Balutiwa ba Jesu nebaamuhezi Linzwi la Mulimu ni kuikataza kusebelisa zene baituta mwa bupilo bwabona. (Joa. 17:6) Nihakulicwalo, nebasika utwisisa libaka Jesu hanaabulailwe sina sikebenga. Jesu naaziba kuli balutiwa bahae nebanani tumelo mi nebalata Jehova, kono naalemuhile kuli nebatokwa kuutwisisa hande Mañolo. (Luka 9:​44, 45; Joa. 20:9) Kacwalo, naabatusize kuutwisisa taluso ya litaba zene babalile mwa Mañolo. Halunyakisiseñi mwanaaezelize cwalo hanaabonahezi kwa balutiwa bababeli bane baya kwa Emausi. Jesu naasika izibahaza kwa baana bao honafo feela. Kono naababuzize lipuzo. Kabakalañi? Mwendi naabata kuli bataluse zene banahana ni zeneli mwa lipilu zabona. Mi nebaezize cwalo. Neba mutaluselize kuli nebalibelela kuli Jesu naakalukulula Maisilaele kwa Maroma bane babahatelela. (Luka 24:​18-27) Jesu aitusisa Mañolo kubatusa kuutwisisa zeneezahezi. Hasamulaho, ili ka nako ya manzibwana fa lizazi leo, Jesu naakopani ni balutiwa babañwi ni kubataluseza zene butalusa bupolofita bo.—Luka 24:​33-48. w24.10 14 ¶9-10

Jesu naaitutile ku Ndatahe wa kwa lihalimu zanaaswanela kueza ni zanaaswanela kubulela. Kopano ya Jehova ilikanyisa mutala wa Jesu ka kuitusisa Linzwi la Mulimu kulutusa kuziba zelukile ni zesika luka ni kulufa ketelelo. (2 Tim. 3:​16, 17) Kamita luhupuliswanga kuli lubalange Linzwi la Mulimu ni kusebelisa zeluituta mwateñi. Lutusiwanga hahulu haluituta Bibele ka kuitusisa lihatiso zaluna zetomile fa Bibele. Ka mutala, lwakona kubapanya lituto za mwa Bibele kwa ketelelo yelufiwanga ki kopano. Halulemuha kuli ketelelo yelufiwa itomile fa Mañolo, lusepanga hahulu kopano ya Jehova. (Maro. 12:2) Jesu naakutazanga “taba yende ya Mubuso wa Mulimu.” (Luka 4:​43, 44) Hape naalaezi balutiwa bahae kuli bakutaze ka za Mubuso wa Mulimu. (Luka 9:​1, 2; 10:​8, 9) Kacenu, batu kaufela babaswalisana ni kopano ya Jehova bakutazanga za Mubuso wa Mulimu kusina taba ni kobapila. w24.04 9 ¶5-7

Muzwelepili kusepa ketelelo yelufiwa ki kopano ya Jehova. Mwa Isilaele wa kwaikale, Jehova naaitusisize Mushe mi hasamulaho naaitusisize Joshua kuli afe litaelo kwa batu bahae. (Josh. 1:17) Maisilaele nebafuyauzwi hane baangile baana bao sina bayemeli ba Jehova Mulimu. Hamulaho wa lilimo zeñata, puteho ya Sikreste hane itomilwe, baapositola ba 12 ki bona bane bafa ketelelo. (Lik. 8:​14, 15) Hasamulaho, sikwata seo nesihulile mi nekuekelizwe baana-bahulu babañwi ba mwa Jerusalema. Batu hane balatelezi ketelelo yene bafiwa ki baana babasepahala bao, “liputeho zazwelapili kutiiswa mwa tumelo mi palo ya balumeli yazwelapili kuekezeha ka zazi ni zazi.” (Lik. 16:​4, 5) Ni luna kacenu, lwafuyaulwanga halulatelela ketelelo yelufiwa ki kopano ya Jehova. w24.07 10 ¶10

Jehova naalata hahulu Mulena Davida. Mane naamubizize kuli “muuna yatabisa pilu yaka.” Kono Davida naaezize libi zetuna, zecwale ka bubuki ni bubulai. Ka kuya ka Mulao wa Mushe, Davida naaswanela kubulaiwa. (Liv. 20:10; Num. 35:31) Kono Jehova naabata kutusa Davida kuli abake. Naalumile mupolofita Natani kuli ayo potela mulena Davida, nihaike kuli ka nako yeo naasika bonisa kale kubaka. Natani naaitusisize swanisezo kuli atuse Davida kuutwisisa butuna bwa libi zanaaezize. Davida alemuha kuli naafoselize hahulu Jehova, mi abaka. (2 Sam. 12:​1-14) Naañozi samu yenebonisa kuli naabakile habuniti. (Samu 51, manzwi a fahalimu) Samu yeo iomba-ombile baezalibi babañata ni kubasusueza kubaka. Lwaitumela luli kuli Jehova naabonisize lilato ku Davida mi naamutusize kubaka! w24.08 10 ¶9

Batu babañata bakona kulumela kuli kuhulisa mwana ki musebezi omutuna. Haiba mu bashemi babahulisa mwana, lwamibabaza kakuli musebeza ka taata kuli mutuse mwanaa mina kuba ni tumelo yetiile. (Deut. 6:​6, 7) Mwanaa mina hanzaa hula, wakona kukala kubuza lipuzo za butokwa ka za litaba zelulumela zetomile fa Bibele, kukopanyeleza cwalo ni likuka za mwa Bibele za muzamao. Kwa makalelo, mwakona kubilaezwa ki lipuzo za mwanaa mina. Mane mwakona kuunga lipuzo zahae kuli ki sisupo sesibonisa kuli tumelo yahae isweli yafokola. Kono niti kikuli, banana habanze bahula batokwa kubuza lipuzo kuli batiise tumelo yabona. (1 Makor. 13:11) Kacwalo, hamuswaneli kuikalelwa. Mwakona kuunga lipuzo kaufela zamibuza mwanaa mina ka za litaba zelulumela sina kolo ya kumutusa kuba ni maata a kunahana. w24.12 14 ¶1-2

Bakreste ba Maheberu nebatokwa kuba ni tumelo yetiile kuli bapunyuhe ñalelwa yenetuha ibateñi mwa Judea. (Maheb. 10:​37, 38) Jesu naalemusize balateleli bahae kuli baswanela kusabela kwa malundu habaka bona muleneñi wa Jerusalema inze upotolohilwe ki limpi. Bakreste kaufela nebaswanela kusebelisa kelezo yeo, ibe kuli nebapila mwa muleneñi kamba mwa mahae. (Luka 21:​20-24) Mwa linako zeo, batu hane batasezwanga ki mpi nebamatelanga mwa muleneñi opotolohilwe ki mamota inge cwalo Jerusalema kuli basilelezwe. Kelezo ya kusabela kwa malundu neikona kubonahala inge kuli neisike yabatusa; kacwalo, nebatokwa kuba ni tumelo yetiile kuli baeze cwalo. Bakreste ba Maheberu hape nebatokwa kusepa batu banaaitusisa Jesu kwa kuetelela puteho. Kubonahala kuli bane baetelela nebafile litaelo zenongile kuli batuse batu kaufela mwa puteho kumamela taelo ya Jesu ka nako yeswanela ni kueza cwalo ka nzila yeswanela.—Maheb. 13:17. w24.09 10 ¶9-10

Hanaali fa lifasi, Jesu naaezize ka kutala musebezi wanaa mufile Ndatahe kuli aeze. (Joa. 17:4) Kono Jesu naasaikutwi kuli ki yena feela yakona kueza zanaabata Jehova kuli liezwe. Jesu naalutile babañwi musebezi. Jesu naafile balutiwa bahae misebezi ya kubabalela lingu za Jehova za butokwa ni kuetelela mwa musebezi wa kukutaza. Jesu naafile balutiwa bahae kelezo yenongile, kono naaezize cwalo ka lilato. Babañwi nebanani mukwa wa kukakanya; kacwalo, abafa kelezo. (Luka 24:​25-27; Joa. 20:27) Naabatusize kulemuha butokwa bwa kuisa hahulu pilu kwa musebezi wa bulisana kufita kuisa pilu kwa misebezi yabona ya kwa mubili. (Joa. 21:15) Naabahupulisize kuli nebasa swaneli kubilaezwa hahulu ki buikalabelo bone bafiwa babañwi. (Joa. 21:​20-22) Mi naahakuluzi mibonelo yefosahezi yene banani yona ka za Mubuso ni kubatusa kuisa hahulu pilu kwa kukutaza taba yende.—Lik. 1:​6-8. w24.10 15-16 ¶13-14

Haiba luutwa Jehova, lukapila kuya kuile. Ka kuswana ni Maisilaele bane batuha bakena mwa Naha ya Sepiso, ni luna lutuha lukena mwa lifasi lelinca lalusepisize Mulimu, mi lukaiponela lifasi halikaba paradaisi. (Isa. 35:1; Luka 23:43) Diabulosi ni madimona ahae habana kubateñi. (Sin. 20:​2, 3) Hakuna kuba ni bulapeli bwa buhata bobuka kelusa batu ku Jehova. (Sin. 17:16) Mi mibuso yehatelela batu haina kubateñi. (Sin. 19:​19, 20) Mwa paradaisi hakuna kuba ni bakwenuheli. (Samu 37:​10, 11) Batu kaufela babaka pila mwa paradaisi bakautwa milao ya Jehova; kacwalo, kukaba ni swalisano ni kozo. Mi batu bakalatana ni kusepana. (Isa. 11:9) Lunyolezwi hahulu nako yeo! Mi haiba luutwa Jehova, lukapila mwa lifasi lelili paradaisi isiñi feela ka lilimo zeñata kono mane ikaba kuya kuile.—Joa. 3:16. w24.11 9 ¶7

Bupolofita bobu mwa liñolo zazazi la kacenu busweli kutalelezwa hahulu mwa linako zaluna kufita kwamulaho. Lushango lwa Mubuso lufumaneha mwa lipuo zefitelela 1,000, mi kabakala webusaiti yaluna ya jw.org, batu babañata mwa lifasi kacenu bakona kuituta ka za taba yende ya Mubuso wa Mulimu. Kono Jesu hape naabulelezi balutiwa bahae kuli nebasike bakona “kupotela mileneñi kaufela,” kamba kukutaza kwa batu kaufela, pili asika taha kale. (Mat. 10:23; 25:​31-33) Manzwi anaabulezi Jesu akatalelezwa ni mwa linako zaluna. Batu babañata kacenu bapila mwa libaka molusa koni kukutaza ka kulukuluha. Kutuha fo, zazi ni zazi limbututu zeñata lisweli zaapepiwa. Lueza molukonela kaufela kukutaza taba yende “kwa macaba kaufela ni mishobo ni malimi.” (Sin. 14:6) Kono niti kikuli, haluna kukona kukutaza taba yende ku mañi ni mañi fa lifasi pili mafelelezo asika taha kale. w24.05 10 ¶6-7

Jesu naaomba-ombile ni kukatulusa babañwi ka manzwi ahae. Naasabulelangi ka buhali kwa balateleli bahae. (Luka 8:​47, 48) Wo ki mutala omunde hahulu kwa baana babali Bakreste! Jesu naalaezi baana kuli bazwelepili kusepahala kwa basali babona. Naakutezi manzwi anaabulezi Ndatahe a kuli muuna uswanela ‘kukumalela musalaa hae.’ (Mat 19:​4-6) Linzwi la Sigerike lelitalusa kezo lelitolokilwe kwa liñolo leo kuli ‘kukumalela,’ halitolokiwa linzwi ka linzwi, litalusa “kulamatela.” Kacwalo, muuna ni musalaa hae baswanela kulatana hahulu kuli mane kube feela inge kuli balamatelani. Haiba yomuñwi aeza nto yeutwisa yomuñwi butuku, kaufelaa bona bakanyanda. Muuna yaikataza kulata musalaa hae ka nzila yeo haana kubuha maswaniso a mapunu a mufuta ufi kamba ufi. Ukabiula meeto ahae kapili “ku zesina tuso.” (Samu 119:37) Ka mubulelo omuñwi, ueza tumelelano ni meeto ahae kuli asike atalima musali ufi kamba ufi ka kumulakaza kwandaa musalaa hae.—Jobo 31:1. w25.01 10 ¶12-13

Batu bakona kutalusa lika zeshutana-shutana hababulela kuli bamiswalezi. Jehova uluswalelanga ka nzila yeshutanela kwahule ni yebaswalelanga ka yona batu. Jehova uluswalelanga ka nzila yeipitezi. Muñoli yomuñwi wa lisamu naabulezi cwana ka za Jehova: “Kakuli wena uswalela libi habuniti, kuli usabiwe.” (Samu 130:4) Kaniti luli, Jehova ‘uswalelanga libi habuniti.’ Ulutomezi mutala omunde hahulu obonisa sekutalusa kuswalela. Mwa litimana zeñwi za Mañolo A Siheberu, bañoli ba Bibele batalusa nzila yaswalelanga ka yona Jehova ka kuitusisa linzwi lelisa itusiswangi hakutaluswa nzila yebaswalelanga ka yona batu. Jehova haswalela mutu, wazwisanga libi za mutu yo ka kutala. Mi mutu yo wakona kuba ni silikani sesitiile hape ni Jehova. Lwaitumela kuli Jehova uzwelangapili kuluswalela ka kutala. w25.02 8 ¶1-3

Nihaikaba kuli batu habateelezi halukutaza ku bona, hakutalusi kuli halusika kondisa mwa bukombwa. Kabakalañi? Kabakala kuli lufile bupaki, ili nto yabata Jehova ni Mwanaa hae kuli lueze. Nihaikaba kuli halufumani batu ba kukutaza ku bona kamba batu habalati kuteeleza kwa lushango lwaluna, lusakona kuba ni tabo kakuli lwaziba kuli lutabisa Ndataa luna wa kwa lihalimu. (Liprov. 27:11) Hape lwakona kuba ni tabo muhasanyi yomuñwi hafumana mutu wa pilu yende mwa bukombwa. Tawala ya Mulibeleli yeñwi neibapanyize musebezi waluna kwa musebezi wa kubata mwanana yalatehile. Batu babañata bakona kutusa mwa musebezi wa kubata mwanana yo mwa libaka zeshutana-shutana. Mwanana yo hafumanwa, haki mutu feela yamufumani yakaba ni tabo, kono batu kaufela bane batusize mwa musebezi wo bakaba ni tabo. Ka mukwa oswana, batu kaufela mwa puteho batusanga kuli mutu abe mulutiwa wa Jesu. Kalulo ya simu ya puteho ikona kukwahelwa ki batu babañata, mi kaufelaa bona batabanga mutu wa pilu yende hakala kufumaneha kwa mikopano. w24.04 18 ¶13-14

Lunyolezwi hahulu kuto bona lika zekaezahala kwapilinyana! Ka tuso ya Jehova, lusepa kuli batu babañata bakaamuhela niti pili ñalelwa yetuna isika kalisa kale. Hape lutabile hahulu kuziba kuli ka nako ya ñalelwa yetuna, mwendi batu babañata bakazwa mwa lifasi la Satani lelika yundiswa, ni kuswalisana ni luna kulumbeka Jehova. Kono ka nako ya cwale, kunani musebezi oluswanela kueza. Lunani tohonolo ya kuabana mwa musebezi osike wakutelwa hape, ona musebezi wa kukutaza taba yende ya Mubuso wa Mulimu mwa lifasi kaufela. Kono ka nako yeswana, luswanela kuzwelapili kushaela lushango lwa temuso. Batu baswanela kuziba kuli mafelelezo a lifasi lelimaswe le, asutelezi hahulu. Bakeñisa kuli lwalata taba yende, lwalata batu, mi sa butokwa nikufita kikuli lwalata Jehova Mulimu ni libizo lahae, lukazwelapili kukutaza ka tukufalelo yetuna ni kuunga musebezi wo kuba wa butokwa hahulu kufitela Jehova abulela kuli kihona!” w24.05 19 ¶14-16

Fa busihu bone butatamiwa ki lizazi lanaabulailwe, Jesu naalutile Pitrosi ni baapositola babañwi tuto ya butokwa ka za buikokobezo. Balutiwa bahae balukela kuba bane bakomokile hahulu kubona Jesu inzaa eza musebezi wo one ueziwanga ki batanga. Jesu atubula liapalo zahae za fahalimu, aitama taulo mwa teka, abeya mezi mwa mukeke mi akala kutapisa mahutu abona. (Joa. 13:​4, 5) Musebezi wa kutapisa mahutu a baapositola bahae ba 12 ulukela kuba one uungile nako yetelele, mi naatapisize ni mahutu a Judasi yanaaka mubeteka. Kono Jesu naapetile musebezi wo ka buikokobezo. Mi Jesu kihona atalusa ka kuwa pilu kuli: “Kana mwautwisisa seniezize ku mina? Munibiza kuli, ‘Muluti,’ ni ‘Mulena,’ mi mubulela niti, kakuli ki cwalo luli. Cwale haiba na, Mulena ni Muluti, nimitapisize kwa mahutu, ni mina muswanela kutapisana kwa mahutu.”—Joa. 13:​12-14. w25.03 10 ¶9-11

Lifasi litahisanga kuli kulubele taata kuzwelapili kuba ni silikani sesitiile ni Jehova. Batu babañata habalumeli kuli Mulimu uteñi. Hañata, kubonahalanga inge kuli batu babasa mameli litaelo za Mulimu bakondisa. Haiba lubona taba yeo inze iezahala, tumelo yaluna yakona kulikiwa. Nihaike kuli lwalumela kuli Mulimu uteñi, lwakona kukala kukakanya ka za haiba uka lutusa. Muñoli wa Samu 73 naaipumani mwa muinelo ocwalo. Naalemuhile kuli batu banaapila ni bona nebasa mameli milao ya Mulimu kono nebaikola bupilo. Kabakaleo, naakalile kukakanya ka za haiba kusebeleza Mulimu neli kwa butokwa. (Samu 73:​11-13) Ki lika mañi zenetusize muñoli wa lisamu yo kucinca mubonelo wahae? Naanahanisisize zekaezahala kwa batu babalibala Jehova. (Samu 73:​18, 19, 27) Hape naanahanisisize bunde bobuzwanga mwa kusebeleza Mulimu. Ni luna lwakona kunahanisisa za limbuyoti zalufile Jehova. w24.06 25 ¶16-17

Mwa linako zene iñolwa Bibele, batu babañwi nebasa ezangi hande mizwale babona bane bali babotana, ka kubata kekelezo hane babakolotisanga masheleñi. Hape baatuli babañwi nebaamuhelanga likweta, ili nto yenetahisanga kuli baatule batu babasina mulatu ka kusaluka. Jehova utoile hahulu likezo zecwalo. (Ezek. 22:12) Lukaeza hande haiba luitekula kuli lubone moluungela masheleñi. Muipuze kuli: ‘Kana hañata ninahananga hahulu ka za masheleñi ni zenikona kuleka? Hanikolotanga masheleñi, kana naliyehanga kuakutisa ka kunahana kuli mwendi mutu yanikolotisize haatokwi masheleñi ao kapili? Kana hanibanga ni masheleñi niikutwanga kuba wa butokwa hahulu mi kunibelanga taata kuba ni bufani? Kana niinganga mizwale ni likaizeli baka kuli balata hahulu sifumu ka libaka feela la kuli banani masheleñi? Kana nibatanga feela kuitama bulikani ni batu babafumile kufita babotana?’ Lwakona kusileleza silikani saluna ni Jehova ka kusaba ni lilato la masheleñi. Haiba lueza cwalo, Jehova haana kulusiya nikamuta! w24.06 12-13 ¶17-18

Kuli lusike lwa kena mwa muliko luswanela kuba ni takazo yetuna ya kubata kueza zelukile. Haiba luituta ‘kutoya bumaswe, ni kulata bunde,’ lukaba ni takazo yetuna ya kubata kueza zelukile. (Amo. 5:15) Kuba ni takazo yetuna ya kubata kueza zelukile hape kuka lutusa kuhanyeza miliko. Lukona kueza cwalo ka kupateha kueza lika zekona kulutusa kulata hahulu Jehova. Kufumaneha kwa mikopano ya Sikreste kamba mwa bukombwa kwakona kulutusa kuba ni takazo yetuna ya kubata kutabisa Jehova. (Mat. 28:​19, 20; Maheb. 10:​24, 25) Kubala, kuituta, ni kunahanisisa Linzwi la Mulimu, kulutusanga kulata hahulu lika zende ni kutoya hahulu lika zemaswe. (Josh. 1:8; Samu 1:​2, 3; 119:97) Muhupule kuli Jesu naabulelezi balutiwa bahae kuli: “Muzwelepili kulapela, kuli musike mwakena mwa muliko.” (Mat. 26:41) Kacwalo, lumufa kolo ya kulutusa mi lukaba ni takazo yetuna ya kubata kumutabisa.—Jak. 4:8. w24.07 17-18 ¶14-16

Babalutanga babañwi musebezi bakaeza hande haiba balikanyisa mwafelanga butali Jehova. Muhupule kuli Jehova ubonisanga bufani ka kufa babañwi butali. Kacwalo, ni luna luswanela kuikabela litaba kaufela zeluziba ni batu boluluta musebezi. Haluswaneli kupata litaba zeñwi ka kusaba kuli mutu yeluluta musebezi ukafiwa buikalabelo bwaluna. Mi haluswaneli kuba ni mubonelo wa kuli: ‘Na hakuna yanaa nilutile musebezi! Uswanela kuituta isali yena.’ Batu ba Jehova habaswaneli kuba ni mubonelo ocwalo. Kono lutabela kuikabela litaba kaufela zeluziba ni batu boluluta, “mane cwalo ni [kubafa] bupilo bwaluna.” (1 Mates. 2:8) Lunani sepo ya kuli ni bona ‘bakakona hande kuliluta babañwi.’ (2 Tim. 2:​1, 2) Haiba kaufelaa luna lubonisa bufani ka kuikabela ni babañwi litaba zeluziba, luna ni batu bao lukaba hahulu ni butali ni tabo. w24.09 29 ¶12-13

Haiba muikutwa kuli hamuna buikoneli bobuipitezi, musike mwazwafa. Kusina kukakanya, munani tulemeno totukona kutusa hahulu puteho. Kubala ni kunahanisisa manzwi a Paulusi a kwa 1 Makorinte 12:​12-30 kwakona kumitusa. Manzwi a Paulusi ao, abonisa hande kuli ka kuswana ni batanga ba Jehova babañwi, ni mina muba butokwa mi kunani zemukona kueza kuli mutuse puteho. Mueze zemukona kaufela kuli musebeleze Jehova ni kutusa mizwale ni likaizeli bamina. Mukolwe kuli baana-bahulu bakalemuha buikoneli bwamina mi baka mifa misebezi yemukona kueza. (Maro. 12:​4-8) Bakreste kaufela baswanela kuba ni silikani sesitiile ni Jehova, kutabela kusebeleza babañwi, ni kupila ka nzila yetabisa Mulimu. w24.11 17 ¶12-13

Anna naakopani ni miinelo yetaata yemiñata yenetahisize kuli aikutwe hahulu bumaswe ni kulotisa miyoko. Omuñwi wa miinelo yetaata yeo kikuli, muunaa hae naanyezi musali yomuñwi wa libizo la Penina, ili yanaa musheununanga. Kwandaa butata bo, Anna hape naasina bana, kono Penina yena naanani bana babañata. (1 Sam. 1:​1, 2) Penina naazwezipili kusheununa Anna kabakala kuli neli mumba. Anna naafilikani hahulu kuli mane “naalilanga, asaci lico,” mi “naaswabile hahulu” mwa pilu. (1 Sam. 1:​6, 7, 10) Ki lika mañi zanaaezize Anna zenee mutusize kuikutwa kuomba-ombiwa? Naaile kwa tabernakele, sona sibaka kwanaalapelelwa Jehova ka nzila yelukile. Hanaali kwa sibaka seo, naakupile Jehova kuli: ‘Ubone manyando a mutangaa hao mi unihupule.’ (1 Sam. 1:11) Jehova naaezize cwalo luli; naautwisisize mwanaaikutwela, naautwile tapelo yahae, mi hasamulaho naamutusize kuba ni bana.—1 Sam. 1:​19, 20; 2:21. w24.12 21 ¶5-7

Tiululo iluluta kuli Jesu uiyakatwa hahulu batu, sihulu balutiwa bahae. (Joa. 13:1) Ka mutala, Jesu naaziba kuli mwa bukombwa bwahae bwa fa lifasi, naakakopana ni miinelo yemiñwi yetaata hahulu, sihulu kushwa lifu leli butuku. Niteñi, Jesu naapetile buikalabelo bwahae fa lifasi, isiñi ka libaka feela la kuli Jehova naabata kuli aeze cwalo, kono neli ka libaka la kuli naalata batu. Jesu naabonisize kuli naalata hahulu batu ka kukutaza ku bona, kubaluta, ni kubatusa. Mane nihaiba fa lizazi lanaabulailwe, Jesu naabile ni nako ya kutapisa mahutu a baapositola bahae, kubaluta, kubasusueza ni kubaomba-omba. (Joa. 13:​12-15) Mi hanaali fa kota ya linyando, naabile ni nako ya kutusa sikebenga sene situha sishwa kuba ni sepo, mi naalukisize kuli mahe akone kubabalelwa. (Luka 23:​42, 43; Joa. 19:​26, 27) Kacwalo, Jesu naabonisize lilato lahae lelituna mwa bupilo bwahae kaufela, isiñi feela ka lifu lahae. w25.01 23 ¶11

Bibele iitusisa pulelo ya swanisezo kuli ilutuse kuutwisisa kuli Jehova haluswalela habuniti luikutwanga kulukuluha. Bakeñisa kuli halusika petahala, luswana sina “batanga ba sibi.” Kono bakeñisa kuli Jehova uluswalezi, luswana sina batanga ‘babalukuluzwi kwa sibi.’ (Maro. 6:​17, 18; Sin. 1:5) Kaniti luli, kuziba kuli Jehova uluswalezi, kutahisa kuli lube ni tabo sina feela mutanga mwaikutwelanga halukuluzwi. Kabakala sitabelo sa tiululo sanaalukisize Jehova ka kulufa Mwanaa hae, kuswana feela inge kuli lufolisizwe. (1 Pit. 2:24) Tiululo ikonahalisa kuli lube ni silikani sesinde ni Jehova hape, ili sene sisinyizwe kabakala kukula kwa moya. Sina feela mutu yafolisizwe kwa butuku bobutuna habanga ni tabo yetuna, ni luna lubanga ni tabo halufoliswa kwa moya ni kuba ni silikani sesinde ni Jehova hape, kabakala kuli uluswalezi. w25.02 11 ¶16; 13 ¶17

Mwa nguli ya litalenta, Jesu naabulezi za batanga bababeli bane basepahalile ku mulenaa bona ni alimuñwi yanaasika sepahala. (Mat. 25:​14-30) Batanga bababeli babasepahala bayemela Bakreste babatozizwe babasepahala. Jesu, yena mulenaa bona, ubata kuli batabe ni yena. Bakazusiwa mwa zuho yapili ni kufiwa mupuzo wabona wa kuya kwa lihalimu. (Mat. 25:​21, 23; Sin. 20:5b) Kwa neku leliñwi, mutala omaswe wa mutanga yabuzwa ufa temuso kwa Bakreste babatozizwe. Ka mukwa ufi? Baswanela kubonisa kuli babeleka ka taata ni ka tukufalelo. Sina feela mone kuinezi mwa nguli ya basizana, Jesu naasapolofiti kuli Bakreste babatozizwe bakaba ni buzwa, hanaabulezi nguli ya litalenta. Kono naatalusa zekaezahala ku bona haiba bapalelwa kuzwelapili kuba ni tukufalelo. Haiba kuba cwalo, bakapalelwa ‘kutiisa kubiziwa ni kuketiwa kwabona,’ mi habana kulumelezwa kukena mwa Mubuso wa kwa lihalimu. w24.09 22 ¶10; 23 ¶12-13

Kaufelaa luna lubata kufumana zelutokwa ni zebatokwa ba mwa lubasi lwaluna. (Muek. 7:12; 1 Tim. 5:8) Ki niti kuli haluketa mubeleko, lukatokwa kuziba masheleñi eluka fumananga. Nihakulicwalo, haiba nto yeo ki yona feela yeluunga kuba ya butokwa, uzibe luzamaya ka kubona. Haiba luzamaya ka tumelo, lukanahanisisa mo musebezi wo ukaamela silikani saluna ni Jehova. Lukaipuza kuli: ‘Kana musebezi wo ukatahisa kuli nieze lika zatoile Jehova?’ (Liprov. 6:​16-19) ‘Kana ukatahisa kuli nisike nasebeleza hande Jehova ni kuli nibe kwahule ni lubasi lwaka ka nako yetelele?’ (Mafil. 1:10) Haiba kalabo kwa lipuzo zeo ki eni, neikaba hande kusakena musebezi wo, nihaikaba kuli kutaata kufumana musebezi. Bakeñisa kuli luzamaya ka tumelo, luezanga likatulo zebonisa kuli lunani buikolwiso bwa kuli Jehova uka lutusa kufumana zelutokwa ka nzila yeñwi.—Mat. 6:33; Maheb. 13:5. w25.03 21 ¶5-6

Luswanela kuzwelapili kuunga mizwale ni likaizeli baluna sina mwabaangela Jehova. Lukona kueza cwalo ka kuisa pilu kwa tulemeno twabona totunde isiñi kwa bufokoli bwabona, ili bobuka feliswa nako yeñwi. Lwakona kutatulula butata bobukona kuba mwahalaa luna ka lilato Haiba lueza cwalo, lukatusa batu bababata kuboniswa lilato lelicwalo kutaha mwa paradaisi ya kwa moya. Haike luzwelepili kuitebuha paradaisi yeo yalulukiselize Jehova. Mutu kaufela yabata kukatuluswa, kuba ni tabo, kusaikalelwa, ni kusilelezwa, uswanela kutaha mwa paradaisi ya kwa moya ni kuzwelapili kuba mwateñi! Kono mutokomele, kakuli Satani ueza mwakonela kaufela kulupuma kuli luzwe mwateñi. (1 Pit. 5:8; Sin. 12:9) Haluswaneli kumulumeleza kueza cwalo. Haike lueza ka taata kuli lusileleze bunde, bukeni, ni kozo, ze mwa paradaisi yaluna ya kwa moya. w24.04 24-25 ¶18-19

Bashemi, mwakona kutusa bana bamina kuba ni takazo ya kusebeleza Jehova ka kutukufalelwa. Mulute bana bamina ka lipulelo ni ka likezo zamina kuli lika za kwa moya zecwale ka kubala Bibele, kufumaneha kwa mikopano, ni kuyanga mwa bukombwa, ki za butokwa hahulu kufita nto ifi kamba ifi. Haiba musaezi cwalo, bana bamina bakona kunahana kuli habatokwi kuba Lipaki za Jehova ibile feela mina bashemi mu Lipaki. Kabakaleo, bakona kuikutwa kuli kusebeleza Jehova haki kwa butokwa hahulu, kamba mane bakona kutuhela kumusebeleza. Haiba mutu atuhela kusebeleza Jehova, kana fo kutalusa kuli haasakona kuba mulikanaa hae nikamuta? Batili, kakuli wakona kubaka ni kuswalisana hape ni bulapeli bwa niti. Kuli aeze cwalo, ukatokwa kuikokobeza ni kuamuhela tuso yafiwa ki baana-bahulu. (Jak. 5:14) Kuba mulikanaa Jehova hape, ki kwa butokwa hahulu kufita buikatazo kaufela bwakona kueza! w24.07 24-25 ¶18-19

Ki lika mañi zemuswanela kueza kuli libato lamina lizwelepili kukutekehisa Jehova? Nako hainze iya, mukafita fa kutabelana hahulu luli. Ki lika mañi zekona kumitusa kusaikenya mwa muzamao wa buhule? Mutokolomohe lipulelo za buhule, kuba hamoho munosi, ni kunwa hahulu bucwala. (Maef. 5:3) Lika zeo likona kutahisa kuli mube ni takazo yetuna ya kubata kueza somano, ili nto yekona kutahisa kuli kumibele hahulu taata kueza zelukile. Neikaba hande hane mukanyakisisanga kamita lika zemukona kueza kuli libato lamina lizwelepili kukutekehisa Jehova. (Liprov. 22:3) Nako hainze iya, mwendi mukalemuha linzila zeñwi zeswanela za kubonisana ka zona lilato. Kono haiba muba ni takazo yetuna ya kubata kueza somano, kuka mibela hahulu taata kueza katulo yende. (Pina 1:2; 2:6) Hape kubonisana lilato ka linzila zeñwi, kukona kutahisa kuli mupalelwe kuba ni buiswalo, ili nto yekona kutahisa kuli muikenye mwa muzamao wa buhule. (Liprov. 6:27) Kabakaleo, isali kwa makalelo a libato lamina, munyakisise likuka zeñwi za mwa Bibele zekona kumitusa kuziba lika zemuswanela kueza ni zemusa swaneli kueza.—1 Mates. 4:​3-7. w24.05 29 ¶10-11

Lubata kuli mizwale ni likaizeli baluna bazibe kuli luka batusa, sihulu mwa linako zetaata. (Liprov. 17:17) Ki lika mañi zekona kulutusa kuzibahala ka kuba batu babaitingwa? Luswanela kuikataza kubonisanga tulemeno twanani tona Mulimu, inge cwalo kutaleleza lisepiso zaluna ni kuikataza kubuluka nako. Baana-bahulu babaitingwa batusa hahulu puteho. Ka mukwa ufi? Bahasanyi baikutwanga kulukuluha haiba baziba kuli bakona kuambola ni baana-bahulu nako kaufela habatokwa tuso, sihulu muokameli wa sikwata sa sebelezo ya mwa simu mobainzi. Bahasanyi hape baikutwanga kuiswa hahulu pilu haiba baziba kuli baana-bahulu batabela kubatusa. Mi baana-bahulu habafa kelezo yetomile fa Bibele ni fa lihatiso za mutanga yasepahala kufita kuitinga fa mubonelo wabona, bakasepiwa ki mizwale ni likaizeli. Mizwale ni likaizeli hape basepanga baana-bahulu babakona kubuluka likunutu ni babatalelezanga lisepiso zabona. w24.06 30 ¶14-15

Kacenu, halulibeleli kuli Jehova ukafelisa miinelo yetaata kaufela yelukopana ni yona, kono lwaziba kuli kamita uitukiselize kulutiisa. (Samu 41:3) Ka tuso ya moya wahae okenile, Jehova ulufanga maata, butali, ni kozo ya mwa munahano kuli luitiise. (Liprov. 18:14; Mafil. 4:13) Hape ulutusanga kuitiisa ka kulufa sepo yetomile fa Bibele ya kuli kwapili ukafelisa matuku kaufela. (Isa. 33:24) Haluikutwa kulembwala, manzwi a Jehova a mwa Bibele akona kuluomba-omba ni kulutusa kuba ni kozo ya mwa munahano. (Maro. 15:4) Kaizeli yomuñwi wa kwa wiko wa Africa hanaafumanwi ni butuku bwa kansa, hañata naalilanga. Utalusa kuli: “Liñolo leli niomba-ombanga hahulu ki la Isaya 26:3. . . . Liñolo leo linitusanga kulemuha kuli Jehova wakona kulutusa kuba ni kozo ya mwa munahano ilikuli lukone kuitiisa halukopana ni miliko.” Kana kunani liñolo leli miomba-ombanga hamukopana ni miinelo yetaata hahulu kuli mane kubonahala inge kuli hakuna sepo? w24.12 24 ¶17-18

Baana-bahulu baikatazanga kubonisa moya wa kuswalela kwa batu babatuhezi kusebeleza Jehova. Babata kuli batu bao bakutele ku Jehova. (Luka 15:​22-24, 32) Kubanga ni tabo kwa lihalimu muezalibi akutela ku Jehova, mi mizwale ni likaizeli ni bona babanga ni tabo! (Luka 15:7) Kwaiponahalela hande kuli Jehova haatuhelelangi baezalibi babasika baka kuzwelapili kuba mwa puteho. Nihakulicwalo, usaikatazanga kubatusa kuli babake. Ubata kuli bakutele ku yena. Hosea 14:4 ibonisa hande mwaikutwela Jehova ka za baezalibi bababakile, ili: “Nika bafolisa mi bakatuhela kusasepahala. Nika balata ka kuitatela, kakuli nizwisize buhali bwaka.” Taba yeo iswanela kususueza baana-bahulu kulemuha lisupo zebonisa kuli mutu ubakile. Mi hape iswanela kususueza batu babatuhezi kusebeleza Jehova kukutela ku yena kapili. w24.08 28 ¶8-9

Kono niti kikuli, ka linako zeñwi batu babañwi habana kubonisa buitumelo bwabona ku luna. Ka linako zeñwi lwakona kuitusisa nako yaluna, maata aluna, kamba lika zeñwi zelunani kuli lutuse babañwi, kono hasamulaho, kukona kubonahala inge kuli batu bao habaitebuhi zelu baezelize. Haiba kuba cwalo, lukona kueza cwañi kuli lusike lwafelelwa ki tabo yaluna kamba kuli lusike lwanyema? Muhupule kuli tabo yaluna yetahiswa ki bufani haisika itinga fa lika zebaeza batu belubonisa bufani. (Lik. 20:35) Lwakona kubonisa bufani nihaikaba kuli batu babañwi hababonisi buitebuho. Ka mukwa ufi? Muise hahulu pilu kwa kulikanyisa Jehova. Ufanga lika zende kwa batu kaufela ibe kuli babonisa buitebuho kamba kutokwa. (Mat. 5:​43-48) Jehova usepisa kuli ni luna haiba lufa ‘lusalibeleli kukutelwa ki sesiñwi, mupuzo waluna ukaba omutuna.’ (Luka 6:35) Pulelo yeli, “sesiñwi” ikona kukopanyeleza manzwi a buitumelo. Ibe kuli batu baitebuha kamba kutokwa, Jehova uka lukutiseza kabakala lika zende zelueza kuli lutuse babañwi, ni kabakala ‘kufana inze lutabile.’—Liprov. 19:17; 2 Makor. 9:7. w24.09 29 ¶14-16