Mizwale bababonisa tulemeno totunde twa Sikreste batusa hahulu puteho. Mutu “yanani kutwisiso” utahisa kuli kube ni kozo. Haiba mubata kuzibahala ka kuba mutu yanani kutwisiso, muteelezange ku babañwi ni kuutwisisa mibonelo yabona. Ka mutala, haiba baana-bahulu babañata balumezi kuli kueziwe katulo yeñwi yelumelelana ni likuka za mwa Bibele, kana mukayemela katulo yeo nihane mukatabela kuli lika liezwe ka nzila isili? Musike mwañañelela kuli babañwi baeze lika ka momubatela. Ki kwa butokwa kuteeleza kwa maikuto a babañwi. (Gen. 13:​8, 9; Liprov. 15:22) Kufita kuba ni buhali ni kusalumelelana ni babañwi, mubonise bunolo ni maseme. Ka kuba mutu yalata kozo, muikataze kutahisa kozo nihaiba mwa miinelo yetaata. (Jak. 3:​17, 18) Manzwi amina amusa akona kutahisa kuli batu baombale, kukopanyeleza cwalo ni balwanisi.—Baat. 8:​1-3; Liprov. 25:15; Mat. 5:​23, 24. w24.11 23 ¶13

Nihaike kuli Jesu naashwile “feela hañwi,” usaeza buitomboli kabakala luna. (Maro. 6:10) Ka mukwa ufi? Uzwelapili kusebeza kuli alufe lika zende zeñata zekonahaliswa ki tiululo. Halunyakisiseñi lika zasweli kueza. Usebeza sina Mulenaa luna, Muprisita Yapahami, ni toho ya puteho. (1 Makor. 15:25; Maef. 5:23; Maheb. 2:17) Ki yena yaetelela musebezi wa kukubukanya babatozizwe ni buñata bobutuna bwa batu, ili musebezi okafezwa kueziwa pili ñalelwa yetuna isika fela kale. (Mat. 25:32) Hape ubona teñi kuli batanga bahae babasepahala bafepiwa hande kwa moya mwa mazazi a mafelelezo a. (Mat. 24:45) Mi mwahalaa nako kaufela ya Puso Yahae ya Lilimo ze Sikiti, ukazwelapili kueza lika zelutusa. Kaniti luli, Jehova naalufile Mwanaa hae kuli alutuse! w25.01 24 ¶12

Jehova haswalela libi zaluna, uezanga cwalo ka kutala mi hazwelangipili kulihupula. Kacwalo, lwakona kuba ni silikani sesinde ni Ndataa luna wa kwa lihalimu. Ka nako yeswana, lwaziba kuli kuswalelwa habuniti ki mpo. Jehova ulufile mpo yeo kabakala lilato ni sishemo sahae kwa batu babasika petahala. Haki tukelo yelunani yona. Mañi ni mañi waluna uswanela kuitumela kuli Jehova ki Mulimu ‘yaswalela libi habuniti’! (Samu 130:4; Maro. 4:8) Nihakulicwalo, haiba lubata kuswalelwa ki Jehova, luswanela kueza nto yeñwi ya butokwa. Jesu naabulezi kuli: “Haiba musaswaleli batu lifoso zabona, Ndataa mina ni yena hana kumiswalela lifoso zamina.” (Mat. 6:​14, 15) Kacwalo, luswanela kulikanyisa Jehova ka kuswalela babañwi. w25.02 13 ¶18-19

Munyakisise ka za batu ba mwa Sodoma ni Gomora. Muuna yasepahala yabizwa Lota, naapila ni batu bao. Kono kana Lota naakutalize kwa batu bao kaufela? Haluzibi. Batu bao neli babamaswe, kono kana kaufelaa bona nebaziba zelukile ni zesika luka? Muhupule kuli sikwata sa baana ba mwa muleneñi wo nebabata kulobala ni baenyi ba Lota. Bibele ibulela kuli batu bane bali mwa sikwata seo neli “kuzwa kwa bashimani kuisa kwa baana babahulu.” (Gen. 19:4; 2 Pit. 2:7) Kana kunani bupaki bobubonisa kuli Jehova Mulimu yasishemo naaatuzi kuli kusike kwaba nihaiba mutu alimuñwi kwa batu bao yakazusiwa? Jehova naabulelezi Abrahama kuli mwa muleneñi wo nekusa koni kufumanwa nihaiba feela baana baalishumi babalukile. (Gen. 18:32) Kacwalo, batu bao nebasika luka, mi kwaswanela Jehova hanaa bayundisize kabakala likezo zabona. Kana lwakona kubulela ka buikolwiso kuli hakuna nihaiba mutu alimuñwi kwa batu bao yakazusiwa ka nako ya “zuho ya . . . babasika luka”? Batili! w24.05 2 ¶3; 3 ¶8

Bakeñisa butata bwa kutokwa hande masheleñi, babañwi baikatulezi kukena musebezi otokwa kuli babe kwahule ni lubasi lwabona, kono hañata zezwanga mwa likatulo zecwalo haki zende. Pili musika amuhela kale musebezi omunca, munyakisise ka za masheleñi omuka fumananga hamohocwalo ni mo musebezi wo ukaamela silikani samina ni Jehova. (Luka 14:28) Muipuze kuli: ‘Linyalo laluna likaamiwa cwañi haiba niba kwahule ni bakuluna? Kana nikakona kufumanehanga kwa mikopano kaufela, kuya mwa bukombwa, ni kutanda nako ni mizwale ni likaizeli baka?’ Haiba munani bana, hape muswanela kuipuza puzo ya butokwa ye: ‘Nikahulisa cwañi bana baka “ka kalimelo ni kelezo ya Jehova” inze nili kwahule ni bona?’ (Maef. 6:4) Muetelelwe ki mubonelo wa Mulimu, isiñi ba lubasi kamba balikani babasa kuteki likuka za mwa Mañolo. w25.03 29 ¶12

Mukreste yazwelapili kuba mbututu kwa moya, ukona kuyembululwa ka bunolo ki “bupumi bwa batu” ni “milelo ya buhata,” mi ukona kupumiwa ka bunolo ki batu babahasanya litaba za buhata ni bakwenuheli. Ukona kuba ni muna, kutahisa lifapahano, kuhalifiswa kapili, kamba kukomiwa kapili ki miliko. (1 Makor. 3:3) Mañolo abapanya kuhula kwa moya kwa kuhula kwa mubili. (Maef. 4:15) Mwanana haana yeloseli; kacwalo, utokwa kuetelelwa. Ka mutala, me wakona kubulelela mwanaa hae yomunyinyani kuli amuswale kwa lizoho habanze batula mukwakwa. Mwana yo hanzaa hula, bo mahe bakona kumulumeleza kutula mukwakwa anosi, kono baka muhupulisa kuli atalimange kafa ni kafa pili asika tula kale. Hasaahulile, mwana yo ukaziba mwakuisileleleza anosi. Ka mukwa oswana Bakreste babahulile kwa moya habaeza katulo, banahanisisanga likuka za mwa Bibele kuli baange lika sina mwaliingela Jehova. w24.04 3 ¶5-6

Ka lilimo zeñata, balikani ba Jehova neli feela libupiwa za moya zenepila ni yena kwa lihalimu. Hasamulaho, abupa batu mi ni bona nebakona kuba baenyi mwa tende yahae. Hamulaho wa nako, babañwi ba batu bane babile baenyi ba Jehova neli Enoke, Nuwe, Abrahama, ni Jobo. Batanga ba Mulimu bane basepahala bao, bataluswa kuli neli balikani ba Mulimu, kamba kuli nebazamaile ni “Mulimu wa niti.” (Gen. 5:24; 6:9; Jobo 29:4; Isa. 41:8) Ka lilimo zeñata, Jehova uzwezipili kumema balikani bahae kuli babe baenyi mwa tende yahae. (Ezek. 37:​26, 27) Ka mutala, mwa bupolofita bwa Ezekiele luituta kuli Mulimu ubata luli kuli batanga bahae babasepahala babe ni silikani sesitiile ni yena. Usepisa kueza “ni bona tumelelano ya kozo.” Bupolofita bo buama kwa nako, ili yeo batu babanani sepo ya kuyo pila kwa lihalimu ni batu babanani sepo ya kuto pila fa lifasi bakaba hamoho mwa tende yahae ya swanisezo sina “mutapi ulimuñwi.” (Joa. 10:16) Taba yeo isweli yaezahala! w24.06 2 ¶2, 4; 3 ¶5

Ka kuba batanga ba Jehova, luyemela Mubuso wa Mulimu ka pilu yaluna kaufela, kono hañata lutokwa kuba ni bundume kuli lueze cwalo. (Mat. 6:33) Ka mutala, mwa lifasi lelimaswe le, lutokwa kuba ni bundume kuli lupile ka likuka za Jehova ni kukutaza taba yende ya Mubuso. Mi hañata lutokwa kuba ni bundume kuli lusike lwaikenya mwa litaba za lipolitiki zesweli kukauhanya batu kacenu. (Joa. 18:36) Batanga ba Jehova babañata bakopani ni butata bwa kutokwa hande masheleñi, kunatakiwa, kamba kulengiwa mwa tolongo kabakala kuhana kuikenya mwa litaba za lipolitiki kamba kukena busole. Kunyakisisa mitala ya batu babayemezi bubusi bwa Jehova ka bundume, kwalutiisanga ni kulutusa kuba ni bundume. Mulenaa luna, Kreste Jesu, naahanile kuikenya mwa litaba za lipolitiki za lifasi la Satani niha naakukuelizwe hahulu kueza cwalo. (Mat. 4:​8-11; Joa. 6:​14, 15) Naaitinganga ku Jehova kamita kuli amufe maata. w24.07 3 ¶4; 4 ¶7

Jehova naatahisize kuli taba yeutwisa butuku kwa pilu yeo iñolwe kuli lutusiwe. Ilutusa kuutwisisa libaka hatoile hahulu sibi. Sibi silukauhanya ku Ndataa luna, mi sitahisa lifu. (Isa. 59:2) Ki lona libaka Satani, yena mukwenuheli yanaatahisize butata bo kaufela haalata hahulu sibi ni kususueza batu kuli bazwelepili kusieza. Kacwalo, bo Adama ni Eva hane baezize sibi, mwendi Satani naanahanile kuli mulelo wa Jehova ka za batu neusike wapetiwa. Kono naasika utwisisa kuli Jehova unani hahulu lilato. Mulimu naasika cinca mulelo wahae ka za bana ba Adama ni Eva. Walata batu; kacwalo, honafo feela afa sepo kwa batu kaufela. (Maro. 8:​20, 21) Jehova naaziba kuli nekukaba ni batu bane baka mulata ni kumuutwa. Mi ka kuba Ndataa bona ni Mubupi, naakalukisa nzila yeneka batusa kulukululwa kwa sibi ni kuba ni silikani sesitiile ni yena. w24.08 3 ¶3-4

Buñata bwa batu ba Jehova bapatehile hahulu. Luezanga misebezi ya kwa mubili kuli lubabalele lubasi lwaluna. (1 Tim. 5:8) Bakreste babañata bababalela bahabo bona babali bakuli kamba basupali. Mi kaufelaa luna luswanela kuisa pilu kwa buikangulo bwaluna bwa kwa mubili, mi kueza cwalo kutokwa nako. Kwandaa buikalabelo bo, kunani misebezi yemiñwi yeluswanela kupeta mwa puteho. Musebezi wa butokwa hahulu oluswanela kueza ki kukutaza taba yende ka tukufalelo. Kubala Bibele ki yeñwi ya “lika za butokwa hahulu” ku luna Bakreste; kacwalo, luswanela kuikataza kuezanga cwalo. Samu yapili ibulela cwana ka za mutu yanani tabo: “Utabela mulao wa Jehova, mi waubala ni kuunahanisisa, musihali ni busihu.” (Samu 1:​1, 2) Kusina kukakanya, taba yeo ibonisa kuli luswanela kubanga ni nako ya kubala Bibele. Ki ifi nako yende ya kubala Bibele? Mañi ni mañi waluna wakona kuketa nako yebonahala kuba hande ku yena. Kono sa butokwa kikuli, luswanela kuketa nako yeka lukonisa kubalanga Bibele kamita. w24.09 3 ¶5-6

Kana Mukreste yahulile kwa moya hatokwi kutusiwa ki babañwi? Eni. Bakreste babahulile kwa moya ni bona ka linako zeñwi batokwanga kutusiwa. Mutu yasika hula kwa moya, mwendi ukalibelela kuli babañwi bamutaluseze zaswanela kueza kamba kuli bamuezeze katulo yaswanela kuikezeza. Kono ka kushutana, Mukreste yahulile kwa moya hakupa tuso kwa Bakreste babanani zibo ni yeloseli, waziba kuli ki yena yanani buikalabelo bwa kuikezeza likatulo ni kuli uswanela ‘kushimba mulwalo wahae. Sina feela batu babahulu habashutana kwa ponahalo, Bakreste babahulile kwa moya ni bona banani tulemeno totushutana totucwale ka butali, bundume, bufani, ni kutwelo-butuku. Kuzwa fo, Bakreste bababeli babahulile kwa moya niha bakopana ni muinelo oswana, bakona kueza likatulo zeshutana zesalwanisani ni likuka za mwa Bibele. Kukona kuba cwalo sihulu haiba batokwa kueza katulo yeama lizwalo. Kacwalo, hakuna yakaatula yomuñwi haiba baeza likatulo zeshutana. Kono bakazwelapili kuswalisana.—Maro. 14:10; 1 Makor. 1:10. w24.04 4 ¶7-8

Ki lika mañi zemukona kueza haiba muikutwa kuli hamu ba butokwa? Mubale litimana za mwa Bibele zemikolwisa kuli muba butokwa ku Jehova mi mulinahanisise. Haiba mupalezwi kupeta sikonkwani sesiñwi kamba muzwafile bakeñisa kuli hamukoni kueza zeñata sina babañwi, musike mwaikutwa kuli hamuna tuso. Jehova haabati kuli mueze lika zemusa koni kueza. (Samu 103:​13, 14) Haiba nemunyandisizwe ki mutu yomuñwi, musike mwaikutwa mulatu kabakala zanaaezize mutu yo. Naasaswaneli nihanyinyani kumieza cwalo! Muhupule kuli babaeza babañwi maswe ki bona babaka ikalabela ku Jehova, isiñi babaezwa maswe. (1 Pit. 3:12) Musike mwakakanya kuli Jehova wakona kutusa babañwi ka kuitusisa mina. Umikutekile hahulu ka kumifa tohonolo ya kusebeza ni yena mwa bukombwa. (1 Makor. 3:9) Zeezahezi mwa bupilo bwamina mwendi limitusize kuba ni kutwelo-butuku ni kuutwisisa mobaikutwela babañwi. Kunani lika zeñata zemukona kueza kuli mubatuse. w24.10 7-8 ¶6-7

Jehova ubata kuli luezwe hande mi walemuhanga haluezwa maswe. “Jehova ulata katulo yelukile.” (Samu 37:28) Jesu ulutusa kukolwa kuli Jehova ‘ukatahisa kuli luezwe kapili ka kuluka’ ka nako yeswanela. Mi hona cwale-cwale fa, ukafelisa manyando aluna kaufela mi haana kulumeleza kuli luezwe maswe nikamuta. (Samu 72:​1, 2) Jehova ulutusa kuitiisa haluezwa maswe halunze lulibelela nako yakafelisa manyando kaufela. (2 Pit. 3:13) Ululuta kusaeza nto yemaswe haluezwa maswe. Ka kuitusisa Mwanaa hae, Jehova ulutomezi mutala omunde hahulu olutusa kuziba za kueza haluezwa maswe. Mi ulufile kelezo yende yelukona kusebelisa mwa muinelo wo. w24.11 2-3 ¶3-4

Nekubonahala inge kuli nekusike kwakonahala kufepa batu sina mwanaabalaelezi Jesu, kakuli nekunani baana baba bato eza 5,000. Mi halukopanya kwateñi basali ni banana, kubonahala kuli batu kaufela bane batokwa kufepiwa nebakona kufita fa 15,000. (Mat. 14:21) Andreasi ali: “Kunani mushimani fa yanani linkwa zeketalizoho za mabele ni tutapi totubeli. Kono zeo likatusa cwañi batu babañata cwana?” (Joa. 6:9) Linkwa za mabele neliciwa hahulu ki babotana ni batu babañwi, mi kubonahala kuli tutapi totunyinyani to netubeilwe lizwai ni kuomiswa. Nihakulicwalo, lico zanaanani zona mushimani yo nelisike zakona kufepa batu babañata cwalo. Kabakala kuli Jesu naabata kubonisa sishemo kwa batu bao, abalaela kuli baine mwa likwata fa bucwañi. (Mare. 6:​39, 40; Joa. 6:​11-13) Jesu kihona aitumela ku Ndatahe kabakala sinkwa ni litapi. Nekuswanela luli kuitumela ku Mulimu, kakuli mane lico kaufela lizwa ku yena. Ki kwa butokwa kulikanyisa mutala wa Jesu ka kulapelanga pili lusikaca kale. Jesu cwale ataluseza baapositola bahae kuli baabele batu lico zeo, mi batu kaufela baca ni kukula. w24.12 2-3 ¶3-4

Jesu hanaali fa lifasi, naakanyisize Ndatahe ka kutaluseza batu kuli naaeza limakazo ka maata anaazwa ku Jehova. (Mare. 5:​18-20) Jesu hape naakanyisize Jehova ka litaba zanaabulezi ka za Ndatahe ni mwanaapilisanezi ni batu. Nako yeñwi, Jesu naaluta mwa sinagoge. Mwahalaa batu bane bateeleza ku yena nekunani musali yanaakatalizwe ki mudimona ka lilimo ze 18. Mudimona wo neutahisize kuli musali yo akotobane hahulu. Jesu naautwisisa kuli musali yo naaziyelehile luli mi naabata kumutusa. Kacwalo, aatumela musali yo mi aambola ni yena ka sishemo, ali: “Musali, ulukuluzwi kwa butuku bwahao.” Kihona amubeya mazoho fahalimu, mi honafo musali yo aotoloha mi “akala kukanyisa Mulimu” kabakala kuli Jehova naamutusize kuba ni buikangulo bobunde hape. (Luka 13:​10-13) Musali yo naaswanela luli kufa Jehova kanya, mi ni luna lunani mabaka aswanela a kukanyisa Jehova. w25.01 2-3 ¶3-4

Kana kwakonahala kuli lukutelwe ki lika kaufela zene balatehezwi ki zona bo Adama ni Eva? Eni, kono isiñi ka buikatazo bwaluna. (Samu 49:​7-9) Haiba lusatusiwi, halukoni kuba ni sepo ya kuba ni bupilo kwapili kamba kuzusiwa. Mane neluka shwa lusina sepo ya kupila hape, sina feela lifolofolo. (Muek. 3:19; 2 Pet. 2:12) Ndataa luna yalilato, yena Jehova, ulufile mpo yekwahela sikoloti sa sibi seluhozize ku Adama. Jesu naatalusize taba yeo cwana: “Mulimu naalatile hahulu lifasi kuli mane naafile Mwanaa hae wa libanda, kuli mutu kaufela yabonisa tumelo ku yena asike atimezwa kono abe ni bupilo bobusa feli.” (Joa. 3:16) Kutuha fo, mpo yeswana yeo ilukonisa kuba ni silikani sesinde ni Jehova. Lwakona kutusiwa ki mpo yende yeo yetahisa kuli libi zaluna liswalelwe. w25.02 3 ¶3-6

Ki lika mañi zenetusize Saule kuli akolobezwe? Jesu hanaaambozi ni Saule kuzwelela kwa lihalimu, liseli lelituna nelitahisize kuli Saule abe sibofu. (Lik. 9:​3-9) Naaitimile lico ka mazazi amalaalu mi kubonahala kuli naanahanisisize ka za lika zenesazo ezahala ku yena. Kaniti luli, Saule naakozwi kuli Jesu neli yena Mesia ni kuli balateleli bahae nebali mwa bulapeli bwa niti. Kunani lituto zelukona kuituta ku Saule. Naakona kulumeleza buikuhumuso kamba sabo ya kusaba batu kumupaleliswa kukolobezwa. Kono naasika lumeleza nto yeo kuezahala. Saule naaitatezi kuba Mukreste niha naaziba kuli naakanyandiswa. (Lik. 9:​15, 16; 20:​22, 23) Hamulaho wa kukolobezwa, naazwezipili kuitinga ku Jehova kuli amutuse kutiyela miinelo yetaata yanaakopana ni yona. (2 Makor. 4:​7-10) Hamukolobezwa sina yomuñwi wa Lipaki za Jehova, mukakopana ni miinelo yetaata, kono mukafumana tuso. Mwakona kukolwa kuli Mulimu ni Jesu bakazwelapili kumitusa.—Mafil. 4:13. w25.03 4 ¶8-9

Sikonkwani sa kubala Bibele ki sa butokwa. Kunani lika zeñwi zeluswanela kueza kuli kubala Linzwi la Mulimu kulutuse ka kutala. Halunyakisiseñi mutala wo: Mezi, sihulu a pula, ki a butokwa mwa bupilo. Kono haiba pula yeñata isuluha mwa nako yekuswani feela, kukona kuba ni mezi amañata hahulu mwa mubu. Haiba kuba cwalo, pula yeñata yeo haina kulutusa. Mubu utokwa nako kuli uanye mezi a pula ni kuli aitusiswe ki limela. Ka nzila yeswana, ni luna haluswaneli kubalanga Bibele ka kumata-mata, fo kikuli, kubala ka kuakufa kuli mane lwapalelwa kuba ni nako ya kunahanisisa zelubalile, kulihupula, ni kulisebelisa. (Jak. 1:24) Kana mulemuhile kuli ka linako zeñwi mubalanga Bibele ka kumata-mata feela? Ki lika mañi zemuswanela kueza? Mubale ka kuiketa. Muikataze kunahanisisa zemusweli kubala kamba zemusazo bala. Mwakona kuiketela kuekeza kwa nako yemuitutanga ili kuli mufumane nako ya kunahanisisa ni kuyeya zemuituta. w24.09 4 ¶7-9

Baana-bahulu habafiwa ketelelo, baswanela kuibala ka tokomelo ni kueza mobakonela kaufela kuilatelela. Bafiwanga ketelelo yebatusa kuziba mwakuzamaiseza likalulo za mukopano, mwakulapelela habayemela puteho, ni mwakubabalelela lingu za Kreste. Baana-bahulu habamamela litaelo kaufela zebafiwa ki kopano, bakatusa mizwale ni likaizeli mwa puteho kuikutwa kusilelezwa ni kulatiwa. Baana-bahulu haba lufa ketelelo, luswanela kuilatelela ka pilu yaluna kaufela. Haiba lueza cwalo, lukatusa mizwale babaetelela bao kupeta hande musebezi wabona. Bibele ilususueza kuli luutwe babaetelela ni kuipeya kwatasaa bona. (Maheb. 13:​7, 17) Ka linako zeñwi, kukona kulubela taata kueza cwalo. Kabakalañi? Kakuli baana bao habasika petahala. Kono haiba luisa hahulu pilu kwa bufokoli bwabona kufita kuisa pilu kwa tulemeno twabona totunde, kukaswana feela inge kuli lutusa lila zaluna. Ka mukwa ufi? Lukatuhela kusepa kopano ya Mulimu. w24.04 10 ¶11-12

Kana batu kaufela babaka shwa ka nako ya ñalelwa yetuna bakayundiswa kuya kuile mi habana kuzusiwa? Mañolo abulela ka kuutwahala kuli batu babalwanisa hahulu Jehova, ili babaka bulaiwa ki yena ni mpi yahae fa Armagedoni, habana kuzusiwa. (2 Mates. 1:​6-10) Kono kucwañi ka za batu babaka shwa kabakala likezahalo za ka taho, likozi, kamba babaka bulaiwa ki batu babañwi? (Muek. 9:11; Zak. 14:13) Kana babañwi kwa batu bao bakazusiwa mwa lifasi lelinca ka nako ya zuho ya batu “babasika luka”? (Lik. 24:15) Haluzibi. Kono lwaziba litaba zeñata ka za lika zekaezahala kwapili. Ka mutala, lwaziba kuli fa Armagedoni, batu bakaatulwa ka kuya ka mobaezeza banyani ba Kreste. (Mat. 25:40) Mi batu babaka atulwa sina lingu, ki bababonisize kuli ba kwa lineku la babatozizwe ni la Jesu.—Sin. 12:17. w24.05 10-11 ¶9-11

Bibele italusa mazazi elupila ku ona kuli ki “linako zetaata, zeziyeza.” (2 Tim. 3:1) Kwandaa kukopana ni miinelo yetaata yebakopana ni yona batu kaufela mwa lifasi le, batu ba Jehova hape bakopana ni butata bwa kulwaniswa ni kunyandiswa. Ki lika mañi zelutusa kuzwelapili kusebeleza Jehova kusina taba ni kukopana ni miinelo yetaata yeo? Nto ya butokwa hahulu yelutusa kueza cwalo, kikuli lufitile fa kuziba Jehova kuli ki “Mulimu yapila.” (Jer. 10:10; 2 Tim. 1:12) Jehova wabonanga miinelo yetaata kaufela yelukopananga ni yona mi kamita uitukiselize kulutusa. (2 Makol. 16:9; Samu 23:4) Kumuunga sina Mulimu yapila kwakona kulutusa kutiyela miinelo yetaata kaufela yelukona kukopana ni yona. w24.06 20 ¶1-2

Luswanela kuzwelapili kusepa kopano ya Jehova. Haiba kuba ni mabaka autwahala atahisa kuli lucince moluutwisiseza taba yeñwi ya mwa Bibele kamba mouonga-ongelwa musebezi wa Mubuso, mizwale babaetelela habazina-zinangi kueza licinceho zetokwahala. Baezanga cwalo bakeñisa kuli nto yebaanga kuba ya butokwa hahulu ki kutabisa Jehova. Hape baezanga mobakonela kaufela kueza likatulo zetomile fa Linzwi la Mulimu, sona sikuka sebaswanela kulatelela batanga ba Jehova kaufela.Muapositola Paulusi naafile kelezo yeli: ‘Muzwelepili kuswala sikuka sa manzwi amande.’ (2 Tim. 1:13) Pulelo yeli, “sikuka sa manzwi amande,” iama kwa lituto za Sikreste zefumaneha mwa Bibele. (Joa. 17:17) Litaba kaufela zelulumela litomile fa lituto zeo. Kopano ya Jehova ilulutile kukumalela kwa sikuka seo. Haiba luzwelapili kueza cwalo, lukafuyaulwa. w24.07 11-12 ¶12-13

Muapositola Pitrosi naakona kuluta babañwi ka za kubaka ni kuswalelwa kabakala zeneezahezi ku yena. Nako yeñwi hamulaho wa mukiti wa Pentekota, Pitrosi naafile ngambolo kwa Majuda babañata bane basalumeli, mi naabataluselize kuli nebabulaile Mesia. Nihakulicwalo, naabasusuelize ka lilato kuli: “Ka mukwa ocwalo, mubake, mi musikuluhe ilikuli libi zamina litakulwe, kuli linako za kukatuluha litahe kuzwa ku Jehova yena kasibili.” (Lik. 3:​14, 15, 17, 19) Kacwalo, Pitrosi naabonisize kuli kubaka kususueza muezalibi kusikuluha, ili kucinca munahanelo ni likezo zahae zemaswe, ni kukala kupila ka nzila yetabisa Mulimu. Muapositola Pitrosi hape naabonisize kuli Jehova naaka takula libi zabona, kamba kubaswalela ka kutala. Kwasusueza kuziba kuli haiba lubakela libi zaluna, nihaiba zetuna, Jehova uka luswalela ka kutala! w24.08 12 ¶14

Kuba ni tumelo yetiile ya kuli lifasi le lituha liyundiswa kwakona kulutusa kusalata hahulu sifumu. Ka nako ya ñalelwa yetuna, batu “bakalatakela silivera yabona mwa linzila” kakuli bakalemuha kuli “silivera yabona ni gauda yabona halina kukona kubapilisa mwa lizazi la buhali bwa Jehova.” (Ezek. 7:19) Kufita kuisa hahulu pilu kwa kuikubukanyeza sifumu, luswanela kueza likatulo zeka lutusa kupila bupilo bobubunolo. Kueza cwalo kukopanyeleza kuhanyeza muliko wa kuba ni likoloti zesaswaneli kamba kuitusisa nako yaluna yeñata kwa kubabalela lika za kwa mubili. Hape luswanela kutokomela hahulu kuli halulati hahulu lika zelunani zona cwale. (Mat. 6:​19, 24) Lika za kwa mubili ni lika zeñwi cwalo zakona kulika tumelo yaluna halunze lulibelela mafelelezo a lifasi le. w24.09 11 ¶13-14

Lwakona kufelisa bufokoli bobuñwi bolunani bona. Kono lwakona kuzwelapili kuba ni bufokoli bobuñwi. Halunyakisiseñi mutala wa muapositola Pitrosi. Kusaba batu nekutahisize kuli alatule Jesu halaalu. (Mat. 26:​69-75) Nekubonahala inge kuli Pitrosi naafelisize bufokoli bo hanaafile bupaki ka bundume fapilaa kuta ya Sanhedrini. (Lik. 5:​27-29) Nihakulicwalo, lilimonyana kuzwa fo, naatuhezi kucanga ni Bakreste ba macaba ka nakonyana “kabakala kusaba babaile kwa mupato.” (Magal. 2:​11, 12) Pitrosi naakutezi kuba ni bufokoli bobuswana. Kukona kuba kuli naasika felisa bufokoli bo ka kutala. Ni luna lwakona kuipumana mwa muinelo oswana. Nihakulicwalo, lwakona kuhanyeza mukwa omuñwi omaswe ka kulatelela kelezo ya Jesu ili “kuzwelapili kutona.” (Mat. 26:41) Niha muikutwa kuli mutiile muzwelepili kuezanga zene mitusize kukondisa kwa makalelo.—2 Pit. 3:14. w24.07 18-19 ¶17-19

Hakuna mutu yabonisize hahulu sishemo sina Jesu. Hanaali fa lifasi, naaitusisize maata ahae a kueza limakazo kuli atuse babañwi. (Luka 9:​12-17) Naafile mpo yetuna ka kufitisisa, ili kufana bupilo bwahae kabakala luna. (Joa. 15:13) Kuzwa feela fazusezwa kwa bafu, Jesu uzwezipili kubonisa bufani. Sina feela mwanaasepiselize, ukupile Jehova kulufa moya wahae okenile kuli ululute ni kuluomba-omba. (Joa. 14:​16, 17, litaluso ze kwatasi; 16:13) Mi ka kuitusisa mikopano yaluna ya puteho, Jesu uzwelapili kulutusa kuziba mwakupetela hande musebezi wa kutusa batu mwa lifasi kaufela kuli babe balutiwa. (Mat. 28:​18-20) Muapositola Paulusi naañozi kuli Jesu hasaakambamezi kwa lihalimu, “naafile limpo zeli batu.” (Maef. 4:​7, 8) Paulusi naatalusize kuli Jesu naafile limpo zeo kuli atuse puteho mwa linzila zeshutana-shutana. (Maef. 1:​22, 23; 4:​11-13) Ki niti kuli baana ba habasika petahala, mi baezanga mafosisa. (Jak. 3:2) Kono Mulenaa luna Jesu Kreste uitusisa bona kuli alutuse, mi ki limpo ku luna. w24.10 18 ¶1-2

Davida naabulelezi mwanaa hae Salumoni kuli naakona feela kukondisa hanaaka zwelapili kuutwa Jehova Mulimu. Ka bumai, Salumoni naakalile kulapela milimu isili kwa mafelelezo a bupilo bwahae. Kacwalo, Jehova atuhela kumushemuba, mi alatehelwa ki butali bone bumutusa kubusa ka kuluka. (1 Mal. 11:​9, 10; 12:4) Luitutañi? Lukakondisa haiba luipeya kuutwa. (Samu 1:​1-3) Ki niti kuli Jehova haasika sepisa kuli uka lufa sifumu ni kanya sina Salumoni. Kono haiba luutwa Mulimu waluna, uka lufa butali bobuka lutusa kueza likatulo zende. (Liprov. 2:​6, 7; Jak. 1:5) Likuka zahae zakona kuluetelela halueza likatulo ka za mubeleko, tuto, za kuitabisa ka zona, ni masheleñi. Haiba lusebelisa kelezo yende yalufa Jehova, lukazwelapili kuba ni silikani sesinde ni yena mi lukafumana bupilo bobusa feli. (Liprov. 2:​10, 11) Lukaba ni balikani babande. Mi lukaba ni tabo mwa lubasi. w24.11 10-11 ¶11-12

Bashemi banani kolo ya kuba ni lipuisano zende ni bana babona ka za Bibele kamba ka za kuba ni tumelo ku Mulimu. Bakona kuba ni kolo yeo habayo pota kwa miziyamu. Ka mutala, mwakona kuitusisa lika za kwaikale zeezizwe kamba likezahalo za kwaikale ili zefumaneha mwa libuka kamba mwa mavidio kuli mutuse mwanaa mina kuikolwisa kuli litaba zeibulela Bibele linepahalile. Mwendi mwakona kuluta mwanaa mina ka za Licwe la Mamoabi (Moabite Stone) lese libile teñi ka lilimo ze 3,000, ili fokufumaneha libizo la Mulimu. Licwe leliezizwe ka kulikanyisa Licwe la Mamoabi mwa miziyamu yebizwa “Bibele ni Libizo la Mulimu” ye kwa Ofisi Yetuna Yeetelela Musebezi wa Lipaki za Jehova Mwa Lifasi Kaufela mwa Warwick, kwa New York. Licwe la Mamoabi leo libonisa kuli Mulena Mesha wa kwa Moabi naakwenuhezi Isilaele. Taba yeo yalumelelana ni zeibulela Bibele. (2 Mal. 3:​4, 5) Mwanaa mina hakaiponela bupaki bobubonisa kuli litaba zeibulela Bibele ki za niti mi linepahalile, tumelo yahae ikatiya hahulu. w24.12 14 ¶4; 15 ¶6