Lisamu 119:1-176
-
Kuitebuha linzwi la Mulimu la butokwa
-
‘Babanca bakona kukenisa cwañi nzila yabona?’ (9)
-
“Nitabela likupuliso zahao” (24)
-
“Nilata hahulu mulao wahao!” (97)
-
“Ninani kutwisiso yetuna kufita baluti baka kaufela” (99)
-
“Linzwi lahao ki lambi yemonyehela mahutu aka” (105)
-
“Linzwi lahao kaufelaa lona ki niti” (160)
-
Babalata mulao wa Mulimu ba mwa kozo (165)
-
א [Aleph]
119 Tabo ki ya babasina sesinyazahala* mwa bupilo bwabona,Babazamaya ka mulao wa Jehova.+
2 Tabo ki ya babamamela likupuliso zahae,+Baba mubata ka lipilu zabona kaufela.+
3 Habaezi nto yesika luka;Bazamaya mwa linzila zahae.+
4 Ulaezi kuliLitaelo zahao lilatelelwe ka tokomelo.+
5 Haki monilatela kuzwelapili kueza sesilukile*+Kuli nimamele litaelo zahao!
6 Mi fo, nenisike naswaba+Haniisa pilu kwa milao yahao kaufela.
7 Nika kulumbeka ka pilu yenani nitiHaninze niituta likatulo zahao zelukile.
8 Nikamamela litaelo zahao.
Usike waniyubeka nikamuta.
ב [Beth]
9 Mutangana ukona kukenisa cwañi nzila yahae?
Ka kuipuluka kulikana ni linzwi lahao.+
10 Nakubata ka pilu yaka kaufela.
Usike wanituhelela kukeluha mwa milao yahao.+
11 Nibulukile linzwi lahao mwa pilu yaka+Kuli nisike nakufoseza.+
12 Ulumbekwe, wena Jehova;Unilute litaelo zahao.
13 Ka mulomo waka nizibahazaLikatulo kaufela zeubulezi.
14 Nitabiswa ki likupuliso zahao+Kufita lika zeñwi kaufela za butokwa.+
15 Nikanahanisisa* litaelo zahao+Ni kuisa pilu kwa linzila zahao.+
16 Nitabela milao yahao.
Hanina kulibala linzwi lahao.+
ג [Gimel]
17 Ueze mutangaa hao hande,Ilikuli nipile mi nimamele linzwi lahao.+
18 Apula meeto aka kuli nibone handeZekomokisa ze mwa mulao wahao.
19 Ni muzwahule mwa naha.+
Usike wanipatela milao yahao.
20 Niciwa ki kushukelwaLikatulo zahao ka nako kaufela.
21 Ukalimela babaikuhumusa,Bona babakutilwe babakeluha mwa milao yahao.+
22 Uzwise lishubu ni kashwau ku na,Kakuli nimamezi likupuliso zahao.
23 Manduna niha bainisana hamoho kunibulela maswe,Mutangaa hao yena unahanisisa* litaelo zahao.
24 Nitabela likupuliso zahao;+Ki zona baelezi baka.+
ד [Daleth]
25 Nipatami mwa liluli.+
Ubukeleze bupilo bwaka ka kuya ka linzwi lahao.+
26 Nikubulelezi linzila zaka, mi seu nialaba;Unilute litaelo zahao.+
27 Unituse kuutwisisa taluso* ya litaelo zahao,Ilikuli ninahanisise* misebezi yahao yekomokisa.+
28 Nipalelwa kubona buloko kabakala maswabi.
Unitiise ka kuya ka linzwi lahao.
29 Uzwise nzila ya bupumi ku na,+Mi unishemube ka mulao wahao.
30 Niketile nzila ya busepahali.+
Nilemuhile kuli likatulo zahao lilukile.
31 Nikumalezi likupuliso zahao.+
Usike wanituhelela kuswaba, wena Jehova.+
32 Nikatukufalelwa kundongwama* nzila ya milao yahaoKakuli uilukiseza sibaka mwa pilu yaka.*
ה [He]
33 Jehova, unilute+ nzila ya litaelo zahao,Mi nika ilatelela kuisa kwa mafelelezo.+
34 Unife kutwisiso,Kuli nimamele mulao wahaoNi kuubuluka ka pilu yaka kaufela.
35 Unietelele* mwa nzila ya milao yahao,+Kakuli naitabela.
36 Uise pilu yaka kwa likupuliso zahao,Isiñi kwa kuipatela feela za ka butu.+
37 Ubiule meeto aka ku zesina tuso;+Ubukeleze bupilo bwaka mwa nzila yahao.
38 Utaleleze sepiso* yahao ku mutangaa hao,Ilikuli usabiwe.*
39 Unizwise lishubu lenisaba,Kakuli likatulo zahao ki zende.+
40 Hakubone monishukelezwi litaelo zahao.
Ubukeleze bupilo bwaka ka kuluka kwahao.
ו [Waw]
41 Unibonise lilato lahao, wena Jehova,+Unipilise ka kuya ka sepiso* yahao;+
42 Mi fo, nikaalaba yaninyefula,Kakuli nisepile linzwi lahao.
43 Usike wazwisa linzwi la niti mwa mulomo waka,Kakuli nisepile* katulo yahao.
44 Nikamamela mulao wahao ka nako kaufela,Kamita ni kuya kuile.+
45 Mi nikaizamaela mwa sibaka mokusina kozi,*+Kakuli nibata-bata litaelo zahao.
46 Nikabulela likupuliso zahao fapilaa malena,Mi hanina kuswaba.+
47 Nitabela milao yahao,Ki cwalo, nailata.+
48 Nikalapela ku wena inze ninanulezi mazoho aka mwahalimu, kabakala milao yahao yenilata,+Mi nikanahanisisa* litaelo zahao.+
ז [Zayin]
49 Uhupule linzwi* leubulelezi mutangaa hao,Lona leu nifa sepo ka lona.*
50 Seo ki sona sesi niomba-omba mwa manyando aka,+Kakuli linzwi lahao libukelelize bupilo bwaka.
51 Babaikuhumusa banisheununa hahulu,Kono hanikeluhi mwa mulao wahao.+
52 Nihupula likatulo zahao za kwakale,+ wena Jehova,Mi niomba-ombiwa ki zona.+
53 Ninyemile hahulu kabakala babamaswe,Babahana kumamela mulao wahao.+
54 Litaelo zahao ki lipina ku naKai ni kai koniinzi.*
55 Ka nako ya busihu nihupula libizo lahao, wena Jehova,+Kuli nimamele mulao wahao.
56 Wo ki ona mukwa wakaKakuli nimamezi litaelo zahao.
ח [Heth]
57 Jehova ki yena kabelo yaka;+Nisepisize kumamela manzwi ahao.+
58 Nakukupa ka pilu yaka kaufela;+Unishemube+ ka kuya ka sepiso* yahao.
59 Nitatubile linzila zaka,Kuli nilatelele likupuliso zahao hape.+
60 Naakufa mi haniliyehiKumamela milao yahao.+
61 Mihala ya babamaswe inipotolohile,Kono hanilibali mulao wahao.+
62 Nizuhanga fahalaa busihu ni kuitumela ku wena+Kabakala likatulo zahao zelukile.
63 Ni mulikanaa baba kusaba kaufelaNi babamamela litaelo zahao.+
64 Lifasi kamukana litezi lilato lahao lelisa feli, wena Jehova;+Unilute litaelo zahao.
ט [Teth]
65 Uezize mutangaa hao hande,Wena Jehova, ka kuya ka linzwi lahao.
66 Unilute ngana ni zibo,+Kakuli nisepile milao yahao.
67 Nisika nyandiswa kale, nenikeluhanga,*Kono cwale nimamela linzwi lahao.+
68 U yomunde+ mi misebezi yahao ki yeminde.
Unilute litaelo zahao.+
69 Babaikuhumusa banitameleza litaba za buhata,Kono nimamela litaelo zahao ka pilu yaka kaufela.
70 Lipilu zabona limbumbutezi,*+Kono nitabela mulao wahao.+
71 Kubile hande haninyandisizwe,+Kuli niitute litaelo zahao.
72 Mulao oubulezi ki omunde ku na,+Ki omunde kufita lishekele za gauda ni za silivera zeeza likiti-kiti.+
י [Yod]
73 Mazoho ahao ki ona aaniezize ni kunibupa.
Unife kutwisiso,Kuli niitute milao yahao.+
74 Baba kusaba banibona mi bataba,Kakuli linzwi lahao ki yona sepo yaka.*+
75 Naziba kuli likatulo zahao lilukile, wena Jehova+Ni kuli unikalimezi kabakala busepahali bwahao.+
76 Haike lilato lahao lelisa feli+ liniomba-ombe,Ka kuya ka sepiso* yene ufile mutangaa hao.
77 Unishwele makeke, kuli nizwelepili kupila,+Kakuli nitabela mulao wahao.+
78 Babaikuhumusa baswabe,Kakuli banifoseza kusina libaka.*
Kono na nikanahanisisa* litaelo zahao.+
79 Baba kusaba bakutele ku na,Bona babaziba likupuliso zahao.
80 Pilu yaka imamele litaelo zahao kusina sesinyazahala,+Kuli nisike naswabiswa.+
כ [Kaph]
81 Ninyolezwi kupiliswa ki wena,+Kakuli linzwi lahao ki yona sepo yaka.*
82 Meeto aka anyolezwi kubona sepiso yahao+Ninze nili: “Uka niomba-omba lili?”+
83 Kakuli niswana sina mukotana wa litalo oomisizwe ki musi,Kono hanilibali litaelo zahao.+
84 Mutangaa hao alibelele ka mazazi amakai?
Ukaatula lili baba ninyandisa?+
85 Babaikuhumusa baniyepela misima,Bona babahana kumamela mulao wahao.
86 Milao yahao kaufela yasepahala.
Batu baninyandisa kusina libaka; haku nituse!+
87 Nekusiyezi feela hanyinyani kuli baniyundise mwa lifasi,Kono nenisika tuhela kumamela litaelo zahao.
88 Ubukeleze bupilo bwaka kabakala lilato lahao lelisa feli,Kuli nimamele likupuliso zeubulezi.
ל [Lamed]
89 Wena Jehova, linzwi lahaoLikaina kuya kuile mwa mahalimu.+
90 Busepahali bwahao ki bwa mwa masika kaufela.+
Utiisize lifasi kuli lizwelepili kubateñi.+
91 Zeo* libile teñi kufitela cwale, kabakala likatulo zahao,Kakuli kaufelaa zona ki batanga bahao.
92 Kambe nenisa tabeli mulao wahao,Kambe nenibulailwe ki manyando aka.+
93 Hanina kulibala litaelo zahao nikamuta,Kakuli ubukelelize bupilo bwaka ka zona.+
94 Ni mutu wahao; unipilise,+Kakuli nibata-batile litaelo zahao.+
95 Babamaswe balibelezi kunibulaya,Kono niisize hahulu pilu kwa likupuliso zahao.
96 Niboni kuli linto kaufela zepetahalile linani maciñekelo,Kono mulao wahao ona hauna maciñekelo.*
מ [Mem]
97 Nilata hahulu mulao wahao!+
Niunahanisisa* lizazi kaufela.+
98 Mulao wahao unitalifisa kufita lila zaka,+Kakuli uinzi ni na kuya kuile.
99 Ninani kutwisiso yetuna kufita baluti baka kaufela,+Kakuli ninahanisisa* likupuliso zahao.
100 Nieza lika ka kutwisiso yetuna kufita babahulu,Kakuli nimamela litaelo zahao.
101 Nihana kuzamaya mwa nzila kaufela yemaswe,+Kuli nimamele linzwi lahao.
102 Hanisika keluha mwa likatulo zahao,Kakuli unilutile.
103 Manzwi ahao amunati hahulu mwahanu yaka,Amunati hahulu mwa mulomo waka kufita linosi!+
104 Ka litaelo zahao, nieza lika ka kutwisiso.+
Ki lona libaka hanitoile nzila kaufela ya buhata.+
נ [Nun]
105 Linzwi lahao ki lambi yemonyehela mahutu aka,Ni liseli la mwa nzila yaka.+
106 Niezize buitamo, mi nika bupeta,
Kuli nimamele likatulo zahao zelukile.
107 Ninyandile hahulu.+
Wena Jehova, ubukeleze bupilo bwaka ka kuya ka linzwi lahao.+
108 Uamuhele linubu zaka za kuitatela za milumbeko,*+ wena Jehova,Mi unilute likatulo zahao.+
109 Bupilo bwaka bu mwa lubeta nako kaufela,*Kono hanisika libala mulao wahao.+
110 Babamaswe baniteezi katwa,Kono hanisika keluha mwa litaelo zahao.+
111 Likupuliso zahao ki liluwo laka la kamita,*Kakuli litabisa pilu yaka.+
112 Niikatulezi* kumamela litaelo zahao
Ka nako kaufela, kuisa kwa mafelelezo.
ס [Samekh]
113 Nitoile ba lipilu zealuhani,+Kono nilata mulao wahao.+
114 Ki wena makundamo aka ni tebe yaka,+Kakuli linzwi lahao ki yona sepo yaka.*+
115 Musike mwanisutelela, mina batu babanani lunya,+Kuli nimamele milao ya Mulimu waka.
116 Unituse sina mone usepiselize,*+Kuli nizwelepili kupila;Usike watuhelela sepo yaka kuli ifetuhe maswabi.+
117 Unituse kuli nipiliswe;+Mi nikaisa hahulu pilu kwa litaelo zahao kamita.+
118 Uhana batu kaufela babakeluha mwa litaelo zahao,+Kakuli ki mahata ni bapumi.
119 Babamaswe kaufela ba lifasi ubayumba sina matakala.*+
Ki lona libaka hanilata likupuliso zahao.
120 Sabo yaka ku wena ingangamisa mubili* waka;Nisaba likatulo zahao.
ע [Ayin]
121 Niezize ka mulao ni ka kuluka.
Usike wanifa mwa mazoho a baba nihatelela!
122 Ukolwise mutangaa hao kuli uka mubabalela;Babaikuhumusa basike banihatelela.
123 Meeto aka akatezi kulibelela kupiliswa ki wena+Ni sepiso* yahao yelukile.+
124 Ubonise mutangaa hao lilato lahao lelisa feli,+Mi unilute litaelo zahao.+
125 Ni mutangaa hao; unife kutwisiso,+Kuli nizibe likupuliso zahao.
126 Nako ya kuli Jehova aange muhato ifitile,+Kakuli balobile mulao wahao.
127 Ki lona libaka hanilata hahulu milao yahaoKufita gauda, mane gauda yekenile.*+
128 Kabakaleo, niinga taelo kaufela yezwa ku wena kuli ilukile;+Nitoile nzila kaufela ya buhata.+
פ [Pe]
129 Likupuliso zahao ki zende hahulu.
Ki lona libaka hani limamela.
130 Kupatululwa kwa manzwi ahao kutahisa liseli,+Kufa babasina zibo kutwisiso.+
131 Niatamisa mulomo waka ni kulula moya,*Kakuli ninyolezwi milao yahao.+
132 Usikuluhele ku na mi unishemube,+Kulikana ni katulo yahao ku babalata libizo lahao.+
133 Uzamaise hande mihato yaka ka linzwi lahao;Sesimaswe sisike sanibusa.+
134 Unilamulele* kwa bahateleli,Mi nikamamela litaelo zahao.
135 Ubenyiseze mutangaa hao pata yahao,+Mi unilute litaelo zahao.
136 Nisuluha miyoko mwa meetoKakuli batu habamameli mulao wahao.+
צ [Tsade]
137 U yalukile, wena Jehova,+Mi likatulo zahao lilukile.+
138 Likupuliso zeufa lilukileMi lisepahala hahulu.
139 Niciwa ki kutukufalelwa kwaka,+Kakuli lila zaka lilibezi manzwi ahao.
140 Linzwi lahao likenile hahulu,+Mi mutangaa hao wa lilata.+
141 Hani sesiñwi mi nanyazisezwa;+Kono hanisika libala litaelo zahao.
142 Kuluka kwahao ki kwa kuya kuile,+Mi mulao wahao ki yona niti.+
143 Niha nikopana ni manyando ni butata,Nizwelapili kutabela milao yahao.
144 Kuluka kwa likupuliso zahao ki kwa kuya kuile.
Unife kutwisiso,+ kuli nizwelepili kupila.
ק [Qoph]
145 Nihuweleza ka pilu yaka kaufela. Haku nialabe, wena Jehova.
Nikamamela litaelo zahao.
146 Nihuweleza ku wena; haku nipilise!
Nikamamela likupuliso zahao.
147 Nizuhile kusika patalala kale ni kuikupela tuso ku wena,+Kakuli manzwi ahao ki yona sepo yaka.*
148 Nizuhile fahalaa busihu,Kuli ninahanisise* linzwi lahao.+
149 Uteeleze kwa linzwi laka kabakala lilato lahao lelisa feli.+
Ubukeleze bupilo bwaka ka kuya ka katulo yahao yelukile, wena Jehova.
150 Ba muzamao oswabisa banisutelela;Ba kwahule ni mulao wahao.
151 U fakaufi wena Jehova,+Mi milao yahao kaufela ki yona niti.+
152 Neniitutile likupuliso zahao kale koo,Kuli neu lilukiselize kuina kuya kuile.+
ר [Resh]
153 Ubone manyando aka mi unilamulele,+Kakuli hanisika libala mulao wahao.
154 Uniyemele* mi unilamulele;+
Ubukeleze bupilo bwaka ka kuya ka sepiso* yahao.
155 Puluso i kwahule ni babamaswe,
Kakuli habasika bata litaelo zahao.+
156 Makeke ahao ki amatuna, wena Jehova.+
Ubukeleze bupilo bwaka ka kuya ka katulo yahao yelukile.
157 Baba ninyandisa ni lila zaka ki babañata;+Kono hanisika keluha mwa likupuliso zahao.
158 Nanyenya hanitalima babasa sepahali,Kakuli habamameli linzwi lahao.+
159 Hakubone monilatela litaelo zahao!
Ubukeleze bupilo bwaka kabakala lilato lahao lelisa feli, wena Jehova.+
160 Linzwi lahao kaufelaa lona ki niti,+Mi likatulo zahao zelukile ki za kuya kuile.
ש [Sin] kamba [Shin]
161 Manduna baninyandisa+ kusina libaka,Kono pilu yaka isaba manzwi ahao.+
162 Nitabiswa ki linzwi lahao+Inge mutu yafumani tutu ya butokwa.
163 Nitoile buhata—nabunyenya+—Nilata mulao wahao.+
164 Nikulumbeka ha 7 zazi ni zaziKabakala likatulo zahao zelukile.
165 Babalata mulao wahao ba mwa kozo yetuna;+Hakuna sesikona kubasitatalisa.*
166 Wena Jehova, nilibelezi likezo zahao za kupilisa,Mi nimamela milao yahao.
167 Nimamela likupuliso zahao,Mi nililata hahulu-hulu.+
168 Nimamela litaelo zahao ni likupuliso zahao,Kakuli waziba zenieza kaufela.+
ת [Taw]
169 Haike muhuwo waka wa kukupa tuso ufite ku wena Jehova.+
Unituse kuutwisisa, ka kuya ka linzwi lahao.+
170 Kupo yaka ya kushemubiwa ifite ku wena.
Unipilise, sina mousepiselize.*
171 Mulomo waka utale milumbeko,+Kakuli uniluta litaelo zahao.
172 Lulimi lwaka luopele za linzwi lahao,+Kakuli milao yahao kaufela ilukile.
173 Lizoho lahao liitukiseze kunitusa,+Kakuli niketile kumamela litaelo zahao.+
174 Ninyolezwi kupiliswa ki wena, Jehova,Mi nitabela mulao wahao.+
175 Unituhelele kupila kuli nikulumbeke;+Haike likatulo zahao linituse.
176 Niyembana inge ngu yelatehile.+ Ubata-bate mutangaa hao,Kakuli hanisika libala milao yahao.+
Litaluso ze kwatasi
^ Kamba “babasepahala.”
^ Linzwi ka linzwi, “Haki monilatela kuli linzila zaka litiye.”
^ Kamba “Nikaituta.”
^ Kamba “uituta.”
^ Linzwi ka linzwi, “nzila.”
^ Kamba “niitute.”
^ Linzwi ka linzwi, “Nikamata mwa.”
^ Kamba mwendi, “utusa pilu yaka kuba ni buikolwiso.”
^ Kamba “Unizamaise.”
^ Kamba “linzwi.”
^ Kamba mwendi, “Yefiwa baba kusaba.”
^ Kamba “linzwi.”
^ Kamba “nilibelela.”
^ Kamba “sibaka sesituna.”
^ Kamba “nikaituta.”
^ Kamba “sepiso.”
^ Kamba “Lona lene unilibelelisize.”
^ Kamba “Mwa ndu monipila sina muzwahule.”
^ Kamba “linzwi.”
^ Kamba “neniezanga sibi ka kusaziba.”
^ Linzwi ka linzwi, “haliutwi sesiñwi, inge mafula.”
^ Kamba “nilibelela linzwi lahao.”
^ Kamba “linzwi.”
^ Kamba mwendi, “ka buhata.”
^ Kamba “nikaituta.”
^ Kamba “nilibelela linzwi lahao.”
^ Fo kikuli, lika zabupile kaufela.
^ Linzwi ka linzwi, “uama lika zeñata.”
^ Kamba “Niituta ona.”
^ Kamba “niituta.”
^ Linzwi ka linzwi, “linubu za kuitatela za mwa mulomo waka.”
^ Linzwi ka linzwi, “Moyo waka u mwa lizoho laka nako kaufela.”
^ Kamba “saanda saka sa kuya kuile.”
^ Linzwi ka linzwi, “Niisize pilu yaka.”
^ Kamba “nilibelela linzwi lahao.”
^ Kamba “ka kuya ka linzwi lahao.”
^ Linzwi la Siheberu leliitusisizwe fa, litalusa masila aazwanga kwa silivera kamba gauda haishengununwa.
^ Linzwi ka linzwi, “nama.”
^ Kamba “linzwi.”
^ Kamba “yekenisizwe.”
^ Linzwi ka linzwi, “kubuyana.”
^ Linzwi ka linzwi, “Uniliulule.”
^ Kamba “nilibelezi manzwi ahao.”
^ Kamba “niitute.”
^ Kamba “Unizekele.”
^ Kamba “linzwi.”
^ Kamba “Ku bona hakuna nto yesitatalisa.”
^ Kamba “ka kuya ka linzwi lahao.”
