I te hoê po, ua moemoeâ Nebukanesa i te hoê moemoeâ riaria mau. Ua ani oia i ta ˈna mau taata î i te paari ia faaite mai eaha to ˈna auraa. Aita râ ratou i nehenehe e faataa i te reira. I te pae hopea, ua paraparau ïa te arii ia Daniela.

Teie ta te arii i parau ia Daniela: ‘I roto i ta ˈu moemoeâ, ua ite au i te hoê tumu raau. Mea teitei roa e tae roa ˈtu te reira i te raˈi. E itehia teie tumu raau mai te mau vahi atoa o te fenua. E rauere nehenehe roa e e rave rahi maa hotu to teie tumu raau. Ua faaea noa te mau animara i raro aˈe i te marumaru o teie tumu raau e ua hamani te mau manu i to ratou ofaaraa i nia i te mau amaa. I muri iho, ua haere mai te hoê melahi mai te raˈi mai. Ua tuô oia: “A tâpû i te tumu raau e a tapûpû i te mau amaa. A vaiiho râ i te raroraa o te tumu e to ˈna mau aˈa i roto i te repo e a tamau i te tapea auri e te tapea veo i nia iho. E tauihia te aau o teie tumu raau, eiaha ei aau taata faahou, ei aau animara râ, e ia mairi noa ˈtu e hitu tau. E ite te mau taata atoa e o te Atua te faatere nei e te horoa nei i te faatereraa arii i te taata ta ˈna e hinaaro.” ’

Ua faaite Iehova ia Daniela i te auraa o te moemoeâ. A taa ˈi Daniela i to ˈna auraa, ua riaria roa oia. Ua na ô Daniela: ‘E te arii e, e ere teie moemoeâ no nia i to oe mau enemi, no nia râ ia oe. Te tumu raau teitei tei tâpûhia, o oe ïa. E ere oe i ta oe faatereraa arii e e amu oe i te aihere i roto i te faaapu mai te hoê animara. No te mea râ e ua parau te melahi ia vaiihohia te raroraa o te tumu e to ˈna mau aˈa, e riro faahou oe ei arii.’

Hoê matahiti i muri aˈe, ua haere Nebukanesa i nia i te tafare o to ˈna aorai no te mataitai i te oire o Babulonia. Ua na ô oia: ‘A hiˈo na i teie oire nehenehe mau ta ˈu i patu. Ia itehia to ˈu teitei!’ A paraparau ai Nebukanesa, ua faaroo atura oia i te hoê reo mai te raˈi mai tei na ô atu: ‘E Nebukanesa e, e ere oe i ta oe faatereraa arii i teie nei.’

I tera taime, ua maamaahia o Nebukanesa e ua riro mai oia mai te hoê animara. Ua faahepohia oia ia faarue i to ˈna aorai e ia ora i rotopu i te mau animara. Mea roroa to ˈna rouru mai te mau huruhuru o te  aeto e ua tupu to ˈna maiuu mai to te manu ra.

E hitu matahiti tei mairi. Aita Nebukanesa i maamaa faahou e ua faariro Iehova ia ˈna ei arii no Babulonia. I muri iho, ua parau Nebukanesa: ‘Te faahanahana nei au ia Iehova e, te Arii o te raˈi. Ua ite ia ˈu e o Iehova te faatere nei. Te faahaama nei oia i te feia teoteo e te horoa nei i te faatereraa arii i te taata ta ˈna e hinaaro.’