuca kamba kunwa kufitela babulaya Paulusi.” (Lik. 22:22; 23:​12-14) Nihaike kuli nebaka toiwa ni kunyandiswa, Bakreste nebatokwa kuzwelapili kukopana hamoho, kukutaza taba yende, ni kuzwelapili kuba ni tumelo yetiile. w24.09 12 ¶15

Joani neli muapositola yanaalatwa hahulu ki Jesu Kreste. (Mat. 10:2) Joani naakutazanga ni Jesu, naaiponezi limakazo zanaaezize, mi naazwezipili kusepahala ku yena ni mwa linako zetaata. Naaiponezi Jesu habulaiwa mi naamuboni hasazusizwe kwa bafu. Hape Joani naaiponezi puteho ya Sikreste haihula, mi naapilile nako yetelele kuli mane naaiponezi taba yende haikutazwa “mwa pupo kaufela ye mwatasaa lihalimu.” (Makolo. 1:23) Joani hasasupezi hahulu, naabile ni tohonolo ya kuñola buka yetabisa ya Sinulo. (Sin. 1:1) Joani naañozi Buka ya Evangeli yebizwa ka libizo lahae. Hape naañozi mañolo amalaalu ka kususumezwa ki moya wa Mulimu. Liñolo lahae labulaalu naaliñolezi Mukreste yasepahala yabizwa Gayusi, ili yanaalatwa ki Joani sina mwana wa kwa moya. (3 Joa. 1) Zanaañozi musupali yasepahala yo lizwezipili kususueza balateleli ba Jesu kaufela kuto fita ni kacenu le. w24.11 12 ¶15-16

Muuna yalata musalaa hae umuunga kuba wa butokwa ni kumukatelwa. Umuunga sina mpo ya butokwa hahulu yezwa ku Jehova. (Liprov. 18:22; 31:10) Kabakaleo, ukapilisana ni yena ka sishemo ni likute nihaiba kwa mukunda. Haana kuhapeleza musalaa hae kulobala ni yena ka nzila yetahisa kuli aikutwe kusalukuluha, kushubulwa kamba kusisitwa ki lizwalo. Mi ni yena ukaikataza kuba ni lizwalo lelikenile fapilaa Jehova. (Lik. 24:16) Baana, mukolwe kuli Jehova wabona ni kuitebuha buikatazo bwamina hamunze mubonisa likute ku bo musalaa mina mwa lika kaufela zemueza. Muzwelepili kubabonisa likute ka kuambuka likezo zekona kubaswabisisa ni ka kubabonisa sishemo ni lilato. Hamueza cwalo, mukabonisa kuli mwabalata ni kuli mubaanga kuba ba butokwa. Mukuteke bo musalaa mina, mi mukasileleza silikani samina ni Jehova, sona sa butokwa hahulu.—Samu 25:14. w25.01 13 ¶17-18

Nto yeñwi yetahisa kuli batanga ba Jehova bashutane ni batu babaipapata kuba Bakreste ki tukufalelo yabona mwa bukombwa. Ki lika mañi zekona kulutusa kuzwelapili kamba kuekeza kwa tukufalelo yaluna ya kukutaza? Lwakona kuituta sesiñwi kwa mutala wa Jesu ka za molukona kubela ni tukufalelo mwa musebezi wa kukutaza. Jesu hanaali fa lifasi, naazwezipili kukutaza ka tukufalelo. Mane nako hane inze iya, naaekelize hahulu kwa bukombwa bwahae. Sina mulimi wa simu ya veine yanaaikatalize ka lilimo zetaalu kubabalela kota ya feiga yenesika beya miselo, Jesu ni yena naaikatalize ka lilimo zetaalu inzaa kutaza kwa Majuda, ili bao buñata bwabona nebasika teeleza kwa lushango lwahae. Nihakulicwalo, sina feela mulimi wa simu ya veine hanaasika zwafa kubabalela kota ya feiga, Jesu ni yena naasika zwafa mwa musebezi wa kukutaza. (Luka 13:​6-9) Kuituta kwa lika zanaalutile ni kulikanyisa zanaaezize kuka lutusa kuzwelapili kuba ni tukufalelo kacenu. w25.03 14-15 ¶1-4

Kucwañi haiba muikutwa kuli mwendi mufumani mutu yaswanela wa kunyalana ni yena? Kana muswanela kutaluseza mutu yo honafo feela kuli mwamutabela? Bibele ibulela kuli mutu yabutali ulikanga kuziba litaba zeñwi pili asika nga kale muhato. Kacwalo, mukaeza hande haiba muba ni nako ya kuziba hande mutu yo yena asazibi, pili musika mutaluseza kale kuli mwamutabela. Mukona kuziba cwañi hande mutu yomuñwi yena asazibi? Kwa mikopano ya puteho kamba kwa tukiti, mwakona kuziba litaba zeñwi ka za silikani sahae ni Jehova, butu bwahae, ni muzamao wahae. Ki bo mañi balikani bahae, mi ki litaba mañi zatabela kuambola? (Luka 6:45) Kana likonkwani zahae zaswana ni zamina? Mwakona kubuza ka za mutu yo kwa baana-bahulu ba puteho yaswalisana ni yona kamba kwa Bakreste babañwi babahulile kwa moya. (Liprov. 20:18) Mwakona kubuza ka za libubo la mutu yo ni tulemeno twanani tona. (Ruti 2:11) Hamunze muziba hande mutu yo, mutokolomohe kueza lika zekona kutahisa kuli asike aikutwa kulukuluha. Mukuteke maikuto ahae, musike mwalika kuziba litaba kaufela ka za mutu yo, mi musike mwaba ni silambeti. w24.05 22 ¶7-8

Baana-bahulu habamatukelangi kunahana kuli muezalibi haana kubaka. Baezalibi babañwi bakona kubaka habakopana lwapili ni katengo ka baana-bahulu, kono babañwi bona batokwa nako. Kacwalo, baana-bahulu bakona kulukisa kuli bakutele kukopana ni yena misipili isikai isiñi feela hañwi. Mwendi hamulaho wa kukopana lwapili ni yena, Mukreste yaezize sibi wakona kukala kunahanisisa hahulu ka za litaba zataluselizwe. Wakona kubonisa buikokobezo ni kukupa Jehova kuli amuswalele. (Samu 38:18) Kacwalo, habaka kopana ni muezalibi yo hape, wakona kuba ni mubonelo omunde kufita sapili. Kuli batuse muezalibi kubaka, baana-bahulu babonisanga kutwelo-butuku ni sishemo. Balapelanga ku Jehova mi babanga ni sepo ya kuli ukafuyaula buikatazo bwabona bwa kutusa Mukreste yaezize sibi kukutelwa ki ngana ni kubaka.—2 Tim. 2:​25, 26. w24.08 22-23 ¶12-13

Jehova haatabeli kuli mutu ufi kamba ufi ayundiswe. Ubata kuli baezalibi bakutele ku yena. (2 Makor. 5:20) Ki lona libaka kuzwa feela kwamulaho hasusuezanga batanga bahae baba mufoselize kuli babake ni kukutela ku yena. Baana-bahulu mwa liputeho banani tohonolo ya kusebeza hamoho ni Jehova habanze baikataza kutusa baezalibi kuli babake. (Maro. 2:4; 1 Makor. 3:9) Munahane feela tabo yetuna yebanga teñi kwa lihalimu baezalibi hababaka! Ndataa luna wa kwa lihalimu, Jehova, ubanga ni tabo yetuna nako kaufela yeñwi ya lingu zahae zelatehile haikutela mwa puteho. Lilato laluna ku Jehova lizwelapili kuhula halunahanisisa ka za mukekecima wahae ni sishemo sahae sesituna.—Luka 1:78. w24.08 31 ¶16-17

Kambe Jesu naalumelelize batu kumueza mulena, naakabe aikenyize mwa lipolitiki za Majuda, bane bali mwatasaa puso ya Maroma. Jesu naangile muhato wa ‘kuikela fa lilundu.’ Kacwalo, kusina taba ni sineneketo yenezwa ku babañwi, naasika ikenya mwa litaba za lipolitiki. Ulutomezi mutala omunde hahulu! Ki niti kuli batu habana kulukupa kuli lueze makazo ya kuli kube ni likwa zeñata kamba ya kufolisa bakuli; hape habana kulika kulueza malena kamba babusi ba naha. Kono bakona kulususueza ka taata kuli luikenye mwa litaba za lipolitiki ka kuvotela mutu yomuñwi kamba ka kuyemela mutu yebanahana kuli wakona kukondisa. Nihakulicwalo, mutala walutomezi Jesu walutusa kuziba za kueza. Naahanile kuikenya mwa litaba za lipolitiki, mi mane hasamulaho naabulezi kuli: “Mubuso waka haki wa lifasi le.” (Joa. 17:14; 18:36) Ka kuba Bakreste, luswanela kuba ni mubonelo wa Jesu wa lika ni kulikanyisa mutala wahae. Luyemela Mubuso wo, lwauzibahaza ku babañwi, mi lwalapelanga kuli utahe.—Mat. 6:10. w24.12 4 ¶5-6

Hamunze muituta, mubate linzila za kusebelisa ka zona zemuituta. Ka mutala, mulikanyise katulo yelukile ya Jehova ka kusaketulula babañwi. Mi mulikanyise lilato la Jesu ku Ndatahe ni kwa batu babañwi ka kuitatela kunyanda kabakala libizo la Jehova ni kueza zeñata kuli mutuse Bakreste babañwi. Hape mulikanyise Jesu ka kukutaza ku babañwi kuli ni bona babe ni kolo ya kuamuhela mpo ya Jehova ya butokwa hahulu. Haiba luzwelapili kuituta ka za tiululo, lukalata hahulu Jehova ni Mwanaa hae. Mi ni bona baka lulata hahulu. (Jak. 4:8) Kacwalo, haike luitusise lika kaufela zalufile Jehova kuli luzwelepili kuituta ka za tiululo. w25.01 25 ¶16-17

Liñolo la zazi la kacenu likona kubaliwa kuli: “Neuzwisize libi zaka kaufela fapilaa hao.” Pulelo ya swanisezo ye ibonisa kuli Jehova unepelanga kwahule libi za batu bababakile mi hatalimangi kwateñi. Pulelo yeo hape ikona kutolokiwa kuli: “Uezize inge kuli nalikuba nikufoseze.” Bibele izwelapili kukoñomeka sisupo seo ka kuitusisa pulelo yeñwi ya swanisezo yeñozwi kwa Mika 7:​18, 19. Litimana zeo libulela kuli Jehova unepelanga libi zaluna mwa buliba bwa liwate. Kwaikale, nekuli hahulu taata kuli mutu afumane nto yeñwi yenepezwi mwa buliba bwa liwate. Lipulelo za swanisezo zeo, lilulutile kuli Jehova haswalela libi zaluna, uezanga cwalo ka kutala mi halutokwi kuzwelapili kuikutwa mulatu. Sina feela mwanaabulelezi Davida, “tabo ki ya babaswalezwi likezo zabona zemaswe ni babakwahelezwi libi zabona.” (Maro. 4:7) Seo ki sona sekutalusa kuswalelwa habuniti! w25.02 9 ¶7-8

Kunani paradaisi ya swanisezo fa lifasi kacenu, ili mokunani batu babañata babapatehile kueza lika zende. Mwa paradaisi yeo kufumaneha batu babañata hahulu, ili babaikola kozo ya luli. Batu baba mwa paradaisi yeo, baikatulezi kuli habana kuzwa mwateñi. Hape babata kutusa batu babañata ka mokukonahalela kaufela kuli bato swalisana ni bona. Paradaisi yeo ki nto mañi? Ki paradaisi ya kwa moya! Kwakomokisa kuli Jehova ulukisize sibaka sa swanisezo, ili mo batu bahae bapilisana ka kozo ni swalisano kusina taba kuli bapila mwa lifasi la Satani mokunani hahulu sitoyo, bumaswe, ni lika zesabisa. (1 Joa. 5:19; Sin. 12:12) Mulimu waluna yalilato wabona bumaswe bobuatile mwa lifasi le ni mobuamela batu, mi usileleza batanga bahae ilikuli bazwelepili kumusebeleza ka tabo. Linzwi lahae litalusa paradaisi ya kwa moya yeo kuli ki “sisabelo” sesinde ni “simu yenani mezi amañata.” (Isa. 4:6; 58:11) Ka tuso ya Jehova, batu baba mwa paradaisi yeo banani tabo mi baikutwa kusilelezwa mwa mazazi a mafelelezo ataata a.—Isa. 54:14; 2 Tim. 3:1. w24.04 20 ¶1-2

Haiba mubata kukena mwa linyalo, kusina kukakanya, semulapezi ka za kufumana mutu yaswanela wa kunyalana ni yena. Niti kikuli, Jehova hasepisi mutu ufi kamba ufi kuli uka mufumanela mutu wa kunyalana ni yena. Kono waisa pilu kwa lika zemutokwa ni kwa maikuto amina, mi uka mitusa hamunze mulika kufumana mutu wa kunyalana ni yena. Kacwalo, muzwelepili kumutaluseza zemubata ni momuikutwela. (Samu 62:8) Mumukupe kuli amituse kuba ni pilu-telele ni butali. (Jak. 1:5) Nihaikaba kuli hamufumani mutu yaswanela wa kunyalana ni yena ka nako ya cwale, Jehova usepisa kuli ukazwelapili kumitusa kufumana zemutokwa, kumibonisa lilato, ni kumiisa pilu. (Samu 55:22) Kono muhupule taba ye: Kubata mutu wakunyalana ni yena haiswaneli kuba yona nto ya butokwa hahulu mwa bupilo bwamina. (Mafil. 1:10) Tabo ya luli haisika itinga fa taba ya kuli mutu u mwa linyalo kamba kutokwa, kono iitingile fa kuba ni silikani sesitiile ni Jehova. (Mat. 5:3) Mi hamusali makwasha, mwakona kuba ni nako yeñata ya kueza zeñata mwa bukombwa. (1 Makor. 7:​32, 33) Muitusise hande nako yemusali makwasha. w24.05 21 ¶4; 22 ¶6

Muswanela kuba mwa libato ka nako yekuma kai? Kueza likatulo ka kayeye hañata kutahisanga butata. (Liprov. 21:5) Kacwalo, muswanela kuba mwa libato nako yetelelenyana kuli muzibane hande. Kono hamuswaneli kuba mwa libato ka nako yetelele hahulu. Bibele hape ibulela kuli: “Salibelezi mutu hasiliyeha kutaha, sikulisa pilu.” (Liprov. 13:12) Haiba kunani batu babali mwa libato, babañwi bakona kubatusa cwañi? Lwakona kubamema kuli bato ca ni luna sico, kufumaneha kwa tukiso yaluna ya kulapela sina lubasi, kamba kubamema kuli bato itabisa ni luna. (Maro. 12:13) Kana batokwa mutu wa kubasindeketa, kutusiwa kwa neku la nzila, kamba kufumana sibaka kobakona kuikambotela bababeli? Haiba ki cwalo, kana lwakona kuitatela kubatusa? (Magal. 6:10) Haiba batu babali mwa libato bamikupa kuli mubasindekete, muitebuhe hahulu tohonolo yeo. Mutokomele kuli hamu basiyi banosi, kono hape mulemuhe nako yemuswanela kubasiya hanyinyani ilikuli baikambote. w24.05 30 ¶13-14

Baana-bahulu baikatazanga kuziba miinelo yenetahisize kuli mutu aeze sibi. Ka mutala, kana Mukreste yo naakalile kufokola hanyinyani-hanyinyani bakeñisa kuli naasaezangi tuto ya ka butu kamba kuabana mwa bukombwa? Kana utuhezi kulapelanga ku Jehova kamita kamba haezangi cwalo kuzwelela kwatasaa pilu? Kana naatuhelezi litakazo zemaswe kumuzamaisa? Kana uezize likatulo zemaswe ka za liango ni ka za lika za kuitabisa ka zona? Likatulo zeo liamile cwañi pilu yahae? Kana walemuha mwaikutwela Ndatahe, yena Jehova, ka za likatulo zaezize cwanoñu fa ni ka za likezo zahae? Baana-bahulu bakona kubuza mutu yo lipuzo zeka mutusa kunahanisisa ka za lika zefokolisize silikani sahae ni Jehova ili zetahisize kuli aeze sibi. Baezanga cwalo ka sishemo mi hababuzangi mutu litaba za ka butu zebasa swaneli kuziba. (Liprov. 20:5) Kutuha fo, bakona kuitusisa liswanisezo kuli batuse mutu yo kunahanisisa ka za likezo zahae ni libaka halifosahalile. Mwendi habakopana ni yena lwapili, mutu yo wakona kukala kuikutwa hahulu bumaswe kabakala zaezize. Mane wakona kubaka. w24.08 22 ¶9-11

Jesu naatukufalezwi kukutaza “taba yende ya Mubuso,” kakuli naaziba kuli Mulimu naabata kuli aeze musebezi wo. Jesu naangile musebezi wa kukutaza kuba yona nto ya butokwa hahulu mwa bupilo bwahae. Mane nihaiba mwa likweli za mafelelezo a bukombwa bwahae fa lifasi, naazamayanga “kuzwa mwa muleneñi omuñwi kuya ku omuñwi ni munzi omuñwi kuya ku omuñwi, anzaa luta batu.” (Luka 13:22) Hape naalutile balutiwa babañwi kuli bakutaze taba yende sina yena. (Luka 10:1) Ni kacenu, kukutaza taba yende ki ona musebezi wa butokwa hahulu wabata Jehova ni Jesu kuli lueze. (Mat. 24:14; 28:​19, 20) Lwakona kuba ni tukufalelo yetuna mwa bukombwa haiba luunga batu sina mwabaangela Jehova. Ubata kuli batu babañata bautwe taba yende ni kuiamuhela. (1 Tim. 2:​3, 4) Bakeñisa kuli taba yende yakona kupilisa batu, Jehova ulutusa kuba ni buikoneli bwa kutalusa hande taba yeo kwa batu. Nihaike kuli batu habaangi muhato ka nako ya cwale, bakona kuba ni kolo ya kueza cwalo pili ñalelwa yetuna isika fela kale. w25.03 15-16 ¶5-7

Mukreste ni Mukreste uswanela kueza katulo ka kuya ka lizwalo lahae lelilutilwe ka Bibele. Babañwi bakona kuikutwa kuli kulukile kulumelisa mutu yo kamba kumuamuhela hataha kwa mikopano. Nihakulicwalo, haluna kuambola ni yena ka nako yetelele kamba kutanda nako ni yena mwa lika zeñwi. Babañwi bakona kuipuza kuli, ‘Kana Bibele haibuleli kuli Mukreste yalumelisa mutu yacwalo uabana ni yena mwa misebezi yahae yemaswe?’ (2 Joa. 9-11) Litaba zeñwi zeswalisana ni liñolo leo libonisa kuli taelo yeo iama kwa bakwenuheli ni kwa batu babasusueza babañwi kuikenya mwa muzamao omaswe. (Sin. 2:20) Kacwalo, haiba mutu ususueza babañwi kulumela lituto za bakwenuheli kamba kuikenya mwa muzamao omaswe, baana-bahulu habana kulukisa kupotela mutu yo. Nihakulicwalo, kunani sepo ya kuli ukabaka. Kono kufitela kuba cwalo, haluna kulumelisa mutu yo kamba kumumemela kwa mikopano ya puteho. w24.08 30-31 ¶14-15

Jesu hasaafepile batu babañata, ataluseza baapositola bahae kuli bazwe mwa sibaka seo ni kukutela kwa Kapernauma ka sisepe mi yena aikela fa lilundu; kacwalo, naatibezi mulelo wa batu bao wa kumueza mulena. (Joa. 6:​16-20) Kono baapositola hane basweli kufuluha sisepe, kwataha liñungwa, lene litahisize moya omutuna ni mandinda. Cwale Jesu ataha ku bona inzaa zamaya fa mezi. Mi ataluseza muapositola Pitrosi kuli ni yena azamaye fa mezi. (Mat. 14:​22-31) Jesu hasaakeni mwa sisepe, moya wafela. Taba yeo neifitile balutiwa kwa lipilu, mi bali: “Kaniti u Mwanaa Mulimu.” (Mat. 14:33) Niteñi, nebasika lemuha swalisano ye mwahalaa makazo ye ni makazo yanaaezize ya kufepa batu babañata. Mareka naañozi cwana ka za kezahalo yeo, kuli: “[Baapositola] bakomoka hahulu, kakuli nebasika lemuha zene baswanela kuituta kwa makazo ya linkwa.” (Mare. 6:​50-52) Baapositola nebasika utwisisa kuli Jehova naafile Jesu maata a kueza limakazo zeñwi zeñata kwandaa feela makazo ya sinkwa. w24.12 5 ¶7

Lukona kubonisa kuli lwaitebuha lilato la Jehova ka kuitusisa nako ya Kupuzo ye, kubonisa Jehova kuli luitumezi hahulu kabakala kulufa tiululo. Kwandaa kuitukiseza kuyo fumaneha kwa Kupuzo, lwakona kumema babañwi kuli ni bona bayo fumaneha teñi. Mutaluseze batu bomumema zekaezahala kwa Kupuzo. Muka batusa haiba mubabuhisa vidio ye fa jw.org yeli, Ki Kabakalañi Jesu Hanaashwile? ni yeli, Muhupule Lifu la Jesu. Baana-bahulu baswanela kuikataza kumema babafokozi. Munahane feela tabo yetuna yekaba teñi kwa lihalimu ni fa lifasi haiba zeñwi za lingu za Jehova zelatehile likutela mwa mutapi wahae! (Luka 15:​4-7) Kwa Kupuzo, lueze molukonela kaufela kulumelisa mañi ni mañi kono sihulu babaka fumaneha lwapili ni batu ili bao sekufitile nako yetelele kuzwa fobafumanehela kwa Kupuzo. Lubata kuli baikutwe kuamuhelwa!—Maro. 12:13. w25.01 31 ¶15

Ki niti kuli tiululo ilutusa kuutwisisa kuli Jehova ulukile, kono sihulu ilutusa kuutwisisa butuna bwa lilato lahae. (Joa. 3:16; 1 Joa. 4:​9, 10) Tiululo hailuluti feela kuli Jehova ubata kuli lupile kuya kuile, kono hape iluluta kuli ubata kuli lube kalulo ya lubasi lwahae. Munahane taba ye: Adama hanaaezize sibi, Jehova naamulunduzi mwa lubasi lwahae. Kabakaleo, kaufelaa luna lupepezwi kwandaa lubasi lwa Jehova. Kono kabakala tiululo, Jehova uswalezi libi zaluna mi kwapili ukakutiseza mwa lubasi lwahae batu kaufela bababonisa tumelo ni kuipeya kuutwa. Nihaiba ka nako ya cwale lwakona kuba ni silikani sesitiile ni Jehova ni mizwale ni likaizeli baluna. Jehova walulata luli!—Maro. 5:​10, 11. w25.01 21 ¶6

Kusina kukakanya, mwalumela kuli tiululo ki mpo ya butokwa hahulu! (2 Makor. 9:15) Bakeñisa kuli Jesu naalushwezi, mwakona kuba ni silikani sesitiile ni Jehova Mulimu. Hape mwakona kuba ni sepo ya kupila kuya kuile. Kacwalo, kwaswanela luli kuitebuha tiululo ni kuitumela ku Jehova, yena yanaasusuelizwe ki lilato kuli alufe mpo yeo! (Maro. 5:8) Jesu naatomile Kupuzo ya lifu lahae yeeziwanga silimo ni silimo kuli alutuse kuzwelapili kuitebuha tiululo ni kuli lusike lwalibala zaluezelize Jehova ni Jesu. (Luka 22:​19, 20) Silimo se, Kupuzo ikaezwa la Bune, April 2, 2026. Kusina kukakanya, kaufelaa luna lusweli kuitukiseza kuyo fumaneha teñi. Lukatusiwa hahulu haiba ka nako ya Kupuzo lufumana nako ya kunahanisisa zaluezelize Jehova ni Mwanaa hae. w25.01 20 ¶1-2

Mwakona kuituta zeñata ka za lilato lanani lona ku luna Jehova Mulimu ni Kreste Jesu haiba muzwelapili kunahanisisa za lilato leo. Ka nako ya Kupuzo ya silimo se, mwakona kubala ka tokomelo buka iliñwi kamba kufitelela kwa Libuka za Evangeli. Musike mwabala litaba zeñata hahulu ka nako yeswana. Kono mubale ka kuiketa mi mulemuhe mabaka amañwi haluswanela kulata Jehova ni Jesu. Haiba semubile mwa niti ka lilimo zeñata, mwakona kukakanya ka za haiba kunani lika zenca zemukona kuituta kwa litaba zezibahala hahulu zecwale ka katulo yelukile ya Mulimu, lilato lahae ni tiululo. Niti kikuli, lukazwelapili kuituta lika zenca kwa litaba zeo ni zeñwi. Kacwalo, mubale ni kuituta litaba zeñata ze mwa lihatiso zaluna. w25.01 24-25 ¶13-15