Eaha to roto?

Mau faaho'iraa ê

Tapura tumu parau

Ite no Iehova

Tahiti

Ta ’u e haapii no roto mai i te Bibilia

 HAAPIIRAA 94

Ua fana‘o te mau pǐpǐ i te varua mo‘a

Ua fana‘o te mau pǐpǐ i te varua mo‘a

Ahuru mahana i muri a‘e i to Iesu ho‘iraa i nia i te ra‘i, ua fana‘o ta ’na mau pǐpǐ i te varua mo‘a. Ua tupu te reira i te Penetekose 33. E rave rahi taata no te mau fenua ěê tei haere i Ierusalema no te faatupu i te Penetekose. I te piha i nia o te hoê fare, ua putuputu mai 120 pǐpǐ a Iesu. Ua tupu taue mai te hoê ohipa maere mau. E au ra e ua fa mai te hoê auahi iti i nia i te upoo o te pǐpǐ taitahi e ua haamata ’tura ratou pauroa i te paraparau na roto i te mau reo ěê. Ua faaroohia te hoê haruru puai mai te hoê vero ra te huru i roto i te fare taatoa.

Ua faaroo atoa te feia no te mau fenua ěê tei haere i Ierusalema i tera haruru e ua horo ratou i roto i te fare no te ite eaha tei tupu. Ua maere roa ratou a faaroo ai i te mau pǐpǐ tei paraparau na roto i tera mau reo. Ua na ô ratou: ‘No Galilea tera mau taata. No te aha ïa ratou e nehenehe ai e paraparau na roto i to matou mau reo?’

I muri iho, ua tia o Petero e te tahi atu mau aposetolo i mua i te nahoa. Ua parau Petero ia ratou e nafea Iesu i haapohehia ’i e ua faaora Iehova ia ’na mai te pohe mai. Ua na ô Petero: ‘I teie nei, tei te ra‘i o Iesu i te pae  atau o te Atua e ua ninii mai oia i te varua mo‘a ta ’na i fafau. No reira outou i ite ai i teie mau semeio.’

Ua putapû roa te aau o te feia tei faaroo i ta Petero mau parau e ua ani atura ratou: “Eaha ïa ta matou e rave?” Ua pahono atura oia: ‘A tatarahapa mai e ia bapetizohia outou i roto i te i‘oa o Iesu. E fana‘o atoa outou i te varua mo‘a.’ I tera mahana, ua bapetizohia e 3 000 taata. Mai reira mai, ua haamata te mau pǐpǐ i te rahi taue mai i Ierusalema. Maoti te varua mo‘a, ua haamau te mau aposetolo i e rave rahi atu â amuiraa ia nehenehe ratou e haapii atu i te mau pǐpǐ no nia i te mau mea atoa ta Iesu i faaue ia ratou.

“Ia parau hoi to oe vaha i mua i te taata e o Iesu te Fatu e ia faatupu oe i te faaroo i roto i to oe aau e ua faatia te Atua ia ’na mai roto mai i te feia pohe, e ora ïa oe.”—Roma 10:9