Liproverbia 13:1-25
13 Mwana yabutali uamuhela kalimelo ya ndatahe,+Kono musheununi hautwi hanyaziwa.*+
2 Mutu ukaca zende kabakala zezwa mwa lipulelo* zahae,+Kono takazo ya babasa sepahali ki ya kueza mifilifili.
3 Yatokomela mulomo wahae* usileleza bupilo* bwahae,+Kono yaatumulusa hahulu milomo yahae ukasinyiwa.+
4 Mutu yabuzwa niha lakaza nto yeñwi, hakuna sanani sona,+Kono mutu yasebeza ka taata ukakula luli.*+
5 Yalukile utoile buhata,+Kono likezo za babamaswe lika baswabisisa ni kubashubulisa.
6 Kuluka kusileleza mutu yasina mulatu,+Kono bumaswe buwisa muezalibi.
7 Mutu yomuñwi uiponahalisa kufuma, kanti haana sesiñwi;+Yomuñwi yena uiponahalisa kuba mubotana, kanti unani bufumu bobuñata.
8 Bufumu ki tiululo yeliulula bupilo* bwa mutu,+Kono babotana habana nihaiba kufumbelwa.*+
9 Liseli la babalukile libenya hahulu,*+Kono lambi ya babamaswe ikatima.+
10 Buikuhumuso butahisa feela lifapahano,+Kono butali ki bwa bababata kelezo.*+
11 Bufumu bobufumanwa kapili-pili* bukayonga,+Kono bufumu bwa mutu bwakubukanya hanyinyani-hanyinyani* bukaekezeha.
12 Salibelezi* mutu hasiliyeha kutaha, sikulisa pilu,+Kono takazo haitalelezwa ki kota ya bupilo.+
13 Mutu yanyaziseza tuto* ukafiwa koto,+Kono yakuteka mulao ukafiwa mupuzo.+
14 Tuto* ya mutu yabutali ki simbule sa bupilo+Sesisileleza mutu kwa malaba a lifu.
15 Mutu yanani kutwisiso yetibile washemubiwa,Kono nzila ya babasa sepahali ki ya matulungundu.
16 Mutu yabutali ueza lika ka zibo,+Kono sikuba sibonahalisa bukuba bwasona.+
17 Numwana yamaswe uwela mwa butata,+Kono numwana yasepahala utisa litaba zefolisa.+
18 Mutu yahana kalimelo ukatahelwa ki bubotana ni maswabi,Kono yalumela kusikululwa* ukakutekiwa.+
19 Takazo haitalelezwa iutwisa mutu hande,+Kono litoto litoile kutuhela kueza zemaswe.+
20 Yazamaya ni bababutali ukaba yabutali,+Kono yaswalisana ni litoto ukakena mwa butata.+
21 Ziyezi indongwama baezalibi,+Kono bupilo bobunde ki mupuzo wa babalukile.+
22 Mutu yomunde usiyela baikulu bahae saanda,Kono bufumu bwa muezalibi bukabulukelwa mutu yalukile.+
23 Simu ya mubotana yekekezwi ibeya lico zeñata,Kono ikona* kusinyiwa ki babasika luka.
24 Yatokwisa mwanaa hae tupa* umutoile,+Kono yamulata uikataza* kumukalimela.+
25 Yalukile waca mi wakula,+Kono mba ya babamaswe iinzi mukungulu.+
Litaluso ze kwatasi
^ Kamba “hasikululwa.”
^ Linzwi ka linzwi, “mulomo.”
^ Kamba “zabulela.”
^ Kamba “moyo.”
^ Linzwi ka linzwi, “ukanuniswa.”
^ Kamba “moyo.”
^ Linzwi ka linzwi, “hakuna yabakalimela.”
^ Linzwi ka linzwi, “lanyakalala.”
^ Kamba “babalelisana.”
^ Linzwi ka linzwi, “bwakubukanya ka lizoho.”
^ Kamba “Bufumu bobufumanwa ka nzila ya mbango.”
^ Kamba “Sasepile.”
^ Kamba “linzwi.”
^ Kamba “Mulao.”
^ Kamba “kunyaziwa.”
^ Kamba “ukona.”
^ Kamba “kalimelo; koto.”
^ Kamba mwendi, “haliyehi.”
