Eaha to roto?

Mau faaho'iraa ê

Tapura tumu parau

Ite no Iehova

Tahiti

Ta ’u e haapii no roto mai i te Bibilia

 HAAPIIRAA 34

Ua upootia Gideona i nia i to Midiana

Ua upootia Gideona i nia i to Midiana

A mairi ai te tau, ua taiva faahou to Iseraela ia Iehova e ua haamata ratou i te haamori i te mau atua hape. E hitu matahiti i te maoro, ua eiâ to Midiana i te mau animara a to Iseraela e ua vavahi atu i ta ratou mau faaapu. Ua tapuni ïa to Iseraela i roto i te mau ana e i nia i te mau mou‘a no te ora i to Midiana. Ua taparu ratou ia Iehova ia faaora ia ratou. Tono atura Iehova i te hoê melahi no te farerei i te hoê taata apî, o Gideona to ’na i‘oa. Ua parau te melahi: ‘Ua maiti Iehova ia oe no te riro ei faehau puai.’ Ani atura Gideona: ‘E nafea vau e faaora ’i ia Iseraela? Mea faufaa ore hoi au.’

E nafea Gideona e ite ai e ua maiti Iehova ia ’na? Ua tuu oia i te hoê otaa huruhuru mamoe i nia i te repo e ua parau oia ia Iehova: ‘I te poipoi, mai te peu e rari te huruhuru mamoe i te hǔpe e mea mǎrô te repo, e ite ïa vau e te hinaaro ra oe ia faaora vau ia Iseraela.’ I te poipoi i muri iho, ua rari roa te huruhuru mamoe e mea mǎrô te repo! Tera râ, ua ani atura Gideona ia mǎrô te huruhuru mamoe e ia rari te repo i te poipoi i muri iho. Ua tupu iho â te reira e ua papu ïa ia Gideona e ua maiti Iehova ia ’na. Putuputu atura oia i ta ’na mau faehau no te aro i to Midiana.

 Ua parau Iehova ia Gideona: ‘E horoa vau i te upootiaraa ia Iseraela. Inaha râ mea rahi ta oe mau faehau, e mana‘o paha oe e ua upootia oe maoti to oe aravihi. A parau i te mau faehau atoa e riaria ra ia ho‘i i to ratou fare.’ E 22 000 ïa tei ho‘i i te fare e e 10 000 tei faaea mai. Ua parau atura Iehova: ‘Mea rahi â faehau ta oe. A aratai ia ratou i te anavai iti e a parau ia ratou ia inu i te pape. A maiti i te feia noa o te inu i te pape ma te haapao e te vai ra anei te enemi.’ E 300 noa faehau tei haapao maitai a inu ai i te pape. Ua fafau atura Iehova e e upootia na faehau e 300 i nia i na faehau e 135 000 no Midiana.

I tera po, ua parau Iehova ia Gideona: ‘Teie te taime no te aro i to Midiana!’ Ua horoa Gideona i ta ’na mau faehau i te mau pu. Oia atoa i te mau farii pape rarahi e lamepa to roto. Ua parau oia ia ratou: ‘A hi‘o ia ’u e a rave mai ta ’u iho â e rave.’ Ua faaoto Gideona i te pu, haaparari i te farii pape e faataueue i te lamepa ma te tuô: ‘O te ‘o‘e a Iehova e ta Gideona!’ Ua na reira atoa na faehau e 300. Ua riaria roa to Midiana e ua horo haere ratou. I roto i tera arepurepuraa, ua haamata ratou i te aro te tahi i te tahi. Ua tauturu faahou â Iehova i to Iseraela ia upootia i nia i to ratou mau enemi.

“Ia itehia e no ǒ mai i te Atua ra te puai o te hau ê i to te taata nei, e ere râ no ǒ mai ia tatou.”—Korinetia 2, 4:7