Liproverbia 12:1-28
12 Yalata kalimelo ulata zibo,+Kono yatoile nyazo haanahani hande.*+
2 Jehova utabela mutu yomunde,Kono unyaza mutu wa milelo yemaswe.+
3 Hakuna mutu yakatiiswa ki bumaswe,+Kono babalukile habana kukumulwa.
4 Musali wa miswalo ki kuwani ya bulena ku muunaa hae,+Kono musali yaeza lika zeswabisa uswana sina butuku bobubolisa masapo a muunaa hae.+
5 Mihupulo ya babalukile ki yelukile,Kono ketelelo ya babamaswe yapuma.
6 Manzwi a babamaswe abandamena mutu kuli amubulaye,*+Kono mulomo wa babalukile wabapilisa.+
7 Babamaswe habatulwa, bakaba siyo,Kono ndu ya babalukile ikazwelapili kuyema.+
8 Mutu ulumbiwa kabakala butali bobuzwa mwa mulomo wahae,+Kono yanani pilu yekopami ukashwaulwa.+
9 Ki hande mutu hakutekiwa hanyinyani inge anani mutangaKufita kuinuneka inge asina sico.*+
10 Yalukile ubabalela limunanu zahae,+Kono sishemo sa babamaswe isali lunya.
11 Yalima simu yahae ukakula lico,+Kono yandongwama lika zesina tuso haana ngana.*
12 Yamaswe ulakaza zefumanwi ki batu babañwi babamaswe,Kono mubisi wa babalukile ukabeya muselo.
13 Yamaswe uswasiwa ki lipulelo zahae za sibi,+Kono yalukile ubanduka kwa ziyezi.
14 Mutu ukula zende kabakala zezwa mwa lipulelo* zahae,+Mi musebezi wa mazoho ahae uka mufumanisa mupuzo.
15 Nzila ya sikuba ilukile mwa meeto asona,+Kono yabutali uamuhela kelezo.+
16 Sikuba sibonahalisa bunyemi bwasona honafo feela,*+Kono mutu yabutali haisi pilu kwa* matapa.
17 Yapaka ka kusepahala ukabulela niti,*Kono paki ya buhata ubulela buhata.
18 Lipulelo zebulelwa ka kusanahanisisa liswana sina lilumo lelitaba,Kono lilimi la bababutali lafolisa.+
19 Milomo yebulela niti ikaina kuya kuile,+Kono lilimi lelibulela buhata likaina nakonyana feela.+
20 Bupumi bu mwa lipilu za babalela za mifilifili,Kono babazwisezapili* kozo banani tabo.+
21 Hakuna kozi yekawela yalukile,+Kono babamaswe bakaatelwa ki liziyezi.+
22 Milomo yebulela buhata ki yenyenyisa ku Jehova,+Kono babasepahala bamutabisa.
23 Mutu yabutali upata zaziba,Kono pilu ya sikuba ipatulula bukuba bwasona.+
24 Mazoho a bababeleka ka taata akabusa,+Kono mazoho anani buzwa akahapelezwa kusebeza.+
25 Lipilaelo ze mwa pilu ya mutu zaiimeza,*+Kono manzwi amande aiwabelisa.+
26 Mutu yalukile ubatisisa mafulisezo ahae,Kono nzila ya babamaswe yabakelusa.
27 Bababuzwa habamatisi sebazuma,+Kono kubeleka ka taata ki sifumu sa butokwa ku mutu.
28 Nzila ya kuluka ilibisa kwa bupilo;+Mwa nzila yeo hakuna lifu.
Litaluso ze kwatasi
^ Kamba “haana ngana.”
^ Linzwi ka linzwi, “abandamena kusulula mali.”
^ Linzwi ka linzwi, “sinkwa.”
^ Linzwi ka linzwi, “haana pilu.”
^ Linzwi ka linzwi, “mulomo.”
^ Kamba “ka lizazi leliswana.”
^ Linzwi ka linzwi, “ukwahela.”
^ Linzwi ka linzwi, “zelukile.”
^ Linzwi ka linzwi, “babaeleza za.”
^ Kamba “zamuzwafisa.”
