Baana-bahulu baikatazanga kulikanyisa mukekecima wa Jehova habatusa mutu yazwisizwe mwa puteho. Ka mutala, Jehova naasika libelela kuli Maisilaele bane bamukwenuhezi babake pili, kihona aka batusa kukutela ku yena. Kono Jehova naatusize batu bahae kuli babake niha nebasika bonisa kale kubaka. Jehova naataluselize mupolofita Hosea kuli aswalele musalaa hae ni kupila ni yena hape kusina taba kuli naasaeza sibi. Ka nzila yeo, Jehova naalutile sicaba sahae kuli unani hahulu mukekecima. (Hos. 3:1; Mala. 3:7) Ka kulikanyisa Jehova, baana-bahulu babata luli kuli muezalibi akutiswe mwa puteho, mi habaezangi lika zekona kumupaleliswa kukuta. Mwa Jesu ya mwana yalatehile, ndate yo “amumatela ni kuyo mukumbata mi amutubeta.” (Luka 15:20) Mulemuhe kuli ndate yo naasika libelela kuli mwanaa hae akupe swalelo pili. Kono ndate yo ki yena yanaamatezi mwana hae bakeñisa kuli naamulata. w24.08 28 ¶7-8

Sina mwaboniseza manzwi a mwa liñolo la zazi la kacenu, Jehova haipulukelangi butali. Ubonisanga bufani ka kufa babañwi butali. Hape mulemuhe kuli Jehova ufanga butali “asashubuli mutu,” kamba “asafumani mulatu ku mutu.” Haatahisangi kuli luikutwe bumaswe kabakala kuli lutokwa ketelelo yahae. Kono mane ulususueza kuli lukupe ketelelo yahae. (Liprov. 2:​1-6) Luna bo? Kana lwakona kulikanyisa Jehova ka kuikabela zibo ni babañwi? (Samu 32:8) Batu ba Jehova banani linzila zeñata za kutaluseza ka zona babañwi zebaitutile. Ka mutala, hañata lwalutanga bahasanyi babanca mwakukutaleza. Baana-bahulu batusanga ka pilu-telele likombwa za puteho ni mizwale babakolobelizwe kuli bazibe mwakupetela buikalabelo bwabona mwa puteho. Mi babanani yeloseli mwa musebezi wa kuyaha ni kubabalela miyaho ya kopano balutanga babasina yeloseli mwa musebezi wo. w24.09 28-29 ¶11-12

Mizwale, kuli mube muuna-muhulu, muswanela “kuba yasanyazahali,” ili kutalusa kuli, muswanela kuba ni libizo lelinde mwa puteho bakeñisa muzamao wamina omunde. (1 Tim. 3:2) Kutuha fo, muswanela kuba yapakwa hande ki baba kwande. Batu babasi Lipaki bakona kunyaza zemulumela ka kuba Mukreste, kono habaswaneli kuba ni libaka leliutwahala la kukakanya busepahali bwamina kamba muzamao wamina. (Dan. 6:​4, 5) Muipuze kuli, ‘Kana ninani libizo lelinde mwa puteho ni kwande?’ Haiba ‘mwalata bunde,’ mukaisa pilu kwa lika zende zebaeza babañwi mi muka bababaza kabakala tulemeno twabona totunde. (Tite 1:8) Hape mukatabela kuezeza babañwi lika zende, mane nihaiba kubaezeza lika zene basika libelela. Ki kabakalañi hakuli kwa butokwa kuli baana-bahulu babe ni kalemeno kao? Bakeñisa kuli batandanga nako yabona yeñata kulisa puteho ni kupeta buikalabelo bobuñwi. (1 Pit. 5:​1-3) Nihakulicwalo, tabo yebanani yona kabakala kusebeleza babañwi ki yetuna hahulu kufita buitomboli bobakona kueza.—Lik. 20:35. w24.11 20-21 ¶3-5

Likombwa za puteho bapeta misebezi ya butokwa hahulu mwa liputeho. Kusina kukakanya, muapositola Paulusi naaitebuha baana babasepahala bao. Ka mutala, hanaañolela Bakreste ba mwa Filipi, naalumelisize likombwa za puteho hamoho ni baana-bahulu. (Mafil. 1:1) Mizwale babañata babakolobelizwe, ibe kuli ki babahulu kamba ki banana, batabela hahulu kuba likombwa za puteho. Ka mutala, muzwale yabizwa Devan naanani lilimo ze 18 haketiwa kuba sikombwa sa puteho. Kono muzwale yabizwa Luis, yena naali kwa makalelo a lilimo zahae za ma 50 haketiwa kuba sikombwa sa puteho. Naaikutwile sina mobaikutwelanga babañwi, mi naabulezi kuli: “Niikutwa kuli ki tohonolo yetuna kuba sikombwa sa puteho, sihulu haninahana lilato lelituna leba nibonisize mizwale ni likaizeli mwa puteho!” Haiba mu muzwale yakolobelizwe mi hamu sikombwa sa puteho, kana mwakona kuitomela sikonkwani sa kuba sikombwa sa puteho? w24.11 14 ¶1-3

Mulena Ezekiasi hanaanani lilimo ze 39, akula butuku bobutuna. Mupolofita Isaya naataluselize Ezekiasi lushango lone luzwa ku Jehova lwa kuli naakabulaiwa ki butuku bwanaakula. (2 Mal. 20:1) Nekubonahala inge kuli nekusina sepo ya kuli Ezekiasi naakapila. Ezekiasi naaikutwile hahulu bumaswe kabakala taba yeo, mi alila hahulu. Alapela ku Jehova ka taata. Jehova naaikutwile bumaswe Ezekiasi hanaakupile tuso inze alila, mi ka sishemo amubulelela kuli: “Niutwile tapelo yahao. Niboni miyoko yahao. Nika kufolisa.” Ka kuitusisa Isaya, Jehova naasepisize ka sishemo kuli naakaekeza mazazi kwa bupilo bwahae ni kuli naakalamulela Jerusalema kwa Maasiria. (2 Mal. 20:​4-6) Kana mukula butuku bobuñwi mi kubonahala inge kuli hakuna sepo ya kuli mukafola? Mutaluseze Jehova momuikutwela, mane mwakona nihaiba kulotisa miyoko hamunze mueza cwalo. Bibele ilutaluseza kuli “Ndate sishemo ni Mulimu yaomba-omba mwa miinelo kaufela” uka luomba-omba mwa manyando aluna kaufela.—2 Makor. 1:​3, 4. w24.12 24 ¶15-17

Lukaba ni tabo yetuna haluka amuhela batu babashwile babaka zusiwa kwa bafu! Hape munahane tabo yemukaba ni yona hamuka ituta ka za Jehova ka kunyakisisa lika zeñata zabupile. (Samu 104:24; Isa. 11:9) Mi sa butokwa nikufita kikuli, mukaba ni tabo yetuna kabakala kulapela Jehova kusina nto niyekana yetahisa kuli muikutwe mulatu! Kana mubata kulatehelwa ki tohonolo ya kuto ikola limbuyoti zeo kwapili kabakala “kuikola minyaka ya libi yeina nako yenyinyani”? (Maheb. 11:25) Kutokwa nihanyinyani! Limbuyoti zeo ki zende hahulu kufita buitomboli bufi kamba bufi bolukona kueza ka nako ya cwale. Muhupule kuli, haluna kuzwelapili kulibelela kuto pila mwa Paradaisi fa lifasi kakuli sepo yeo ikatalelezwa. Mi lika zeo kaufela likakonahala kabakala kuli Jehova naalulatile hahulu kuli mane naalufile Mwanaa hae sina tiululo! w25.01 29 ¶12

Buka ya Maheberu ibulela za batu babañata bane banani tumelo ku Jehova, kono yomuñwi wa batu bao, yena Mushe, naanani tumelo yeipitezi. (Maheb. 3:​2-5; 11:​23-25) Mi tumelo ya Mushe nesi ya mbango kakuli Mulimu naaezize makazo ya kufepa batu bao ka kubafa lico ni mezi kuli bazwelepili kupila mwa lihalaupa. (Exo. 15:​22-25; Samu 78:​23-25) Nihakulicwalo, nihaike kuli Mushe naanani tumelo yetiile, hamulaho wa silimo kuzwa fobalukululelwa Maisilaele ka makazo, naakakanyize ka za haiba Jehova naakona kufa batu bahae nama. Mushe naasazibi mo Jehova naakona kufumanela nama yeneka kwana batu bao kaufela. Jehova naaalabile Mushe ka kumubuza kuli: “Kikuli lizoho la Jehova ki lelikuswani?” (Num. 11:​21-23) Kuswana feela inge kuli Jehova naabuza Mushe kuli, ‘Kana unahana kuli hanikoni kueza zenisepisize?’ w25.03 26 ¶1-2

Kana lwaswanela kuunga likande lelibulela za Muunda sina bupolofita bobusupa kwa nto yeñwi? Batili. Kabakalañi? Kakuli Bibele haibuleli cwalo. Jesu naabapanyize nako ya kubateñi kwahae kwa mazazi a Nuwe, kono naasatalusi kuli likande lelibulela za Muunda neli bupolofita bone busupa kwa nto yeñwi, ni kuli batu kaufela ni likezahalo kaufela neliyemela nto yeñwi; mi naasika bulela kuli kukwaliwa kwa sikwalo sa aleka neli bupolofita bobuyemela nto yeñwi ya butokwa yeneka talelezwa kwapili. (Mat. 24:​37-39) Nuwe naaezizeñi hanaautwile lushango lwa Jehova lwa temuso? Naabonisize kuli naanani tumelo ka kuyaha aleka. (Maheb. 11:7; 1 Pit. 3:20) Ka nzila yeswana, batu habautwa taba yende ya Mubuso wa Mulimu baswanela kusebelisa zebaituta. (Lik. 3:​17-20) Pitrosi naabulezi kuli Nuwe naali “mukutazi wa kuluka.” Kacenu, lueza musebezi wa kukutaza oezwa mwa lifasi kaufela mi luueza ka kutukufalelwa. Niteñi, kusina taba ni buikatazo bolukona kueza, halukoni kukutaza taba yende kwa batu kaufela fa lifasi pili mafelelezo asika taha kale. w24.05 9-10 ¶3-5

Luswanela kubatanga linzila za kubonisa ka zona sishemo ni likute kwa balikani ba Jehova. (Maro. 12:10) Ka mukwa ufi? Ka kuya ka Samu 15:​4, nzila yeñwi ki ya kuli muenyi mwa tende ya Jehova “haapalelwi kutaleleza sepiso yahae, lika niha lisike zamuzamaela hande.” Lukautwisa babañwi butuku kwa pilu haiba lupalelwa kutaleleza zelusepisize. (Mat. 5:37) Ka mutala, Jehova ubata kuli baenyi bahae bapete buitamo bone baezize habanyalana. Hape watabanga habona bashemi habaeza mobakonela kaufela kueza lika zebasepisize bana babona. Lilato laluna ku Mulimu ni kwa batu babañwi, lilususuezanga kueza molukonela kaufela kutaleleza lisepiso zaluna. Nzila yeñwi yelukona kukuteka ka yona balikani ba Mulimu, ki ka kuba ni moya wa kuamuhela baenyi ni kuba ni bufani. (Maro. 12:13) Kuitabisa ni mizwale ni likaizeli baluna, kuka lutusa kutiisa silikani saluna ni bona ni kutiisa silikani saluna ni Jehova. Kuzwa fo, haluba ni moya wa kuamuhela baenyi, lulikanyisa Jehova. w24.06 12 ¶15-16

Jehova upatululanga niti yahae kwa batu babaikokobeza. (Mat. 11:25) Nelubonisize buikokobezo hane lulumezi kuituta niti. (Lik. 8:​30, 31) Nihakulicwalo, luswanela kutokomela kuli lusike lwakala kuikuhumusa. Kuba ni buikuhumuso kukona kutahisa kuli lukale kunahana kuli mibonelo yaluna ilukile sina feela likuka za mwa Mañolo ni ketelelo yelufiwa ki kopano ya Jehova. Kuli luzwelepili kuba ni buikokobezo, luswanela kuhupula kuli lubabanyinyani hahulu halubapanywa ku Jehova. (Samu 8:​3, 4) Hape lwakona kukupa Jehova kuli alutuse kuba hahulu ni buikokobezo ni kulata kulutiwa. Jehova uka lutusa kuunga mihupulo yahae, yona yalufile ka kuitusisa Linzwi lahae ni kopano yahae, kuba ya butokwa hahulu kufita yaluna. Hamunze mubala Bibele mulemuhe mo Jehova aboniselize kuli walata buikokobezo ni kuli utoile buikuhumuso. Mi mueze momukonela kufela kuli muzwelepili kuikokobeza niha mufiwa buikalabelo bobukona kutahisa kuli muzibahale hahulu. w24.07 10 ¶8-9

Kuzwa feela ka 1919, Jesu uitusisize sikwatanyana sa baana babatozizwe kuli baonga-onge musebezi wa kukutaza ni kutusa balateleli bahae kufumana lico za kwa moya. (Luka 12:42) Kwaiponahalela hande kuli Jehova usweli wafuyaula musebezi osieza sikwata seo. (Isa. 65:​13, 14) Nelusike lwakona kupeta hande musebezi walufile Jesu kambe nelusika onga-ongiwa hande. (Mat. 28:​19, 20) Ka mutala, nekukaba cwañi kambe puteho ni puteho haisika fiwa kalulo yayona ya simu, mi batu kaufela balukuluhile kukutaleza kwa libaka zebatabela? Likalulo zeñwi za simu nelika kutalezwa hahulu ki bahasanyi babashutana-shutana, kono zeñwi zona nelisike za kutalezwa. Mwakona kunahana ka za linzila zeñwi zelutusiwa ka zona kabakala kuonga-ongiwa hande. Jesu uzwezipili kuonga-onga batu ba Mulimu kacenu, sina feela mwanaaezelize hanaali fa lifasi. w24.04 8-9 ¶2-4

Kaine neli yena mweli wa Adama ni Eva. Naahozize sibi kwa bashemi bahae. Kutuha fo, Bibele ibulela kuli: “Misebezi yahae neli yemaswe.” (1 Joa. 3:12) Mwendi ki lona libaka Jehova hanaasika “shemuba Kaine nihanyinyani mi naasika amuhela nubu yahae.” Kufita kucinca mupilelo wahae, “Kaine ahalifa hahulu mi aswaba.” Jehova naaezizeñi kuzwa fo? Naaambozi ni Kaine. (Gen. 4:​3-7) Mulemuhe kuli Jehova naaambozi ni Kaine ka musa, kumutaluseza kuli naaka mufuyaula hanaaka eza zende mi naamulemusize ka za kozi yeneka mutahela haiba aeza sibi. Ka bumai, Kaine naasika utwa. Naasika lumeleza Jehova kuli amutuse kubaka. Nihaike kuli Kaine naasika utwa Mulimu, Jehova naasika atula kuli haasana kutusa mutu ufi kamba ufi kuli abake! w24.08 10 ¶8

Naahupulisize sicaba sa Isilaele kuli nebakaba ni bupilo bobunde kwapili. Maisilaele hane bakafuyaulwa ki Jehova, nebaka pila nako yetelele mwa naha yanaa basepisize. Mi naha yeo neli yende hahulu mi nekunani limela zeñata! Mushe naabataluselize cwana ka za naha yeo, naaize: “Mileneñi yemituna, yeminde, yeusika yaha, ni mandu aatezi lika zende za mifuta kaufela zeusika sebeleza, masima eusika yepa, ni masimu eusika cala a likota za veine ni a likota za olive.” (Deut. 6:​10, 11) Mushe hape naafile Maisilaele temuso. Kuli bazwelepili kupila mwa naha yabona yende, nebaswanela kuutwa milao ya Jehova. Mushe naabasusuelize “kuketa bupilo” ka kuteeleza ku Jehova ni ka “kumukumalela.” (Deut. 30:20) Nihakulicwalo, Maisilaele nebasika utwa Jehova. Kacwalo, Mulimu naatuhelezi Maasiria ni Mababilona hasamulaho kuli batule Maisilaele ni kubaisa mwa buhapiwa.—2 Mal. 17:​6-8, 13, 14; 2 Makol. 36:​15-17, 20. w24.11 9 ¶5-6

Batu babañata babaipapata kuba Bakreste baikutwa kuli bakapiliswa ka kubulela feela kuli balumela ku Jesu ni kuli ki mupilisi wabona. (Joa. 6:29) Niteñi, babañwi ba batu babañata bane bateelelize ku Jesu neba muyubekile hasamulaho. Libaka? Buñata bwa batu banaafepile Jesu nebatabela kumulatelela ibile feela abafa zene babata. Nebabata kuli abafolise, kubafa lico, ni kubabulelela zene batabela kuutwa. Nihakulicwalo, Jesu naabonisize kuli balutiwa bahae ba niti nebatokwa kueza lika zeñwi zeñata. Naasika taha fa lifasi ka libaka feela la kutusa batu kufumana zene batokwa kwa mubili. Nebaswanela kuamuhela memo ya “kutaha” ku yena ka kulumela ni kusebelisa litaba kaufela zanaalutile.—Joa. 5:40. w24.12 12 ¶12-13

Ki lika mañi zekona kutusa muuna kutuhela kunyandisa ni kushubula musalaa hae? Uswanela kuikataza kulikanyisa Jesu. Naatomezi baana mutala omunde wa mobaswanela kupilisanela ni basali babona ka mwanaapilisanezi ni balutiwa bahae. Halunyakisiseñi zebakona kuituta baana ku Jesu ka mwanaapilisanezi ni baapositola bahae ni mwanaa ambolelanga ni bona. Jesu kamita naabonisanga sishemo ni likute kwa baapositola bahae. Naasaambolangi ni bona ka buhali kamba kubaeza ka situhu. Naasika itusisa maata ahae kuli bamusabe. Kono mane naabasebelelize. (Joa. 13:​12-17) Naabulelezi balutiwa bahae kuli: “Muitute ku na, kakuli ninani musa mi niwile pilu, mi mukakatuluha.” (Mat. 11:​28-30) Mulemuhe kuli Jesu naanani musa. Mutu yanani musa haki kuli wafokola. Kono ki mutu yakona kuiswala. Haahalifiswa uzwelangapili kuwa pilu ni kuiswala. w25.01 10 ¶10-11

Mafelelezo a lifasi le hanzaa atumela, lwakona kulibelela kuli lukakopana ni butata bwa kutokwa hande masheleñi. Mifilifili yetahiswa ki ba lipolitiki, lindwa, likozi za ka taho kamba matuku amanca ayambukela, zakona kutahisa kuli lube ni lisinyehelo zene lusika libelela, kuzwisiwa musebezi, kulatehelwa ki maluwo aluna kamba kusinyehelwa ki ndu yaluna. Ki lika mañi zekona kulutusa kueza likatulo zebonisa kuli lusepile lizoho la Jehova? Muhato wa butokwa hahulu ili otusa omuswanela kuunga ki kutaluseza Jehova lika kaufela zemibilaeza. Mumukupe kuli amife butali bomutokwa kuli mueze likatulo zende ni kuwa pilu, ilikuli mutuhele “kubilaela hahulu” ka za muinelo omuli ku ona. (Luka 12:​29-31) Mumukupe kuli amituse kukolwa ka lika zemunani zona mwa bupilo. (1 Tim. 6:​7, 8) Mueze lipatisiso mwa lihatiso zaluna kuli muzibe mwakutiyela butata bwa kutokwa hande masheleñi. Batu babañata batusizwe ki litaba ze fa jw.org zebonisa mwakutiyela butata bwa kutokwa hande masheleñi. w25.03 28-29 ¶10-11

Nako nese ifitile ya kuli batu ba macaba bane basikaya kwa mupato ni bona babe sicaba sa Mulimu. Muapositola Pitrosi naalumilwe kuyo kutaza ku Kornele, ili Mulicaba yanaakaba yomuñwi wa batu bapili kuba mwa sikwata sesinca seo sa balapeli ba Mulimu. Majuda ni batu ba macaba nebasa lumelelani; kacwalo, Pitrosi naatokwa kucinca mubonelo wahae kuli akone kupeta musebezi wahae. Pitrosi hanaalemuhile tato ya Mulimu mwa taba ye, naacincize mubonelo wahae. Kacwalo, Kornele hanaakupile Pitrosi kuli ayo mupotela, Pitrosi naaile ‘asahanyezi ni hanyinyani.’ (Lik. 10:​28, 29) Naakutalize ku Kornele ni ba ndu yahae, mi nebakolobelizwe. (Lik. 10:​21-23, 34, 35, 44-48) Hamulaho wa lilimo, Pitrosi naasusuelize Bakreste sina yena kuli ‘banahane ka kulumelelana.’ (1 Pit. 3:​8, litaluso ze kwatasi) Ka kuba batu ba Jehova, lwakona kunahana ka kulumelelana halulikanyisa mwanahanela Jehova sina mokuboniselizwe mwa Linzwi lahae. w25.03 9-10 ¶7-8

Munahanelo ni mubonelo wa batu wa lika uzwelapili kushutana hahulu ni munahanelo wa Jehova. (Liprov. 17:15) Kacwalo, ki kwa butokwa kulemuha mihupulo yefosahalile ni kuihanyeza, mi haluswaneli kulumeleza balwanisi kuluzwafisa ni kutahisa kuli lutuhele kusebeleza Jehova. Lukaeza hande haiba lusebelisa kelezo yanaafile muapositola Paulusi kwa Bakreste ba Maheberu ya kuli baeze ka taata kuli bafite fa buhulu bwa kwa moya. Kueza cwalo kukopanyeleza kuba ni zibo yenepahezi ya kuziba niti ni kuunga lika sina mwaliingela Jehova. Luswanela kuzwelapili kueza cwalo mane niha seluneezi bupilo bwaluna ku Jehova ni kukolobezwa. Kusina taba kuli lubile mwa niti ka nako yekuma kai, kaufelaa luna luswanela kubanga ni nako ya kubala ni kuituta Linzwi la Mulimu kamita. (Samu 1:2) Kuba ni tomahanyo yende ya kuezanga tuto ya ka butu kuka lutusa kutiisa tumelo yaluna, kona kalemeno kanaakoñomekile Paulusi mwa liñolo lahae kwa Bakreste ba Maheberu.—Maheb. 11:​1, 6. w24.09 10 ¶7-8

Haiba luba ni silikani sesitiile ni Jehova, kuka lubela hahulu bunolo kuzwelapili kusepahala ku yena. Zeneezahezi ku Josefa libonisa buniti bwa taba yeo. Naahanile kueza buhule. Naanani silikani sesitiile ni Jehova, mi naasalati kueza lika zesa mutabisi. (Gen. 39:9) Kuli lube ni silikani sesitiile ni Jehova, lutokwa kubanga ni nako ya kulapela ku yena ni kuituta Linzwi lahae. Kueza cwalo kukatiisa hahulu silikani saluna ni yena. Ka kuswana ni Josefa, ni luna haiba luba ni silikani sesitiile ni Jehova haluna kueza nto ifi kamba ifi yesa mutabisi. Batu babalibalanga kuli Jehova ki Mulimu yapila kukona kubabela hahulu bunolo kutuhela kusepahala ku yena. Halunyakisiseñi zeneezahezi kwa Maisilaele hane bali mwa lihalaupa. Nebaziba kuli Jehova uteñi, kono nebakalile kukakanya ka za haiba naaka batusa kufumana zene batokwa. (Exo. 17:​2, 7) Kabakaleo, nebakwenuhezi Mulimu. Kaniti luli, halubati kulikanyisa mutala wabona wa kusaipeya kuutwa, ili mutala oli temuso ku luna.—Maheb. 3:12. w24.06 24 ¶14-15

Mafelelezo a lifasi le a fakaufi hahulu, mi lulibelela kuli lukakopana ni miinelo yetaata hahulu, ili yekatahisa kuli lulotise miyoko. Jehova wabonanga miyoko yelulotisanga mi uikutwanga hahulu bumaswe. Miyoko yaluna ki ya butokwa hahulu ku yena. Kacwalo, halukopana ni miinelo yeluutwisa hahulu butuku kwa pilu, lulapele ku Jehova kuzwelela kwatasaa pilu. Nikamuta lusike lwaikauhanya kwa mizwale ni likaizeli baluna mwa puteho, ili baba lulata. Mi haike manzwi a mwa Bibele azwelepili kuluomba-omba. Lwakona kukolwa kuli Jehova uka lufuyaula haiba luzwelapili kuitiisa ka busepahali. Taba yeo ikopanyeleza sepiso yende ya kuli ukatakula miyoko kaufela kwa meeto aluna yetahiswa ki kuutwa hahulu bumaswe, kubetekiwa, ni kufelelwa ki sepo. (Sin. 21:4) Mi miyoko yeluka lotisa ka nako yeo, ikaba feela miyoko ya tabo. w24.12 20 ¶3; 25 ¶19

Jehova uluketile kuli lube Lipaki zahae, mi usepisa kuli uka lutusa kuba ni bundume. (Isa. 43:​10, 11) Halunyakisiseñi feela linzila zeene kwa linzila zalutusanga ka zona. Nzila yapili, Jesu ubanga ni luna nako kaufela halukutaza taba yende. (Mat. 28:​18-20) Nzila yabubeli, Jehova uketile mangeloi kuli alutuse. (Sin. 14:6) Nzila yabulaalu, Jehova ulufile moya wahae okenile kuli ulutuse kuhupula lika zeluitutile. (Joa. 14:​25, 26) Nzila yabune, Jehova ulufile mizwale ni likaizeli bolukona kubeleka ni bona. Ka tuso ya Jehova ni ka tuso ya mizwale ni likaizeli baluna baba lulata, lunani lika kaufela zelutokwa kuli lukondise. Kono haiba mwazwafanga hamufumana batu basikai feela fa mandu, muipuza kuli: ‘Batu ba mwa kalulo yaka ya simu bakai ka nako ye?’ (Lik. 16:13) ‘Kana ba kwa mubeleko kamba baizo leka lika zeñwi kwa musika?’ Haiba ki cwalo, mwendi kukutaleza mwa makululu kwakona kumitusa kufumana batu babañata. w24.04 17 ¶10-11

Haiba munyezi mi mubata kukwanisa zetokwahala kuli mube muuna-muhulu, ba mwa lubasi lwamina ni bona baswanela kuba mutala omunde. Kacwalo, muswanela ‘kuzamaisa ba ndu yamina hande.’ Muswanela kuzibahala ka kuba mutu yalata lubasi lwahae ni yapeta hande buikalabelo bwahae ka kuba toho ya lubasi. Kueza cwalo kukopanyeleza kuetelela lubasi lwamina mwa lika kaufela za kwa moya. Haiba mu bo ndate lubasi, bana bamina babanyinyani baswanela kuba “babaipeya kwatasi ni babaisa pilu kwa lika.” (1 Tim. 3:4) Muswanela kubaluta ka lilato. Nihakulicwalo, mubata kuli bana bamina babe ni tabo, basehe ni kubapala sina feela banana kaufela. Kono bakeñisa kubaluta hande, bakaipeya kuutwa, kuba ni likute, ni kuikuteka. Hape muswanela kueza momukonela kaufela kutusa bana bamina kuba ni silikani sesinde ni Jehova, kupila ka likuka za mwa Bibele, ni kukwanisa zetokwahala kuli bakolobezwe. w24.11 22 ¶10-11

Halupeta zeñata mwa bukombwa, lukabona mwalutuseza Jehova mi luka musepa hahulu. (1 Makor. 3:9) Kono muhupule kuli Jehova habapanyangi zemueza ku zebaeza babañwi; yena ubona ze mwa pilu yamina. Ubanga ni tabo halemuha kuli mwaitebuha hahulu tiululo, yona mpo ya butokwa hahulu. (1 Sam. 16:7; Mare. 12:​41-44) Tiululo ki yona feela yekonahalisa kuli libi zaluna liswalelwe, lube ni silikani sesinde ni Jehova, ni kuli lube ni sepo ya kupila kuya kuile. Haike kamita lubonise buitebuho kwa lilato la Jehova, lona lene limususuelize kulufa limbuyoti ze kaufela. (1 Joa. 4:19) Mi haike lubonise buitebuho ni ku Jesu, yena yanaa lulatile hahulu kuli mane naafanile bupilo bwahae kabakala luna! w25.01 31 ¶16-18

Mulemuhe zeibulela Bibele ka za mwanaaikutwezi muñoli wa Samu 73. Naabonanga batu bane babonahala inge kuli nebaikola bupilo, nebakondisa, mi nebasina lipilaelo mwa bupilo. (Samu 73:​3-5, 12) Hanaabonanga batu bao bane babonahala kuli nebakondisa, naaikutwanga kuli buikatazo bwanaaeza kuli asebeleze Jehova neli bwa mbango. ‘Naakatazeha lizazi kaufela’ kabakala maikuto azwafisa ao. (Samu 73:​13, 14) Ki lika mañi zene mutusize kufelisa maikuto azwafisa ao?Muñoli wa samu ye naaile mwa sibaka sesikenile sa Jehova. (Samu 73:​16-18)Hanaali mwa sibaka seo, naakona kunahanisisa hande. Naalemuhile kuli nihaike kuli batu babañwi nebabonahala inge kuli nebaikola bupilo, nebasina sepo ya za kwapili. Kuba ni temuho yeo neku mutusize kuba ni kozo ya mwa munahano, ni kuziba kuli kundongwama lika za kwa moya neli yona katulo yende hahulu. Kabakaleo, naaikatulezi kuzwelapili kusebeleza Jehova.—Samu 73:​23-28. w24.10 27 ¶11-12

Jehova uluketile kuli lube “lipaki” zahae. (Isa. 43:​10-12) Lilimo lisikai kwamulaho, liñolo lelizwa kwa sitopa sesietelela nelibulezi kuli: “Hakuna tohonolo yetuna yefita ya kubizwa Lipaki za Jehova.” Ki kabakalañi hakuli cwalo? Halunyakisiseñi mutala wo. Haiba mubata mutu yaka mitusa kukenisa libizo lamina mwa kuta, mukaketa mutu yemuziba ni yemusepile, ili mutu yanani libizo lelinde lelika tahisa kuli batu bakolwe litaba zaka bulela. Ka kuluketa kuli lube Lipaki zahae, Jehova ubonisize kuli uluziba hande hahulu mi ulusepile kuli lwakona kutaluseza batu babañwi kuli ki yena feela Mulimu anosi wa niti. Luikutwa kuli ki tohonolo yetuna kuba Lipaki zahae mi luitusisanga kolo kaufela yelubanga ni yona kuzibahaza libizo lahae, ni kubonisa kuli litaba zemaswe kaufela zebulezwi ka za hae ki za buhata. Ka nzila yeo, lueza zeluswanela kueza ka kuba Lipaki za Jehova, lona libizo lelulata kubizwa ka lona.—Maro. 10:​13-15. w24.05 18 ¶13

Kusebeleza babañwi nekutahiselize Jesu tabo yetuna. Ka nako yeñwi, Jesu naasika luta feela batu, kono naabaezelize lika zeñwi. Naabafile lika zene batokwa kwa mubili. Naaezize makazo kuli kube ni lico zeñata kihona alifa kwa balutiwa bahae kuli baabele sicaba. (Mare. 6:41) Ka kueza cwalo, naalutile balutiwa bahae mwakusebeleza babañwi. Hape naababonisize kuli kueza misebezi yetusa babañwi ki kwa butokwa. Munahane feela tabo yene babile ni yona baapositola ba Jesu hane basebelisani ni Jesu mwa musebezi wa kuabela lico kwa sicaba kufitela “baca kaufelaa bona mi bakula”! (Mare. 6:42) Wo ki mutala ulimuñwi feela kwa mitala yemiñata yebonisa kuli Jesu naabeile za babañwi mwa sibaka sapili. Naasebelelize babañwi mwa bupilo bwahae kaufela fa lifasi. (Mat. 4:23) Jesu naabanga ni tabo yetuna hanaalutanga babañwi ni kubatusa kufumana zene batokwa. w24.11 16 ¶10-11

Kusina kukakanya, miinelo mwa “mazazi a mafelelezo” hainze izwelapili kutotobela, lukatokwa kutusana hahulu ni mizwale ni likaizeli baluna. Hape lwakona kuomba-omba mizwale ni likaizeli baluna ni kubabonisa lilato. Nzila yeñwi yelukona kueza cwalo ka yona ki ka kubaamuhela hande kwa Ndu ya Mubuso. Kacwalo, lubata kueza molukonela kaufela kuli mizwale ni likaizeli baluna habataha kwa mikopano, baikutwe kulatiwa, kukatuluha, ni kusilelezwa. Baana-bahulu bakona kuba masabelo kwa mizwale ni likaizeli babasweli kutiyela miinelo yetaata yekona kubapiswa kwa liñungwa kamba babaziyelizwe ki liñungwa la luli. Hakuba ni likozi za ka taho, kamba miinelo ya ka sipundumukela yetokwa likalafo, baana-bahulu baanganga muhato kuli batuse mizwale ni likaizeli babona. Hape bafanga mizwale ni likaizeli babona tuso ya kwa moya. Kukabela hahulu bunolo mizwale ni likaizeli kuatumela muuna-muhulu haiba uzibahala ka kuba mutu yabunolo, yanani kutwelo-butuku, ni yatabela kuteeleza ku babañwi. Kubonisa tulemeno to kukona kutahisa kuli babañwi baikutwe kuli baiswa pilu; kacwalo, kukona kubabela hahulu bunolo kusebelisa litaba kaufela zetomile fa Bibele zakona kubafa muuna-muhulu.—1 Mates. 2:​7, 8, 11. w24.06 29 ¶12-13

Haluswaneli kunahana kuli Jehova haana maikuto kabakala kuli ki Mulimu yamaata kaufela! Lubupilwe ka siswaniso sa Jehova; kacwalo, kwaswanela kulumela kuli unani maikuto kakuli ni luna lubupilwe ni maikuto. Bibele italusa kuli waikutwanga “butuku kwa pilu” ni kuli ‘waswabanga.’ (Samu 78:​40, 41) Jehova ulukela kuba yanaautwile hahulu butuku hanaaboni Mwanaa hae inzaa bulaiwa ka nzila yesituhu ki batu babasa sabi Mulimu! Tiululo iluluta kuli hakuna mutu yalulata hahulu sina mwalulatela Jehova, mane nihaiba bahabo luna bolulata kamba balikani baluna babatuna. (Maro. 8:​32, 38, 39) Kusina kukakanya, Jehova ululata hahulu kufita mane ni moluitatela. Kana mubata kupila kuya kuile? Jehova yena ubata hahulu kuli mupile kuya kuile. Kana mubata kuli libi zamina liswalelwe? Jehova yena ubata hahulu kuswalela libi zamina. Saabata feela kikuli, muamuhele mpo yahae yebonisa sishemo ka kubonisa tumelo ni kuipeya kuutwa. Kaniti luli, tiululo ki mpo ya butokwa hahulu yebonisa kuli Jehova ululata hahulu.—Muek. 3:11. w25.01 22-23 ¶8-9

Kaufelaa luna fokuñwi luezanga likatulo ka kuya ka zelubona, zeluutwa ni moluikutwela. Kono fokuñwi halukoni kusepa zelubona ni zeluutwa. Niha kusabi cwalo, haiba luzamaya feela ka kubona, lwakona kupalelwa kueza tato ya Mulimu kamba kusebelisa kelezo yahae. (Muek. 11:9; Mat. 24:​37-39) Nihakulicwalo, haiba luzamaya ka tumelo, lwakona kueza likatulo ‘zelumelelwa ku Mulena.’ Haiba lusebelisa kelezo ya Mulimu, lukaba ni kozo ya mwa munahano ni tabo sakata. (Samu 16:​8, 9; Isa. 48:​17, 18) Mi haiba luzwelapili kuzamaya ka tumelo, lukaba ni bupilo bobusa feli kwapili. (2 Makor. 4:18) Lukona kuziba cwañi kuli luzamaya ka tumelo kamba ka kubona? Kuipuza lipuzo zelatelela kwakona kulutusa: Ki lika mañi zeluetelelanga halueza likatulo? Kana luetelelwanga feela ki lika zelubona? Kamba kana luetelelwanga ki kelezo ya Jehova? w25.03 20-21 ¶3-4

Mañi ni mañi waluna unani buikalabelo bobutuna bwa kutusa babañwi kuli batahe mwa paradaisi ya kwa moya. Lwakona kupeta buikalabelo bwaluna haiba lulikanyisa Jehova. Hahapelezangi batu kutaha mwa kopano yahae. Kono ‘ubahohelanga’ ku yena ka lilato. (Joa. 6:44; Jer. 31:3) Batu ba lipilu zende habaituta za tulemeno twa Jehova totunde ni butu bwahae, basusuezwanga kutaha ku yena. Kuba ni tulemeno totunde ni mikwa yeminde, kukona kutusa cwañi batu kutaha mwa paradaisi ya kwa moya? Kubonisa mizwale ni likaizeli baluna lilato ni sishemo ki yeñwi ya linzila zelukona kutusa ka zona batu kutaha mwa paradaisi ya kwa moya. Lubata kuli batu babataha lwapili kwa mikopano ya puteho baikutwe sina mone baikutwezi batu bane basi balumeli, ili bao mwendi nebayanga kwa mikopano mwa Korinte wa kwaikale. Nebabulezi kuli: “Kaniti Mulimu uteñi mwahalaa mina.” (1 Makor. 14:​24, 25; Zak. 8:23) Kacwalo, luswanela kuzwelapili kusebelisa kelezo yemwa liñolo la zazi la kacenu. w24.04 23-24 ¶16-17