Batanga ba Jehova babañwi bakatazwa ki busupali, mapongo, kamba buyanga. Lika zeo likona kutahisa kuli bakakanya ka za haiba Jehova ubaanga kuba ba butokwa. Bakona kuipuza kuli, ‘Kana Jehova usa niinga kuba wa butokwa?’ Muñoli wa Samu 71 ni yena naabile ni maikuto acwalo. Naalapezi kuli: “Usike waniyubeka hase nifelelwa ki maata.” (Samu 71:​9, 18) Nihakulicwalo, muñoli wa samu yo naazwezipili kuba ni buikolwiso bwa kuli haiba asebeleza Mulimu ka busepahali, Jehova naaka muetelela ni kumutusa. Muñoli wa samu yo naalemuhile kuli Jehova utabiswa ki batu babaeza mobakonela kaufela kumusebeleza kusina taba ni miinelo yabona. (Samu 37:​23-25) Basupali, mube ni mubonelo wa Jehova ka za muinelo omuli ku ona. Wakona kumitusa kuzwelapili kumusebeleza ka busepahali kusina taba kuli hamusana hande maata. (Samu 92:​12-15) Mwa sibaka sa kuisa pilu kwa lika zemusa koni kueza ka nako ya cwale, muise pilu kwa lika zemukona kueza. w24.10 28 ¶14-16

Bakreste babasika hula kwa moya kubabelanga taata kueza katulo yelukile habakopana ni miinelo yetokwa kuli basebelise likuka za mwa Bibele. Haiba mwa Bibele hakuna mulao onongile, babañwi bakona kuikutwa kuli bakona kueza zebalata kaufela. Babañwi bakona kubata mulao ni fousa tokwahali. Ka mutala, kubonahala kuli Bakreste ba mwa Korinte nebakupile muapositola Paulusi kuli abafe mulao ka za haiba nebaswanela kuca lico zefilwe kwa milimu ya maswaniso kamba kutokwa. Kufita kubataluseza za kueza, Paulusi naabonisize kuli mañi ni mañi wabona naanani ‘tukuluho ya kuiketela’ za kueza ka kuya ka lizwalo lahae. Naatalusize likuka lisikai za mwa Bibele zenekona kubatusa kueza likatulo zende, ilikuli basike basisitwa ki lizwalo ni kuli basike basitatalisa babañwi. (1 Makor. 8:​7-9) Kacwalo, Paulusi naatusa Bakreste ba mwa Korinte kuhula kwa moya, ilikuli baitusise maata abona a kulemuha kufita kuitinga ku babañwi kamba kubata kuli bafiwe mulao onongile. w24.04 5 ¶14

Mwa linako za Jonasi, batu ba Ninive bona nebabile ni kolo ya kubaka. Kuzwa fo, muhupule zanaabulezi Jesu ka za ‘kuzuhela katulo.’ Zuho yeo ikopanyeleza batu “bane baezize lika zemaswe.” (Joa. 5:29) Kacwalo, kubonahala kuli kunani seponyana ka za batu ba mwa Sodoma ni Gomora. Kubonahala kuli babañwi kwa batu bao bakazusiwa, mi mwendi lukaba ni kolo ya kubaluta ka za Jehova ni Jesu Kreste. Jehova kamita ki yena ‘yatatubanga lipilu ni mihupulo ya mutu.’ Hakazusa batu kwapili, “[ukafa] mutu ni mutu kulikana ni linzila zahae,” sina feela mwaezezanga kamita. Jehova ukayemela katulo yahae ka kutiya kono hape ukabonisa sishemo hakukaba ni libaka la kueza cwalo. Kacwalo, haluswaneli kunahana kuli mutu haana kuzusiwa kwa bafu konji haiba lwaziba luli kuli Bibele ibulela cwalo. w24.05 5-6 ¶15-16

Kuzwa feela kwamulaho, lushango loluzwa ku Mulimu lutusize batanga bahae kuba ni maata a kupeta misebezi yetaata. Halunyakisiseñi mutala wa mupolofita Jeremia. Naaikalezwi, Jehova hanaa mufile musebezi wa kukutaza. Jeremia naabulezi kuli: “Hanizibi kubulela, kakuli ni mutangana feela.” (Jer. 1:6) Ki lika mañi zenee mutusize kuba ni bundume kuli akutaze? Naatiisizwe ki manzwi anaa mubulelezi Mulimu. Jeremia naabulezi kuli: “Laba inge mulilo otuka okwalezwi mwa masapo aka, mi nenikatezi kuiswala.” (Jer. 20:​8, 9) Nihaike kuli batu banaakutaza ku bona Jeremia nebali taata, lushango lwanaafilwe kukutaza nelu mufile maata a kupeta musebezi wahae. Bakreste batiiswanga ki lushango lolufumaneha mwa Linzwi la Mulimu. Muapositola Paulusi naasusuelize mizwale bahae kuba ni zibo yenepahezi, ilikuli ‘bazamaye ka mukwa oswanela Jehova’ inze bazwelapili “kubeya muselo mwa musebezi kaufela omunde.—Makolo. 1:​9, 10. w24.04 14-15 ¶2-4

Zadoki naazwezipili kusepahala ku Jehova nihaike kuli Abiatare Muprisita Yapahami naatuhezi kusepahala ka kuswalisana ni Adonija mwanaa Davida yanaabata kumuyola fa lubona. Davida naasika kakanya nihanyinyani busepahali bwa Zadoki. Mulelo wa Adonija hane uzibahalile, Davida aketa Zadoki, Natani, ni Benaya, kuli batoze Salumoni kuba mulena. (1 Mal. 1:​32-34) Kuswalisana ni batanga ba Jehova babasepahala, babacwale ka Natani ni batu babañwi bane bayemezi Mulena Davida, kulukela kuba kone kutiisize Zadoki ni kumususueza. Salumoni hasaabile mulena, “aketa muprisita Zadoki kuli ayole Abiatare. (1 Mal. 2:35) Mukona kulikanyisa cwañi Zadoki? Haiba mutu yomuñwi yemuswalisana hahulu ni yena aikatulela kutuhela kusebeleza Jehova, mina muzwelepili kusepahala. (Josh. 24:15) Jehova uka mitiisa ni kumitusa kuba ni bundume bomutokwa. Muitinge ku yena ka tapelo ni ka kuswalisana hahulu ni mizwale ni likaizeli bamina babasepahala. Jehova waitebuha busepahali bwamina, mi uka mifa mupuzo.—2 Sam. 22:26. w24.07 6-7 ¶16-17

Kwa Samu 15:​2, mulikanaa Mulimu utaluswa kuli ki mutu “yasina mulatu mwa mupilelo wahae, yaeza sesilukile.” Manzwi ali, “mupilelo” ni ‘kueza,’ aama kwa nto yezwelapili kueziwa. Kono kana luli lwakona kuba ‘babasina mulatu mwa mupilelo waluna’? Eni. Kusina taba kuli hakuna mutu yapetahalile, Jehova uka luunga kuba ‘babasina mulatu mwa mupilelo waluna’ haiba lueza molukonela kaufela kumuutwa. Haluneela bupilo bwaluna ku Mulimu ni kukolobezwa, lukalisa feela kuzamaya ni yena. Mwa linako zene iñolwa Bibele, mutu naasakoni kuba muenyi wa Jehova ka libaka feela la kuli naali Muisilaele. Babañwi nebabizanga fa libizo lahae, kono nebasa ezangi cwalo “ka niti ni ka kuluka.” (Isa. 48:1) Maisilaele bane babata luli kuba baenyi ba Jehova, nebatokwa kuituta milao yahae ni kuimamela. Ka mukwa oswana, kuli lube ni silikani sesitiile ni Mulimu, lutokwa kueza lika zeñwi kwandaa feela kukolobezwa ni kuswalisana ni puteho ya Sikreste. Luswanela kuzwelapili ‘kueza zelukile.’ w24.06 9 ¶4; 10 ¶6

Ki lifi linzila zeñwi zabonisanga ka zona bufani Jehova? Halunyakisiseñi mitala isikai. Jehova ulufanga lika za kwa mubili. Mwendi kamita haluna kupila bupilo bwa simbombo, kono lwaitumela ku Jehova, kakuli buñata bwaluna lunani zelutokwa. Ka mutala, walutusanga kufumana lico, liapalo, ni malobalo. (Samu 4:8; Mat. 6:​31-33; 1 Tim. 6:​6-8) Kana Jehova ulufanga lika zelutokwa kwa mubili ka libaka feela la kuli uikutwa kuli uswanela kueza cwalo? Kutokwa nihanyinyani! Halunyakisiseñi manzwi a Jesu a kwa Mateu 6:​25, 26. Jesu hanaabulela za linyunywani, naabulezi kuli: “Halicali peu kamba kukutula kamba kukubukanya mwa mabulukelo.” Nihakulicwalo, mulemuhe zanaabulezi kuzwa fo, naaize: “Ndataa mina ya kwa lihalimu walifepa.” Cwale Jesu kihona abuza kuli: “Kana mina hamu ba butokwa hahulu kufita linyunywani?” Luitutañi? Haiba Jehova wababalelanga lifolofolo, lwakona kuba ni buikolwiso bwa kuli uka lufa zelutokwa! Ka kuswana ni ndate yalilato, Jehova wababalelanga lubasi lwahae kabakala lilato.—Samu 145:16; Mat. 6:32. w24.09 26-27 ¶4-6

Sikombwa sa puteho ki muzwale yakolobelizwe, ili yaketilwe ki moya okenile kuli atuse baana-bahulu ka kupeta misebezi yeshutana-shutana mwa puteho. Likombwa za puteho ki baana babalata Jehova mi bapila ka kulumelelana ni likuka zahae. Mi hape balata hahulu mizwale ni likaizeli babona. (Mat. 22:​37-39) Ki lika mañi zaswanela kueza muzwale yakolobelizwe kuli abe sikombwa sa puteho? Bibele italusa lika zebaswanela kueza mizwale kuli babe likombwa za puteho. (1 Tim. 3:​8-10, 12) Haiba mubala lika zebulezwi mwa Bibele zeo ni kuikataza kulikwanisa, mwakona kuba sikombwa sa puteho. Kono muswanela pili kunahanisisa libaka hamubata kuba sikombwa sa puteho. w24.11 15 ¶4-5

Batu babañata babulelanga kuli babalile Bibele hañata-ñata. Kono kana balumela luli litaba zeiluta Bibele? Kana baikatalize kupila ka kulumelelana ni zeiluta Bibele kamba kuilumeleza kubaetelela mwa bupilo? Ka bumai, hañata kalabo kwa lipuzo zeo ki batili. Kono batu ba Jehova bona bashutanela kwahule ni batu bao! Luikatazanga kubonisa kuli Linzwi la Mulimu lasebeza mwa bupilo bwaluna. Nihakulicwalo, haki nto yebunolo kubala Linzwi la Mulimu ni kusebelisa zeluituta. Kukona kulubela taata kufumana nako ya kubala. Kamba lwakona kuba ni mukwa wa kubala ka kumata-mata ni kupalelwa kunahanisisa litaba zelubalile. Kamba lukona kuikutwa kuzwafa kabakala licinceho zeñata zelutokwa kueza. Kusina taba ni butata bomukopana ni bona, musike mwaikutwa kuli ki bobutuna hahulu kuli mane habukoni kufeliswa. Ka tuso ya Jehova, mwakona kufelisa butata bo. Haike luikatulele kuba baezi ba Linzwi. Kusina kukakanya, kubalanga hahulu Linzwi la Mulimu ni kusebelisa zeluituta, kuka lutahiseza tabo yetuna.—Jak. 1:25. w24.09 7 ¶15-16

Nto yemaswe haiezahala ku luna, Jehova waluomba-ombanga ka kuitusisa moya wahae okenile. Haiba mulembwalile hahulu, mwakona kutaluseza Jehova ze mwa pilu yamina kaufela, hape mwakona kulapela ku yena ka kukuta-kutela mi tapelo yamina yakona kuba yetelele kamba yekuswani. (Samu 86:3; 88:1) Mukuta-kutele kukupa Jehova kuli amife moya wahae okenile. Kamita uka mitusa. Kana nemukopani ni muinelo otaata hahulu mi cwale muikutwa kuli hamuna maata a kueza nto ifi kamba ifi? Haiba ki cwalo, moya okenile wakona kumitusa kuba ni maata kuli muzwelepili kusebeleza Jehova ka busepahali. (Maef. 3:16) Ki lika mañi zemuswanela kueza hase mukupile Jehova kuli amife moya wahae okenile? Mueze lika zekatahisa kuli moya wa Mulimu umituse. Lika zeo likopanyeleza kufumaneha kwa mikopano ni kukutaza ku babañwi. Mubalange Bibele zazi ni zazi ilikuli mube ni mubonelo wa Jehova wa lika. (Mafil. 4:​8, 9) Hamunze mubala Bibele, mulemuhe batu bababulezwi mwateñi bane bakopani ni miinelo yetaata mi munahanisise mo Jehova naabatuselize kuitiisa. w24.10 9 ¶12-14

Ka kuswana ni Jehova ni Mwanaa hae, ni luna lwalata batu. (Liprov. 8:31) Lushwelanga hahulu makeke batu ‘babasa zibi Mulimu’ ni ‘babasina sepo.’ (Maef. 2:12) Miinelo yetaata yebakopana ni yona mwa bupilo ikona kutahisa kuli baikutwe inge kuli ba mwa musima otungile, kono lunani muhala okona kubatusa kuzwa ma musima wo, yona taba yende ya Mubuso wa Mulimu. Lilato ni mukekecima waluna kwa batu bao lilususuezanga kueza molukonela kaufela kuli lukutaze taba yende ku bona. Lushango lwa butokwa lo lwakona kubatusa kuba ni sepo, kubatusa kupila bupilo bobunde hahulu ka nako ya cwale, ni kubafa kolo ya kuto pila “bupilo sakata,” bona bupilo bobusa feli, mwa lifasi lelinca la Mulimu. (1 Tim. 6:19) Lilato laluna kwa batu hape lilususuezanga kubataluseza kuli mafelelezo a lifasi lelimaswe le a fakaufi. (Ezek. 33:​7, 8) Lushwelanga makeke batu kaufela, kukopanyeleza cwalo ni ba mwa lubasi lwaluna babasa sebelezi Jehova. Lubata kuli bazibe zekaezahala ka nako ya ñalelwa yetuna—bulapeli bwa buhata bukayundiswa mi  hasamulaho, ili ka nako ya ndwa ya Armagedoni, lifasi lelimaswe le likayundiswa.—Sin. 16:​14, 16; 17:​16, 17; 19:​11, 19, 20. w24.05 16-17 ¶8-9

Muapositola Paulusi naasusuelize Bakreste kuli, ‘batuhelele Mulimu kuli akutiseze.’ Jehova ki yena yaswanela kukutiseza. Lukona kutuhelela Jehova kuli akutiseze ka kumufa kolo ya kulukisa kusaluka ka nako yahae yeswanela ni ka nzila yatabela. Muzwale yabizwa John, hamulaho wa kuezwa maswe, naabulezi kuli: “Nenitokwa kuikataza kuli nisike nalukisa mafosisa ka nzila yene nitabela. Liñolo la Maroma 12:19 neli nitusize kuba ni pilu-telele ni kusepa Jehova.” Kulibelela kuli Jehova atatulule butata kwakona kulutusa. Haiba lueza cwalo, haluna kuimezwa ni kuhalifa kabakala kulika kutatulula butata kaili luna. Jehova ubata kulutusa. Kuswana feela inge kuli ubulela kuli, ‘Haiba hamusika ezwa hande, musiye taba yeo mwa mazoho aka mi nikaitatulula.’ Haiba lulumela sepiso ya Jehova ya kuli “ki na yakakutiseza,” haluna kuzwelapili kuhalifa, mi lukakolwa kuli ukatatulula butata ka nzila yende hahulu. w24.11 6 ¶14-15

Luswanela kutokomela kuli haluungi lika za kwa mubili kuba zona lika za butokwa hahulu mwa bupilo bwaluna. Muapositola Paulusi naakoñomekile taba yeo hanaañolezi Bakreste bane bapila ka nako yeo Jerusalema ni tempele yayona nelituha lisinyiwa. Naatalusize zeneezahezi kwa Maisilaele kwamulaho, hamohocwalo ni zeneezahezi bukaufi ni Lilundu la Sinai. Naafile temuso kwa Bakreste ‘kuli basike balakaza lika zemaswe, sina mone baezelize Maisilaele.’ (1 Makor. 10:​6, 7, 11) Maisilaele nebalakaza hahulu lico kuli mane takazo yeo neitahisize kuli lico zanaa bafile Jehova ka makazo lifetuhe kuba “lika zemaswe.” (Num. 11:​4-6, 31-34) Mi hane balapezi namani ya gauda, nebabonisize kuli zeneli za butokwa ku bona neli kuca, kunwa, ni kuitabisa kufita kuutwa Jehova. (Exo. 32:​4-6) Paulusi naaamile kwa mutala wo kuli afe temuso kwa Bakreste bane bapila ka nako yeo Jerusalema ni tempele yayona nelituha lisinyiwa, ili ka 70 C.E. Bakeñisa kuli lupila ka nako yeo lifasi le lituha lifela, ki kwa butokwa hahulu kusebelisa kelezo ya Paulusi. w24.12 6 ¶13

Jehova ki “Mulimu yatabile,” mi ubata kuli ni luna lube babatabile. (1 Tim. 1:11) Ulufile limpo zeñata zelutusa kuikola bupilo. (Jak. 1:17) Linyalo ki yeñwi ya limpo zeo. Muuna ni musali habanyalana, baitamanga kuli bakalatana ni kukutekana. Haiba muuna ni musali bazwelapili kulatana hahulu, bakaba ni tabo yetuna. Ka bumai, batu babañata babanyalani kacenu balibalanga buitamo bone baezize fa lizazi la sinawenga. Kabakaleo, habana tabo. Jehova ubata kuli baana bapilisane cwañi ni basali babona? Jehova ulaela baana kuli bakuteke basali babona. Muuna yakuteka musalaa hae uka mubonisa sishemo ni lilato.—1 Pit. 3:7. w25.01 8 ¶1-2; 9 ¶4-5

Kusina kukakanya, liñolo la muapositola Paulusi kwa Bakreste ba Maheberu nelitusize Bakreste ba mwa linako za baapositola kuitukiseza ñalelwa yene bakakopana ni yona. Paulusi naasusuelize mizwale bahae kuli baitute Linzwi la Mulimu ka tokomelo ni kuliutwisisa hande. Kueza cwalo nekuka batusa kulemuha ni kuhanyeza lituto zeneka fokolisa silikani sabona ni Jehova. Naabasusuelize kutiisa tumelo yabona ilikuli bakone kulatelela kapili ketelelo ya Jesu ni ya batu bane baketilwe kuetelela mwa puteho. Hape naatusize Bakreste kuitiisa ka kuba ni mubonelo oswanela ka za miliko ni kuunga miliko yeo sina kolo ya kulutiwa ki Ndataa bona yalilato. Haike ni luna lusebelise kelezo yeo ya mwa Bibele. Haiba lueza cwalo, lukakona kuitiisa ka busepahali kuisa kwa mafelelezo.—Maheb. 3:14. w24.09 13 ¶17, 19

Ka kuya ka Bibele, tiululo ki tifo yelifiwa kuli libi likwahelwe ni kuli batu bakutisezwe ku Mulimu. Ku Jehova, tukiso yeo itahisa kuli zenelatehile likutiswe. Ka nzila ifi? Muhupule kuli, bo Adama ni Eva nebalatehezwi ki bupilo bwabona bobupetehile ni tohonolo ya kupila kuya kuile. Kacwalo, tiululo neiswanela kuba tifo yelikanelela ni zenelatehile. (1 Tim. 2:6) Neikona feela kulifiwa ki muuna yahulile ili (1) yapetahalile; (2) yakona kupila kuya kuile fa lifasi; ni (3) yakona kuitatela kufana bupilo bwahae sina sitabelo kabakala luna. Halunyakisiseñi mabaka amalaalu anaatahisize kuli Jesu akone kulifa tiululo. (1) Naapetahalile—“naasika eza sibi.” (1 Pit. 2:22) (2) Kabakaleo, naakona kupila kuya kuile fa lifasi. (3) Naaitatela kushwa ni kufana bupilo bwahae kabakala luna.—Maheb. 10:9. w25.02 4-5 ¶11-12

Mukolwe kuli Jehova wamilata mi ubata kuli mube mwa lubasi lwahae. Jehova wamilata kusina taba ni miinelo yetaata yekona kutahisa kuli kumibele taata kukolobezwa. Jesu naabulelezi balutiwa bahae ba mwa linako za baapositola kuli: “Haiba munani tumelo yelikana feela ni peu ya masitete, mukakona kubulelela lilundu le kuli: ‘Shimbuluka fa, uye fale,’ mi likashimbuluka, mi hakuna sesika pala ku mina.” (Mat. 17:20) Batu bane bateeleza ku Jesu ka nako yeo nebabile ni yena ka lilimo lisikai feela; kacwalo, tumelo yabona neisa tokwa kuhula. Kono Jesu naabasusuelize kuli hane bakaba ni tumelo yelikani, nebaka kona kutula miinelo yetaata yeswana sina malundu. Jehova uka mitusa kueza nto yeswana! Haiba kunani miinelo yataata yemipaleliswa kukolobezwa, mutule miinelo yeo kusina kuzina-zina. Muneele bupilo bwamina ku Jehova ni kukolobezwa. Yeo ki yona katulo yende ka kufitisisa yemukona kueza! w25.03 7 ¶18-20

Lwakona kutiyela miinelo yetaata haiba luhupula kuli Mulimu yapila uitukiselize kulutusa. Lwakona kuba ni buikolwiso bo ka kunahanisisa zanaaezize kwamulaho. (Isa. 37:​17, 33-37) Hape, munyakisise litaba ze fa webusaiti yaluna ya jw.org zebonisa mo Jehova atuselize mizwale ni likaizeli ba mwa linako zaluna. Kutuha fo, munahanisise mwamituselize Jehova. Musike mwabilaela haiba hamusika kopana kale ni muinelo otaata hahulu. Libaka ki lifi? Kakuli zamiezelize Jehova mwa bupilo bwamina ki zeñata hahulu! Umimemile kuli mube balikani bahae. (Joa. 6:44) Mukaeza hande haiba mumukupa kuli amituse kuhupula mwanaaalabezi litapelo zamina, mwanaa mituselize ka nako yeswanela, kamba mwanaa mitiiselize hane mukopani ni muinelo otaata. Kunahanisisa mwamituselize Jehova kuka mitusa kukolwa kuli ukazwelapili kumitusa. w24.06 21 ¶8

Luswanela kuitakatulela kuli haluna kulumeleza nto ifi kamba ifi kulukauhanya ku Jehova. Niteñi, halusika petahala mi lwakona kukena mwa muliko. (Maro. 7:​21-23) Ka kusalibelela, lwakona kuipumana mwa muinelo okona kutahisa kuli kulubele hahulu taata kueza zelukile. Kuli luzwelepili kusepahala ku Jehova ni ku Mwanaa hae, luswanela kumamela kelezo ya Jesu ya kuli luitukiseze kuhanyeza miliko. Kaufelaa luna lwakopananga ni muliko wa kueza sibi. Kono mañi ni mañi waluna kunani mwafokola, bufokoli bo bukona kuba bwa kubata kueza sibi sesituna, kuikenya mwa muzamao omasila, kamba kunahana sina mobanahanela batu ba mwa lifasi le. Ka mutala, mutu yomuñwi ukona kuikataza kuhanyeza muliko wa kueza buhule. Yomuñwi ukona kukomiwa hahulu ki mikwa yemasila, yecwale ka mukwa wa kuicuka kamba wa kubuha maswaniso a mapunu. Yomuñwi yena ukona kuba ni butata bwa kusaba batu, kubata kuikezeza lika, kacima-cima, kamba butata bobuñwi cwalo. w24.07 14 ¶3; 15 ¶5

Munahane feela zeneka ezahala kambe baana-bahulu nebasika lumeleza muuna yo yanaabakile habuniti kukutela mwa puteho, kamba kambe mizwale ni likaizeli mwa puteho nebahanile kumubonisa lilato hasaakutile. Naakakomiwa ki “maswabi atulile tikanyo.” Naakaikutwa kuli haasakona kusebeleza Jehova hape. Mane naakapalelwa kuikataza kuba ni silikani sesinde ni Mulimu hape. Mane nto yemaswe nikufita kikuli, mizwale ni likaizeli hane bakahana kuamuhela muezalibi yanaabakile yo, silikani sabona ni Jehova nesika sinyeha. Libaka? Kakuli nebasike balikanyisa mubonelo wa Jehova ka za baezalibi bababakile, kono nebaka likanyisa Satani yasituhu ili yasina makeke. Nebaka lumeleza Diabulosi kuitusisa bona kuzwafisa muuna yo kuli asike asebeleza Jehova hape.—2 Makor. 2:​10, 11; Maef. 4:27.w24.08 17 ¶7, 10-11

Kreste Jesu naafile puteho “limpo zeli batu” kuli batuse puteho ka nzila yeñwi hape. Ka kuetelelwa ki yena, baana-bahulu mwa Jerusalema nebalumile Paulusi, Barnabasi, ni babañwi cwalo sina baokameli ba maeto. (Lik. 11:22) Kabakalañi? Ka libaka leliswana lene baketezwi likombwa za puteho ni baana-bahulu: kuli basusueze liputeho. (Lik. 15:​40, 41) Musebezi wa baokameli ba mupotoloho utokwa kuli bazamaye hahulu. Babañwi bazamayanga misipili yemitelele hahulu kuzwa kwa puteho yeñwi kuya ku yeñwi. Sunda ni sunda, muokameli wa mupotoloho ufanga lingambolo zeñata, kueza misipili ya bulisana, ni kuzamaisa mukopano wa mapaina, wa baana-bahulu, ni mikopano ya kuzwela mwa simu. Uitukisezanga lingambolo ni kuonga-onga mikopano ya mupotoloho ni yemituna. Ulutanga likolo za mapaina, kuonga-onga mukopano oipitezi wa mapaina ba mwa mupotoloho, ni kueza misebezi yemiñwi cwalo—fokuñwi ibanga ya ka putako—yakupilwe kueza ki ofisi ya mutai. w24.10 21 ¶12-13

Jehova naataluselize mupolofita Jeremia manzwi a mwa liñolo la kacenu. Muapositola Paulusi naaama kwa manzwi aswana ao, hanaañozi kuli: “Hanisana kuhupula libi zabona.” (Maheb. 8:12) Kono taba yeo italusañi luli? Bibele haiitusisa pulelo ya “kuhupula,” kamita haitalusi kuli mutu uswanela kuhupula nto yeñwi kamba kuinahanisisa. Kono hape ikona kutalusa kuli mutu uswanela kuunga muhato. Sikebenga sene sikokotezwi kwatuko ni Jesu nesibulezi kuli: “Jesu, unihupule hauka kena mwa Mubuso wahao.” (Luka 23:​42, 43) Sikebenga seo nesikupa Jesu kuli asiezeze nto yeñwi. Kalabo ya Jesu neibonisa kuli ukaanga muhato wa kuzusa sikebenga seo. Kacwalo, Jehova haabulela kuli haasahupula libi zaluna, utalusa kuli uluswalezi mi haana kuunga muhato kwapili kuli alufe koto kabakala libi zaluna. w25.02 10-11 ¶14-15

Luba ni kutwisiso ya niti haluziba tulemeno twa Jehova, mulelo wahae, ni zalata ni zatoile. Muipuze kuli, ‘Kulikana ni zeniziba ka za Jehova, ki katulo mañi yenika eza kuli nimutabise?’ (Maef. 5:17) Kuli lutabise Jehova, ka linako zeñwi luswanela kueza lika zesatabisi batu boluswalisana hahulu ni bona. Ka mutala, bashemi babañwi, ili babanani milelo yeminde, bakona kuhapeleza mwanaa bona wa musizana kuli anyalwe ku muuna yanani masheleñi, kamba yakona kubalifa masheleñi amañata a sionda, nihaike kuli silikani sahae ni Jehova hasisika tiya. Ki niti kuli babata kuli mwanaa bona ababalelwe kwa mubili, kono cwale ki mañi yaka mutusa kuzwelapili kuba ni silikani sesitiile ni Jehova? Jehova uunga cwañi taba yeo? Lufumana kalabo kwa Mateu 6:33. Kwa liñolo leo, Bakreste basusuezwa ‘kuzwelapili kubata pili Mubuso.’ Nihaike kuli lwakuteka bashemi baluna ni batu ba mwa silalanda saluna, nto yeluunga kuba ya butokwa hahulu ki kutabisa Jehova. w25.01 17 ¶9-10

Ni luna kacenu lutokwa kutusiwa ki Jehova kuli luzwelepili kukutaza halunze lukopana ni twaniso. (Sin. 12:17) Ki kabakalañi hamukona kukolwa kuli Jehova uka mitusa? Halunyakisiseñi tapelo ya Jesu yeñozwi kwa Joani kauhanyo 17. Jesu naakupile Jehova kuli asileleze baapositola bahae, mi Jehova naaalabile kupo yeo. Buka ya Likezo italusa mo Jehova naatuselize baapositola kukutaza ka tukufalelo kusina taba ni nyandiso. Mwa tapelo yahae, Jesu hape naakupile Jehova kuli asileleze ni batu bane bakateeleza kwa baapositola. Batu bao bakopanyeleza ni mina. Jehova uzwezipili kualaba tapelo ya Jesu; ni mina uka mitusa sina feela mwanaatuselize baapositola. (Joa. 17:​11, 15, 20) Niha kukona kulubela hahulu taata kukutaza taba yende ka tukufalelo mafelelezo hanze aatumela, lukafiwa tuso yelutokwa.—Luka 21:​12-15. w25.03 18 ¶13-14

Batu ba Mulimu bakona ‘kuhuweleza ka tabo’ kabakala kuli baitebuha lika kaufela zabaezeza Jehova. Litaba za niti ni lisepiso zeomba-omba ze mwa Linzwi la Mulimu, ni sepo yaluna yetiile yetomile fa sitabelo sa tiululo sa Kreste, litahisa kuli lube ni ‘buiketo mwa lipilu zaluna.’ Kuikambota litaba zeo kulutahisezanga tabo yetuna. (Samu 34:8; 133:​1-3) Limbuyoti zepeli za butokwa hahulu zebaikola batu baba mwa paradaisi ya kwa moya, ki lilato ni swalisano ze mwahalaa batu ba Jehova. Swalisano yetuna yeo, ilutusa kuziba mobuka bela bupilo mwa lifasi lelinca, ili mo batanga ba Jehova bakalatana hahulu ni kuswalisana, kufita mobaezeza kacenu. (Makolo. 3:14) Mutu kaufela yabata kuba ni tabo ya luli, uswanela kutaha mwa paradaisi ya kwa moya. Batanga ba Jehova banani libubo lelinde ni Jehova ni baba mulapela kaufela kusina taba ni moba baangela batu ba mwa lifasi le.—Isa. 65:15. w24.04 21 ¶7-8

Lukona kutusa cwañi Bakreste ba makwasha bababata kukena mwa linyalo? Nzila yeñwi yelukona kueza cwalo ka yona ki ka kutokomela zelubulela. (Maef. 4:29) Lwakona kuipuza kuli: ‘Kana nibulelanga lika nihaiba ka lisheha zekona kuutwisa butuku batu bababata kukena mwa linyalo? Hanibonanga muzwale wa likwasha ni kaizeli wa likwasha inze baambola, kana ninahananga kuli batabelana?’ (1 Tim. 5:13) Kutuha fo, haluswanela kutahisa kuli Bakreste ba makwasha baikutwe kuli haki ba butokwa kabakala kuli habayo mwa linyalo. Lukaeza hande hahulu haiba lubabaza Bakreste ba makwasha. Kucwañi haiba luikutwa kuli muzwale yomuñwi ni kaizeli yomuñwi baswanelana? Bibele ilutaluseza kuli luise pilu kwa maikuto a babañwi. (Maro. 15:2) Bakreste babañata ba makwasha habatabeli kuzibahazwa ku mutu yaswanela wakunyalana ni yena, mi luswanela kukuteka maikuto abona. (2 Mates. 3:11) Babañwi bona bakona kuitebuha tuso yaluna, kono lusike lwaeza cwalo haiba habasika lukupa kuli lubatuse.—Liprov. 3:27. w24.05 24-25 ¶14-15

Ka linako zeñwi, lwakona kukopana ni miinelo yetaata ka sipundumukela, ili yekona kutatafaza bupilo bwaluna kamba mane kutahisa kuli lupalelwe kueza lika zene luezanga. Lwaitumela hahulu kuli lwakona kukupa tuso ku Jehova Mulimu halukopana ni miinelo yecwalo! Halutusiwa ki yena, luba ni buikolwiso bwa kuli “Jehova wapila!” (Samu 18:46) Nihakulicwalo, Davida hasaabulezi manzwi ao, naabizize Mulimu kuli “Licwe laka!” Ki kabakalañi Davida hanaabapanyize Jehova kwa licwe lelisa pili? Mwa Bibele kuitusisizwe linzwi la swanisezo la “licwe,” kuli luutwisise tulemeno twanani tona Jehova. Hañata, linzwi leo liitusisizwe mwa Bibele ka mulelo wa kulumbeka Mulimu ni kubonisa kuli hakuna yaswana ni yena. Pulelo yeli Jehova “ki yena Licwe” ifumaneha lwapili kwa Deuteronoma 32:4. Anna hanaalapezi ku Jehova, naabulezi kuli “hakuna licwe leliswana ni Mulimu waluna.” (1 Sam. 2:2) Habakuki naabizize Jehova kuli “Licwe laka.” (Hab. 1:12) Muñoli wa Samu 73 naabizize Mulimu kuli “licwe la pilu yaka.” (Samu 73:26) Mane nihaiba Jehova kasibili naaipizize kuli ki licwe.—Isa. 44:8. w24.06 26 ¶1, 3

Malena ba Isilaele bane batabisize Jehova ki bane bamusebelelize ka pilu yabona kaufela. Bibele italusa Josiasi kuli: “Nekusina mulena yanaaswana ni yena, yanaakutezi ku Jehova ka pilu yahae kaufela.” (2 Mal. 23:25) Kucwañi ka za Salumoni, yanaaezize lika zemaswe hasaasupezi. “Naasika sebeleza Jehova Mulimu wahae ka pilu yahae kaufela.” (1 Mal. 11:4) Mi Bibele ibulela ka za Abijami mulena yanaasa sepahali kuli: “Naasika sebeleza Jehova Mulimu wahae ka pilu yahae kaufela.” (1 Mal. 15:3) Bibele hañata iitusisanga linzwi la “pilu” kutalusa mutu wa mwahali, ili lika zecwale ka litakazo, minahano, butu, mikwa, buikoneli, milelo, ni likonkwani zanani zona mutu. Kacwalo, kusebeleza Jehova ka pilu kaufela kutalusañi? Mutu yasebeleza Mulimu ka pilu kaufela, haamusebelezi ka libaka feela la kuli waziba kuli uswanela kueza cwalo. Kono usebeleza Jehova ka libaka la kuli wamulata ni kumukuteka mwa bupilo bwahae kaufela. w24.07 21 ¶4-5

Jehova uitusisa pulelo yeñwi ya swanisezo kuli alutuse kuziba mwatakulelanga libi. Ubulela kuli: “Nikafelisa lifoso zahao sina yalikwahela ka lilu, ni libi zahao sina yalikwahela ka lilu lelinani mukita.” (Isa. 44:22) Jehova haswalela libi zaluna, kuswana feela inge kuli uitusisa lilu lelinani mukita kukwahela libi zaluna mi halisana kubonahala hape. Luitutañi kwa lipulelo za swanisezo zeo? Jehova haswalela libi zaluna, haluswaneli kuzwelapili kuikutwa mulatu mwa bupilo bwaluna kaufela inge kuli lusanani sitampa sa libi zeo. Ka mali a Jesu Kreste, libi zaluna liswalezwi ka kutala. Jehova haswalela sibi saluna, kuswana feela inge kuli nelusika eza sibi seo. Taba yeo ibonisa kuli Jehova uluswalelanga habuniti halubakela libi zaluna. Hape sishemo salubonisize Jehova silutusa kuba ni silikani sesitiile ni yena ni kuli lusike lwazwelapili kuikutwa mulatu. w25.02 10 ¶11-14

Baana-bahulu bababanga mwa tutengo banani buikalabelo fapilaa Jehova bwa kubukeleza bukeni mwa puteho. (1 Makor. 5:7) Hape babata kuli baezalibi batusiwe kuli babake haiba kwakonahala. Kacwalo, baana-bahulu bazwelangapili kuba ni mubonelo omunde, ili sepo ya kuli muezalibi ukacinca. Kabakalañi? Kakuli babata kulikanyisa Jehova, yena yanani “lilato lelituna ni makeke.” (Jak. 5:11) Mulemuhe mo muapositola Joani naaboniselize moya wo. Naañozi kuli: “Bana baka babanyinyani, nimiñolela litaba ze kuli musike mwaeza sibi. Kono nihakulicwalo, haiba mutu aeza sibi, lunani mutusi yali ku Ndate, yena Jesu Kreste, yalukile. (1 Joa. 2:1) Ka bumai, ka linako zeñwi Mukreste wakona kuhana kubaka. Haiba ki cwalo, uswanela kuzwisiwa mwa puteho. w24.08 25 ¶19-20

Mwakona kukenelwa ki muliko wa kubapanya zemueza ku zebaeza babañwi. Muhanyeze muliko wo! Kabakalañi? Kakuli Jehova hamibapanyangi ku babañwi. (Magal. 6:4) Ka mutala, Maria naafile Jesu mpo ya mafula a sende atula hahulu. (Joa. 12:​3-5) Ka kushutana ni Maria, mbelwa wa mubotana naabeile tusheleñi twa muwayawaya twa teko yenyinyani hahulu, mwa sibulukelo sa mwa tempele. (Luka 21:​1-4) Niteñi, Jesu naanga limpo zepeli zeo sina nzila ya kubonisa ka yona tumelo. Jehova, yena ndatahe, uitebuha hahulu nto ifi kamba ifi yemueza kabakala tumelo ni lilato lamina ku yena, kusina taba kuli nto yeo ikona kubonahala bunyinyani ku mina. Kaufelaa luna lwakakanyanga ka linako zeñwi. Nihakulicwalo, Bibele yakona kulutusa kufelisa kukakanya. Muikataze kufelisa maikuto amina a kuikutwa kuzwafa kono mube ni bundume. Jehova umiziba hande hahulu. Jehova waitebuha buitomboli kaufela bomueza mi uka mifa mupuzo sina mwasepiselize. Jehova walata batanga bahae kaufela babasepahala mi wabaisa pilu. w24.10 25 ¶3; 29 ¶17-18