Eaha to roto?

Mau faaho'iraa ê

Tapura tumu parau

Ite no Iehova

Tahiti

Ta ’u e haapii no roto mai i te Bibilia

 HAAPIIRAA 27

Ua orure hau ratou ia Iehova

Ua orure hau ratou ia Iehova

I muri iti a‘e, tei te medebara ïa to Iseraela, ua orure hau mai Kora, Datana, Abirama e te tahi atu na taata e 250 ia Mose e ia Aarona. Ua parau ratou ia raua: ‘Ua fiu roa matou ia orua! No te aha o oe to matou aratai e o Aarona te tahu‘a rahi? Tei ia tatou pauroa o Iehova, eiaha ia oe noa e ia Aarona.’ Aita Iehova i au i te reira. No ’na, e au ra e te orure hau ra tera mau taata ia ’na!

Ua parau Mose ia Kora e i te feia i turu ia ’na: ‘A haere mai i te sekene ananahi e a afai mai i ta outou farii auahi faaîhia e te mea no‘ano‘a. E faaite mai Iehova o vai ta ’na i maiti.’

I te mahana i muri iho, ua haere Kora e na taata e 250 e farerei ia Mose i te sekene. I tera vahi, ua tutui ratou i te mea no‘ano‘a mai te huru ra e e tahu‘a ratou. Parau atura Iehova ia Mose raua Aarona: ‘Ia faataa ê orua ia Kora, oia atoa i ta ’na mau taata.’

Noa ’tu ua haere Kora ia Mose ra i te sekene, ua patoi Datana, Abirama e to raua utuafare i te haere atu. Ua parau Iehova i to Iseraela ia haere ê i te mau tiahapa o Kora, Datana e Abirama. Oioi te mau Iseraela i te na reira. Ua vai Datana, Abirama e to raua  utuafare i rapaeau i to ratou mau tiahapa. I muri iho, ua amaha taue te fenua e ua topa ratou i roto i tera apoo a pohe atu ai! I te sekene, ua topa mai te hoê auahi mai te ra‘i mai i nia ia Kora e i nia i na taata e 250 e ua pohe ratou.

Ua parau ihora Iehova ia Mose: ‘A rave i te hoê raau no ô mai i te taata aratai o te opu taitahi e a papai i to ’na i‘oa i nia i tera raau. I nia râ i te raau a te ati Levi, a papai i te i‘oa o Aarona. A tuu i taua mau raau ra i roto i te sekene. E uaa mai te tiare i nia i te raau a te taata ta ’u e maiti.’

Te mahana i muri iho, ua afai Mose i te mau raau atoa no te faaite atu i te feia aratai. I nia i ta Aarona raau, ua itehia te tiare tei tupu mai e te sedaki para. Maoti teie ravea, ua haapapu Iehova e ua maiti oia ia Aarona ei tahu‘a rahi.

“A faaroo i te mau aratai i rotopu ia outou e a auraro atu.”—Hebera 13:17