Ua ora o Iosepha e o Maria i Nazareta e ta raua mau tamarii, oia hoi o Iesu e te tahi atu mau tamaroa e tamahine. No te tauturu i te utuafare, ua ohipa o Iosepha ei tamuta e ua haapii oia i to ˈna utuafare no nia ia Iehova e ta ˈNa mau ture. E pinepine te utuafare i te haere i te sunago no te haamori i te Atua e i Ierusalema no te oroa Pasa i te matahiti taitahi.

I te 12raa o to Iesu matahiti, ua tere te utuafare i te oire atea roa o Ierusalema, mai ta ratou i matau. Mea rahi te taata i te oire. Ua haere atu ratou i ǒ no te faatupu i te oroa Pasa. I muri iho, ua haamata o Iosepha raua Maria i te hoˈi i to raua fare ma te manaˈo e ua apee Iesu i te pǔpǔ tereraa. Tera râ, ua haamata raua i te imi ia ˈna i rotopu i ta raua mau fetii. Aita râ o Iesu i apee ia ratou!

Ua hoˈi faahou raua i Ierusalema. Ua imi raua ia ˈna e toru mahana i te maoro. I te pae hopea, ua haere raua i te hiero. Ua ite raua ia Iesu, e parahi ra i ropu i te mau orometua no te faaroo maite ia ratou e no te ui atu i te mau uiraa maitai mau. Ua maere roa te mau orometua ia Iesu e  ua haamata ratou i te ui atu i ta ratou mau uiraa. E ua maere roa ratou i ta ˈna mau pahonoraa. Ua ite maitai ratou e ua taa ia ˈna i te ture a Iehova.

Ua peapea roa o Iosepha raua Maria. Ua parau Maria: ‘Ta ˈu tamaiti e, ua paimi noa maua ia oe! Ua haere oe ihea?’ Ua pahono atura Iesu: ‘Aita anei orua i ite aˈe e tei te fare o to ˈu Metua vau?’

Ua hoˈi Iesu e to ˈna na metua i Nazareta. Ua haapii Iosepha ia Iesu i te ohipa tamuta. No oe, eaha te huru taata o Iesu i to ˈna apîraa? A rahi mai ai o Iesu, ua riro atu â oia ei taata î i te paari. E ua au atu â te Atua e te taata ia ˈna.