Genese 3:1-24
3 Cwale noha+ neli yona yeneinani hahulu maseme* kwa lifolofolo kaufela za mwa naheñi zanaabupile Jehova Mulimu. Kiha ili ku musali: “Kana luli Mulimu naaize musike mwaca kwa likota kaufela za mwa simu?”+
2 Musali kihaa li ku noha: “Lwakona kuca kwa muselo wa likota za mwa simu.+
3 Kono Mulimu ubulezi cwana ka za muselo wa kota yefahalaa simu,+ uize: ‘Musike mwaca kwateñi, mi musike mwaiswala; hamukaeza cwalo, mukashwa.’”
4 Noha kiha ili ku musali: “Kushwa, hamuna kushwa.+
5 Kakuli Mulimu waziba kuli fa lizazi lemuka ca kwateñi, meeto amina akatona mi mukaba sina Mulimu, muzibe bunde ni bumaswe.”+
6 Ka mukwa ocwalo, musali abona kuli kota yeo neli yende haiciwa ni kuli neilakazeha mwa meeto, ki cwalo, kota yeo neikateleha haitalimwa. Mi cwale akoyola muselo kwa kota ni kuuca.+ Hasamulaho, afa kwateñi muunaa hae ka nako yanaali ni yena, mi ni yena aca.+
7 Cwale meeto abona bababeli atona, mi balemuha kuli nebali mapunu. Kiha baluka matali a kota ya feiga mi baikezeza mabindo akutina.+
8 Hasamulaho, bautwa linzwi la Jehova Mulimu hanaazamaya mwa simu ka nako yene kufuka kamoya, mi muuna ni musalaa hae baipata mwa likota za mwa simu kuli basike babonwa ki Jehova Mulimu.
9 Mi Jehova Mulimu naasweli kubiza muuna inze ali: “Uinzi kai?”
10 Kwa nalulelule, muuna ali: “Niutwile linzwi lahao hanenili mwa simu, kono nenisaba kakuli nenili mapunu, mi seniipata.”
11 Mulimu kihaa li: “Ki mañi yanaa kubulelezi kuli neuli mapunu?+ Kana ucile kwa kota yene nikulaezi kuli usike waca kwateñi?”+
12 Muuna ali: “Musali yene unifile kuli aine ni na ki yena yanifile muselo wa kota, mi senica.”
13 Jehova Mulimu kihaa li ku musali: “Kiñi seuezize?” Musali aalaba, ali: “Noha nei nipumile, mi senica.”+
14 Jehova Mulimu kihaa li ku noha+ “Kakuli uezize nto ye, ukutilwe mwahalaa limunanu kaufela ni mwahalaa lifolofolo kaufela za mwa naheñi. Ukazamaya ka mba, mi ukaca liluli mwa mazazi a bupilo bwahao kamukana.
15 Mi nikabeya sitoyo+ mwahalaa hao+ ni musali+ ni mwahalaa mwanaa* hao+ ni mwanaa* musali.+ Mwana yo ukapyata* toho yahao,+ mi wena uka muluma* kwa lisito.”+
16 Mulimu ali ku musali: “Nikaekeza hahulu kwa butuku bwa kuitwala kwahao; ukautwa butuku hauka pepa bana, mi ukalakaza hahulu kuba ni muunaa hao, mi uka kubusa.”
17 Mi Mulimu ali ku Adama:* “Kakuli uutwile linzwi la musalaa hao mi ucile kwa kota yene nikulaezi+ kuli: ‘Usike waca kwateñi,’ mubu ukutilwe kabakala hao.+ Ukaca sesibeiwa ku ona ka manyando mwa bupilo bwahao kaufela.+
18 Mubu uka kumeliseza miutwa ni liseto, mi uce limela za naha.
19 Ukafufulelwa ni kusebeza ka taata kuli uce sico* kufitela ukutela mwa mubu, kakuli ki mona mone uzwisizwe.+ Kakuli uliluli mi ukakutela kwa liluli.”+
20 Hasamulaho, Adama abeya musalaa hae libizo la Eva,* kakuli ki yena yanaakaba mahe batu kaufela babapila.+
21 Mi Jehova Mulimu aezeza Adama ni musalaa hae liapalo zetelele za matalo, kuli abaapese zona.+
22 Jehova Mulimu kihaa li: “Mutu ki kale aba sina yomuñwi waluna bakeñisa kuli saaziba bunde ni bumaswe.+ Cwale kuli asike aisa lizoho lahae kuli akoyole muselo hape ni kwa kota ya bupilo+ mi ace ni kupila kuya kuile,*—”
23 Kabakaleo Jehova Mulimu amuleleka mwa simu ya Edeni+ kuli ayo lima mubu wanaazwisizwe ku ona.+
24 Mulimu aleleka mutu cwalo, mi kwa upa wa simu ya Edeni abeya kwateñi likerubimi+ ni mukwale otuka one uswalelezi kupikuluha, ili kukantela nzila yeya kwa kota ya bupilo.
Litaluso ze kwatasi
^ Kamba “yenetalifile hahulu.”
^ Kamba “uka muholofaza; uka mupyata.”
^ Kamba “ukaholofaza; ukanata.”
^ Linzwi ka linzwi, “peu.”
^ Linzwi ka linzwi, “peu.”
^ Lelitalusa “Mutu wa fa Lifasi; Batu.”
^ Kamba “sinkwa.”
^ Lelitalusa “Yapila.”
^ Kamba “kamita ni mita.”
