Eaha to roto?

Tapura tumu parau

 HAAPIIRAA 76

Ua tamâ o Iesu i te hiero

Ua tamâ o Iesu i te hiero

I te omuaraa o te avaˈe Eperera i te matahiti 30, ua haere Iesu i Ierusalema. Mea rahi te taata tei haere i ǒ no te oroa Pasa. I tera oroa, i te hiero, ua pûpû ratou i te mau animara ei tusia. Ua afai te tahi mau taata i ta ratou mau animara e ua hoo mai te tahi atu i te mau animara i Ierusalema.

I to Iesu haereraa i te hiero, ua ite atura oia i te mau taata tei hoo atu i te mau animara. Ua hoohoo ratou i te mau taoˈa i roto i te fare haamoriraa o Iehova! Eaha to Iesu huru a ite ai i te reira? Ua faaohipa Iesu i te hoê taura rii no te tiahi i te mau mamoe e i te tahi atu mau animara i rapaeau i te hiero. Ua huri oia i te mau airaa maa a te feia taui moni e  ua hue oia i ta ratou moni i raro. Ua parau atura Iesu i te feia hoo uupa: ‘A afai i ta outou mau taoˈa i rapae i teie vahi! Eiaha outou e faariro i te fare o to ˈu Metua ei fare hoohooraa!’

Ua maere mau te mau taata i te hiero i ta Iesu i rave. Ua haamanaˈo atura ta ˈna mau pǐpǐ i te parau tohu no nia i te Mesia: ‘E rahi toˈu here no to Iehova fare.’

I muri aˈe, i te matahiti 33, ua tamâ Iesu i te hiero no te piti o te taime. Aita oia i vaiiho i te tahi noa ˈˈe taata ia faatura ore i te fare o to ˈna Metua.

“E ore e tia ia outou ia tavini i te Atua e te moni.”—Luka 16:13