Sinulo Yefilwe ku Joani 10:1-11
10 Mi nabona lingeloi leliñwi lelimaata inze lishetumuka kuzwa kwa lihalimu, leliapezi lilu, mi fa toho yalona nekunani nambwamutalati, mi pata yalona neiswana sina lizazi,+ mi mahutu alona naaswana ni misumo ya mulilo,
2 mi mwa lizoho lalona nelisweli muputonyana one uputuluzwi. Mi lahata fa liwate ka lihutu lalona la bulyo, kono lahata fa lifasi ka lihutu lalona la nzohoto,
3 mi lahuwa ka linzwi lelituna sina tau haibuluma.+ Mi hase lihuwile, mishika+ ye 7 yabulela.
4 Cwale mishika ye 7 hase ibulezi, nabata kuñola, kono nautwa linzwi lelizwa kwa lihalimu,+ lelili: “Utiise ka liswayo litaba zebulezwi ki mishika ye 7, mi usike waliñola.”
5 Lingeloi lene niboni inze liyemi fa liwate ni fa lifasi layemiseza lizoho lalona la bulyo kwa lihalimu,
6 mi lakonka ka Yapila kamita ni kuya kuile,+ yanaabupile lihalimu ni ze ku lona ni lifasi ni ze ku lona ni liwate ni ze ku lona,+ lali: “Nako ya kulibelela ifelile.
7 Kono mwa mazazi elituha liliza tolombita+ yalona lingeloi labu 7,+ kunutu yekenile+ yeo Mulimu naashaezi sina taba yende kwa batanga bahae bona bapolofita,+ ikafitiswa kwa mafelelezo ayona.”
8 Mi nautwa linzwi lelizwa kwa lihalimu+ halibulela ni na hape, lali: “Hakuye, uyo nga muputo oputuluzwi o mwa lizoho la lingeloi leliyemi fa liwate ni fa lifasi.”+
9 Naya ku lingeloi mi nalitaluseza kuli linife muputonyana wo. Lali ku na: “Haku uunge mi uuce,+ mi ukababisa mwa mba yahao, kono mwa mulomo wahao ukautwahala munati sina linosi.”
10 Naanga muputonyana wo mwa lizoho la lingeloi ni kuuca,+ mi mwa mulomo waka neuutwahala munati sina linosi,+ kono hase niucile, mwa mba yaka kwababa.
11 Mi bali ku na: “Ulukela kupolofita hape ka za batu ni macaba ni malimi* ni malena babañata.”
Litaluso ze kwatasi
^ Kamba “lipuo.”
