Daniele 12:1-13
12 “Ka nako yeo, Mikaele*+ ukayema,* yena nduna yomutuna+ yayemela sicaba sahenu.* Mi kukaba ni nako ya ñalelwa yesika bonwa kale kuzwa fositomelwa sicaba kufitela nako yeo. Mi ka nako yeo, sicaba sahenu sikabanduka,+ ili mutu kaufela yakafumanwa añozwi mwa buka.+
2 Mi babañata babalobezi mwa liluli la lifasi bakazuha, babañwi bakazuhela bupilo bobusa feli, mi babañwi bona bazuhele kushubulwa ni kushwaulwa kuya kuile.
3 “Mi babanani kutwisiso bakabenya sina mbyumbyulu ya lihalimu, mi babatusa babañata kuba babalukile bakabenya sina linaleli, kamita ni kuya kuile.
4 “Haili wena Daniele, ubuluke manzwi a sina kunutu, mi ukwale buka ye kufitela nako ya mafelelezo.+ Babañata bakaya kafa ni kafa,* mi zibo yaniti ikaata.”+
5 Cwale na Daniele, natalima mi nabona babañwi bababeli babayemi fo, yomuñwi naali mwabuse bwa kwanu bwa nukana mi yomuñwi naali mwabuse bwani bwa nukana.+
6 Mi yomuñwi abulelela muuna yaapezi siapalo sa lisila la line,+ yanaayemi fahalimwaa mezi a nukana, ali: “Kukaanga nako yekuma kai kuli lika zende hahulu ze liezahale?”
7 Kihona niutwa mutu yaapezi lisila la line, yanaali fahalimwaa mezi a nukana, hanze ayemiselize lizoho lahae la bulyo ni la nzohoto kwa mahalimu, ni kukonka ka Yena yapila kuya kuile,+ ali: “Kukaanga nako yetomilwe, linako zetomilwe, ni hafu ya nako.* Basafeza feela kutuba maata a sicaba sesikenile,+ lika ze kaufela likapetahala.”
8 Cwale na, nautwa, kono nenisika utwisisa;+ mi nali: “Wena mulenaaka, ki lika mañi zekaezahala hamulaho wa lika ze?”
9 Kihaa li ku na: “Daniele, uzamaye, kakuli manzwi ao anani kubulukiwa sina kunutu ni kukwaliwa kufitela nako ya mafelelezo.+
10 Babañata bakaikenisa ni kuisweufaza mi bakakeniswa.+ Mi babamaswe bakaeza zemaswe, mi hakuna yamaswe yakautwisisa; kono babanani kutwisiso bakautwisisa.+
11 “Mi kuzwa nako yesika zwiswa sitabelo sesifiwa kamita+ ni yeika tomiwa nto yenyenyisa yetahisa sinyeho,+ kukafita mazazi a 1,290.
12 “Unani tabo mutu yazwelapili kulibelela* yakafita kwa mazazi a 1,335!
13 “Kono haili wena, uikele kuisa kwa mafelelezo. Ukapumula, kono ukayema kuli ufiwe kabelo yahao* kwa mafelelezo a mazazi.”+
Litaluso ze kwatasi
^ Lelitalusa “Ki Mañi Yaswana ni Mulimu?”
^ Kamba “ukananuha.”
^ Linzwi ka linzwi, “bana ba sicaba sahenu.”
^ Kamba “baka itatubisisa [fo kikuli, buka].”
^ Fo kikuli, linako zetaalu ni hafu ya nako iliñwi.
^ Kamba “yalibelela ka kutukufalelwa.”
^ Kamba “mwa sibaka sahao seufilwe.”
