Eaha to roto?

Tapura tumu parau

 HAAPIIRAA 26

Na taata hiˈo 12

Na taata hiˈo 12

Ua faarue to Iseraela i te Mouˈa Sinai e ua tere ratou na roto i te medebara o Parana no te haere i te hoê vahi parauhia Kadesa. I reira Iehova i parau ai ia Mose: ‘A tono atu 12 tane. A maiti hoê tane mai roto mai i te opu taitahi no te hiˈo haere i te fenua Kanaana, te fenua ta ˈu e horoa ˈtu i te ati Iseraela.’ Maiti atura Mose i na tane 12 e parau atura oia: ‘A haere i Kanaana e a hiˈo atu mea maitai anei te fenua no te faaapu. A hiˈo atoa mea paruparu anei aore ra mea puai te nunaa, te ora anei ra ratou i roto i te mau tiahapa aore ra i roto i te mau oire.’ Haere atura na taata hiˈo 12 i Kanaana. Tei roto atoa Iosua e o Kaleba.

E 40 mahana i muri iho, ua hoˈi mai te mau taata hiˈo e te suke, te remuna e te vine. Parau atura te mau taata hiˈo: ‘Mea maitai te fenua. Tera râ, mea puai te nunaa e mea teitei te mau patu o te mau oire.’ Na ô atura Kaleba: ‘E nehenehe tatou e upootia i nia ia ratou. E haere anaˈe i teie nei!’ Ua ite anei oe no te aha Kaleba i parau ai i te reira? No te mea ua tiaturi Kaleba raua Iosua ia Iehova. Ua parau râ te tahi atu na taata hiˈo ahuru: ‘Eiaha! Mea tiapai te taata o tera nunaa. E au ratou i te mau aito! O matou râ, e au i te vivi.’

Ua toaruaru roa te nunaa Iseraela. Haamata ˈtura ratou i te amuamu e i te parau te tahi i te tahi: ‘E maiti anaˈe i te tahi atu taata aratai e e hoˈi anaˈe i Aiphiti. No te aha tatou e haere ai i tera fenua inaha e haapohehia  tatou?’ Parau atura Iosua e o Kaleba: ‘Eiaha e faaroo ore ia Iehova e eiaha e mǎtaˈu. E paruru Iehova ia tatou.’ Aita râ to Iseraela i faaroo atu. Ua hinaaro râ ratou e haapohe ia Iosua raua Kaleba!

Eaha ta Iehova i rave? Ua parau oia ia Mose: ‘Noa ˈtu te mau mea atoa ta ˈu i rave no te ati Iseraela, te tamau noa ra ratou i te faaroo ore ia ˈu. E vai noa ïa ratou i roto i te medebara e 40 matahiti i te maoro e e pohe ratou i roto i tera medebara. O ta ratou mau tamarii e o Iosua raua Kaleba anaˈe te ora i roto i te fenua ta ˈu i fafau.’

“Eaha outou e mǎtaˈu roa ˈi, feia mea iti te faaroo?”—Mataio 8:26