Eaha to roto?

Mau faaho'iraa ê

Tapura tumu parau

Ite no Iehova

Tahiti

Ta ’u e haapii no roto mai i te Bibilia

 HAAPIIRAA 23

Te hoê euhe ia Iehova

Te hoê euhe ia Iehova

Piti ava‘e i muri a‘e i to ratou faarueraa ia Aiphiti, ua tapae te mau Iseraela i te mou‘a Sinai e ua faatia ratou i te puhapa i ô. Ua pii atura Iehova ia Mose, o tei haere i nia i te mou‘a, e ua na ô atura oia: ‘Ua faaora vau i te mau Iseraela. Ia faaroo ratou ia ’u e ia pee ratou i ta ’u mau faaueraa, e riro ratou ei nunaa taa ê no ’u.’ Ho‘i atura Mose i to Iseraela ra no te faaite atu eaha ta Iehova i parau. Eaha ta ratou i pahono atu? Ua parau ratou: ‘E rave matou i te mau mea atoa ta Iehova e faaue mai.’

Ua haere faahou Mose i nia i te mou‘a. I reira Iehova i parau ai: ‘E toru mahana i muri iho, e paraparau vau ia oe. A faaara i te nunaa ia ore ratou e tamata i te haere i nia i te mou‘a Sinai.’ Pou atura Mose mai te mou‘a mai e parau atura oia i to Iseraela ia vai ineine no te faaroo i te reo o Iehova.

Toru mahana i muri iho, ua ite te mau Iseraela i te anaparaa uira e i te hoê ata poiri i nia i te mou‘a. Ua faaroo atoa ratou i te haruru puai o te patiri e i te ta‘i o te hoê pu. I muri iho, pou maira Iehova i nia i te mou‘a na roto i te auahi. Ua riaria roa te mau Iseraela e ua rûrû ratou. Ua aueue te mou‘a e ua tapo‘i roa te au auahi i te mou‘a. Puai noa ’tura te ta‘i o te pu. Parau atura te Atua: ‘O vau o Iehova. Eiaha roa ’tu outou e haamori i te tahi atu mau atua.’

Ua haere faahou Mose i nia i te mou‘a. Horoa ’tura Iehova i ta ’na mau ture ia nehenehe te nunaa e ite e nafea ia haamori ia ’Na e ia haa. Papai atura Mose i te mau ture e taio atura i te reira i te mau Iseraela. Euhe atura ratou: ‘E rave matou i te mau mea atoa ta Iehova e faaue mai.’ Parau mau, ua euhe ratou i te Atua. E tapea anei râ ratou i te reira?

“Ia here oe ia Iehova to Atua ma to aau atoa e ma to ora atoa e ma to mana‘o atoa.”—Mataio 22:37