Liñolo Labubeli ku Timotea 1:1-18
1 Na Paulusi, muapositola wa Kreste Jesu ka kuya ka tato ya Mulimu kulikana ni sepiso ya bupilo bobutaha ka Kreste Jesu,+
2 niñolela Timotea, mwanaka yalatwa, nili:+
Haike sishemo, muhau, ni kozo yezwa ku Mulimu Ndate ni Kreste Jesu Mulenaa luna libe ni wena.
3 Niitumela ku Mulimu, yena yeniezeza sebelezo yekenile ka lizwalo lelikenile sina mone baezelize bo kuku, hanituheli kukuhupula mwa likupo zaka busihu ni musihali.
4 Haninze nihupula miyoko yahao, ninyolelwa kukubona, kuli nitabe hahulu.
5 Kakuli nihupula tumelo yahao yesina buipi,+ yeneli teñi pili ku kuku wahao Loisi ni ku maho Eunise, kono ili yenikolwa kuli iteñi ni ku wena.
6 Ka lona libaka leo nikuhupulisa kuli mpo ya Mulimu yeinzi ku wena, yene ufilwe hane nikubeile mazoho fahalimu, uikoteze sina mulilo.+
7 Kakuli Mulimu naasika lufa moya wa boi,+ kono naalufile moya+ wa maata ni wa lilato ni wa kuba ni kutwisiso.
8 Cwale usike waswabela bupaki bwa za Mulenaa luna+ kamba kuswabela na, yali lipantiti kabakala hae,+ kono uitukiseze kunyandela taba yende ka kuitinga fa maata a Mulimu.+
9 Naalupilisize ni kulubiza ka pizo yekenile,+ isiñi kabakala misebezi yaluna, kono kabakala mulelo wahae ni sishemo sahae.+ Sishemo seo nelu sifilwe ka kuswalisana ni Kreste Jesu kwakale-kale,
10 kono cwale sibonahalisizwe hande ka kubonahala kwa Mupilisi waluna, yena Kreste Jesu,+ yafelisize lifu+ mi ubonahalize mwakufumanela bupilo+ bobusa shwi+ ka taba yende,+
11 yona yene niketezwi kuba mukutazi ni muapositola ni muluti wayona.+
12 Leo ki lona libaka leninyandisezwa cwalo ni na,+ kono haniswabi.+ Kakuli naziba yenilumezi ku yena, mi ninani buikolwiso bwa kuli wakona kubukeleza senibeile mwa pabalelo yahae kufitela lizazi leo.+
13 Uzwelepili kuswala sikuka* sa manzwi amande*+ ane uutwile ku na, inze ubonisa tumelo ni lilato lelizwa mwa kuswalisana ni Kreste Jesu.
14 Usileleze nto ya butokwa yende ye, ka moya okenile oinzi ku luna.+
15 Waziba kuli batu kaufela mwa provinsi ya Asia+ banifulalezi, kukopanyeleza cwalo ni Figelo ni Ermogene.
16 Haike Mulena ashemube ba ndu ya Onesiforo,+ kakuli naanikatulusize hañata, mi naasika swabela mawenge aka.
17 Kono hanaali mwa Roma, atukufalelwa kunibata mi anifumana.
18 Haike Mulena amutuse kuli Jehova* amushemube mwa lizazi leo. Mi waizibela hande misebezi kaufela yanaaezize mwa Efese.
