Sitabelo sa tiululo sa Kreste sisweli salutusa. Ka mutala, Jehova waswalelanga libi zaluna kabakala tiululo. Haasika tameha kuluswalela. Kono walata kueza cwalo. (Samu 103:​3, 10-13) Babañwi bakona kuikutwa kuli habaswaneli kuswalelwa ki Jehova. Kono niti kikuli, kaufelaa luna haluswaneli. Muapositola Paulusi naautwisisa kuli ‘naasaswaneli kubizwa muapositola.’ Nihakulicwalo, naaekelize kubulela kuli: “Ki ka sishemo sa Mulimu hanili senili sona.” (1 Makor. 15:​9, 10) Jehova waluswalelanga halubakela libi zaluna. Libaka? Kakuli walulata, isiñi kuli lwaswanela kuswalelwa. Haiba mukatazwa ki maikuto a kuli hamuswaneli kuswalelwa, muhupula kuli Jehova ufile tiululo, isiñi kwa batu babasina sibi, kono kwa baezalibi bababakile.—Luka 5:32; 1 Tim. 1:15. w25.01 26-27 ¶3-4

Haluna maata fahalimwaa lika zebakona kubulela kamba kueza ku luna batu babañwi, kono lunani maata a kuiketela za kueza mwa muinelo wo. Mi hañata nto yende yelukona kueza ki kuswalela. Kabakalañi? Kakuli lwalata Jehova, mi ubata kuli lube ni moya wa kuswalela. Haiba luzwelapili kunyema ni kusaswalela, lwakona kueza ka bukuba, mi mwendi mane lwakona kuikutwisa butuku. (Liprov. 14:​17, 29, 30) Haiba lufelisa ndimbelela, haluna kuutwa hahulu butuku kwa pilu mi lukaswalisana hande ni babañwi. Kueza cwalo hape kwakona kulutusa ka nzila yeñwi—lwakona kutuhela kunahana ka za taba yeo ni kuba ni tabo hape mwa bupilo. Ki lika mañi zekona kumitusa kufelisa bunyemi? Nzila yeñwi yemukona kueza cwalo ka yona ki kutuhelela nako kuli ifite ilikuli butuku bomuutwa bukusufale. Mutu yaholofezi hahulu hafilwe likalafo, utokwanga nako yeñata kuli afole. Ka nzila yeswana, ni luna kukona kuluungela nako kuli butuku boluutwa bukusufale pili lusika swalela kale mutu yalufoselize, kuzwelela kwatasaa pilu. (Muek. 3:3; 1 Pit. 1:22) Mukupe Jehova kuli amituse kuba ni moya wa kuswalela. w25.02 16-17 ¶8-11

Lituto za matatekelo likopanyeleza kubaka, tumelo, kolobezo, ni zuho. (Maheb. 6:​1, 2) Zeo ki zeñwi za lituto za matatekelo zebalumela Bakreste kaufela. Ki lona libaka muapositola Pitrosi hanaabulezi za lika zeo hanaakutaza kwa nyangela fa lizazi la Pentekota. (Lik. 2:​32-35, 38) Luswanela kulumela lituto za matatekelo zeo kuli lube balutiwa ba Kreste. Ka mutala, Paulusi naabonisize kuli haiba luhana tuto ya zuho, halukoni kubulela kuli lu Bakreste ba niti. (1 Makor. 15:​12-14) Nihakulicwalo, luswanela kuba ni takazo ya kuituta zeñata kwandaa kuziba feela lituto za matatekelo zeo. Ka kushutana ni tuto ya makalelo, lico zetiile za kwa moya likopanyeleza milao ni likuka za Jehova, ili zelutusa kuutwisisa mwanahanela. Kuli lutusiwe ki lico zeo, luswanela kuituta Linzwi la Mulimu, kunahanisisa zelubala, ni kuikataza kusebelisa zeluituta. Mi halueza cwalo, lukaitwaeza kuezanga likatulo zetabisa Jehova. w24.04 5 ¶12-13

Mulimu naanani kuhupulisa mupolofita wahae yanaanyemile yo, kuli batu ba mwa Ninive nebasa zibi “shutano ye mwahalaa sesilukile ni sesifosahalile.” (Jona. 1:​1, 2; 3:10; 4:​9-11) Hasamulaho, Jesu naaitusisize mutala wo kuluta batu ka za katulo ya Jehova yelukile ni ka za sishemo sahae. Kono taba ya kuli batu ba mwa Ninive ‘bakazuha fa katulo’ italusañi? Jesu naabulezi kuli kwapili kunani babaka ‘zuhela katulo.’ (Joa. 5:29) Naama kwa nako ya puso yahae ya lilimo ze 1,000, mi ka nako yeo “babalukile ni babasika luka” bakazusiwa. (Lik. 24:15) Batu babasika luka ‘bakazuhela katulo.’ Taba yeo italusa kuli Jehova ni Jesu bakatatuba batu bao kuli babone haiba bamamela litaba zebalutiwa. Haiba mutu yanaapila mwa Ninive yazusizwe kwa bafu ahana kulapela Jehova ka nzila yelukile, Jehova haana kumulumeleza kuli azwelepili kupila. (Isa. 65:20) Kono batu kaufela babaka iketela kulapela Jehova ka busepahali, bakaatulwa ka nzila yende. Bakafiwa kolo ya kupila kuya kuile!—Dan. 12:2. w24.05 5 ¶13-14

Jesu naalikanyisize sishemo sa Ndatahe ka kutala. (Joa. 14:9) Ka lipulelo ni ka likezo, naabonisize kuli Ndatahe yanani mukekecima ni sishemo, walata batu mi ubata kutusa mañi ni mañi wabona kusakomiwa ki sibi. Jesu naatusize batu kuli babe ni takazo ya kucinca mupilelo wabona ni kumulatelela. (Luka 5:​27, 28) Jesu naaziba kuli naakafa bupilo bwahae sina sitabelo. Naakuta-kutezi kutaluseza balateleli bahae kuli naakabetekiwa ni kubulaelwa fa kota. (Mat. 17:22; 20:​18, 19) Naaziba kuli sitabelo sahae nesika zwisa sibi sa lifasi. Jesu hape naalutile kuli hamulaho wa kufa bupilo bwahae sina sitabelo, ‘ukahohela batu ba mifuta kaufela’ ku yena. (Joa. 12:32) Batu bane babonisize tumelo ku Jesu ni kuikataza kumulikanyisa nebakona kutabisa Jehova. Mi kwa mafelelezo nebaka ‘lukululwa kwa sibi.’ (Maro. 6:​14, 18, 22; Joa. 8:32) Kacwalo, Jesu naabonisize bundume ni kuitatela kushwa lifu lelibutuku.—Joa. 10:​17, 18. w24.08 5 ¶11-12

Muhupule mone muikutwezi hane muitutile lwapili litaba za niti ze mwa Linzwi la Mulimu. Nemuitutile kuli Ndataa mina ya kwa lihalimu wamilata, ubata kuli muswalisane ni lubasi lwahae lwa batu baba mulapela, ukafelisa lika zemiutwisa butuku ni zemitahiseza manyando, ni kuli mwakona kuba ni sepo ya kubona balatiwa bamina habaka zusiwa kwa bafu mwa lifasi lelinca, ni zeñwi cwalo. (Mare. 10:​29, 30; Joa. 5:​28, 29; Maro. 8:​38, 39; Sin. 21:​3, 4) Litaba za niti zeo neli mitahiselize tabo yetuna. (Luka 24:32) Nemutabezi litaba zene muituta, mi nemubata kutaluseza batu kaufela ka za teñi! (Mubapanye Jeremia 20:9.) Haiba lulata hahulu litaba za niti ze mwa Bibele, lukasusuezwa kulitaluseza babañwi. (Luka 6:45) Luikutwa sina mone baikutwezi balutiwa ba Jesu ba mwa linako za baapositola, bane babulezi kuli: “Halukoni kutuhela kubulela lika zeluboni ni zeluutwile.” (Lik. 4:20) Lulata hahulu litaba za niti mi lubata kulitaluseza batu babañata ka mokukonahalela kaufela. w24.05 15 ¶5; 16 ¶7

Ka kuba batu ba Jehova, lwakutazanga ku babañwi bakeñisa kuli lwalata Ndataa luna wa kwa lihalimu mi lubata kutusa batu babañwi kuli bamuzibe. Kono babañwi bona kubabelanga taata kuba ni tabo habaeza musebezi wa kukutaza. Kabakalañi? Babañwi banani hahulu maswabi mi baikutwa kuli haki baluti babande. Babañwi habaikutwangi kulukuluha kuya fa mandu a batu basika memiwa. Babañwi baikalelwanga kuli mwendi batu habana kuamuhela lushango lobakutaza. Babañwi mwendi balutilwe kuli habaswaneli kueza lika zekona kufilikanya babañwi. Mizwale ni likaizeli bao kubabelanga taata kukutaza taba yende kwa batu bobasa zibi. Kana ni mina fokuñwi mwabanga ni maikuto ao kuli mane mwapalelwanga kuba ni tabo mwa bukombwa? Haiba ki cwalo, musike mwazwafa. Kuba ni maikuto acwalo kubonisa kuli mwaikokobeza ni kuli hamulati kuli batu baise hahulu mamelelo ku mina kamba kukananisana ni mina. Mi hakuna mutu yatabela kufilikanya babañwi sihulu haiba ubata kubatusa. Ndataa mina wa kwa lihalimu waziba hande butata bomukopana ni bona mi ubata kumitusa.—Isa. 41:13. w24.04 14 ¶1-2

Hamunze mubala Bibele kufita kulika kusebelisa litaba zemuituta kaufelaa zona ka nako iliñwi, muitomele likonkwani zemukona kupeta. Mwakona kulika muezezo wo: Mube ni mukoloko wa lika fomuswanela kubelekela, mi mukete nto iliñwi kamba zepeli fomuka kala kusebeleza, mi zesiyezi muka belekela ku zona hasamulaho. Muswanela kukalela kai? Mwakona kukala ka sikonkwani semukona kupeta ka bunolo. Kamba mwakona kuketa kubelekela fa bufokoli bomubona kuli butokwa hahulu kuiswa mamelelo. Hase muketile sikonkwani, mueze lipatisiso mwa lihatiso zaluna. Mulapele ka za sikonkwani seo mi mukupe Jehova kuli amife “takazo ni maata a kuunga muhato.” (Mafil. 2:13) Kihona mukasebelisa zemuitutile. Haiba mueza zwelopili yende kulikana ni sikonkwani samina sapili, mwakona kususuezwa kubelekela fa sikonkwani sesiñwi. Mane niti kikuli, haiba mueza zwelopili mwa kalulo yeñwi ya kupila sina Mukreste kamba kubonisa kalemeno kakañwi ka Sikreste, kukona kumibela bunolo kueza hande mwa likalulo zeñwi. w24.09 6 ¶13-14

Mwendi muikutwa hahulu bumaswe kabakala kuli zene muezize kwamulaho neliutwisize babañwi butuku. Ki lika mañi zekona kumitusa? Muikataze kulukisa mafosisa, mane ni kukupa swalelo kwa batu bao. Mukupe Jehova kuli atuse batu bao bone muutwisize butuku. Wakona kumitusa ni kutusa batu bone muutwisize butuku kuzwelapili kumusebeleza ni kuba ni kozo. Muitute kwa mafosisa ane muezize kwamulaho mi mulumeleze Jehova kuitusisa mina mwabatela. Halunyakisiseñi mutala wa mupolofita Jonasi. Mwa sibaka sa kuya kwa Ninive yeneli kwa upa sina mwanaa mulaelezi Mulimu, Jonasi abalehela kwa Tareshishi yeneli kwa wiko. Jehova naakalimezi Jonasi, mi Jonasi naaitutile kwa mafosisa ahae. (Jona. 1:​1-4, 15-17; 2:​7-10) Jehova naasika tuhela kuitusisa Jonasi. Mulimu naamufile kolo yeñwi ya kuya kwa Ninive, mi ka nako ye Jonasi naaezize cwalo kapili-pili. Nihaike kuli Jonasi naaikutwile bumaswe kabakala mafosisa anaaezize, naalumezi kueza musebezi wanaa mufile Jehova.—Jona. 3:​1-3. w24.10 8-9 ¶10-11

Jehova haswalelangi feela likoloti kamba libi zaluna, kono hape walitakulanga. Ka mutala, muunge kuli mutu uswaya palo ya masheleñi emukolotile. Nihakulicwalo, palo ya masheleñi ao isabonahala. Kono kutakula kona kwashutana. Kuli luutwisise hande pulelo ya swanisezo yeo, luswanela kuhupula kuli mwa linako za kwamulaho inki yeneitusiswanga neli yeezizwe ka kukopanya musili, njilela, ni mezi. Mutu naakona kuitusisa siponji sesikolobile kuli atakule zeñozwi. Kacwalo, sikoloti hase ‘sitakuzwi,’ nesisa koni kubonahala hape nikamuta. Zeneñozwi nelisa koni kubonwa nikamuta. Nekuswana feela inge kuli nekusina sikoloti. Kwatabisa luli kuziba kuli Jehova haswalelangi feela libi zaluna kono hape walitakulanga ka kutala!—Samu 51:9. w25.02 10 ¶11

Haiba luatuzwi maswe kamba kuezwa maswe ki babañwi, luswanela kukolwa kuli Jehova waziba zeezahezi. Kuba ni buikolwiso bo kulutusa kuitiisa haluezwa maswe kakuli lwaziba kuli kwa mafelelezo, Jehova ukatatulula muinelo. Kusiya lika mwa mazoho a Jehova, kulutusa kusahalifa kamba kusaba ni ndimbelela. Kuzwelapili kuhalifa haluezizwe maswe kukona kutahisa kuli lueze nto yemaswe, kufelelwa ki tabo, ni kufokolisa silikani saluna ni Jehova. Niti kikuli, halukoni kulikanyisa mutala wa Jesu ka kutala. Ka linako zeñwi, lukaeza kamba kubulela lika zekatahisa kuli luinyaze hasamulaho. (Jak. 3:2) Mi fokuñwi kuezwa maswe ki babañwi kukona kutahisa kuli luutwe hahulu butuku ni kulembwala mwa bupilo bwaluna kaufela. Haiba mukopana ni muinelo wo, mukolwe kuli Jehova waziba zemukopana ni zona. Mi Jesu waziba momuikutwela kakuli ni yena naaezizwe maswe. (Maheb. 4:​15, 16) Lwaitumela kuli Jehova hape ulufile kelezo yende yelutusa kuziba moluswanela kuezeza haluezwa maswe. w24.11 6 ¶12-13

Nebaswanela kubonisa tumelo ku Jesu, yena yanaa lumilwe ki Mulimu, ilikuli bafumane “bupilo bobusa feli.” Mane Jesu naabulezi za taba yeo kwamulaho. (Joa. 3:​16-18, 36; 17:3) Majuda babañata nebasika lumela tuto ya Jesu ka za “musebezi wa Mulimu” omunca. Neba mubuzize kuli: “Ki makazo ifi he yeu lufa sina sisupo, kuli luibone ni kukulumela?” (Joa. 6:30) Nebabulezi kuli bokukululu babona mwa mazazi a Mushe nebaamuhezi maana, yekona kuswanisezwa kwa sinkwa. (Neh. 9:15; Samu 78:​24, 25) Kwaiponahalela hande kuli nebasa isize hahulu pilu kwa kufiwa sinkwa sa luli. Mane nebapalezwi kubuza Jesu sanaatalusa manzwi anaabulezi kuzwa fo ali, “sinkwa sa niti sesizwa kwa lihalimu,” ili sene siswana sina maana yefa bupilo yezwa kwa lihalimu. (Joa. 6:32) Nebaisize hahulu pilu kwa lika za kwa mubili zene batokwa kuli mane nebapalezwi kuteeleza kwa litaba zanaalika kubaluta Jesu ka za kufumana bupilo bobusa feli. w24.12 5-6 ¶10-11

Kwa sikolo, mwanaa mina wakona kuituta ka za molibupehezi lika zeñwi. Ka mutala, likota zeñata libupilwe ka nzila yeñwi. Fa kota kumelanga mitai yemituna, mi fa mitai yeo hape kumelanga mitai yeminyinyani ili yeikabanga kuba mitai yeminyinyani hahulu. Mubupehelo wo ubizwa fractal. Kunani lika zeñwi hape zebupilwe ka nzila yeo. Kono ki mañi yatahisize kuli lika libupiwe ni kubonahala ka nzila yende hahulu yeo? Mwanaa mina hanahanisisa hahulu ka za lika zemakaza zabupile Jehova, wakona kuba ni tumelo yetiile. Hamulaho wa nako, mwakona kubuza mwanaa mina kuli, “Haiba Mulimu ki yena yalubupile, kana haana tukelo ya kulufa likuka za muzamao zekona kulutusa kuba ni tabo?” Kihona muka mutusa kulemuha kuli ketelelo yende yeo ifumaneha mwa Bibele. w24.12 16 ¶8

Ka kususumezwa ki moya wa Mulimu, Muapositola Paulusi naañozi liñolo la kulaela kuli muezalibi yanaasika baka yo azwisiwe mwa puteho. (1 Makor. 5:13) Bakreste babasepahala nebaswanela kueza cwañi muuna yo? Paulusi naabataluselize kuli ‘batuhele kuswalisana’ ni yena. Taelo yeo neitalusañi? Paulusi naatalusize kuli taelo yeo neitalusa kuli ‘mane nihaiba kuca ni mutu yacwalo basike baca ni yena.’ (1 Makor. 5:11) Kuca sico ni mutu yomuñwi kukona kutahisa kuli kube bunolo kueza siango ni yena. Kusina kukakanya, Paulusi naatalusa kuli mizwale ni likaizeli mwa puteho nebasa swaneli kueza siango ni muuna yo. Kueza cwalo nekuka tusa kuli mizwale ni likaizeli mwa puteho basike bakukuezwa ki yena. (1 Makor. 5:​5-7) Kutuha fo, kuambuka kuswalisana ni muuna yo nekukona kumutusa kulemuha kuli naafoselize hahulu Jehova, mi mwendi naakaikutwa hahulu bumaswe ni kususuezwa kubaka. w24.08 15 ¶4-5

Mwa Isilaele, silimo ni silimo nekubanga ni Lizazi la Sebelezo ya Kukwahela Libi. Fa lizazi leo, muprisita yapahami naafanga matabelo a lifolofolo kuli libi za sicaba liswalelwe. Niti kikuli, matabelo a lifolofolo naasakoni kukwahela libi za batu ka kutala bakeñisa kuli batu ki ba butokwa hahulu kufita lifolofolo. Kono Jehova naakona kuswalela libi za Maisilaele bane babakile, ibile feela bafa matabelo anaatokwahala. (Maheb. 10:​1-4) Tukiso yeo neibahupulisanga kuli neli baezalibi. Nihakulicwalo, Jehova naaezize kale tukiso yeneka tahisa kuli libi liswalelwe ka kutala. Naalukisize kuli Mwanaa hae yalatwa afiwe “feela hañwi kuli alwale libi za babañata.” (Maheb. 9:28) Jesu naafanile “bupilo bwahae sina tiululo kuli aliulule babañata.”—Mat. 20:28. w25.02 4 ¶9-10

“Ki niti, moya ona walata, kono nama yafokola.” (Mat. 26:41b) Manzwi ao abonisa kuli Jesu waziba kuli halusika petahala ni kuli lwakona kueza mafosisa. Kono hape naaitusisize manzwi ao kuli alufe temuso ya kuli lusike lwaisepa hahulu. Nakonyana pili Jesu asika bulela kale manzwi ao, balutiwa bahae nebasepisize kuli nebasike bamuyubeka. (Mat. 26:35) Nebabata kueza zelukile. Kono nebasika lemuha kuli nekukona kubabela hahulu bunolo kupalelwa kueza zelukile hane bakakopana ni muinelo otaata. Ki lona libaka Jesu hanaa bafile temuso, ili manzwi afumaneha mwa liñolo lazazi la kacenu. Ka bumai, balutiwa nebapalezwi kuzwelapili kutona. Ka nako yanaatamiwa Jesu, balutiwa bahae neba muyubekile ni kubaleha. Bakeñisa kuli balutiwa nebasika itukiseza kuhanyeza muliko wo, nebapalezwi kutaleleza sepiso yabona mi bayubeka Jesu.—Mat. 26:56. w24.07 14 ¶1-2

Adama ni Eva nebasinyehezwi ki silikani sabona ni Ndataa bona, yena Jehova. Kwa makalelo, bo Adama ni Eva nebali mwa lubasi lwa Mulimu. (Luka 3:38) Kono hane bafoselize Jehova, nebalelekilwe mwa lubasi lwahae pili basikaba kale ni bana. (Gen. 3:​23, 24; 4:1) Kacwalo, ka kuba bana babona, lutokwa kukutisezwa ku Jehova. (Maro. 5:​10, 11) Ka mubulelelo omuñwi, luswanela kuba ni silikani sesinde ni yena. Hatiso yeñwi ibulela kuli linzwi la Sigerike lelitolokilwe kuli “kukutisezwa,” likona kutalusa “kueza bulikani ni sila.” Kwatabisa kuziba kuli Jehova ki yena yanaangile muhato ilikuli lukutisezwe ku yena. Ka mukwa ufi? Ka tukiso ya kukwahela libi yanaaezize Jehova kuli abe ni silikani sesinde hape ni batu babali baezalibi. Tukiso yeo iama kucincanisa nto yeñwi ni nto yelikanelela ni yona. Ka nzila yeo, nto yelatehile kamba yesinyizwe yakona kukutiswa kamba kuyoliswa. w25.02 3-4 ¶7-8

Muapositola Paulusi naatalusize kuli, ‘Kalimelo yenefilwe ki babañata neilikani ku mutu yacwalo.’ (2 Makor. 2:​5-8) Ka mubulelelo omuñwi, kalimelo yeo neitusize muuna yo yanaaezanga buhule ni musalaa ndatahe. (1 Makor. 5:1) Ka mukwa ufi? Kalimelo yeo nei mutusize kubaka. (Maheb. 12:11) Kacwalo, Paulusi naalaezi mizwale ni likaizeli mwa puteho kuli: “Muswanela kumuswalela ka pilu kaufela ni kumuomba-omba” mi “mubonise lilato lamina ku yena.” Mulemuhe kuli Paulusi naabata kuli mizwale ni likaizeli mwa puteho baeze lika zeñwi kwandaa feela kulumeleza muuna yo kuswalisana ni batu ba Jehova hape. Paulusi naabata kuli bakolwise muuna yo yanaabakile, ka lipulelo ni ka likezo zabona, kuli neba muswalezi luli mi neba mulata. Ka kueza cwalo, nebaka bonisa hande kuli neba muamuhezi hande mwa puteho. w24.08 15 ¶4; 16-17 ¶6-8

Muapositola Paulusi naaziba hande zenetokwahala kuli mutu aitiise. Naahupulisize Bakreste kuli habatiyela nyandiso, nebaswanela kuitinga ku Jehova isiñi kuitinga fa maata abona. Paulusi naakona kubulela ka bundume kuli: “Jehova ki yena yanitusa; hanina kusaba sesiñwi.” (Maheb. 13:6) Mizwale baluna babañwi basweli kutiyela nyandiso ka nako ya cwale. Lwakona kubatusa ka kubabeyanga mwa litapelo zaluna, mi ka linako zeñwi lwakona kubatusa ka kubafa lika zeñwi zebatokwa. Nihakulicwalo, Bibele ibulela ka kuutwahala kuli: “Batu kaufela babalakaza kupila ka kusepahala ku Mulimu ka kuswalisana ni Kreste Jesu ni bona bakanyandiswa.” (2 Tim. 3:12) Kabakaleo, kaufelaa luna luswanela kuitukiseza zekaezahala kwapili. Haike luzwelepili kusepa Jehova ka kutala, ni kukolwa kuli uka lutusa kutiyela miinelo yetaata kaufela yelukona kukopana ni yona. Ka nako yeswanela, ukaimulula batu kaufela babasepahala ku yena.—2 Mates. 1:​7, 8. w24.09 13 ¶17-18

Ki lika mañi zenetusize batu ba mwa Korinte kuli bakolobezwe? (2 Makor. 10:​4, 5) Linzwi la Mulimu ni moya wahae okenile omaata neli batusize kueza licinceho zetuna mwa bupilo bwabona. (Maheb. 4:12) Batu ba mwa muleneñi wa Korinte bane baamuhezi taba yende ka za Kreste, nebakonile kutuhela mikwa yabona yecwale ka bucakolwa, busholi ni kalombe. (1 Makor. 6:​9-11) Mulemuhe kuli nihaike kuli batu babañwi mwa muleneñi wa Korinte nebanani mikwa yeneli taata kucinca, nebasika nahana kuli nebasa koni kueza licinceho kuli babe Bakreste. Nebaezize ka taata kuli bazamaye mwa nzila yekumbani yeisa kwa bupilo bobusa feli. (Mat. 7:​13, 14) Kana musweli kuikataza kueza licinceho zetuna kuli mukolobezwe? Muzwelepili kuikataza! Mukupe Jehova kuli amife moya wahae okenile, ilikuli mukone kuhanyeza litakazo zemaswe. w25.03 6 ¶15-17

Jehova usepisa kuli uka lufa butali kuli luzibe haiba katulo yelubata kueza ika mutabisa. Ufanga butali bo kwa “batu kaufela ka bufani bobutuna asashubuli mutu.” Hase mulapezi ku Jehova kukupa ketelelo, muise hahulu pilu kwa kalabo yahae. Ka mutala: Haiba mu mwa musipili mi kikale mulateha, mwakona kukupa tuso ku mutu yapila mwa sibaka seo. Kono kana mukaikela pili mutu yo asika feza kale kubulela? Batili. Mukateeleza ka tokomelo hanzaa mikakanyeza nzila. Ka nzila yeswana, hase mukupile butali ku Jehova, muikataze kulemuha kalabo yahae ka kubata milao ya mwa Bibele kamba likuka zesebeza mwa muinelo omuli ku ona. Ka mutala, hamueza katulo ka za kufumaneha kwa kakiti, mwakona kunyakisisa zeibulela Bibele ka za mikiti yelilata, liango zemaswe, ni libaka hakuli kwa butokwa kubeya za Mubuso mwa sibaka sapili kufita zemutabela ka butu.—Mat. 6:33; Maro. 13:13; 1 Makor. 15:33. w25.01 16 ¶6-7

Bupolofita bwa Isaya bubonisa shutano yetuna ye mwahalaa bupilo bobapila batu baba mwa paradaisi ya kwa moya ni bobapila batu babasiyo mwateñi. Jehova ufanga batanga bahae lika kaufela zebatokwa kuli bazwelepili kumusebeleza. Ulufile moya wahae okenile, Linzwi lahae, ni lico zeñata za kwa moya kuli ‘luce, lunwe, ni kunyakalala.’ (Mubapanye Sinulo 22:17.) Ka kushutana, batu babasiyo mwa paradaisi ya kwa moya bona ‘balapa, bashwa linyolwa, mi baswabile.’ Habana silikani sesinde ni Mulimu. (Amo. 8:11) Jehova ufanga batu bahae lika zebatokwa, kukopanyeleza cwalo ni lico za kwa moya. (Joe. 2:​21-24) Uezanga cwalo ka kuitusisa Bibele ni lihatiso zaluna zetomile fa Bibele, webusaiti yaluna, hamohocwalo ni mikopano ya puteho, ya mupotoloho, ni yemituna. Lwakona kuca lico za kwa moya zeo zazi ni zazi, mi kueza cwalo kukona kutahisa kuli luikutwe kuli lwafepiwa hande hahulu ni kukatuluha. w24.04 21 ¶5-6

Haiba mubata kukena mwa libato ni mutu yomuñwi, mwakona kulukisa kuli muikambote ni mutu yo mwa sibaka sesiñwi sa nyangela kamba ka kumulizeza foni. Mumutaluseze ka kuutwahala kuli mubata kukena mwa libato ni yena. (1 Makor. 14:9) Haiba kwatokwahala, mumufe nako ya kunahanisisa mwaku mialabela. (Liprov. 15:28) Mi haiba mutu yo hatabeli kukena mwa libato ni mina, mukuteke maikuto ahae. Kucwañi haiba mutu yomuñwi amitaluseza kuli wamitabela? Mwendi mutu yo naatokwa kuba ni bundume kuli amiatumele; kacwalo, mumubonise sishemo ni likute. Haiba mutokwa nako kuli munahanisise ka za haiba mwatabela kukena mwa libato ni mutu yo, mumutaluseze. Kono musike mwaliyeha kumutaluseza kalabo yamina. (Liprov. 13:12) Haiba hamutabeli, mumutaluseze ka sishemo ni ka kuutwahala. Haiba mwatabela kukena mwa libato ni mutu yo, mumutaluseze maikuto amina ni kunyakisisa lika zecwale ka nako yemuka tandanga hamoho kamba batu bomuka taluseza ka za teñi. Lika zemubata zakona kushutana ni zabata mutu yo. w24.05 23-24 ¶12-13

Davida naaile kwa mafulo a mpi ya Maisilaele, mi kubonahala kuli neli ka nako yanaali mwa lilimo za kunonoboka. Naaizo fumana kuli masole ba Maisilaele nebasabile hahulu bakeñisa kuli singangalume sa Mufilisita sesibizwa Goliati nesisweli ‘kushubula mpi ya Isilaele.’ (1 Sam. 17:​10, 11) Masole bao nebasabile kabakala kuli nebaisize pilu kwa singangalume seo ni kwa manzwi asona a kubasheununa. (1 Sam. 17:​24, 25) Kono Davida yena naanani mubonelo oshutana ni wabona. Davida naaziba kuli Goliati naasashubuli mpi ya Maisilaele kono naashubula “limpi za Mulimu yapila.” (1 Sam. 17:26) Davida naaisize pilu ku Jehova. Davida naaziba kuli Mulimu yanaa mutusize ka nako yanaali mulisana, naaka mutusa hape ni mwa muinelo wo. Kukolwa kuli Mulimu naaka mutusa, nekutahisize kuli Davida alwanise Goliati ni kumutula!—1 Sam. 17:​45-51. w24.06 21 ¶7

Munahane mone bukabela bupilo bwaluna kambe nelusa sebelezi Jehova. Haiba lueza cwalo, lukazwelapili kusepahala ku Jehova mi ka kuswana ni muñoli yomuñwi wa lisamu, lukabulela kuli: “Kusutelela ku Mulimu ki yona nto yende ku na.” (Samu 73:28) Lwakona kutiyela miinelo yetaata kaufela yelukona kukopana ni yona mwa mazazi a mafelelezo a, bakeñisa kuli ‘lusebeleze Mulimu wa niti yapila.’ (1 Mates. 1:9) Mulimu waluna ki Mulimu yapila mi kamita watusanga batu baba musebeleza. Naatusize batanga bahae ba kwamulaho mi walutusanga ni luna kacenu. Hona cwale-cwale fa, kukaba ni ñalelwa yetuna hahulu fa lifasi. Kono Jehova uka lutusa ka nako yeo. Haike kaufelaa luna “lube ni bundume mi lubulele, luli: ‘Jehova ki yena yanitusa; hanina kusaba sesiñwi.’”—Maheb. 13: 5, 6. w24.06 25 ¶17-18

Bibele ilutaluseza ka za baana babafitelela 40 bane babusize sina malena ba Isilaele. Malena babande nebaezize lika zeñwi zemaswe. Halunyakisiseñi mutala wa Davida yanaali mulena yomunde. Jehova naabulezi kuli: ‘Davida mutangaaka, naanilatelezi ka pilu yahae kaufela, mi naaezize feela sesilukile mwa meeto aka.’ (1 Mal. 14:8) Niteñi, muuna yo naabukile ni musalaa mutu, ni kulukisa kuli muunaa musali yo abulaiwe mwa ndwa. (2 Sam. 11:​4, 14, 15) Bibele hape ilutaluseza ka za lika zeñwi zende zene baezize malena babañata bane basika zwelapili kusepahala ku Jehova. Halunyakisiseñi mutala wa Roboami. ‘Naaezize zemaswe’ mwa meeto a Jehova. (2 Makol. 12:14) Niteñi, naautwile taelo ya Mulimu ya kuli atuhelele masika a lishumi a Isilaele kuiketela mulena. Hape naatiisize mileneñi yemiñata mwa mubuso wahae kuli asileleze batu ba Mulimu. (1 Mal. 12:​21-24; 2 Makol. 11:​5-12) Ki kabakalañi Jehova hanaanga malena babañwi kuli nebasepahala ni kuli babañwi nebasa sepahali? Naalemuhanga pilu yabona, kubaka kwabona, ni mone baangela bulapeli bwa niti. w24.07 20 ¶1-3

Kucwañi ka za banana baba mwatasaa lilimo ze 18 babakolobelizwe, ili babaezize libi zetuna? Sitopa sa baana-bahulu sikalukisa kuli baana-bahulu bababeli bayo kopana ni mwanana yo hamohocwalo ni bashemi bahae babali Bakreste. Baana-bahulu bao bakabuza bashemi bahae zebaezize kuli batuse mwanaa bona kubaka. Haiba mwanana yo unani mubonelo omunde, wasebelisa kelezo ya bashemi bahae mi waeza licinceho, baana-bahulu bababeli bao bakona kuatula kuli haswaneli kutomelwa katengo ka baana-bahulu. Esi mane Mulimu ufile bashemi buikalabelo bwa kuhakulula bana babona ka lilato. (Deut. 6:​6, 7; Liprov. 6:20; 22:6; Maef. 6:​2-4) Baana-bahulu bao bakaambolanga ni bashemi bahae hamulaho wa nako kuli babone teñi kuli mwanana yo wafiwa tuso yatokwa. Kono kucwañi haiba mwanana yakolobelizwe haalati kubaka mi uzwelapili kueza zemaswe? Mwa muinelo wo, mizwale ba mwa katengo ka baana-bahulu bakakopana ni yena hamohocwalo ni bashemi bahae babali Bakreste. w24.08 24 ¶18

Kaufelaa luna lwabanga ni tabo halufiwa mpo. Nihakulicwalo, lubanga ni tabo yetuna hahulu halufana. Bakeñisa kuli Jehova naalubupile ka nzila yeo, lwakona kuekeza kwa tabo yaluna. Lwakona kuekeza kwa tabo yaluna ka kubata linzila zeñwi zelukona kubonisa ka zona bufani. Kana hakutabisi kuli Jehova naalubupile ka nzila yeo? (Samu 139:14) Bibele ibulela kuli kufana kutahisa tabo; kacwalo, kwaswanela Bibele haitalusa Jehova kuli ki “Mulimu yatabile.” (1 Tim. 1:11) Ki yena wapili kubonisa bufani mi hakuna yamufita kwa bufani. Sina feela muapositola Paulusi mwanaataluselize, “lunani bupilo, lwazamaya, mi luteñi” kabakala hae. (Lik. 17:28) Kaniti luli, “mpo yende kaufela ni mpo yepetehile kaufela” izwa ku Jehova. (Jak. 1:17) Kusina kukakanya, kaufelaa luna neluka tabela kuba hahulu ni tabo yetahiswa ki bufani. Lwakona kueza cwalo ka kulikanyisa bufani bwa Jehova.—Maef. 5:1. w24.09 26 ¶1-4

Hamulaho wa kunyakisisa zatokwa kukwanisa mutu kuli abe muuna-muhulu, likombwa za puteho babañwi bakona kuikutwa kuli habakoni kukwanisa zetokwahala. Kono muhupule kuli Jehova ni kopano yahae habalibeleli kuli mukabonisa tulemeno to ka kutala. (1 Pit. 2:21) Mi moya wa Jehova omaata ki ona omitusa kuli mukwanise zetokwahala. (Mafil. 2:13) Kana kunani kalemeno kakañwi komubata kubonisa hahulu? Mutaluseze Jehova ka za teñi. Mueze lipatisiso ka za kalemeno kao, mi mukupe yomuñwi wa baana-bahulu kuli amife liakalezo zekona kumitusa kubonisa hahulu kalemeno kao. Mueze ka taata kuli mukwanise zetokwahala. Mukupe Jehova kuli amilute ilikuli mukone kupeta zeñata mwa sebelezo yamina ku yena ni mwa puteho. (Isa. 64:8) Haike Jehova afuyaule hahulu buikatazo bomueza bwa kukwanisa zetokwahala kuli mube muuna-muhulu! w24.11 25 ¶17-18

Haluswaneli kuikutwa kuli Jehova uswanela kuluswalela ka libaka feela la kuli lumusebelelize ka lilimo zeñata. Nihakulicwalo, Jehova waitebuha lika kaufela zelu muezelize. Naalufile Mwanaa hae sina mpo yefiwa feela, isiñi sina tuwelo yelufiwa kabakala sebelezo yaluna ku yena. Kacwalo, kufosahalile kunahana kuli lwaswanela kuswalelwa bakeñisa kuli luezize zeñata mwa sebelezo yaluna ku Jehova, haiba luba ni mubonelo wo, fo lutalusa kuli halutokwi tiululo. (Mubapanye Magalata 2:21.) Muapositola Paulusi naaziba kuli naasike akona kushemubiwa ki Jehova ka libaka feela la kuli naapetile zeñata mwa sebelezo yahae ku yena. Kono cwale ki kabakalañi hanaaikatalize kupeta zeñata mwa sebelezo yahae ku Jehova? Naaezize cwalo kuli abonise buitebuho kwa sishemo sa Jehova sesituna. (Maef. 3:7) Sina Paulusi, ni luna luzwelapili kusebeleza Jehova ka tukufalelo kuli lubonise buitebuho kwa sishemo sahae, isiñi kuli luboniswe sishemo. w25.01 27 ¶5-6