Eaha to roto?

Tapura tumu parau

 HAAPIIRAA 33

Ruta raua Naomi

Ruta raua Naomi

I te hoê tau oˈe i Iseraela, ua haere te hoê vahine Iseraela, o Naomi to ˈna iˈoa, i te fenua o Moabi. Ua apiti atoa ta ˈna tane e ta raua na tamaiti e piti. I muri iho, ua pohe te tane a Naomi. Ua faaipoipo ta ˈna na tamaiti ia Ruta e ia Oraphe. E mau vahine ïa no Moabi. I muri iho râ, ua pohe atoa na tamaiti a Naomi. E tupuraa mauiui mau!

Ua faarooroo Naomi e ua oti te tau oˈe i Iseraela. Faaoti atura oia i te hoˈi i to ˈna fenua. Ua apiti atoa Ruta e Oraphe ia ˈna. Tera râ, a tere ai ratou, ua parau atu Naomi: ‘E mau vahine maitai orua no ta ˈu na tamaiti e e hunoa vahine maitai orua no ˈu. Te hinaaro nei au ia faaipoipo faahou orua. A hoˈi i Moabi.’ Parau atura na vahine: ‘Ua here maua ia oe! Eita maua e hinaaro e faarue ia oe.’ Ua tamau noa râ Naomi i te parau atu ia hoˈi i Moabi. Hoˈi atura o Oraphe. Ua faaea râ o Ruta. Na ô atura Naomi ia ˈna: ‘Te hoˈi ra Oraphe i to ’na nunaa e to ˈna mau atua. A ho‘i na muri ia ˈna, e a ho‘i i te fare o to orua na metua vahine.’ Ua parau râ Ruta: ‘Eita vau e faarue ia oe. E riro to oe nunaa ei nunaa no ˈu e to oe Atua ei Atua no ˈu.’ No oe, eaha te huru o Naomi a faaroo ai oia i te mau parau a Ruta?

Ua tae Ruta e Naomi i Iseraela i te omuaraa o te tau auhuneraa kerite. I te hoê mahana, ua haere o Ruta e ohi i te mau huero tei vaiihohia i roto i te faaapu a Boaza, te tamaiti a Rahaba. Ua faarooroo Boaza e e vahine no Moabi o Ruta e ua vai taiva ore oia ia Naomi. Na ô atura Boaza i ta ˈna mau tavini ia vaiiho maa huero hau i roto i te faaapu ia nehenehe Ruta e rave i te reira.

 I tera ahiahi, ua ani Naomi ia Ruta: ‘Na vai te faaapu i reira oe i ohipa ˈi i teie mahana?’ Pahono atura Ruta: ‘Na Boaza te faaapu.’ Parau atura Naomi: ‘E fetii Boaza no ta ˈu tane. A tamau i te ohipa i roto i ta ˈna faaapu e te tahi atu mau vahine apî. E vahi papu ïa no oe.’

Ua tamau Ruta i te ohipa i roto i te faaapu a Boaza e tae roa ˈtu i te taime i oti ai te tau auhuneraa. Ua ite Boaza e e vahine itoito e te maitai o Ruta. I tera tau, ia pohe te hoê tane e aita ta ˈna e tamaiti, na to ˈna fetii e faaipoipo i ta ˈna vahine ivi. No reira Boaza i faaipoipo ai ia Ruta. E tamaiti ta raua. O Obeda to ˈna iˈoa. O ˈna te papa ruau o te arii Davida. Ua au roa te mau hoa o Naomi i te reira. Ua parau ratou: ‘A tahi, ua horoa Iehova ia Ruta na oe. E ua haapao maitai Ruta ia oe. I teie nei, e mootua ta oe. Ia aruehia Iehova!’

“Ati maitai mai â vetahi taua i to te taeae.”—Maseli 18:24