Eaha to roto?

Mau faaho'iraa ê

Tapura tumu parau

Ite no Iehova

Tahiti

Ta ’u e haapii no roto mai i te Bibilia

 HAAPIIRAA 86

Ua faatia o Iesu ia Lazaro

Ua faatia o Iesu ia Lazaro

E toru hoa piri to Iesu tei ora i Betania. O Lazaro ïa e to ’na na tuahine, o Maria raua Mareta. I te hoê mahana, tei te tahi atu pae o Ioridana o Iesu e ua faatae o Maria raua Mareta ia ’na i te hoê poroi ru: ‘Ua ma‘i-roa-hia o Lazaro. A haere oioi mai na!’ Aita râ o Iesu i haere oioi atu. Ua tiai oia e piti mahana i te maoro e i muri iho ua parau oia i ta ’na mau pǐpǐ: ‘E haere ana‘e i Betania. Te taoto ra o Lazaro e te haere atu nei au no te faaara ia ’na.’ Ua na ô atura te mau aposetolo: ‘Ia taoto o Lazaro, e maitai mai ïa oia.’ No reira Iesu i haapapu roa ’i: ‘Ua pohe o Lazaro.’

I to Iesu taeraa ’tu i Betania, a maha mahana ’tura hoi o Lazaro i te hunaraahia. Ua haere mai e rave rahi taata no te tamahanahana ia Mareta raua Maria. I to Mareta faarooraa e ua tae mai o Iesu, ua horo oia no te farerei ia ’na. Ua na ô oia: “Fatu, ahani oe i ǒ nei, e ore ïa to ’u taeae e pohe.” Ua parau atura o Iesu: ‘E ora faahou mai to oe taeae. Te tiaturi anei ra oe i te reira, e Mareta e?’ Ua pahono oia: ‘Te tiaturi nei au e ora faahou mai to ’u taeae i te mahana e tupu ai te tia-faahou-raa.’ Ua parau atura o Iesu ia ’na: “O vau te tia-faahou-raa e te ora.”

I muri iho, ua haere o Mareta ia Maria ra e ua parau atura oia: ‘Ua tae mai o Iesu.’ Ua horo atura o Maria ia Iesu ra e ua apee mai te hoê nahoa taata. Ua tipapa ’tura o Maria i te pae avae o Iesu e ua ta‘i noa oia. Ua parau oia: ‘E te Fatu e, ahani oe i ǒ nei, e ora noa mai ïa to ’u taeae!’ Ua ite Iesu e ua mauiui roa o Maria. Ua haamata atoa o Iesu i te ta‘i. I to te nahoa taata iteraa i to Iesu mau roimata, ua na ô ratou: ‘A hi‘o na, mea here mau â na Iesu ia Lazaro.’ Ua uiui râ vetahi: ‘No te aha aita oia i faaora i to ’na hoa?’ Eaha ta Iesu i rave i muri iho?

Ua haere o Iesu i te menema tei opanihia i te hoê ofai rarahi. Ua faaue o Iesu: ‘A turai i te ofai.’ Ua parau atura o Mareta: ‘A maha ’tura hoi mahana i teie nei! E hau‘a ino te tino pohe.’ Noa ’tu râ, ua turai ratou i te ofai e ua pure o Iesu: ‘E to ’u Metua e, mauruuru i te faarooraa mai ia ’u. Ua ite au e e faaroo noa mai oe ia ’u. Tera râ, te pure nei au ma te reo puai ia nehenehe teie mau taata e ite e na oe i tono mai ia ’u.’ I muri iho, ua tuô oia: “Lazaro, haere mai i rapae!” Ua tupu atura te hoê ohipa maere mau: ua haere mai o Lazaro i rapae i te menema, ua vehî-noa-hia to ’na na avae  e na rima e te tahi mau ahu. Ua parau o Iesu: “A tatara i te ahu i vehîhia ’i oia e a tuu ia ’na ia haere.”

I to ratou iteraa i te reira, e rave rahi tei faatupu i te faaroo ia Iesu. Te vai ra râ o tei haere e farerei i te mau Pharisea no te faaite atu eaha tei tupu. Mai reira mai, ua hinaaro te mau Pharisea e haapohe ia Lazaro e ia Iesu. Ua haere o Iuda Isakariota, hoê o na aposetolo 12, e farerei huna i te mau Pharisea e ua ani atu oia: ‘Mai te peu e tauturu vau ia outou ia ite teihea ra o Iesu, ehia moni ta outou e aufau mai?’ Ua farii ratou i te aufau atu e 30 moni ario. Ua imi atura o Iuda i te ravea ia nehenehe te mau Pharisea e haru ia Iesu.

“O to matou nei Atua, o te Atua ïa e ora ’i; no te Atua hoi, no Iehova, i ora ’i tatou i te mau pohe nei.”—Salamo 68:20

No te ite atu â

A PEE I TO RATOU FAAROO

Ua tiaturi Mareta

Mea nafea Mareta i te faaiteraa i te faaroo faahiahia mau i roto i te oto?