Jobo 2:1-13
2 Hasamulaho, lizazi lafita la kuli bana ba Mulimu* wa niti+ bakene kuyo yema fapilaa Jehova,+ mi Satani ni yena akena ali mwahalaa bona kuyo yema fapilaa Jehova.+
2 Jehova kihaa buza Satani, ali: “Uzwa kai?” Satani aalaba Jehova, ali: “Nizwa kwa kuzamaya-zamaya mwa lifasi ni kupota-pota mwateñi.”+
3 Mi Jehova ali ku Satani: “Kana ulemuhile* mutangaaka Jobo? Hakuna mutu yaswana ni yena mwa lifasi. Ki muuna yanani niti ni yasepahala,*+ yasaba Mulimu ni kuikambusa kwa bumaswe. Usatiiselize mwa busepahali+ bwahae, niha unisusueza kumueza maswe,+ kuli nimutimeze* kusina libaka.”
4 Kono Satani aalaba Jehova, ali: “Litalo ka litalo. Mutu ukafa zaluwile kaufela kuli abukeleze bupilo bwahae.
5 Kono cwale hakuotolole lizoho lahao, uswale fa lisapo lahae ni nama yahae, mi kaniti uka kunyefula ali fapilaa hao.”+
6 Jehova kihaa li ku Satani: “Bona! U mwa lizoho lahao!* Feela usike wamubulaya!”
7 Satani azwa fapilaa* Jehova mi ayo nata Jobo ka litombo zebutuku+ zenani bulalu, kukalela kwa mahutu ahae kuisa kwa toho yahae.
8 Mi Jobo aanga liñetana la piza yetubehile, kuli aiñwaise lona, mi aina mwa mufuse.+
9 Kwa mafelelezo, musalaa hae ali ku yena: “Kana usatiiseza mwa busepahali bwahao? Nyefula Mulimu kuli ushwe!”
10 Kono Jobo ali ku yena: “Ubulela sina yomuñwi wa basali babasina ngana. Kana lukaamuhela feela zende ku Mulimu wa niti, lusaamuheli zemaswe?”+ Mwa litaba zeo kaufela, Jobo naasika fosa ka mulomo wahae.+
11 Balikani ba Jobo babalaalu bautwa liziyezi kaufela zetahezi Jobo mi yomuñwi ni yomuñwi wabona ataha kuzwa habo yena—ili Elifazi+ wa Mutemani, Bilidadi+ wa Mushuha,+ ni Zofari+ wa Munaama. Kiha balumelelana kukopana hamoho kuli bayo tiisa Jobo ni kumuomba-omba.
12 Haba mubona basali kwahule, bapalelwa kumuziba. Bakala kulila ka kutiisa mi bapazula liapalo zabona, bahasakela liluli mwahalimu ni kwa litoho zabona.+
13 Kiha baina ni yena fafasi ka mazazi a 7 ni masihu a 7. Hakuna yanaabulezi sesiñwi ku yena, kakuli nebabona kuli naautwa butuku bobutuna hahulu.+
