Sinulo Yefilwe ku Joani 20:1-15
20 Mi nabona lingeloi lelituluka kuzwa kwa lihalimu inze lisweli sinotolo sa mukoti+ ni liwenge lelituna mwa lizoho lalona.
2 Laswala drakoni,+ noha yakale,+ yena Diabulosi+ ni Satani,+ mi lamutama ka lilimo ze 1,000.
3 Mi lamunepela mwa mukoti+ mi laukwala ni kuutiisa ka liswayo, kuli asike akelusa macaba hape kufitela lilimo ze 1,000 lifela. Hamulaho wa zeo ulukela kulukululwa ka nakonyana.+
4 Mi nabona mabona, mi bane bainzi ku ona nebafilwe maata a kuatula. Ki cwalo, neniboni mioyo* ya bane babulailwe* kabakala bupaki bwa Jesu bone bafile ni kabakala kubulela za Mulimu, ni bane basika lapela sibatana kamba siswaniso sasona mi nebasika amuhela liswayo fa pata yabona ni fa lizoho labona.+ Mi nebazuhile ni kubusa sina malena hamoho ni Kreste+ ka lilimo ze 1,000.
5 (Bafu+ kaufela babasiyezi nebasika zuha kufitela lilimo ze 1,000 lifela.) Yeo ki yona zuho yapili.+
6 Banani tabo mi ki babakenile batu kaufela babaka ba mwa zuho yapili;+ lifu labubeli+ halina maata fahalimwaa bona,+ kono bakaba baprisita+ ba Mulimu ni ba Kreste, mi bakabusa sina malena hamoho ni yena ka lilimo ze 1,000.+
7 Cwale lilimo ze 1,000 lisafela feela, Satani ukalukululwa mwa tolongo yahae,
8 mi ukazwa kuyo kelusa macaba a mwa maneku amane a lifasi, Gogo ni Magogo, kubakubukanyeza kwa ndwa. Palo ya bao ilikana ni mushabati wa liwate.
9 Mi baya mwa lifasi kaufela mi baambeka mafulo a babakenile ni muleneñi olatwa. Kono mulilo wazwa kwa lihalimu mi wato baciseleza.+
10 Mi Diabulosi yanaa bakelusa anepelwa mwa lisa la mulilo ni sulufula, mone kuinzi kale sibatana+ ni mupolofita wa buhata;+ mi bakatukufazwa* musihali ni busihu kamita ni kuya kuile.
11 Mi nabona lubona lolutuna lolusweu ni Yainzi mwateñi.+ Lifasi ni lihalimu zasaba fapilaa hae,+ mi nelisika fumanelwa sibaka sazona.
12 Mi nabona babashwile, babatuna ni babanyinyani, inze bayemi fapilaa lubona, mi miputo neiapuzwi. Kono kwaapulwa muputo omuñwi; ki muputo wa bupilo.+ Babashwile nebaatuzwi kulikana ni zeñozwi mwa miputo ka kuya ka likezo zabona.+
13 Mi liwate lakutisa bafu baba ku lona, ni lifu ni Libita* zakutisa bafu baba ku zona, mi baatulwa yomuñwi ni yomuñwi ka kuya ka likezo zahae.+
14 Mi lifu ni Libita* zanepelwa mwa lisa la mulilo.+ Lisa leo litalusa lifu labubeli,+ lona lisa la mulilo.+
15 Hape mutu kaufela yanaasika fumanwa añozwi mwa buka ya bupilo+ anepelwa mwa lisa la mulilo.+
Litaluso ze kwatasi
^ Mubone Litaluso za Manzwi ni litaluso ze kwatasi kwa Sin 6:9.
^ Linzwi ka linzwi, “bane babulailwe ka capu.”
^ Kamba “bakaswalwa; bakakenywa mwa tolongo.”
^ Kamba “Hadesi,” fo kikuli, sibaka sa swanisezo sa babashwile. Mubone Litaluso za Manzwi.
^ Kamba “Hadesi,” fo kikuli, sibaka sa swanisezo sa babashwile. Mubone Litaluso za Manzwi.
